Toʻu Tupú
Tataki ʻe ha Palōfita Moʻui
Ne u fuofua maʻu e faingamālie ke ʻalu ki he konifelenisi lahí ʻi hoku taʻu 16. Naʻe nofo hoku fāmilí ʻi he fakahihifo ʻo ʻOlikoní, ʻi USA, pea naʻa mau fononga meʻalele ki ʻIutā ki he konifelenisí mo ʻave hoku tuongaʻane lahí ki he senitā akoʻanga fakafaifekaú.
Naʻá ku ʻalu ki he konifelenisí mo e fakaʻamu ke akoʻi au ʻe he Laumālie Māʻoniʻoní. Ko hono olá, ne u maʻu ha fakahā mei he Laumālié naʻe ʻikai ke u mei maʻu kapau naʻe ʻikai ke u mateuteu.
Naʻe tuʻu kotoa e kāingalotú he taha ʻo e ngaahi fakatahaʻangá ʻo hivaʻi ʻa e himi ko e, “ʻE Sihova Haofaki.” ʻI heʻemau hivá ne u ongoʻi mālohi ke sio takai holo he Senitā Konifelenisí. Naʻá ku fai ia peá u ofo he mālohi ʻo e uouangatahá ʻa ha lauiafe ʻi hono hiki hake homau leʻó ʻo fakafetaʻi ki he ʻOtuá.
Pea ne u aʻusia leva ha meʻa ʻo u ongoʻi hangē ko Nīfaí ʻi heʻene mamata ki he meʻa-hā-mai ʻo e ʻakau ʻo e moʻuí, he naʻe talamai ʻe he Laumālié kiate au, “Sio atu” (vakai, 1 Nīfai 11–14). Naʻá ku sio atu kia Palesiteni Tōmasi S. Monisoni peá u ongoʻi e uouangataha e Siasí he ʻoku tataki kitautolu ʻe ha palōfita moʻui. Pea ʻi he fakamoʻoni ʻa e Laumālie Māʻoniʻoní, ʻoku ou ʻiloʻi ko e palōfita moʻoni ʻi hotau kuongá ʻa Palesiteni Monisoni, pea ʻoku ou ʻilo ʻoku tataki ʻa e Siasí ni ʻe Sīsū Kalaisi ʻo fakafou mai ʻiate ia.