I Upu a Perofeta
O Se Manatuaga o le Kerisimasi
Mai le “Meaalofa Taua,” Liahona, Tes. 2006, 3–4.
I le fale i se tulimanu e le iloa atu, o loo i ai so’u tamai tootoo uliuli e le o se siliva moni lona au. O le tootoo o se tasi o lo’u aiga. Aisea ua ou teuina ai i se vaitaimi umi ua silia i le 70 tausaga? E i ai se mafuaaga faapitoa. Ao ou laitiiti, sa ou auai i le faatinoina o se tala o le Kerisimasi a la matou uarota. Sa ou maua le avanoa e avea ai ma se tasi o le Au Makoi e toatolu. Faatasi ai ma se fusi na sai ai lo’u ulu, ma le ufiufi o le piano a tina na pulupulu ai ou tauau, ma le tootoo uliuli i lo’u lima, sa ou faia ai la’u vaega na tofia ai au: “Po o fea o i ai le ua fanau mai o le tupu o tagata Iutaia? Aua ua matou vaaia lona fetu i sasae, ua matou o mai ai e ifo atu ia te ia” (Mataio 2:2). Ou te manatuaina lelei lava lagona o lo’u loto ao tetepa ae i matou e toatolu o le “Au Makoi” ma vaaia se fetu, ma matou o atu i luga o le tulaga, maua ai Maria ma le tamaitiiti o Iesu, ona faapauu lea i lalo ma ifo atu ia te Ia ma talai a matou oloa ma tuuina atu ni meaalofa: o le auro, pulu lipano ma le pulu muro.
Sa faapitoa lava lo’u fiafia i le mea moni e faapea, matou te lei toe foi atu ia Herota amioleaga e faalata le pepe o Iesu ae na matou usitai i le Atua ma ui atu i le isi ala.
Ua mavae le tele o tausaga, ae ua faaauau pea ona nofoia e le tootoo o le Kerisimasi se nofoaga faapitoa i totonu o lo’u fale; ma ua i ai i totonu o lo’u loto se naunautaiga ia Keriso.