Kami Namulong kang Kristo

Iyang Gidala ang Akong mga Kasub-anan

Ni Jane Bleak

“Sa pagkamatuod siya mipas-an sa atong mga kagul-anan, ug midala sa atong mga kasub-anan” (Mosiah 14:4).

Dili gayud nako makalimtan ang ting-init ug tinglarag sa 2009. Niadtong Hunyo 9 ang akong amahan namatay human nga nag-antus og dementia sobra sa 10 ka tuig. Niadtong Hunyo 25 ang among 22 anyos nga anak nga lalaki namatay nga wala damha, ug wala dangti og usa ka bulan, ang akoang ig-agaw. Niadtong Agosto 13 ang akong 82-anyos nga inahan adunay open-heart surgery ug dugay nga naayo. Niadtong Oktubre 18 ang akong 41 anyos nga igsoong lalaki namatay. Niadtong Oktubre 31 ang akong bana giatake pag-ayo sa kasingkasing ug walay pulso sulod sa walo ka minutos. Ang mga bombero, mga paramedic, ug panalangin sa priesthood ang nakapabalik sa iyang kinabuhi.

Ang mga tawo kanunay nangutana kanako giunsa namo sa pagdumala niining tanang mga panghitabo. Ang kanunay nakong tubag mao nga kami modangup sa Manluluwas, ug Siya moatiman kanamo. Wala mi Niya pasagdi sa among mga pagsulay. Mibati ko nga gipangalagaran ug gi-agak sa kalangitan. Sa tinuoray, Siya “mipas-an sa [akong] mga kagul-anan” (Mosiah 14:4).

Ang paghupay mabati usab gikan sa mga pamilya, mga higala, ug mga miyembro gikan sa among ward ug stake. Sila mahigugmaong miamuma kanamo sa dili maihap nga mga paagi. Ang among 13 anyos nga apong babaye, si Krystal, misulat kanamo human sa kamatayon sa among anak nga lalaki nga si Michael. Siya mipahinumdom kanamo nga kami wala mag-inusara sa dihang siya misulat, “Ang Dios nag-agak kaninyo.” Ang iyang sulat nakapahinumdom kanako sa kasulatan diha sa Doktrina ug mga Pakigsaad 84:88: “Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo.”

Nakaangkon ko og kalig-on pinaagi sa pagbasa sa usa ka pakigpulong ni Elder Richard G. Scott sa Korum sa Napulog Duha ka mga Apostoles nga giulohan og “Trust in the Lord.” Siya miingon: “Kon ang tanan ingon og maayo na, ang mga hagit sa kanunay moabut nga dinaghan nga nagsunod-sunod. Kon kadtong mga hagit dili mga sangputanan sa inyong pagkamasupakon, kini mga ebidensya nga ang Ginoo mibati nga kamo andam na sa dugang nga kalamboan. Busa Siya naghatag kaninyo og mga kasinatian nga makahatag og kalamboan, pagsabut ug kalooy, nga mohashas kaninyo alang sa inyong mahangturong kaayohan. Aron madala kamo gikan sa inyong nahimutangan ngadto sa dapit nga gusto Niyang inyong adtoan nanginahanglan og taas nga pag-inat, ug kana sa kasagaran nagpasabut og kalisdanan ug kasakit” (Ensign, Nob. 1995, 16–17).

Siya miingon nga ang pangutana sama sa “Nganong kinahanglan nga mahitabo kini kanako?” o “Nganong kinahanglan man ko nga mag-antus karon?” makadala kanato sa sayop nga mga agianan. Hinoon, si Elder Scott nagsugyot sa pagpangutana sa sama niini “Unsa may angayan nakong makat-unan niining kasinatian?” “Si kinsa ang akong tabangan?” ug “Unsaon nako sa paghinumdom sa akong mga panalangin atol sa pagsulay?”

Akong nabuntog ang tintasyon sa pagpangutana og, “Ngano?” Hinoon, ako nangayo og giya sa Langitnong Amahan sa akong mga pagsulay. Siya mipanalangin kanako og paglaum sa umaabot, mitabang kanako sa pag-ayo sa akong nabug-atan nga kasingkasing, midugang sa akong kahibalo sa kanindot sa akong palibut, mihatag kanako og mga oportunidad sa pagserbisyo, mipalawum sa akong kalooy alang sa uban, ug mipalambo sa akong paghigugma sa akong pamilya ug mga higala.

Tungod niining tanan, nakaangkon ako og pagpamatuod nga ang atong hagit mao ang pagtugyan sa atong kabubut-on ngadto sa atong Langitnong Amahan tungod kay pinaagi lamang niini kita sa personal nga paagi mahashasan sa mga paagi nga piho Niyang gidesenyo alang sa matag usa kanato.

Pagdumala sa Kasubo

• Kita wala mag-inusara sa atong kasubo tungod kay si Jesukristo—“usa ka tawo sa mga kasub-anan, ug nakasinati sa pag-antus” (Isaias 53:3)—mipas-an sa atong mga kasubo isip bahin sa Pag-ula.

• Kita makabuntog sa tintasyon sa pagpangutana og, “Ngano?” Hinoon, kita makahangyo sa paggiya sa Ginoo.

• Kita makadawat sa hagit sa pagtugyan sa atong kabubut-on ngadto sa atong Langitnong Amahan.

Alang sa dugang impormasyon niini nga hilisgutan, tan-awa sa Mga Proverbio 3:5–6 ug Joseph B. Wirthlin, “Ang Dominggo Moabut,” Liahona, Nob. 2006, 28–30.

Ang Kalisdanan Makadala paingon sa Dios

President David O. McKay

“Adunay mga tawo kinsa nakasinati og kalisdanan, nga hapit dili na gayud masulbad, nga mora og napaitan na pag-ayo sa ilang kahimtang; apan kon sila mihunong aron sa paghunahuna, bisan ang kalisdanan nga midangat kanila magsilbing usa ka pamaagi sa espirituhanon nga pagbayaw. Ang kalisdanan mismo mopaingon ug dili mahilayo sa Dios ug sa espirituhanon nga paglamdag.”

Presidente David O. McKay (1873–1970), Treasures of Life, comp. Clare Middlemiss (1962), 107–8.

Nganong Makasalig Kita sa Ginoo?

Si Elder Richard G. Scott sa Korum sa Napulog Duha ka mga Apostoles mitabang sa pagtubag niini nga pangutana sa iyang pakigpulong sa kinatibuk-ang komperensya “Trust in the Lord” (Ensign, Nob. 1995, 16–18).

1. Ang Dios nasayud unsa ang Iyang gibuhat. Kon kita makabuntog sa mga pagsulay alang sa Iyang mga katuyoan, kita makasalig Kaniya sa pagtabang kanato.

2. Ang Dios nagplano sa paghimaya kanato aron kita makabalik sa pagpuyo uban Kaniya.¹

3. Ang pagbuntog sa mga pagsulay kabahin niana nga plano. Samtang ato kining gibuhat, kita makaangkon og kalig-on, panabut, hugot nga pagtuo, ug pagsalig sa Dios.²

Ikonsiderar sa pagpakigbahin ang pakigpulong ni Elder Scott “Trust in the Lord” ngadto sa usa ka tawo kinsa nanlimbasug.

Mubo nga mga sulat

1. Tan-awa sa Mga Baruganan sa Ebanghelyo (2009), 13–15.

2. Tan-awa sa Mga Baruganan sa Ebanghelyo 21–31.

Sa Getsemani, si Jesukristo mipakita sa hingpit nga ehemplo sa pagsalig sa dihang Siya mihangyo sa Iyang Amahan nga “kon mahimo man, isaylo lang kanako kining kopa.” Apan Siya miingon, “Ngani dili sumala sa akong pagbuot kondili sa imo” (tan-awa sa Mateo 26:39–44).

Si Kristo sa Getsemani, ni Heinrich Hofmann, sa maayong kabubut-on sa C. Harrison Conroy Co.