Avea o se Molimau a Iesu Keriso
O Aposetolo, e ala i le mana o le perisitua, ua tofia e avea ma molimau faapitoa a Keriso i le lalolagi atoa (tagai MFF 107:23). E taua a latou molimau i le galuega a le Alii mo le faaolataga. Ae e le tatau ona faia pe tutu na o i latou. O tatou uma na papatisoina ma faamauina, ua tatou ave i o tatou luga le suafa o Iesu Keriso ma se tautinoga “e tutu atu o ni molimau a le Atua i taimi uma i mea uma, ma nofoaga uma” (Mosaea 18:9). Ua i ai ia te i tatou le tulaga gafatia e avea ai ma Ana molimau. E matua faalagolago le Alii i “e vaivai ma lotomaulalo” e folafola atu Lana talalelei (tagai MFF 1:19, 23), ma o Lona naunautaiga ia “taitoatasi le tagata ma tautala atu i le suafa o le Atua le Alii, o le Faaola lava o le lalolagi” (MFF 1:20).
Manatunatu i ni auala e mafai ona avea ai se tagata o le Au Paia o Aso e Gata Ai ma se molimau a Keriso.
O i tatou o molimau a Keriso, pe a tatou maua se molimau mautinoa a le tagata lava ia o loo soifua o Ia.
O se manatu faavae lava ia o le avea ma se molimau a Iesu Keriso, o le i ai lea o se molimau patino, o Ia o le Alo paia o le Atua, o le Faaola ma le Togiola o le lalolagi. Na iloa e Aposetolo anamua o Iesu o le Mesia folafolaina ma sa talanoa mai i mea patino na latou silafia i le moni o Lona Toetu. E ui i lea, o se molimau a Keriso e le seiloga ua vaai tino ia te Ia, po o le ulu atu foi i Lona afioaga. Ina ua tautino atu e Peteru ia Iesu “O Oe o le Keriso, o le Alo o le Atua,” na tali atu le Alii e lei maua e ia lena malamalama ona o le mafutaga vavalalata po o aafiaga o Peteru ma Iesu, ae o Lona Tama i le Lagi na faaali ia te ia (tagai Mataio 16:15–17). Na faamanino e Iesu ia Toma e mafai ona maua e se tasi le talitonuga ma le molimau lea na maua e Toma e aunoa ma le pa’i atu po o le vaai atu ia te Ia: “Ua fetalai atu Iesu ia te ia, Toma e, ua e talitonu aua ua e vaai mai ia te au: amuia o ē le vaai mai ae talitonu mai pea” (Ioane 20:29).
O a tatou molimau ia Keriso e amata mai i molimau a isi—tagata ua tatou iloa, pe ua tatou faalogo i ai ma talitonuina. Ua tatou maua molimau tusitusia a Aposetolo “o Iesu lava na toe faatuina e le Atua; molimau i matou uma i lena mea” (Galuega 2:32). Ua ia i tatou le Feagaiga Tuai ma le Fou o Lona muai faauuina, lana misiona, ma le Togiola. Ua ia i tatou le isi molimau, le Tusi a Mamona, o le fatu ma le pogai “o le faamautinoa i sa Iuta ma nuu ese o Iesu o le Keriso, o le Atua Faavavau na faaali atu o Ia i malo uma.”1 Ua ia i tatou le molimau a le Perofeta o Iosefa Samita, na vaai ma faalogo, a o faasino le tamatama’i aao o le Tama ia Iesu ma fetalai, “O Lo’u Atalii Pele Lenei” (Iosefa Samita—Talafaasolopito 2:17), atoa ma le talitonuga mulimuli ane o le Perofeta “ina ua uma ona faia molimau e tele e uiga ia te ia, o le molimau tupito mulimuli lenei i mau uma lava, ma te faia ia te Ia: O loo soifua o Ia! Aua na ma vaaia o Ia i le itu taumatau lava o le Atua na ma faalogoina foi le siufofoga o molimau mai o Ia lava o le Toatasi na Fanaua e le Tama” (MFF 76:22–23). Ua i ai lava a tatou molimau faapitoa i o tatou taimi, o ē o soifua faatasi ma i tatou, ma ua tatou maua mai ia i latou se molimau mautu, i le vaai i ai o o tatou lava mata ma faalogo i ai o o tatou taliga.
O latou ua ulu atu i osigafeagaiga o le papatisoga ua latou maua faaeega faapitoa o le faatuatua ia Iesu Keriso, faatasi ma le meaalofa o le Agaga Paia ua oo mai ai le faamaoniga o molimau ua tatou maua e uiga ia Keriso e moni. Na faamaonia mai e Nifae o le a tupu lenei mea: “Ona i ai lea outou i lenei ala sa’o ma le lauitiiti e tau atu i le ola faavavau; ioe, ua ulu atu ai outou i le faitotoa, ua faia e outou e tusa ma poloaiga a le Tama ma le Alo, ua maua foi e outou le Agaga Paia, “e molimau o Ia e uiga i le Tama ma le Alo, e oo i le faataunuuina o folafolaga ua na faia, “Afai ua outou ui atu i le ala, ona maua lea e outou” (2 Nifae 31:18; faaopoopo le faatusilima).
O se meaalofa faaleagaga le talitonu i upu a isi ma o le meaalofa sili atu le “faamaonia e le Agaga Paia ia iloa Iesu Keriso o le Alo o le Atua, ma sa faasatauroina o Ia mo agasala a le lalolagi” (MFF 46:13).
O lenei molimau e masani ona oo mai i lagona—e mu, e filemu, o se lagona faamaoni, o se faalogoga o le malamalama faateleina. Na tuuina e le Alii ia Oliva Kaotui se molimau i le Tusi a Mamona e uunaiga a le agaga, ma faamaonia—“o upu poo galuega o loo e tusia ua moni ia” (MFF 6:17). Na toe faaopoopo mai le Alii, “Afai e te manao i se isi molimau, ia e toe manatu i le po na e tagi mai ai i lou loto ia te a’u ina ia e malamalama e uiga i le faamaoni o nei mea. Na ou le avatua ea le filemu i lou mafaufau e uiga i lea mataupu? O le a ea se tasi molimau e mafai ona e maua e sili atu i lo lea mai le Atua?” (MFF 6:22–23). O le aumai e le Agaga o le filemu i le mafaufau o se tasi, e le na pau lea o le tulaga e oo mai ai se molimau, peitai ona e mai le Atua, e leai se isi mea e sili atu. E pei lava ona tatou taumamafa i afioga a Keriso i tusitusiga paia, ua “mafai ona tatou tautino atu ua [tatou] faalogo i [Lona] siufofoga ma iloa [Ana] afioga” (MFF 18:36), e mafai ona tatou tautino atu mai uunaiga faaleagaga faamautinoa mai le Atua ua tatou iloa Lona Alo, ma, o loo soifua o Ia.”
O tatou o molimau a Keriso pe a tatou ola i auala e faailoa atu ai Ana aoaoga.
I Lana misiona i le itulagi i Sisifo, na tuuina atu ai e le Faaola le poloaiga lenei: “Ia outou sii i luga lo outou malamalama ina ia pupula atu ai i le lalolagi. Faauta, o A’u o le malamalama tou te sii i luga—o mea ua ou fai ua outou vaai i ai” (3 Nifae 18:24). E tatau ona vaaia e tagata ia i tatou se vaega o Iesu Keriso. O a tatou amio, tautala, vaai, e oo lava i manatu ia atagia mai ai o Ia, ma Ona ala. Na ta’ua e Alema o le i ai lea o se liliu tele i o tatou loto, ma le vaaia o ona foliga i o tatou mata (tagai Alema 5:14). I lea lava mataupu e tasi na poloa’i ai le Alii ia pei lava i tatou o Ia (tagai 3 Nifae 27:27). E ui lava e tatou te le’i i ai i le taimi o Lana taitaiga, a tatou saili i tusitusiga paia, ua tatou vaaia Iesu, ma mea na Ia fetalai mai ai ma faia. Ma, a’o tatou mulimulitaia lea alafua, ua tatou molimau atu mo Ia.
Ou te manatua se faataitaiga a se faifeau Katoliko na ou masani i ai ao ma galulue faatasi i se auaunaga i Nashville, Tennessee. Na faia e Patele Charles Strobel se fuafuaga ia aumaia ai tagata e leai ni mea e nonofo ai, mai le alatele, e auauai na o sina vaega i lea taimi ma lea taimi, i se polokalama faaaoaoga faavaitaimi e maua ai tomai o le olaga ma avanoa mo ni galuega mo i latou. Sa ofo atu le tele o itula e fesoasoani ai i tagata ia faia ni suiga tumau mo se lelei sili atu ina ia latou faalagolago ia i latou lava. Na faateia a’u ina ua ou iloa na tagatavaleina lona tina e se tamaloa e leai se aiga i ni nai tausaga e lei mamao tele. O le alofa faa-Keriso o Patele Stobel na faalautele e oo lava i le tamaloloa ia na maua i ai se tasi na aveesea le ola o si ona tina.
O le savali autu a aposetolo ma perofeta i tausaga uma, o le manaomia o le salamo ina ia maua le faamagaloga o agasala e ala i le Togiola a Iesu Keriso. O lo tatou lava salamo e ta’u atu ai se molimau mo Ia, ma le mana o Lona alofa tunoa e magalo ma faamamaina ai tatou. E le afaina pe ua tatou atoatoa ina ia lagolagoina a tatou molimau, pau lava le mea ia tatou taumafai e faatulaga o tatou olaga ia pei lava o le Faaola. Na fautuaina mai ma le atamai e Peresitene Ezra Taft Benson (1899–1994) ia i ai le onosai faapea foi le maelega i lenei faiga.
“O le avea faapei o Keriso o le tauiviga o le olaga atoa, ma o le mea moni e masani ona aofia ai suiga ma le tuputupu a’e malie, toetoe lava e le iloga mai ma le amanaiaina.”
“… Mo tagata taitasi uma lava ua liliu mai e pei o Paulo, Enosa, ma Tupu Lamonae, e faitau fiaselau ma fiaafe tagata ua latou iloaina le matuai maaleale, ma le matuai faifaimalie o le faagasologa o le salamo. Mai lea aso i lea aso, ua latou faalatalata atu ai lava i le Alii, ma lo latou le iloa o loo latou fausia se olaga faaleatua. Latou te ola i ni olaga toafilemu lelei, auaunaga ma tautinoga. Ua pei lava o sa Lamana, lea na fetalai ai le Alii, ‘sa papatisoina i le afi, ma le Agaga Paia, a ua latou le iloa ai’ (3 Nifae 9:20; faaopoopo le faatusilima).”2
O molimau i tatou a Keriso pe a tatou fesoasoani i isi ia o mai ia te Ia.
Na toe faamatala e Nifae i se faaupuga fiafia, “Ua matou tautalatala ia Keriso, ua matou olioli ia Keriso, ua matou tala’i atu Keriso, ua matou vavalo atu foi ia Keriso, ua matou tusitusi e tusa ma a matou valoaga, ina ia iloa e a matou fanau le mea latou te faamoemoe ai mo le faamagaloina o a latou agasala” (2 Nifae 25:26). E mafai foi ona tatou fesoasoani atu i isi ae maise o a tatou fanau, ia o mai ia Keriso.
I le fasi fuaitau a Nifae, “ua matou tautalatala ia Keriso,” ua ta’u mai ai e le tatau ona faatuai ona tatou talanoa atu i o tatou lagona e faatatau i le Faaola i talanoaga ma fetufaaiga faasamasamanoa. E masani lava o tulaga tasi-i-le-tasi, lea e fefaasoaai ai faauo, tatou te talanoaina ai pe o ai o Ia ma pe o a mea sa Ia fai ma a’oa’o atu, ma faamalosi atu i isi ia alolofa ma ia mulimuli ia te Ia.
“Ua matou olioli ia Keriso,” e ta’u mai ai o loo tatou ola i se vaaiga lautele i uiga e atagia ai lo tatou faatuatua ia Keriso. Ua tatou iloa ua lava lona alofa tunoa mo i tatou e faaolaina ai mai le oti ma le agasala, ma faaatoatoaina ia te Ia (tagai Moronae 10:32–33). E ui ina tatou feagai ma tulaga le faamalieina ma puapuaga matautia, ua tatou iloa ona o Ia, ua mautinoa ai lo tatou fiafia faavavau. A’o susulu atu lo tatou faatuatua ia Iesu Keriso, ua tatou faaali atu i isi o e o “puapuagatia ma mafatia i avega” le ala e maua ai le mapusaga ia te Ia (tagai Mataio 11:28–30).
“Ua matou talai atu Keriso” e faatatau tonu ia i latou o loo galulue faamisiona mo le taimi atoa, ae e aofia ai foi mea o loo tatou fai i a tatou sauniga tapuai, vasega o le Aoga Sa, atoa ma soo se nofoaga faapea, o loo avea ai o Ia ma mataupu autu i suesuega ma aoaoga. O lo tatou auai o ni faiaoga pe o tamaiti aoga, o se vaega o le tuuina atu o la tatou molimau ia te Ia, atoa ma le suesuega a le tagata lava ia e lagolagoina le auai, e atili molimauina ai lo tatou talitonuga.
“Ua matou vavalo atu ia Keriso,” o lona uiga ua tatou faaali atu a tatou molimau ia te Ia, e ala i le mana o le Agaga (tagai 1 Korinito 12:3) “O le agaga o le valoaga o le mau lea ia Iesu” (Faaaliga 19:10). E pei ona vavalo mai i latou anamuā i Lona uluai afio mai, ua faapena foi ona tatou faamaonia i upu ma mea e fai, valoaga o Lona Afio Mai Faalua. O le faia o papatisoga ma isi sauniga paia mo o tatou tuaa e ala i le pule o le perisitua na toefuatai mai e Elia, a o tulimatai atu mo le “aso sili ma le matautia o le Alii” (Malaki 4:5–6, tagai foi MFF 2; 128:17–19), tatou te tautino atu ai o le a toe afio mai Keriso, ma o le a liliu atu o tatou loto i o tatou tama, e saunia ai mo Lona afio mai (Malaki 4:6; MFF 2:2).
“Ma ua matou tusitusi e tusa ma a matou valoaga” e ta’u mai ai le faautauta i le faia o faamaumauga mausali o a tatou molimau ia Keriso. Ua tatou malamalama o molimau tatou te tuuina atu, “ua tusia i le lagi ina ia vaavaai i ai agelu; o loo olioli foi i latou ona o [i tatou]” (MFF 62:3). E mafai ona vaavaai mai o tatou tuaa ma isi, ma olioli ona o a outou molimau ia Keriso ua tusitusia ma faamaumauina mo lo latou foi iloa, e oo lava i nisi o latou e lei fananau mai.
A o e lagonaina le molimau a le Agaga Paia ia te Ia, faamautu ma toe faamautu i lou agaga i le tele o manatu ma tulaga, a o e taumafai e faasusulu atu le malamalama o Ana faataitaiga i lou olaga i lea aso ma lea aso, ma a o e molimau atu i isi ma fesoasoani ia i latou e aoao, ma mulimuli ia te Ia, o oe lava o se molimau a Iesu Keriso. E to atu e le Atua ia te oe le naunautaiga o lou loto ina ia faatasi atu ma i latou “ua talia le mau ia Iesu” (MFF 76:51) ma sa faamaoni ia latou molimau i o latou olaga atoa faaletino (tagai MFF 138:12).