O Le Tusi o loo i ai Tali
A o ou matamata i se ata faamatala e faatatau i le togavao o le Amasone, na ou iloa ai, sa aoaoina e faifeautalai mai ekalesia eseese ia Tagata Moni o Amerika e uiga ia Iesu Keriso. Sa amata ona ou mafaufau i le faaolataga o le fia miliona o o latou augatama o e e le’i faalogo ia Iesu, le talalelei, po o sauniga faaola e pei o le papatisoga. Afai na maliu mai le Faaola mo le faaolataga o tagata uma, aisea la ua le aofia ai le toatele o tagata o le talafaasolopito mai Lana savali matagofie?
Sa ou saili mo tali i le Tusi Paia, ae ou te lei maua ai se mea o faapea mai na iloa e le Lalolagi Tuai ia ni tagata i Amerika. E leai se faifeau, tiakono, po o se Tusi Paia na mafai ona taliina au fesili.
I se tasi aso, sa faagaeetia lava au i se viiga na ou faalogo i ai. Sa ou aoaoina le viiga i lau lava gagana, o le faaPotukale, a o ou tauivi e faaliliu i le faaPeretania, sa ou manatuaina lo’u tuaoi o se tasi o le Au Paia o Aso e Gata Ai, o Jesuina, sa masani ona o mai faifeautalai Amerika i lona fale. Sa ou fesili ia te ia pe mafai ona faaliliu e faifeautalai lea viiga mo au. O le aso na sosoo ai, sa laua tuua ai le faaliliuga faatasi ma se faamatalaga puupuu na faitauina, “O se fiafiaga le mafai ona fesoasoani atu ia te oe. E i ai se aso ma te fia feiloai ai ia te oe.”
Ina ua matou feiloai ma faifeautalai i le vaiaso mulimuli ane, sa laua valaaulia au ou te asiasi atu i le la lotu. Ae ou te le’i fiafia i Mamona. O tagata o lo’u aiga ma taitai o isi ekalesia sa ou sailiili i ai, sa latou faitioina i latou, ma taua i latou o se faalapotopotoga leaga. Sa latou faia ni faitioga faavalevalea sa faapea ona ou talitonu ai e moni. Ae peitai, i se tasi Aso Sa timuga e le’i mamao atu, sa ou ala ae ma se naunautaiga tele e asiasi atu i le latou ekalesia—e toe tauia i laua mo lo la agalelei ae faapea foi ona o le fia iloa lava. I le taimi o le sauniga muamua, sa o atu tagata i le pulelaa ma molimau mai o le Ekalesia ma le Tusi a Mamona e moni, ma o Iosefa Samita o se perofeta a le Atua. Sa fai si ou le mautonu, ma sa ou tuua le sauniga ma ou alu atu i le Aoga Sa.
A tau e le faiaoga ia mau po o tala mai le Tusi Paia, sa ou fiafia lava e auai. Ae a talanoa loa e uiga i le Tusi a Mamona, sa ou fifilemu ma mafaufau loloto. Aisea ua i ai se isi tusi pe afai o lea ua i ai le Tusi Paia? Ae ou te le’i aluese, sa faafetai mai le faiaoga mo lo’u auai i talanoaga ma sa ou te’i i lona tuuina mai ia te au o lana kopi o le Tusi a Mamona.
Ina ua ou foi atu i le fale, sa ou alu i lo’u potu, tootuli i luga o le foloa, ma amata loa se talanoaga faamaoni ma le Tama Faalelagi. Sa ou tau atu ia te Ia, sa ou lagonaina se mea faapitoa e uiga i le Ekalesia Mamona, ae ou te le’i manao e faasee au e le fili. Sa ou tatalo ina ia fesoasoani mai o Ia e foia lo’u le mautonu ma faaali mai ia te au po o fea le ekalesia moni.
Ina ua uma lea, sa ou lagonaina se naunautaiga tele e faitau le Tusi a Mamona. Sa ou toe tatalo mo le malosi ma le taitaiga. I le taimi o la’u tatalo, sa ou lagonaina se lagona malosi ma le manaia—o se mafanafana i totonu. Sa ou iloaina sa le tuua na o au i lena taimi. Na oo mai se manatu i lo’u mafaufau i le taimi lava lena: “Faitau le tusi!”
Sa ou susueina ma amata loa ona faitau. Ao lei uma ona ou faitauina le folasaga, na amata ona tafe ifo ou loimata a o faaali mai e le Alii ia te au le mealilo e uiga i Tagata Moni o Amerika. Na foliga mai sa saunia faapitoa le Tusi a Mamona e tali i ou popolega. Sa ou lagonaina le olioli tele i le taliina o au fesili. Na pei lava na tautatala mai tagata Amerika anamua mai o latou tuugamau e tau mai ia te au e uiga i o latou olaga ma molimau mai sa latou iloaina foi Iesu Keriso ma sa tigaina foi o ia mo i latou.
I le maofa ai i mea na ou iloaina, sa ou sailia ai faifeautalai ma faalogo i a laua lesona. I le taeao o le Aso Sa o le Eseta, 31 o Mati, 1991, sa ou alu ifo ai i le vai o le papatisoga—o le filifiliga aupito sili lea ona lelei sa ou faia.
Ou te lagona le faafetai tele i le Tama Faalelagi mo Lona alofa tunoa ma le poto tele. Ou te iloa e faamaoni o Ia, ma Na te lei faagaloina se tasi o Ana fanau, ma o loo naunau o Ia e faaali mai Lana fuafuaga i tagata uma. Ou te iloa o le Tusi a Mamona o se tusi paia. E moni le [Tusi a Mamona].