O mai e Faalogo i le Siufofoga o se Perofeta
O Le Malamalama o se Aso Fou
Sa faia sa’u fonotaga ou te manatuaina pea faatasi ma se alii sa avea ma se palemia. Sa ia vaaia le tele o feteenaiga ma faafitauli i ona taimi. Sa ia faamatalaina se tala manaia lava i se aoao Iutaia sa talanoa ma ni ana uo se toalua. Na fesili atu le aoao i le tasi o i laua, “E faapefea ona e iloa ua tuanai le po ae ua amata se aso fou?”
Na tali lana uo, “Pe a e vaai atu i le itu i sasae ma mafai ona e iloa le eseesega o se mamoe ma se oti, ona e iloa lea ua mavae le po ae amata le ao.”
Na fesiliga foi le uo lona lua i le fesili lava lea e tasi. Na tali o ia, “Pe a e vaai mamao atu ma mafai ona e iloa le eseesega o se laau olive mai se laau o le mati, ona e iloa ai lea ua oo mai le taeao.”
Ona la fesiligia lea o le aoao pe faapefea ona ia iloa ua mavae le po ae amata se aso fou. Na mafaufau o ia mo se taimi ona faapea atu lea, “Pe a e vaai atu i sasa’e ma iloa atu foliga o se tamaitai ma mafai ona [e] faapea, ‘O ia o lo’u tuafafine,’ ma pe a e vaai atu i sasa’e ma iloa atu foliga o se alii ma mafai ona [e] faapea, ‘O ia o lo’u uso,’ ona e iloa lea ua malamalama mai se aso fou.”
Mafaufau i lena faaupuga mo ni nai minute, au uo pele. O loo talanoa mai i le uiga moni o le usoga.
O le talalelei a Iesu Keriso e na o le pau lea o le elemene na te faatamaiaina le inoino o loo tulai mai i tagata. Afai latou te aumaia lenei talalelei i o latou olaga, o le a i ai se fua faatatau sili atu o le filemu i le lalolagi. O le mafuaaga lena ua outou i ai ma ou i ai iinei—ia aoao atu le talalelei a le Alii o Iesu Keriso ma pa’i atu i loto o tagata ina ia latou fetausiai o ni uso ma tuafafine, o ni fanau a lo tatou Tama oi le Lagi.
Mai se saunoaga na tuuina atu i le Iunivesite o Polika Iaga i le aso 31 o Oketopa, 2006, ma “O Afioga a le Perofeta Soifua,” Liahona, Tes. 1996, 8.
O MEA E MAFAUFAU I AI
-
I le tala, na faatusa e le aoao le alofa i le malamalama o se taeao fou. Aisea e aumaia ai e le talalelei le alofa i totonu o o tatou loto?
-
E faapefea ona e faasoaina atu le talalelei ma fesoasoani e aumaia le filemu i isi?
-
E faapefea ona e maua le filemu o le talalelei i lou lava olaga?