E Le Lava le Taimi?

Saunia e Hong Ook Son

Ou te le i mafaufauina e i ai so’u taimi mo le inisitituti. Ae na musuia au e le Agaga ina ia faaavanoa se taimi.

I le faaiuga o Tesema 2008 na ou nofo ai i totonu o le potu selesitila o le Mamalu o Seoul Korea, ma mafaufau e uiga i le tausaga fou o loo lumanai nei. Na ou faaipoipo i lenei lava malumalu i ni nai masina se lua ua mavae atu, ma o le taimi nei ua matua faatumulia o’u aso ma vaiaso i le galuega, lo’u valaauga i le Ekalesia, ma lo’u aiga fou faatoa amata. Sa ou alu soo lava i vasega o le inisitituti, ae o le taimi nei ua ou mafaufau masalo o le a ou le toe auai.

Ao ou tatalo mo se taitaiga mo le tausaga fou, na ou lagonaina se uunaiga manino lava ina ia faaauau le auai atu i le inisitituti. Na musuia foi au ina ia faateleina lo’u auai atu i le malumalu. Ao ou tuua le malumalu i lena aso, na faatumulia au i se lagona toafilemu ma le agaga faafetai mo se taitaiga fou na tuuina mai e le Alii ia te au. Na malosi lo’u lagona faapea afai ou te mulimuli i le taitaiga na ou maua, o le a faamanuiaina au.

I le amataga o Ianuari na ou amata galue ai o se tagata faigaluega o le malumalu i le Malumalu o Seoul. O lea tulaga na moomia ai le faalua i le vaiaso ona ou malaga pe a ma le itula i le malumalu ina ia faatino lo’u taimi faigaluega. E le gata i lea, e faalua foi i le vaiaso ona faia e lo’u toalua lea malaga e itula le umi, o le tasi mo le auauna atu o se tagata faigaluega o le malumalu ma le isi tasi [itula] ma te auai faatasi ai i le vasega inisitituti o le Tusi a Mamona.

Ao ou tauaveina nei tautinoga faaopoopo, na vave ona manino le tatau lea ia te au ona tuuitiitia ni nai itula o la’u galuega i vaiaso taitasi. Talu ai ou te faigaluega i fefaataua’iga, e totogi au e tusa ma le tele o au tagata faatau e tumau. Na ou iloa afai e tuuitiitia o’u itula faigaluega, e ono feagai au ma le faaitiitia tele o lo’u totogi. Ae peitai, ou te manatuaina le uunaiga na ou maua, ma e ou te iloa o le a sologa lelei mea uma lava pe afai ou te tuuina atu atoa lava au e mulimuli i le Alii.

Ao ou auai atu i le inisitituti ma le malumalu e le aunoa, na amata tafe mai le tele faamanuiaga i lo’u olaga. Na ou matauina ni nai suiga iloga. Na ou lagona le latalata mai ma le faateleina atili o le Agaga, ma na tuputupu ae la’u molimau i le talalelei toefuataiina. Na ma maua ma lo’u toalua ni faamanuiaga maoae mai le auauna atu i le malumalu ma le auai atu i vasega o le inisitituti. Ma e le i mafaufauina, na ou maua foi ni faamanuiaga faaletino. I nisi auala, e ui i le tuuitiitia o o’u itula faigaluega, ae na mafai ona ou feiloai i le toatele atu o tagata faatau na i lo le taimi muamua. E le i faaitiitia a’u tupe maua; ae, na toeitiiti a faaluaina.

Ou te iloa o nei faamanuiaga matagofie na aumai mai le Alii. Ou te faafetai na Ia tuuina mai ia te au le toafilemu ina ia iloa ai pe a tatou “muai … saili le malo o le Atua ma lana amiotonu, … ona faaopoopoina atu lea ia mea uma ia te outou” (3 Nifae 13:33).

Ata na tusia e Dan Burr