NOFO TOKO Taha kae ʻIkai Tuēnoa
ʻOku tatau ai pē pe ʻokú ke nofó ʻi fē, ʻe ʻi ai pē taimi te ke ongoʻi ai ʻokú ke kehe mei he tokotaha kotoa pē. ʻI heʻene hoko iá, ʻoku mahuʻinga ke matuʻaki tokanga pea fai e meʻa ʻoku totonú.
ʻOku ʻilo ʻe Sione Kapalela taʻu 18 mei Kuenika ʻi ʻEkuatoá ʻa e ongo ko ia ʻokú te kehé. Ko e taha ia ʻo e kau mēmipa tokosiʻi ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ʻi ha kolo ʻoku toko 500,000 nai hono kakaí, pea ʻoku fuʻu mālohi ʻaupito e teke ko ia ke tukulolo ki he ʻahiʻahí. Ka ʻoku ʻiloʻi ʻe Sione ha maʻuʻanga mālohi ʻoku laka ange ia ʻi ha faʻahinga ʻahiʻahi.
Fakatupulaki e Tokangá
Naʻe akoʻi ʻa Sioné ʻe heʻene ongomātuʻá ʻi heʻene kei siʻí ke muimui ʻi he ngaahi tuʻunga moʻui ʻe tāpuekina ai ʻene moʻuí. Naʻe tokoniʻi ai ia ke fakatupulaki mo fakalakalaka hono talēnití. ʻOkú ne fakamatalaʻi ʻo pehē, “Talu mei heʻeku kei siʻi, ne u fokotuʻu ha taumuʻa ʻi he Palaimelí mo e Kau Talavoú ke ako ke tā ha ngaahi meʻalea. ʻOku ou lava ke tā ʻa e vālingí, fulutá, pianó, pea mo e kītaá he taimí ni. ʻOku ou saiʻia taha he kitaá.”
Naʻe toe fokotuʻu foki ʻe Sione ha ngaahi taumuʻa ke moʻui lelei fakatāutaha ʻo fakatefito ʻi he Fakahoko Hoku Fatongia ki he ʻOtuá. ʻI he ngaahi taʻu kuo hilí naʻá ne ako tae kwon do, kakaú, mo e fakamālohisinó, pea ʻokú ne toe kau ʻi he timi lele ʻa e akó.
ʻOkú ne pehē, “ʻOku ou saiʻia ʻaupito ke ako. Ko e ʻuhinga ia ʻoku ou tukupā ai ke ako ha meʻalea pe sipoti foʻoú, ke ako ha meʻa lahi ange.”
ʻOku poupouʻi ʻe he ngaahi taumuʻa ko ʻení ha ʻuhinga lahi ange. ʻOkú ne fakamatalaʻi, “Ko e meʻa kotoa pē kuó u faí, meʻa kotoa kuó u akó, teuteu fakatuʻasino kotoa pē, mo e ngaahi taumuʻa kotoa pē kuó u fokotuʻú—ko hono taumuʻá kotoa ke u ʻalu ʻo ngāue fakafaifekau. Pea ko e ʻalu ʻo ngāue fakafaifekaú ko ha konga ia ʻo ha toe taumuʻa ʻe taha: ke sila ʻi he temipalé pea hoko ko ha husepāniti lelei.”
Ako ke ke Tali ʻIkai
Neongo e matuʻaki tokanga ko ʻení, ka ʻoku ʻilo ʻe Sione ʻoku ʻikai faingofua ke nofo maʻu ʻi he ngaahi taumuʻá. ʻI he ngaahi taʻu siʻi kuo hilí naʻá ne maʻu ha mālohi lahi mei he kau talavou matuʻotuʻa ange ʻi hono uōtí. Ka ko e tokolahi ʻo kinautolu kuo hiki pe kamata ʻalu ki he kōlomu ʻa e kaumātuʻá, ʻo toe pē ha ngaahi kaungāmeʻa tokosiʻi ʻo Sione he Siasí ke poupouʻi ia ʻi he taimi faingataʻá. ʻI he ngaahi taimi pehení, ne kumi ʻa Sione ki ha mālohi mei heʻene ongomātuʻá mo e kāingá—pea mo ʻene Tamai Hēvaní.
Ka ʻoku pehē ʻe Sione ʻi he loto falala, “ʻOkú ke ongoʻi tuēnoa he taimi ʻe niʻihi koeʻuhí he ʻoku kehe hoʻo ngaahi tuʻunga moʻuí, kehe ʻa e anga hoʻo moʻuí, fakafeangai ki he kakai kehé, mo e fekumi ki he ngaahi meʻa kehekehe ʻo e moʻuí. Ko hono moʻoní, ʻoku ʻikai pē ke ke tuēnoa koe. ʻOku tau maʻu ʻa e lotú, pea lava ke toe ofi ange ki heʻetau Tamai Hēvaní. ʻOku ou lotua maʻu pē ke maʻu e mālohi ke fai ʻa ia ʻoku totonú, ke loto-toʻa ke fakafepakiʻi hoku ngaahi kaungāmeʻá he taimi ʻoku ʻikai ke nau fai ai e meʻa ʻoku totonú”.
Naʻá ne hoko atu, “Pea ʻokú ke ʻilo ha meʻa? ʻOku ʻi ai e taimi ʻe niʻihi ʻoku talamai ʻe hoku ngaahi kaungāmeʻá ʻoku nau saiʻia heʻeku sīpingá mo ʻeku loto-toʻa ke talaange ʻikaí.”
Tuʻu Fakamakatuʻu
ʻOku faingofua pē ke fakafisingaʻi e niʻihi ʻo e ngaahi ʻahiʻahi ne fehangahangai mo Sioné. Ne faingofua pē ke ne tali ʻikai ʻi hano fakaafeʻi ia ʻe hano kaungāmeʻa ke inu ʻolokaholo. He ʻoku mahino ʻaupito ko hono maumauʻi ia ʻo e ngaahi fekaú.
ʻOku fakamatala ʻa Sione, “ne ʻi ai e taimi ne olopoto ange e ngaahi ʻahiʻahí. Pea hangē ko hono fakamatalaʻi ʻe he folofolá, ʻoku faʻa fakapulipuli [vakai, Mātiu 7:15]. ʻE lava ke hā mai e ngaahi ʻahiʻahí ko ha meʻa lelei pē ʻo hangē ia ʻoku ʻikai ke maumau ai ha faʻahinga fekau pau ia. Ko e taimi ia ke ke lotu ai ke ʻilo e meʻa ʻoku hokó ke ʻoua naʻá ke puputuʻu. Kuo tokoni e Laumālié ke mahino kiate au ʻa e meʻá ni he taimi lahi ʻi he hoko ha fehālaaki pe taimi ʻoku feinga ai e kakaí ke u fai ha ngaahi meʻa ʻoku koví.”
ʻI he teuteu atu ko ia ʻa Sione ke ʻalu ʻo ngāue fakafaifekaú, kuó ne maʻu ha ngaahi kaungāmeʻa foʻou he Siasí ʻoku nau poupouʻi ia.
ʻOkú ne pehē, “ʻOku ou hoko he taimí ni ko ha sīpinga ki he toʻu tupu kehé, pea ko ha tāpuaki ia kiate au. ʻOku tokoni ke mahino kiate au ʻa e mahuʻinga ʻo e feinga ko ia ke loto-toʻa mo angatonú.”
Taupotu ki ʻolungá: Sione mo hono fāmilí. ʻOlungá: taha ʻo e ngaahi vaitafe ʻe fā ʻoku tafe atu ʻi Kuenikaá.
Faitaaʻi ʻe Joshua J. Perkey