Te Tortillas Semeio
« E haere mai, e haere tatou i ni‘a i te mou‘a o te Fatu, i te fare o te Atua »(2 Nephi 12:3).
Ua tae maira e piti na taure‘are‘a ahu uouo e te taamu arapoa i ô matou i Honduras. « No ô mai maua i te Ekalesia a Iesu Mesia i te Feia Mo‘a i te mau Mahana Hopea nei », ta raua ïa parau.
Ua farii o mama ia raua ia tomo mai i roto. Ua haapii maira na misionare i to matou utuafare i te parau no te evanelia a Iesu Mesia. Noa’tu e e iva ana‘e to‘u matahiti, ua ite a‘era vau i roto i to‘u aau i te parau mau o ta raua mau parau.
« Eaha ta matou e rave ia riro matou ei melo no te Ekalesia a te Mesia ? » Te uiraa ïa a papa.
« Ia bapetizohia », te parau ïa a te hoê o te mau orometua.
Ua bapetizohia o mama, o papa e o vau hoê ava‘e i muri iho To‘u taea‘e o Tomas, e ono matahiti, e bapetizohia ïa oia e piti matahiti i muri nei.
A haapii ai na Elders ia matou i te tahi atu mau parau o te evanelia, ua haamaramarama mai raua e mea nahea te mau utuafare ia taatihia i roto i te utuafare.
Te hiero fatata a‘e tei Guatemala ïa, e rave rahi kilometera i te atea. E titauhia ia matou ia aufau e piti mahana pereoo e e piti pô taotoraa i roto i te oire. Aita ta matou e moni no te reira huru tere, tera râ, ua pato‘i o mama e o papa ia vaiiho i te reira mana‘o ia tape‘a ia matou ia haere i te hiero.
Pauroa te matahiti e tanu to matou utuafare i te to popaa. E faaohipa matou i te reira no te hamani i te tortillas no te hoo i te ratere e ratere mai na roto i te oire.
Ua rave maira o mama i te hoê api parau e te tuira. Ua amui ihora oia i te tahi mau numera e ua parau maira, « E titauhia ia tatou ia hoo e 2,500 totillas no te aufau i to tatou tere ».
Ua araara to‘u na mata. Mea rahi tera tortillas! « Aitâ matou i hoo a‘e nei i tera huru rahiraa tortillas », ta‘u ïa parau.
Aita o mama i haape‘ape‘a. « Na te Fatu e horo‘a mai », ta’na ïa parau. E Raoul, o oe e o Tomas e tauturu orua i to orua papa ia tapu i te to popaa », ta mama ïa i parau mai ia‘u.
Ua tauturu maua o Tomas ia papa no te ootiraa i te to popaa. Pauroa te mahana e taviri o mama i te reira, no te hamani i te faraoa ota, e no te farai. Na maua o Tomas e afa‘i i te tortillas i roto i te oire.
« Ua tae mai te hoê pereoo uta ratere i teie mahana », ta‘u ïa parau ia mama i to matou ho‘iraa i te fare i te mahana matamua. « E mea rahi te tortillas ta matou i hoo ».
« E semeio ïa », te na reira ra o Mama.
Pauroa te mahana e rahi noa’tu te tortillas ta matou e hoo. I roto i te tahi tau ava‘e ua haaputu matou i te moni e titauhia no matou no te haere i Guatemala. Te haape‘ape‘a noa ra â vau. Ua faaroo vau i te mau aamu no ni‘a i te feia eia o te tape‘a i te mau pereoo utaraa taata e tere na roto i te uru raau. E haru ratou i te mau horopetete faufaa.
« Eaha te parau no te feia eia ? » Ta‘u ïa aniraa.
« E paruru te Fatu ia tatou », ta mama ïa parau. I muri iho ua ui a‘era oia, « E Raoul, te ti‘aturi ra anei oe i te evanelia ? »
« E ».
« I muri iho, ua ite outou e, e mea ti‘a ia tatou ia rave i te mau mea atoa no te pee i te Fatu e Ta’na mau peropheta ».
Hoê matahiti i muri mai i to matou bapetizo-raa-hia, ua ineine to‘u utuafare no te tere atu i te hiero. Ua tere atu maua i te oire no Guatemala na ni‘a i te pereoo utaraa taata Eita roa e mo‘ehia ia‘u te Varua ta‘u i ite i te taime a taatihia ai to‘u utuafare no teie tau e no te tau a amuri noa’tu.
I taua pô ra, a tuturi ai au i raro no te pure, ua haamaitai au i te Metua i te Ao ra no te mau haamaitairaa o te hiero.
Mau faahoho‘araa na Jim Madsen