O Se Malo Faapitoa
“O Iosefa Samita … e sili atu mea na ia faia, vagana o Iesu lava, mo le faaolataga o tagata i lenei lalolagi, i lo soo se isi lava tagata ola na ola ai” (MFF 135:3).
O le a i ai sa tatou malo faapitoa nanei i le afiafi faaleaiga,” o le faaaliga lea a Tama i le mālūtaeao.
Na ea a’e i luga Tanielu ma le te’i. “O ai e sau?” o lana fesili lea.
“O se tasi e te matua iloaina lava,” o le tala lea a Tina. “O se tagata o le a e fiafia e feiloai i ai!”
I le aso atoa na manatunatu ai Tanielu po o ai o le a sau i le afiafi faaleaiga. Toe o ni nai aso oo i le Kerisimasi. Atonu o le malo faapitoa e i ai se faiā ma le Kerisimasi.
Na iu ina potopoto le aiga i le afiafi. Fai mai Tama, “O le po nei o le a avea ai Iosefa Samita ma a tatou malo faapitoa. O lona aso fanau o le aso 23 o Tesema. I le avea ai o se aiga, o le a tatou faia se tala faatino o le Muai Faaaliga Vaaia a Iosefa Samita.”
Na aoina mai e tagata uma mea e fesoasoani i le faatinoga ma toniga mo a latou vaega na tofi ai. Na faataitai e Tanielu lana vaega ma Tama a o isi na faataitai ma Tina. E lei umi ae saunia loa i latou.
Na fiafia Mataio laitiiti e faatino le vaega a Iosefa Samita. O Tanielu ma Elisapeta na faatinoina le aiga o Iosefa. O Tina ma Tama na faafoliga o ni faifeau mai isi ekalesia.
“O mai i la matou ekalesia e faaolaina ai!”
“Leai, sau ia i matou! O matou e sa’o!”
“O le mea lea ua ta’u mai e le Tusi Paia!”
“Ae e le o le faauigaga lena!”
“Ia, o le a la sou manatu i lagona o Iosefa Samita?” O le fesili lea a Tama. “E te manatu atonu na ia mafaufau pe aisea na eseese uma ai mea na fai mai ai ia faifeau ma po o ai e sao?”
Na ioe uma lava Tanielu, Mataio, ma Elisapeta atonu na manatunatu i ai Iosefa i lena mea.
Ona tutuina lea o se moligao e Tama. Na lagona e Tanielu e pei lava o loo i ai o ia iina ma Iosefa Samita ao faitau mai e Tama le Iakopo 1:5 i le malamalama o le moligao, “A e afai ua leai se poto i so outou, ina ole atu ia i le Atua.” Ona amata lea ona faitauina e Tama le tala o le Muai Faaaliga Vaaia.
E pei ona faia e Iosefa Samita, na tootuli i lalo ia Mataio e pei o la e tatalo. Na faafuaseia lava ona sulugia o ia i le moliuila, ma tuuina atu ma le migao e Tanielu lana vaega lea na fesoasoani ai Tama ia te ia ia tauloto: “O Lo’u Atalii Pele Lenei. Faalogo ia te Ia!” (Iosefa Samita—Talafaasolopito 2:17).
Na faamalamalama mai e Tama le auala na faaali mai ai le Tama Faalelagi ma Iesu Keriso ia Iosefa Samita ma sa ta’u atu ia te ia e aua nei auai i soo se ekalesia i luga o le fogaeleele i lena vaitaimi.
“Na filifilia e le Alii ia Iosefa Samita e avea na Ana perofeta e toefuatai mai le Ekalesia moni a Iesu Keriso i le fogaeleele,” o le tala lea a Tama. “Na faataunuuina ma le faatuatua e Iosefa lena misiona.”
I ni nai aso mulimuli ane na sau ai Andy o le tuaoi o Tanielu e taalo. Na mafaufau pea Tanielu i le afiafi faaleaiga ma Iosefa Samita.
Na ia liliu atu ia Andy ma faapea atu, “Ou te iloa se perofeta na i ai i se taimi ua leva atu—o Iosefa Samita. E te iloa o ai o ia?”
Ata na tusia e Jennifer Tolman