Pagpalig-on sa mga Pamilya pinaagi sa Temporal nga Pagpaningkamot sa Kaugalingon

Tun-i kini nga materyal ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo • Pamilya • Kahupayan

Pagpalambo sa pagpaningkamot sa kaugalingon—ang abilidad sa pag-atiman sa atong mga kaugalingon ug sa atong mga pamilya—mao ang responsibilidad sa tanang sister. Mahimo kitang mapaningkamuton sa kaugalingon kon kita makat-on nga mahigugma sa pagtrabaho, samtang maninguha kita sa pagpangita sa labing maayong mga paagi sa pagsangkap sa atong mga kaugalingon, ug samtang kita motrabaho uban sa mga sakop sa pamilya aron matubag ang nag-unang mga panginahanglan.

Kon kita mapaningkamuton sa kaugalingon, atong gigamit ang atong mga panalangin ug mga kapanguhaan sa pag-andam ug sa paglikay sa mga problema. Ang pagpaningkamot sa kaugalingon, hinoon, mapalambo samtang kita mag-ampo alang sa kaisug nga matubag uban sa hugot nga pagtuo ang mga hagit nga siguradong moabut. Ang pagpaningkamot sa kaugalingon makapahimo usab nato sa pagtuman sa atong pakigsaad sa pag-atiman sa uban.

Sa Relief Society, kita gitudloan sa mga baruganan ug mga kahanas sa pagpaningkamot sa kaugalingon. Ang mga sister makat-on mahitungod sa pagbadyet, paglingkawas sa utang, kwalipikasyon sa panarbaho, sa mga kasulatan, pagtudlo sa uban sa pagbasa ug pagkat-on, sa teknolohiya, pisikal nga panglawas, pagpahimsog, paglikay ug pagkaayo gikan sa pagkaadik, sosyal ug emosyonal nga kahimsog, paglikay sa sakit, pagpananom, food production and storage, pagpangandam sa emerhensya, ug daghang laing mga butang nga makatabang nato nga mahimong mapaningkamuton sa kaugalingon.¹

Julie B. Beck, kinatibuk-ang presidente sa Relief Society, mipasabut nga “ang pagsangkap alang sa atong mga kaugalingon ug sa uban mao ang ebidensya nga kita mga disipulo ni Ginoong Jesukristo. Sa dihang [ang akong ugangang babaye] kalit nga namatay sa miaging tuig, nagbilin siya og ebidensya sa iyang pagkamapaning kamuton sa kaugalingon. Siya adunay bag-o nga rekomend sa templo ug ginamit kaayo nga mga kasulatan ug mga manwal sa pagtuon sa ebanghelyo. Mahigugmaon kaming nagbahin sa mga kaldero, mga kaha, ug mga plato nga maoy iyang giandaman og daghang mga pagkaon. Nagbilin siya kanamo og mga hapin nga iyang gihimo gikan sa daan nga mga sinina. Mituo siya sa karaan nga panultihon “Gamita kini, gamita hangtud madaan, gamita nga inusab o pagpakabuhi bisan wala kini.” ’ Among nakita ang sangkap sa mga pagkaon nga iyang gitanom, gipreserba, ug gitipigan. Ilabi pa nga makatandog mao ang iyang gamay nga mga libro sa listahan diin matinud-anon siyang milista sa iyang mga gasto sulod sa daghang mga katuigan. Tungod kay siya nagpuyo nga madaginuton, nagbilin siya og pipila ka kwarta nga iyang natigum alang sa mga emerhensya ug wala siya magbilin og utang! Labing importante, mitudlo ug midasig siya og daghan sa mga kahanas nga iyang naangkon sulod sa iyang matinud-anong kinabuhi.”²

Gikan sa mga Kasulatan

Juan 13:34–35; Santiago 1:27; Mosiah 4:26; Doktrina ug mga Pakigsaad 29:34–35; 38:30; 44:6

Gikan sa Atong Kasaysayan

Ang mga sister sa Relief Society kanunay nga miapil sa buhat sa pagluwas sa mga kalag sa temporal ug sa espirituhanon nga paagi. Kada semana sa Female Relief Society sa Nauvoo magtigum, ang mga sister mo-report sa mga tawo nga nanginahanglan. Mga donasyon sa kwarta, mga butang, mga talento, ug panahon gihatag aron matabangan ang timawa. Kini nga pundasyon sa paghupay sa nag-antus nagpadayon nga buhat sa Relief Society sa tibuok henerasyon.

Sa dihang ang mga Santos miabut sa Salt Lake Valley, si Presidente Brigham Young (1801–77) mitambag sa mga sister sa pagtabang niadtong nanginahanglan ug sa pagkat-on og mga kahanas nga maoy ilang magamit sa pag-atiman sa ilang mga kaugalingon. Siya miingon, “Pagkat-on sa pagsangkap sa inyong kaugalingon; pagtipig og lugas ug harina, ug tiguma kini hangtud sa adlaw sa kawad-on.”³ Ubos sa direksyon sa priesthood, ang Relief Society nagpadayon sa pagtudlo og pagpaningkamot sa kaugalingon, sa pagbantay sa pamilya, ug sa pag-awhag og personal nga pagkamatarung ug mga buhat sa gugma nga putli, ang tiunay nga gugma ni Kristo.

Paghulagway sa litrato pinaagi ni Welden C. Andersen