Kōm̧m̧an bwe Tampeļ eo en M̧ōttan Mour eo Am̧
N̄an Jodikdik ro:
Men̄e kom̧ij kōppopo n̄an bōk kain̄i ko an tampeļ eo ami ilo iien ko rej itok, tampeļ eo emaron̄ wōr juōn an kareel emwilaļ ilo mour eo ami kiiō.
Tampeļ eo ej jikin eo ekanooj in kwojarjar ioon laļ in—juōn jikin me laļ in im lan̄ rej ioon doon im ijo jej en̄jake ad epaak ļo̧k n̄an Jemedwōj Ilan̄ im Jisōs Kraist. Men̄e kom̧ij kōpopo n̄an bōk kain̄i ko an tampeļ eo ami ilo iien ko rej itok, tampeļ eo emaron̄ wōr juōn an kareel emwilaļ ilo mour eo ami kiiō. Errein rej jet iaan men ko kom̧ maron̄ kōm̧m̧ani bwe tampeļ eo en juōn m̧ōttan mour eo ami ilo ami iddik wōt.
Bōk kuņaami ilo Peptaij ko n̄an ro Remej
Likao ro rerreo im jiron̄ ro 12 iiō im rūttoļo̧k remaron̄ ilo̧k n̄an tampeļ ko n̄an peptaij kōn rūtto ro aer me em̧ōj aer kar mej ilo aer kar jab peptaij. Būreejtōn Thomas S. Monson eaar kōnono kōn lan̄lōn̄ eo jerbal in jipan̄ in ej bōktok:
“Juōn jibbon̄ ke Iaar etetal ļo̧k n̄an tampeļ eo, Iaar lo juōn kumi in jiron̄ ro me, ilo jimarokōn eo, raar bōk kuņaer ilo peptaij kōn ro me em̧ōj aer em̧makūt im̧aanļo̧k. Koļaan pōraer eaar tutu. Ettōn̄ dikdik ko aer raar laudin̄din̄. Būruweer raar obrak kōn lan̄lōn̄. Juōn leddik eaar oktak likļo̧k n̄an jelm̧ae tampeļ eo im kar kwaļo̧k en̄jake ko an. ‘Menin eaar raan eo elem̧ōņōņō tata ilo mour eo aō,’ eaar ba.”1
Jessica Hahn jōn̄oul-jilu-iiō jān Daphne, Alabama, eaar peptaij kōn jet iaan rūtto ro an ilo Tampeļ eo ilo Atlanta Georgia. Men̄e eaar bōk ļalem awa ko n̄an ettōr ļo̧k n̄an tampeļ eo, ej ba en̄jake eo eaar kanooj em̧m̧an. “Maron̄ eo n̄an kōņak nuknuk ko rerreo remouj im kar peptaij kōn rūtto ro aō eaar letok n̄an eō juōn en̄jake eļap an em̧m̧an,” eaar ba. “Ij en̄jake āinwōt Ijeļā kajjier kiiō.”
Emmakijkij in etal n̄an tampeļ jon̄an wōt eo kom̧ maron̄e. Ijōņ kom̧ maron̄ en̄jake lan̄lōn̄ eo kōn jipan̄ ro jet bōk kōjeram̧m̧an ko an peptaij.
Rejtake Jerbal eo an Tampeļ
Elōn̄ wāween ko n̄an rejtake jerbal in tampeļ, men̄e ejjab emmakijkij ami etal n̄an tampeļ eo kōn kom̧ make. Kom̧ maron̄ katak kōn rūtto ro ami im lale bwe kain̄i ko an tampeļ ren kōm̧m̧an n̄an er. Kom̧ maron̄ kōjparok ajri ro reddik bwe ro jinier im jemeer renmaron̄ etal n̄an tampeļ eo. Kōnke jerbal an tampeļ eo eļap wōt an kalimjōk baam̧le ko, kom̧ maron̄ jerbal n̄an kōkajoorļo̧k baam̧le eo ami make. Im kom̧ maron̄ kwaļo̧k ippān ro jet naan in kam̧ool eo ami bwe tampeļ eo ej m̧ool in im̧ōn Irooj.
Mour erreo n̄an Deļo̧n̄e Tampeļ eo
Kōnke tampeļ eo ej juōn jikin ekwojarjar, Irooj eaar kōm̧m̧ani jon̄ak ko reutiej n̄an kōj n̄an mour kaki m̧okta jān ad maron̄ deļo̧n̄ n̄an lowaan. Būreejtōn Dieter F. Uchtdorf eaar kōmeļeļeik bwe “jon̄ak ko kōm̧m̧ani jān Irooj ilo kajjitōk ko an peba in mālim an tampeļ rej lukkuun einļo̧k wōt jon̄ak ko loe ilo Non Kokajur Jodrikdrik ro. Ilo iien ko reluur ak barāinwōt ilo iien ko eļļap kapo, jon̄ak kein im tōl eo an Jetōb Kwojarjar renaaj jipan̄ kom̧ kōm̧m̧ani jokālet ko rejim̧we. … Wāween am̧ mour kōn jon̄ak kein renaaj kwaļo̧k jekjek in wōn kwe im ta eo kwōj kōņaan erom̧.”2
Mour kōn jon̄ak ko an Irooj, im kom̧ naaj erreo n̄an deļo̧n̄e tampeļ eo. Wōr ikirelel eo n̄an deļo̧n̄e tampeļ eo ilo iien ko rej itok emaron̄ jipan̄ kom̧ oktakļo̧k jān kapo rainin. “Ej lewaj n̄an kom̧ juōn wun n̄an pād wōt ilo erreo,” Marlon Ruiz eaar ba, 16 iiō, jān Sunrise, Florida. “Toon wōt an wōr menin kōttōpar jab in, aolep iien kom̧ij ļōmņak kōn ta eo kom̧ij kōm̧m̧ane kōnke kom̧ij jab maron̄ deļo̧n̄e tampeļ eo n̄e kom̧ij jab erreo.”
Karōk kōn juōn M̧are ilo Tampeļ
“Ij lo tampeļ eo im ļōmņak kōn m̧are ijōņ juōn raan,” Annika Reithmeier eaar ba, 16 iiō, jān Oslo, Norway. “Ijeļā bwe kalim̧m̧ur ko kom̧ij kōm̧m̧ani ilo tampeļ eo rej kallim̧m̧ur ko ippān Irooj. Men ko kom̧ij katak ijo rejjab m̧ōkaj aer oktak ak jako.”
Likūt juōn pija in tampeļ juōn jikin ijo emmakijkij ami naaj lo ie, im reim̧aanļo̧k n̄an raan eo n̄e kom̧ maron̄ bōk kain̄i ko an tampeļ kōn kom̧ make.
Ke eaar 14 iiō detta, Jody Hazelbaker jān American Fork, Utah, eaar etal n̄an Tampeļ eo ilo Mount Timpanogos Utah ilo iien kōppeļo̧k eo an. “Ke iaar etetal ilo ruum̧ eo an kōrā ro rej pojak in m̧are, Iaar pōjrak ium̧win jidik iien im kar kalimjōk kilaaj eo,” eaar ba. “Ke Iaar reilo̧, Imaron̄ kar lo n̄a make ilo iien ko rej itok, kōņak juōņ nuknuk in m̧are eaiboojoj im juōn ettōn̄ ekilep. Iaar jeļā en̄in eaar jikin eo me Iaar aikuj etal n̄an e n̄an m̧are ie, ilo tampeļ eo, epaakeļo̧k Jema ilo Lan̄.”