2008
O Upumoni Faigofie ma le Taua
Mati 2008

O Upumoni Faigofie ma le Taua

Ua faamanuiaina i tatou i le i ai o tusitusiga paia o aso e gata ai, faapea foi ma le Tusi Paia e aoao ai i tatou e uiga ia Iesu Keriso ma tautino atu ai. O loo i lalo ni upu moni e faatatau i le Faaola faatasi ma mau ma aoaoga a perofeta o aso e gata ai e feagai lelei. (O lenei siata e le o se lisi lavelave o aoaoga e faatatau i nei mataupu. Mo nisi faaopoopoga e uiga i nei mataupu, tagai i le “O Le Keriso Soifua: O Le Molimau a Aposetolo,” i le itulau e 42 o le lomiga lenei.)

Aoaoga Faavae

Mai le Tusi Paia

Mai Tusitusiga Paia o Aso e Gata ai ma Perofeta

1 O le Tama, le Alo, ma le Agaga Paia o peresona eseese ma mavaevae e toatolu.

“Aua e toatolu o e molimau i le lagi, o le Tama, ma le Lokou, atoa ma le Agaga Paia; o i latou nei foi e toatolu e toatasi lava ia” (1 Ioane 5:7, tagai foi Mataio 3:16–17; Galuega 7:55).

“Ua ou folafola atu i taimi uma lava o le Atua o se peresona tutoatasi, o Iesu Keriso o se peresona mavae ma tutoatasi mai le Atua le Tama, ma o le Agaga Paia o se peresona tutoatasi ma o se Agaga: ma o le toatolu lenei o ni peresona taitoatasi e toatolu ma o Atua e toatolu” (Iosefa Samita, Aoaoga a Peresitene o le Ekalesia: Iosefa Samita [2007], 41–42).

2 O le Tama ma le Alo e i ai tino aano ma ivi, o le Agaga Paia o se peresona agaga.

“Ia outou tagotago mai ia te a’u, aua o le agaga e leai sona aano ma ni ivi pei o a’u nei ua outou vaavaai i ai” (Luka 24:39; tagai foi Kenese 5:1; Ioane 14:9; Filipi 3:21).

“E i le Tama le tino aano ma ivi e pei lava o le tagata; e faapena foi le Alo, a o le Agaga Paia e leai sona tino o aano ma ivi, a o le peresona o agaga. A na le faapea, ua le mafai le Agaga Paia ona mau i totonu ia i tatou” (MFF 130:22; tagai foi 3 Nifae 11:13–15).

3 O le toatolu o le Aigaatua e tasi i latou i lo latou finagalo.

“Le Tama Paia e, ia e tausi ia i latou i lou suafa o e ua e foai mai ia te au, ina ia tasi i latou faapei o i taua” (Ioane 17:11).

“O i latou o ni tagata mavaevae, ae tasi i latou i lo latou finagalo ma mea e fai. E soo faatasi i latou i le aumaiga o le fuafuaga paia mo le faaolataga ma le faaeaina o fanau a le Atua” (Gordon B. Hinckley, “Ou Te Talitonu ia i Latou Nei e Toatolu,” Liahona, Iulai 2006, 8; tagai foi 3 Nifae 11:27).

4 O Lau galuega ma Lou mamalu lenei – ia faataunuu le faaofuina o le tagata i le tino ola pea ma le ola faavavau.

“Ua faailoa mai nei i le faaalia mai o lo tatou Faaola o Iesu Keriso, o le ua faaumatia lava le oti, a o le ola ma le le iu vale ua faamalamalamaina mai lea e ia i le tala lenei” (2 Timoteo 1:10; tagai foi Ioane 3:16–17; 1 Korinito 15:22; Eperu 9:11–12, 28).

“Aua faauta, o lau galuega ma lou mamalu lenei—ia faataunuu le faaofuina o le tagata i le tino ola pea ma le ola faavavau” (Mose 1:39; tagai foi MFF 29:43).

5 O Iesu Keriso sa i le Atua i le amataga ma o Ia foi le Ulumatua.

“Sa i le amataga le Lokou, sa i le Atua le Lokou, o le Atua foi le Lokou.

“O Ia lava sa i le Atua i le amataga” (Ioane 1:1–2; tagai foi Roma 8:29; Eperu 1:5–6).

“Sa ou i le amataga faatasi ma le Tama, o au foi o le Ulumatua” (MFF 93:21; tagai foi 3 Nifae 9:15; Mose 2:26).

6 I le muai olaga, na filifilia Iesu e le Tama Faalelagi e avea ma Faaola.

“Na muai faauuina [Keriso] a’o lei faavaeina le lalolagi, a ua faaalia mai i ona po nei e gata ai ona o outou” (1 Peteru 1:20; tagai foi Faaaliga 13:8).

“Lou Atalii Pele, o lau Pele lea ma Le na ou filifilia talu mai le amataga, ua fai mai ia te au, Lou Tama e, ia faia lou finagalo, ma ia ia te oe pea le mamalu e faavavau” (Mose 4:2; tagai foi Eteru 3:14).

7 I lalo o le taitaiga a Lona Tama, na foafoaina ai e Iesu le lalolagi.

“Na ia faia mea uma lava; e leai foi se mea e tasi na faia e lei faia e ia” (Ioane 1:3; vaai foi Isaia 40:28; Kolose 1:16).

“Faauta o Au o Iesu Keriso o le Atalii o le Atua. Na ou faia le lagi ma le lalolagi, ma mea uma lava o i ai” (3 Nifae 9:15; tagai foi Mosaea 3:8; Mose 1:33).

8 O Iesu Keriso o Ieova o le Feagaiga Tuai.

“Ua fetalai atu Iesu ia te i latou, E moni, e moni, ou te fai atu ia te outou, sa au i ai, a o lei leai se Aperaamo” (Ioane 8:58; tagai foi Kenese 22:14; 1 Korinito 10:1–4).

“Ua tatou tauave i o tatou loto se faamaoniga mausali ma le le maluelue, i le paia o le misiona a le Alii o Iesu Keriso. O Ia o le Ieova Sili o le Feagaiga Tuai, o le na foafoaina le lalolagi ma mea uma i lalo o le taitaiga a Lona Tama” (Gordon B. Hinckley, “O Se Vaitau mo le Lotofaafetai,” Liahona, Tes. 1997, 4; tagai foi Aperaamo 2:8).

9 O Iesu o le Toatasi na Fanaua e le Tama i le tino.

“Ua liu tino tagata le Lokou, sa mau foi o Ia ma i tatou, (na matou matamata i lona mamalu; o le mamalu lava lea o le Alo e Toatasi o le Tama,) ua tumu o Ia i le alofa tunoa ma le faamaoni” (Ioane 1:14; tagai foi Ioane 3:16).

“Ou te iloa e afio mai Iesu Keriso, ioe, o le Alo e Toatasi ua fanauina e le Tama, ua tumu i le alofa tunoa ma le alofa, ma le upu moni. Faauta foi, o ia lena e afio mai e aveeseina agasala a le lalolagi, ioe, o agasala a tagata uma o e tutumau i le faatuatua i lona suafa” (Alema 5:48; tagai foi Alema 9:26; MFF 93:11).

10 O Iesu o le faaaoao atoatoa lea o le fanauga a tagata.

“Aua ua ou avatu le faaaoao ia te outou, e pei ona ou faia ia te outou, ia faapea lava e outou ona fai” (Ioane 13:15; tagai foi 1 Peteru 2:21).

O se tasi o faamoemoega taua o lo tatou i ai iinei, ina ia mafai ai ona tatou ola ai i foliga ma uiga o Ia o lē sa soifua i le tino e aunoa ma se ila—e paia, mama, ma le lē pona! Na afio mai Iesu e le gata ina togiola mo agasala a le lalolagi, ae ia faia se faataitaiga i luma o tagata uma ma faatuina faatulagaga o le atoatoa o le Atua, o tulafono a le Atua, ma le usiusitai i le Tama” (Iosefa F. Samita, Aoaoga a Peresitene o le Ekalesia: Iosefa F. Samita [1998], 151; tagai foi 2 Nifae 31:16; 3 Nifae 18:16).

11 I le amataga o le misiona a le Alii i le lalolagi na Ia faatuina Lana Ekalesia.

“Na Ia tuuina mai foi nisi e fai ma aposetolo, o isi foi e fai ma perofeta, o isi foi e folafola le talalelei, o isi foi e fai ma leoleo, atoa ma a’oa’o.

“Ina ia faaatoatoaina ai le au paia, latou te fai ai le galuega, ia atiina ae ai le tino o Keriso” (Efeso 4:11–12; tagai foi Mataio 16:18; Luka 6:13).

“Matou te talitonu i le faatulagaga sa i ai i le Ekalesia anamua, e pei o aposetolo, perofeta, epikopo, a’oa’o, peteriaka ma isi tofiga faapena” (Mataupu Faavae o le Faatuatua 1:6; tagai foi 3 Nifae 12:1).

12 Na tuuina mai e le Faaola Lona soifua e togiolaina ai agasala a le fanau a tagata.

“O lo’u toto lenei, o le toto o le feagaiga fou, ua faamaligiina mo tagata e toatele, e faamagalo ai agasala” (Isaia 53:5–6; 1 Ioane 2:1–2).

“Aua faauta o au le Atua na puapuagatia i nei mea mo tagata uma, ina ia latou le puapuagatia pe afai latou te salamo; …

“O le tiga lea na faagateteina ai a’u lava, o le Atua, le silisili ese i mea uma ona o le tiga, ma na maligi ai le toto mai pu laiti uma lava o le tino, ma na tiga le tino atoa ma le agaga—ma sa ou loto ou te le inu i le ipu oona ae teena—

“Ae ui i lea, ia i le Tama le viiga, ma na ou inu ma faaumaina ai au sauniuniga i le fanau a tagata” (MFF 19:16, 18–19; tagai foi 1 Nifae 11:32–33).

13 Na mafai e Iesu lava ia ona totogi le faasalaga mo a tatou agasala.

“E leai foi se tasi ua i ai le ola; e leai lava se isi igoa i lalo o le lagi ua foaiina mai e tagata e mafaia ona faaolaina ai i tatou” (Galuega 4:12).

“Na mafai ona Ia ausia Lana misiona aua o Ia o le Alo o le Atua ma sa ia te Ia le mana o le Atua… .

“E leai se tagata ola e i ai le pule, po o le agavaa e faaolaina ai isi tagata uma mai le se ese ma lo latou tulaga toilalo, pe mafai foi ona ofo atu lona ola ma faataunuu ai le toetutu o le lalolagi aoao, ma e uma o nonofo ai.

“Ua na o Iesu Keriso lava na te mafai ma le loto i ai, ona faataunuu se galuega faaola o le alofa faapena” (Ezra Taft Benson, “Jesus Christ—Our Savior and Redeemer,” Tambuli, Dec. 1990, 5; tagai foi Alema 34:8–10).

14 Ua motusia e Iesu noataga o le oti.

“A o lenei ua toe faatuina mai Keriso, ua avea ma faapolopolo o e ua momoe” (1 Korinito 15:20; tagai foi Ioane 14:19; 1 Korinito 15:54).

“O lenei, ua i ai le oti ua taua o le oti faaletino, e tatalaina foi e le maliu o Keriso noanoaga o lenei oti faaletino, ina ia toe faatutuina mai tagata uma mai le oti faaletino” (Alema 11:42; tagai foi Mosaea 16:7–8; Alema 22:14).

15 O Iesu o le Faaola ma le Togiola o le Lalolagi.

“Ua matou vaaia, ua matou molimau ai foi, na auina mai e le Tama o le Alo, o le Faaola o le lalolagi” (1 Ioane 4:14; tagai foi Luka 2:11).

“E afio mai foi o ia i le lalolagi ina ia faaolaina e ia tagata uma, pe afai latou te faalogo atu i lona siufofoga; aua faauta, e onosai o ia i tiga o tagata uma, e moni o tiga o tagata ola uma, o tane ma fafine atoa ma le fanau” (2 Nifae 9:21; tagai foi MFF 66:1; Mose 1:6).

16 O Iesu o le Mesia o le Feagaiga Tuai.

“Ua fai mai le fafine ia te ia, “Ua ou iloa o le a maliu mai le Mesia, o le ua igoa ia Keriso, pe a maliu mai o ia, e faailoa mai mea uma ia te i matou”

“Ona fetalai atu lea o Iesu ia te ia, “O a’u lava lenei, o le tautala atu ia te oe” (Ioane 4:25–26; tagai foi Luka 4:16–21).

“Ioe, a mavae le 600 tausaga i le aso ua te’a ai lou tama i Ierusalema, e faatuina e le Alii le Atua le perofeta ai tagata Iutaia, o le Mesia lava, o lona uiga o le Faaola o le lalolagi” (1 Nifae 10:4; tagai foi 2 Nifae 2:26; Mose 7:53)

17 Na asiasia e le Alii “isi o ana mamoe” i Amerika anamua.

“Ua ia te a’u foi isi mamoe e le o i lenei lotoa; e tatau ona ou taitaiina mai o i latou foi, e faalogo foi i latou i lou leo, ona tasi ai lea o le lafu mamoe, ma le leoleo mamoe e toatasi” (Ioane 10:16).

“E moni, ou te fai atu ia te outou, o outou, o i latou ia na ou fai atu ai, ua ia te a’u foi isi mamoe e le o i lenei lotoa; e tatau ona taitaiina mai i latou foi, e faalogo i latou i lou leo, ona tasi ai lea o le lafu mamoe, ma le Leoleo Mamoe e toatasi” (3 Nifae 15:21; tagai foi 3 Nifae 19:2–3; 26:13, 15).

18 O Iesu o lo tatou Puluvaga ma le Fautua i le Tama.

“Afai e toatasi le Atua e toatasi foi le puluvaga i le Atua ma tagata o le tagata o Keriso Iesu lea” (1 Timoteo 2:5; tagai foi 1 Ioane 2:1).

“Ina siitia ia outou loto ma ia fiafia, aua o loo i ai au i totonu ia te outou, ma o au o lo outou fautua i le Tama” (MFF 29:5; vaai foi 2 Nifae 2:27–28; MFF 45:3–5).

19 O Le Alii o le Malamalama ma le Ola o le lalolagi.

“Ona toe fetalai atu lea o Iesu ia te i latou, ua faapea atu, o A’u nei o le malamalama o le lalolagi; o le mulimuli mai ia te au e le savali o ia i le pouliuli, ae ia te ia le malamalama o le ola (Ioane 8:12; tagai foi Salamo 27:1; Ioane 1:9).

“Aua e moni ou te fai atu ia te outou, o a’u o le Alefa ma le Omeka, o le amataga ma le gataaga, o le malamalama ma le ola o le lalolagi—o le malamalama e pupula i le pouliuli, ae le iloa e le pouliuli” (MFF 45:7; tagai foi Mosaea 16:9; MFF 12:9).

20 E fesoasoani Iesu i ona tagata i lo latou vaivai.

“Aua ua tigaina o ia ona o tofotofoina, o le mea lea ua mafai ai o ia ona fesoasoani i e ua tofotofoina” (Eperu 2:18; tagai foi Isaia 53:5).

“Na te ave foi le oti i ona luga, ina ia tatalaina e ia noanoaga o le oti o loo ua noanoatia ai lona nuu. Na te ave foi i ona luga o latou vaivai, ina ia faatumuina lona alo i le alofa e tusa ma le faaletino, ina ia silafia e ia e tusa ma le tino le ala e tausia ai lona nuu e tusa ma o latou vaivai” (Alema 7:12; tagai foi MFF 62:1).

21 E mafai ona suia e le Faaola le natura o le tagata.

“O lenei afai ua ia Keriso se tasi, o le tagata fou ia; ua mavae mea tuai, faauta ua faafouina mea uma” (2 Korinito 5:17; tagai foi 1 Ioane 5:4).

“Aua e te ofo, aua e ao ina toe fanauina tagata uma lava, ioe, o tane atoa ma fafine, o atunuu uma, ituaiga, ma gagana eseese, ma nuu; ioe, ia fanauina i la le Atua, ma ia liua mai le faaletino ma le pau i le amiotonu, ona ua togiolaina e le Atua, ma ua avea mona atalii ma afafine.

“Ua faapea foi ona avea i latou ma tagata fou; a latou le faia lenei mea, e le mafai ona fai mo latou tofi le malo o le Atua” (Mosaea 27:25–26; tagai foi Mosaea 5:2, 7; Alema 5:14).

22 Ua toefuatai mai e le Alii Lana uluai Ekalesia i aso e gata ai.

“Ina ia auina mai foi e ia le na muai talaiina ia te outou, o Iesu Keriso lea.

“E tatau ona nofo o ia i le lagi seia oo i tausaga e toefuatai ai mea uma lava, na fetalaia mai e le Atua i fofoga o ana perofeta paia uma lava talu mai anamua (Galuega 3:20–21; tagai foi Mataio 17:11).

“Ma e oo atu foi i e na tuuina atu i ai nei poloaiga, e mafai ona maua le mana e faataatia ai le faavae o lenei Ekalesia, ma ia aumaia i fafo nai le mea lilo ma le pogisa, le Ekalesia ola e tasi ma le faamaoni i luga o le fogaeleele atoa ua fiafia i ai a’u, o le Alii” (MFF 1:30; tagai foi MFF 20).

23 O loo taitaiina e Iesu Lana Ekalesia, e ala i Ana perofeta filifilia.

“O loo ua atiina ae i luga o le faavae o le au aposetolo, atoa ma le au perofeta, o le maa tulimanu o Iesu Keriso lava lea” (Efeso 2:20).

“O le ao o le Ekalesia o le Alii o Iesu Keriso. O Lana Ekalesia. Peitai o le ao faalelalolagi o lo tatou perofeta” (Gordon B. Hinckley, “The Church Is on Course,” Ensign, Nov. 1992, 53; tagai foi MFF 21:1–5).

24 O le a toe afio mai Iesu i le lalolagi i se aso.

“O Iesu lena ua aveina ae nai ia te outou i le lagi, e faapea ona toe afio mai o Ia, pei o lona afio atu i le lagi na outou vaavaai i ai” (Galuega 1:11; tagai foi 1 Tesalonia 4:16; Faaaliga 1:7).

“Aua o le a ou faaalia o a’u lava mai le lagi i le mana ma le mamalu tele, faatasi ma ’au uma o i ai, ma e nofo i le amiotonu faatasi ma tagata i le lalolagi i le afe o tausaga, ao e amioleaga latou te le tumau ai lava” (MFF 29:11; tagai foi MFF 34:6; Mose 7:62–64).

25 O le a faamasino e le Alii le lalolagi i le amiotonu.

“Aua ua faatuina e ia le aso e faamasinoina ai le lalolagi ma le tonu” (Galuega 17:31; tagai foi Salamo 9:8; Isaia 11:3–4).

“E oo foi ina faatumuina lē salamo ma papatisoina i lou igoa, afai foi e tumau o ia seia oo i le gataaga, faauta, ou te ta’uamiotonuina o ia i luma o lo’u Tama, i le aso ou te tu ai e faamasino i le lalolagi” (3 Nifae 27:16; tagai foi MFF 19:1–3).