Pagserbisyo sa Simbahan
Napanalanginan pinaagi sa mga Council
Gikan sa Pagpanambag uban sa Atong mga Council (1997), 15–17.
Pipila ka tuig ang milabay sa nagserbisyo pa ako isip bishop, usa ka pamilya sa among ward nakasinati og krisis dihang ang amahan nawad-an sa iyang trabaho. Nahingawa ako sa ilang kahimtang, ug mibisita ko sa ilang balay sa pagtambag kanila ug sa pagtanyag og tabang gikan sa Simbahan. Makaikag kaayo, nagpanuko sila sa pagdawat sa akong gitanyag nga temporaryo nga tabang, mao nga akong gidala kini nga kahimtang ngadto sa ward council. Sa diwa sa mapinanggaon nga kompidensyalidad, akong gipaambit kanila ang akong kahingawa alang niini nga talagsaong pamilya ug nangayo sa ilang mga ideya kon unsaon sa pagpanalangin kanila.
Ang among presidente sa Relief Society miboluntaryo sa pagbisita sa inahan aron sa pagsiguro sa ilang temporal nga panginahanglan ug sa pakigtambayayong kanila sa pagkab-ot sa ilang panginahanglan—diin, dayag lang, mao ang iyang responsibilidad sumala sa programa sa Simbahan. Sulod sa duha ka adlaw, iyang natuman ang wala nako mahimo, ug ang pamilya mapaubsanon ug mapasalamatong midawat sa gikinahanglan nga tabang. Ang presidente sa elders quorum nakigtambag sa amahan sa pamilya—diin, dayag lang, nga mao ang iyang katungod ug katungdanan—ug nakigtambayayong kaniya sa mga paagi sa pagpangita og trabaho. Ang among presidente sa Young Men nakamatikod nga ang balay sa pamilya kinahanglan kaayong mapintalan, ug nakigsabut siya sa iyang mga priest nga makigtambayayong sa grupo sa mga high priest sa pagpintal sa balay.
Atol sa among panagsultihay uban sa mga ginikanan, akong nahibaloan nga dako na kaayo sila og amoroso sa ilang mga utang. Subay sa giaprubahan nga tamdanan sa welfare, nagpangutana ako kabahin sa iyang paryente nga makatabang apan gamay ra ang nakuhang impormasyon. Ang among presidente sa Relief Society , hinoon, nakahibalo nga ang inahan dunay igsoong lalaki nga adunahan.
“Walay hinungdan ang pagkontak kaniya,” miingon ang inahan. “Dugay nang katuigan nga wala kami magkaistorya.”
Akong nasabtan ang iyang gikalibgan, ug bisan paman akong gibati nga importante ang pagsunod sa pamaagi sa Simbahan. Ug mao nga siya akong gitambagan ug sa katapusan nakadawat sa iyang pagtugot sa pagkontak sa iyang igsoon, kinsa nagpuyo sa layo nga siyudad. Mitawag ko kaniya ug mipasabut sa lisud nga kahimtang diin nagpuyo ang iyang manghud nga babaye. Sulod sa tulo ka adlaw miabut siya sa Salt Lake City ug mitabang sa iyang igsoong babaye nga mahapsay ang iyang mga pinansyal nga problema. Sa pagkakaron, ang among presidente sa elders quorum mitabang sa iyang bana nga makakita og permanente nga trabaho nga maayo og sweldo.
Mas importante, hinoon, nga sila mas nagkasuod ug mas naghiusa isip usa ka pamilya. Dili ko motuo nga akong mahikalimtan kadtong malumo nga panag-abut tali sa inahan ug sa iyang igsoong lalaki human sa dugay nang katuigan nga panagbungol. Bisan og ang igsoon layo na ang pagbati sa Simbahan, adunay diha-diha nga diwa sa pagsinabtanay. Isip resulta, ang igsoong lalaki sa katapusan mibalik sa hingpit nga pagkaaktibo sa Simbahan ug mibag-o sa iyang relasyon uban sa iyang pamilya.
Tanan kini nahitabo tungod sa dinasig nga buhat sa usa ka matinud-anon nga ward council nga naglihok subay sa programa sa Dios nga nalatid alang sa Iyang mga anak pinaagi sa Iyang mga sinugo.