Ko Hotau Ngaahi ʻApí, Ko Hotau Ngaahi Fāmilí
Teuteu ki he Konifelenisi Lahí
Naʻe ako ʻe hoku fāmilí ʻoku lava ke fakaafeʻi fakaʻaho mai e Laumālié ki heʻetau moʻuí ʻi hono ako ʻo e konifelenisi lahí.
Naʻá ku ʻiloʻi mo hoku fāmilí ko e founga lelei taha ke teuteu ai ki he konifelenisi hokó ko hono matuʻaki fakahoko moʻoni e faleʻi ne ʻomi ʻi he konifelenisi kimuʻá. ʻI he taimi ʻoku ʻatā ai hoku uaifí, ʻokú ne lau e lea ʻo e konifelenisí ʻi he Liahoná. Peá ne feinga leva ke fakahoko e ngaahi akonaki naʻá ne akó. Hangē ko ʻení, naʻá ne talamai naʻe tokoniʻi ia ʻe he lea ʻa ʻEletā Tēvita A. Petinā ke toe lelei ange ai e tuʻunga ʻo ʻemau lotú ʻo ne fekumi fakamātoato ange ai ʻi he ʻofa faka-Kalaisí ki hono ʻohake homa ongo foha ne fuʻu longomoʻuí.1
ʻOku ou feinga foki ke toe fai hano vakaiʻi ʻo e konifelenisi fakamuimuitaha ne toki faí. ʻI heʻeku lue ki he akó he pongipongi kotoa pē, ʻoku ou fanongo ki ha lea ʻe taha peá u fakalaulauloto mo lotu, ʻo fakaʻatā e ngaahi akonaki ʻa e kau palōfitá ke hū ki hoku lotó mo e ʻatamaí. ʻOku ou talanoa leva mo e Tamai Hēvaní kau ki he ʻaho hokó mo hoku ngaahi fatongia ko e husepāniti, tamai, Kāingalotu, tokotaha ako, mo e tangataʻi fonuá.
ʻI ha pongipongi ʻe taha naʻe fuʻu ongo makehe ʻa e lea ʻa ʻEletā L. Tomu Peuli ko e “Tuku Ke Ne Fai Ia ʻi ha Founga Faingofua” ki he tuʻunga ne u ʻi aí 2 Naʻe fakaʻaongaʻi ʻe ʻEletā Peuli ʻa e ngaahi tefitoʻi moʻoni naʻe akoʻi ʻe Henelī Tēvita Folau ʻi Uolotení ke fakafaingofuaʻi ʻetau moʻuí ʻaki hono fakatupulaki e tuʻunga fakalaumālié mo maʻu e nongá mei he hohaʻa ʻo e māmaní. Koeʻuhí ko e lahi ʻeku ngāue fakaakó naʻe mahuʻinga ʻaupito pea tātataha ʻemau ō ʻo ʻeva ki ha feituʻu mo e fāmilí. ʻI ha faʻahitaʻu māfana kimuʻa he lea ʻa ʻEletā Peulí, naʻa mau ʻeva ai ki he Vai ʻo Uolotení, ʻo fakamoleki ha taimi he kiʻi fale ʻo Folaú naʻe toe langá. Naʻa mau fakaʻaongaʻi lelei e taimí he hoʻatā ko iá ke kakau holo he Vai ʻo Uolotení pea langa ha ngaahi fale ʻoneʻone ʻi he matātahí. Hili e foki ki ʻapí, naʻe fakamālō homau fāmilí ki he Tamai Hēvaní koeʻuhí ko ʻEne ngaahi fakatupu ne mau fiefia fakataha aí.
Hili ha ngaahi māhina mei ai, ʻi heʻeku lue atu he veʻehala fonu sinoú, naʻá ku manatu ki he ʻaho fakafiefia ʻo e faʻahitaʻu māfana ko iá. Koeʻuhí ko e aʻusia ko iá mo e pōpoaki ʻa ʻEletā Peulí, naʻe toki mahino lahi ange ai kiate au ʻa e mahuʻinga hono tuku ha taimi ke u feohi ai mo hoku fāmilí ki hono moʻui ʻaki ha moʻui ʻoku fakatefito ʻi he ongoongoleleí.
Makehe mei he fanongo fakafoʻituitui ki he ngaahi leá, ʻoku fanongo homau fāmilí he pongipongi Sāpaté ʻi heʻemau komipiutá ki ha lea mei he konifelenisí lolotonga ʻemau teuteu ki he lotú. Naʻe ʻi ai ha taimi ʻe taha naʻá ma ʻiloʻi ai mo hoku uaifí hano talaange ʻe homa foha taʻu faá ki hono tehiná ke fakalongolongo kae lava ke ne fanongo kia Palesiteni Tōmasi S. Monisoni.
Ko ha tāpuaki ki homau fāmilí ʻa e ngaahi akonaki ʻa hotau Fakamoʻuí ʻoku fakafou mai ʻi he leʻo ʻo e kau palōfita ʻo onopōní. ʻI heʻemau feinga ke fakakau mai ʻa e kau palōfitá, tangata kikité mo e kau maʻu fakahaá ʻi heʻemau moʻui fakaʻahó, kuo mau fakaʻatā ai ha founga ke hoko ʻa e Laumālie Māʻoniʻoní ko ha fai fakahinohino maʻu pē ki homau fāmilí. ʻOku mau toe fakaongo atu ʻa e ngaahi lea ʻo e himí: [“ʻOku mau Fakamālō ki he ʻOtuá koeʻuhí ko ha Palōfita.”]3
ʻI hono faʻa ako e faleʻi naʻe fai mai ʻi he konifelenisi lahí, naʻá ku maʻu mo hoku uaifí ha mahino lahi ange ki he ngaahi akonaki kimuí ni ʻa e ʻEikí ʻi he taimi ʻoku hoko mai ai e konifelenisi lahi hono hokó. ʻOku fakamāmaʻi fakalaumālie kimaua peá ma toe mateuteu ange ke tali ʻEne ngaahi akonaki he taimi ní ʻa ia ʻoku fakafou mai ʻi Heʻene kau tamaioʻeiki, ko e kau palōfitá.
Tā fakatātaaʻi ʻo e ʻatá ʻe David Stoker