O LE SUIGA MAOAE O LE FATU
Ina ua maea le aoga faatausimai, sa ou faigaluega ai lea i le vaega e tuu ai mai tigaina o le falemai o tamaiti. Sa i ai lou naunautaiga e aoao ma maua lou poto masani, ma faamaonia lou tagata. Ou te lei manatu lava o le a i ai sona faigata, ae peitai, sa matua faigata lava—mo le malosi faaletino ma le mafaufau. Ou te lei malamalama pe aisea ua matua amioleaga ai le lalolagi e oo lava i matua ua latou faaoo ni faaletonu tumau i a latou lava fanau. Ou te lei malamalama foi pe aisea ua faataga ai e le Atua tamaiti e maliliu. Ina ua maea lou tausaga e tasi na ou galue ai i le falemai, sa matua vaivai ma le lava lou agaga.
O lea na ou iloaina ai o loo faia ni lesona a nisi o lo matou aiga e ni faifeautalai o le Au Paia o Aso E Gata Ai. Sa ou galue i ni taimi uumi ma e le mafai ai ona ou i le fale i le taimi e faia ai ia lesona. E lei umi ae papatiso lou tuafafine ma lou tina. Ma sa ou lagona ai e peiseai ua tuua na o au ma ni fesili ma ni faafitauli e lei foiaina. E ui ina taumafai lou aiga e fuafua se taimi matou te feiloai ai ma faifeautalai, ou te lei manao ou te vaai ia i latou. Ae i se tasi aso ina ua asiasi atu Sisters Johnson ma Marchuk, sa ou auai i le latou talanoaga. I le isi taimi na sosoo ai, na la aoaoina mai ia te au se lesona faaleagaga, ma sa mafai ona ou mauaina tali i fesili sa matou tauivi mo se taimi umi. E lei umi ae ou papatiso ma faamauina au.
Talu nei ona avea au ma tagata o le Ekalesia a Iesu Keriso o le Au Paia o Aso E Gata Ai, ou te lagonaina lava le lagolagoina o au e lou faatuatua ia Iesu Keriso. Ua ou iloaina i le tele o taimi le mana o le tatalo ma ou lagona ai e pei ua ou aluese mai se mea pogisa i le malamalama. O lou ono tausaga i le Ekalesia ua ou mauaina ai le faamaoniga o Iesu Keriso o lou Faaola. Ma ona o Iesu Keriso, ua ou maua nei le avanoa ou te latalata ai i lou Tama Faalelagi.