Na Ou Puipuia le Perofeta o Iosefa Samita

Maria Brando, Italia

I le tausaga 1978 na ou faia ai se miti e le mafai ona faagaloina lea na faaali mai ai ia te au ni tagata se toalua. Ao ou talanoa atu ia i la’ua i lenei miti, na ou lagona le olioli e le mafaagaeetia. Na i ai pea lava lea lagona fiafia e oo i le taimi na ou ala ai i le taeao na sosoo ai.

O lena lava aso na tuitui ai e faifeautalai e toalua o le Au Paia o Aso e Gata Ai le faitotoa o lo matou fale ma fesili mai ai pe mafai ona la faasoa mai se savali. O lo’u manatuaina o la’u miti, na ou taliaina ai ma valaaulia i laua i totonu. Na le manao i ai lo’u toalua, ae na ia talia ina ua ou ta’u atu e le mafai ona ou tuuina atu i laua e o ese e aunoa ma le talanoa atu i ai.

Mai le tele o isi mea, na aoao au i lena aso e faifeautalai e uiga i perofeta. Na ou iloa lelei perofeta o le Tusi Paia, e pei o Aperaamo ma Mose, ae na aoao au e faifeautalai i se perofeta o nei ona po, o Iosefa Samita. I le faaiuga o la matou lesona, na fesili mai ai faifeautalai pe mafai ona la toe foi mai mo isi lesona. Na ou fai atu ua lelei.

Ina ua maea lesona faaopoopo na valaaulia au e faifeautalai ina ia papatiso. Na ou fiafia i mea na ou aoaoina, ae ao le i papatisoina a’u, na ou manao e maua se molimau ia Iosefa Samita. Mai mea uma na aoaoina ai au e faifeautalai, o lana tala na matua sili ona faigata ona ou taliaina. Ae na ou iloa pe afai ou te faamaoni i le sailia o sea ituaiga molimau, o le a faamautinoa mai e le Tama Faalelagi ia te au le mea moni.

Na ou alu e vaai se tasi o faifeau o le ekalesia na ou ola a’e ai. Na ou ta’u atu ia te ia le mea na aoaoina ai au e faifeautalai ma lo’u naunau tele e toe feiloai ia i laua. Ao le i fai atu se isi a’u tala, na ia fai mai ia te au o Iosefa Samita e faavalevalea, ma o ia o se tagata sa nofo lava ma faatupu ni ona manatu.

Na faafuasei lava, lo’u faalogoina o se leo o loo ta’u mai ia te au, “O Iosefa Samita o se perofeta moni.” Na amata ona tata malosi lo’u fatu i totonu, ma e ui lava ou te le i papatiso i le Ekalesia, na ou iloaina o loo ou puipuia le Perofeta o le Toefuataiga.

Na tuputupu ae le malosi o le lagona o le faamautinoaga ao ou tuua le ofisa o le faifeau. Na ou mauaina la’u tali ma iloa le ekalesia e tatau ona ola a’e ai la’u fanau tama.

Na papatisoina au i se taimi puupuu mulimuli ane, ma na ou lagona se manao tele e faasoa le mea na ou mauaina. Na ou mauaina se faamautinoaga faaleagaga e uiga i le Perofeta o Iosefa Samita, ma na ou manao i isi latou te iloa foi le olioli lea ua ou maua i lo’u olaga, o se taunuuga. Na lagonaina e lo’u toalua lena olioli mo ia lava ia ina ua ia auai i le Ekalesia i le lua tausaga talu ona ou auai.

Ou te faafetai ua ou ola i se taimi ua toe i ai perofeta i luga o le fogaeleele. Ona o la latou taitaiga, ua ia te au se auala mautinoa e mafai ona ou mulimuli ai.