O Nonoa E Fusia Ai
“Fai ma epikopo i lo’u nuu, ua faapea mai ai le Alii, e le o le igoa lava a o le galuega” (MFF 117:11).
“Eeeka … ou te le talitonu i lenei mea!” o le tala lea a Ryan ia te ia lava i luma o le faata. Sa tilotilo ifo o ia i itu le gatusa o lona fusiua. E afa itula lelei o tau fai lenei mea. O le a le faigata e oo i ai?
Sa tuitui mai Tina i le faitotoa o le fale taele. “Ryan?” sa valaau lemu atu ai o ia.
“Sau i totonu,” na oioi mai ai.
Sa ataata atu Tina ia te ia a o ia tatalaina le faitotoa. “O faafefea mai?”
“Faalelelei tele,” sa ia fai atu ai. “Maimau pe ana mafai ona ou faia ia foliga o le fusiua o Tama.”
Na vave oso ae ma toe aluese atu se faauu laitiiti i foliga o Tina. Na moomoo Ryan maimau pe ana ia le ta’ua Tama, ae sa leai se mea na mafai ona ia faia.
Sa feliuai e Tina ia itu o le fusiua. “E te manatu e mafai ona ta faia mai le tusitaulima a le Sikauti?” Sa alu o ia e sue mai le tusi.
Sa foliga mai o se mea faavalevalea ia Ryan le atoa o lona 12 tausaga ae na te lei iloa lava fusi se fusiua. Sa masani ona fusi e Tama mo ia. Ae o lenei ua tetea ia Tina ma Tama, ma ua nofo tama i le isi itu o le aai.
Sa toe sau Tina ma le tusi ua matala i se itulau. “Sei ou faataitai i ai?” o lana fesili lea.
“Ua lelei,” o le tala lea a Ryan, sa taumafai e tali faalelei atu i ai. E poto Tina, ae sa le tautaua o ia i ona tomai i le faiga o nonoa.
Sa nonoa e Tina se mea na foliga o se galuega faatino o mamanu e fai i pepa ona toe tatala lea o le ie silika ma toe fai foi. I le uma ai o se isi taumafaiga toilalo, sa mapuea leotele o ia.
E le’i umi, ae nanati mai Katie o le tuafafine matua o Ryan i totonu o le faletaele. “Ryan! O le a le mea ua tupu i lou fusiua?” sa ia fesili ai, e pei o lona fusiua o se meaola foliga ese.
“E leai se mea!” o le tala lea a Tina, ma toso le ie ia taatia lelei. “O mea uma lava.”
“O le a ou tuai,” o le tala lea a Ryan, ma taumafai e aua nei foliga o ita. Ae na ita o ia. O le aso muamua lenei na te tufaina ai le faamanatuga talu ona faauuina o ia o se tiakono, ae sa le lelei foliga o lona fusiua.
“Ia, e le mafai ona e tufaina le faamanatuga ma ni foliga faapena,” o le tala lea a Katie.
Sa tulei malie ese e Tina ia Katie mai le faletaele ona toe sau lea o ia i totonu. “E i ai lo’u manatu,” o lana tala lea.
Sa tilotilo atu Ryan ia te ia ma le le mautinoa.
“Ae a pe a e tamoe vave atu i le falesa ma fai i le epikopo pe mafai ona ia faia?”
I le epikopo? Auoi ta ma ae! Sa mafaufau Ryan e sili ai lona nofo i le fale nai lo le savali atu i le falesa ma uu atu lona fusiua ma alu atu i le epikopo i luma o tagata uma.
“Ou te iloa lava e fesoasoani o ia i taimi uma e fai le fusiua o Pita,” o le tala lea a Tina.
O Pita o le atalii lea o le epikopo. “Ailoga,” o le tala lea a Ryan. Sa faauu atu ona foliga i le faata ma toso le fusiua.
Ina ua taunuu atu Ryan i le faitotoa o le falesa, sa ia faalogo atu ua sosolo ae se vevela mumu o le ma i ona foliga. O a manatu o isi tama o le a i ai pe a latou vaai mai o ou fai i le epikopo? Aisea e le mafai ai e lona tina ona faia mo ia? Sa mafaufau o ia e toe foi. Ae na ta’u atu e se lagona filemu ae malosi ia te ia, e alu i totonu o le falesa ma o le a le afaina.
Sa manava tele o ia i totonu ma savali atu i le faitotoa. Na vave taunuu o ia, ma na tau leai ni tagata i totonu o le falesa vagana ai le ta piano ma ni nai tagata sa saofafai i le pito i luma. Sa i ai foi Epikopo Anderson sa punou i lalo i le faitauina filemu o ana tusitusiga paia. Na fetaui lava ma le ea ae o le epikopo ma iloa mai Ryan. Sa tuu i lalo ana tusitusiga paia ae savali mai i lalo. Sa faaloaloa atu lona lima.
“Malo, Ryan. Ua e fiafia e tufa le faamanatuga nei?” sa ia fesili ai.
“E, i ai si o’u faafitauli laitiiti,” o le tala lea a Ryan.
“Aua le popole. E popole uma tagata i le taimi muamua. Sa ou tu i le vae o se tamaitai a o ou matua e pei o oe. Na iu lava ina manaia.”
“E leai,” na fai atu ai Ryan, ma faalala atu lona fusiua.
“Oi. Sau ta o,” o le tala lea a le epikopo.
Sa o atu i laua i luma i le faapaologa. Sa faasino atu e le epikopo ia Ryan le faiga o le matasele i le ie, ma a o le’i maua e Ryan le taimi e mafaufau i ai, ae ua i ai sona fusiua foliga masani. Sa le’i ula Epikopo Anderson ia te ia, pe na faaali foi se uiga faapea ua leva na tatau ona e iloa fai lenei mea. Na te le’i faaalia foi se uiga o le faanoanoa mo Ryan.
“Ou te faafetai mo lou fai mai ou te fesoasoani atu mo lou fusiua,” o le tala lea a Epikopo Anderson a o la savavali atu i totonu o le falesa.
Sa luelue le ulu o Ryan. Sa ia lagona lava lona ma, ae sa le afaina tele ona ua uma ona fai lona fusiua.
Sa tuu e le epikopo lona lima i luga o le tauau o Ryan. “O le uarota lenei e pei lava o se aiga toatele, ma ou te lagona lava le fiafia pe afai o loo tausia lelei ia tagata o lo’u aiga.” Ona savali atu lea o ia i le pito i luma o le falesa.
A o tufaina e Ryan le faamanatuga, sa ia vaaia ni foliga masani ma ataata. Sa mafaufau o ia i le tala a le epikopo. O le uarota lenei e pei lava o se aiga toatele, ma o se aiga sa fiafia o ia e avea ai ma se tasi o i latou.