O Le Aao Laveai o le Faaola
O se tasi taumafanafana ao ou tuputupu a’e i Arkasas, sa valaauina au e ou tuaoi matou te o i se tolauapiga e lua aso, o fagotaga ma feausiga i se vaituloto tele e latalata i Sardis, i Misisipi. Na faafiafiaina i matou i nai aso i le tele o gaoioiga sa fai i fafo.
I lo matou aso mulimuli na faia ai ni feausiga ae matou te lei toe foi i aiga. A o matou fetogiaia se polo i le matafaga, na alamu ane le polo i o’u luga ma pau i tala atu. Na lelea faafuasei atu le polo i agiga o le savili ma oo atu ai i le vai. Na ou mulimuli atu ai, ae na tapili ese atu e le savili le polo mai ia te a’u. E lei umi, ae ou tau i faailoilo e gata ai le vaega papau o le vai mo feausiga. Na lelea le polo ma pasia faailoilo ma oo atu ai i le vaega tele o le vaituloto.
Ina ua ou latalata atu i faailoilo, ou te lei manatu ou te aau i tala atu. E le mamao tele le polo i luma atu ma sa ou mautinoa e mafai ona ou oo i ai. I se isi itu ua maea au aoaoga mo le faasaoina o le ola, ma sa ou mitamita i ou faailoga sa faapipii i a’u mea aau. Sa ou lagona le to’a i le vai, ma sa ou mautinoa e lava lo’u malosi e toe maua ai le polo.
Peitai, sa agiagi foi le savili ma lelea ese atu ai le polo ma a’u. O nisi taimi sa mafai lava ona pa’i i ai o’u tumutumu lima, peitai e vave lava lana alu ese. Na iu ina agi mai se savili faatautau ma tapili ese atu ai, ma lē mafai ai ona ou toe au i ai.
Ou te le iloa pe o le a le mamao ua oo i ai seia oo ina ua ou malolo. E foliga mai ua pogisa ma malulu le vaega o le vai ua ou i ai nai lo le vaega papau mo feausiga. Ina ua ou toe tilotilo atu i le matafaga, sa ou iloa ai ua ou latalata i le ogatotonu o le vai. Sa tonu ia te au e tiai le polo ae toe aau agai i le matafaga. Sa ou vaivai ma le lavā ae ou te le’i popole. O lea ou te talavou ma sa ou lagona o le a ou le afaina.
Peitai, ao ou taumafai e foi atu i le matafaga, sa ma fetaiai ma le savili lea na fesoasoani i le polo. E foliga mai pe o le a lava lo’u taumafai malosi e aau, ae leai se suiga tele. Sa amata ona tiga maatiati o’u lima ma o’u vae. Na ou taumafai e aau pei o se ta’ifau ma faaopeopea, a o ou taumafai ia toe maua lou malosi.
Ona ou faalogoina lea o se leo masani—o le leo o se vaaafi. Sa ou fiafia ma to’a ina ua vave ona ou vaaia se tamaloa i se tama’i vaaafi o faalatalata mai ia te au ma ofo mai se fesoasoani. Na lagona le matua eeva o o’u vae ma lima. Sa le mafai ona ou oso i luga o le vaa, ma sa na ona pipii atu lou lima i le itu o le vaa ma tautau ai, ao taumafai lenei tagata ou te le masani ai e toso atu au agai i le vaega mo feausiga. Sa ou pipii atu i se tasi o faailoilo, ma faamamulu le vaa, ma talo atu se faafetai mo le tagata, ma ou aau loa agai i le matafaga.
E sefululima tausaga mulimuli ane na ou toe feagai ai foi ma se isi faafitauli. Mo se taimi umi, sa ou aau i se vaituloto o agasala. O le saili atu i mea o le lalolagi, ma tata’i atu i mea e leai se taua na tuua ai au i se olaga e tumu i faalavelave ona o au lava filifiliga. Ua alu lou malosi, ma ua tauau atu foi o’u faamoemoega. O mea sa ou tulimatai ia maua, sa tumau lava ona mamao ese ma a’u, ma foliga mai ua matua lofituina au i le pouliuli.
I lo’u popolevale na ou tagi atu ai i le Tama i le Lagi. Pei lava o le tagata na i le vaa, na laveaiina au e le Faaola ina ua ou matua manaomia o Ia. E ala mai i se perofeta a le Atua i aso e gata ai, na Ia taitai au i le Tusi a Mamona. Na Ia taitai au i le ala o le salamo, ma faamamaina a’u i au agasala i le vai o le papatisoga. Ona tuu lea o au i le mea maualuga lea na ou taumafai ai ou te tumau ai, talu mai lena taimi.