MANATU MO AFIAFI FAALEAIGA

O nei manatu mo aoaoga e mafai ona faaaogaina i le potuaoga faapea foi i le aiga. E mafai ona e fetuunaia nei manatu i lou aiga po o le vasega.

“Faatulagaina o Mea e Tatau Ona Faamuamua,” i. 10: O le gaoioiga o loo taua atonu e aoga i le faamalamalamaina o le faatulagaina o mea e tatau ona ave i ai le faamuamua. Afai tou te pagatia ma lou aiga i le toafa, o a aitema e 10 o le a e manaomia? Afai tou te pagatia faaleagaga ma lou aiga, o a aitema e 10 o le a outou manaomia? Ia faatusatusa lisi e lua. Ia fetufaai ma lou aiga i le vaega “O Se Olaga e Faavae i Feagaiga.” Ia talanoaina le ala o le faamuamua o mea a le Atua e agatonu uma ai isi mea e tatau i ai le faamuamua.

“O Le Tusi a Mamona: O Le Punaoa Sili i le Filemu o le Faaola,” i. 18: Ia faaali atu se koneteina vaiinu, ma ia ofo atu i tagata o le aiga. Ia talanoaina le galala o o tatou tino mo le vai ma lagona ai le faafouina pe a uma ona inuina. Ia faatusatusa le vai i le Tusi a Mamona ma lo tatou galala mo le filemu ma le upumoni. I le faaaogaina ia aafiaga patino ma tala mai le tusiga, ia toe iloilo ia eria eseese lea e mafai ona tatou maua ai le filemu e ala i le faitauina o le Tusi a Mamona.

“O Le Lesona a le Aualofa Na Suia Ai Lo Matou Aiga,” i. 26: Faitau leotele le tala i le lesona a le Aualofa. Ia valaaulia lou aiga e fesoasoani atu ia te oe i le faia o ni lisi se lua, o le tasi e lisiina ai “gata feai ua felelei” o loo feagai ma lou aiga ma le isi e lisi ai auala e mafai ona tatou liliu atu ai i le Faaola mo le puipuiga. Ia talanoaina pe faapefea ona puipuia outou e aitema o le lisi lona lua. Ia molimau atu i auala ua mafai ai e le taulai atu i le Faaola ona e maua ai le malosi e tetee atu ai i gata feai ua felelei i lou olaga.

“O Nonoa e Fusia Ai,” i. U10: Faitau leotele le tala seia oo i le vaega lea na amata ai ona fautuaina e le tina o Ryan o ia e alu i le epikopo mo se fesoasoani. Fesili atu i tagata o le aiga mo ni manatu o mea e mafai ona fai e Ryan. Ia faamatala atu le vaega o loo totoe o le tala. Ia talanoaina ia lagona o Ryan ina ua ia iloaina o le uarota o lona aiga lea, ma na i ai iina le epikopo e fesoasoani atu ia te ia. Ia valaaulia tagata o le aiga e tusi ni faamatalaga e talisapaia ai lo outou epikopo po o le peresitene o le paranesi.