Lisi o Manatu

Ola Maloloina ma le Malosi

Ua outou silafia lava o le le gaoioi ma le taumafaina o meaai le lelei i taimi uma, e vaivai ai lou tino faaletino, e apo gofie e mai, ma e tau leai ai se malosi mo galuega ma mea faafiafia. E moni foi lena tulaga i lou agaga. O le eseesega o le, e ui ina o le a tuuina atu e le Atua ia te oe se tino atoatoa ma faamamaluina i le Toetu, ae o le agaga o le a nofoia lena tino o le a pei lava o le tulaga na e faia i ai (tagai Alema 34:34). O lea la, o ni nai fautuaga nei mo le atiina ae o le ola maloloina ma le malosi faaleagaga:

Taumafa Fuafua

• Ia maua se fiafia mo meaai faaleagaga. Ia tausami pea i tusitusiga paia, saunoaga o konafesi aoao, lesona i le Lotu ma le Seminare, ma isi meaai faaleagaga, ma o le a amata ona manaia le tofo ia te oe (tagai Alema 32:28).

• Ia matuai taumafa nai lo le ai tofotofo. O meaai faaleagaga, e mafai ona e ai tele ma sili atu ai lou malosi, ae le o le lapoa.

• Faaitiitia meaai e le maua ai se malosi. E faapei lava o le tele foi o vaiaiga e faaleagaina ai lou fiafia i se taumafataga maloloina o le afiafi, o le tele o le taimi e faaalu i taaloga i vitio, le Initoneti, Televise, ma isi lava, e laitiiti pe leai ai foi se taimi e te maua mo le taumafataga faaleagaga.

• Aua le taumafaina meaai mafu. Soo se mea lava e le fiafia ai le Agaga Paia e oona mo lou lava agaga. O Ponokarafi, faafiafiaga le mafaufau pe saua, ma musika le lelei ua na o ni mea oona lava.

• E maofa i le tele o le fafagaina faaleagaga o loo i ai i se tamai fasi falaoa se tasi ma sina miti se tasi o le vai, pe a e tagofia le faamanatuga ma le mafaufau loloto ma le agaga tatalo i se agaga o le salamo.

Faamalositino

• Tuu atu le auaunaga ma faaali atu le agalelei. O le siiina o isi tagata o se faamalositino lelei tele.

• Faapipio tulivae ia le itiiti ifo ma le faalua i le aso. O le tatalo e le aunoa e aoga mo le malosi faaleagaga.

• Ia tuuina atu lau molimau i taimi uma. E pei lava o se maso e faateleina lona malosi pe a faaaoga soo.