ප්‍රේමයෙන් සත්‍යය උගන්වන්න
අවසාන කාලයේ ක්‍රිස්තුස්වහන්සේගේ ගෝලයන්ගේ ප්රධාන ලක්ෂණය වන්නේ ප්‍රේමයෙන් යුතුව සත්‍යය ඉගැන්වීමයි.
හැඳින්වීම
සත්‍යය වෙනුවෙන් පෙනී සිටීමට ධෛර්යය අවශ්‍යයි. ප්‍රේමයෙන් සත්‍යය වෙනුවෙන් පෙනී සිටීමට ඊටත් වඩා ධෛර්යයක් අවශ්‍ය වෙනවා. සභාපති ඩැලන් එච්. ඕක්ස් මෙම පණිවිඩය නැවත නැවතත් අවධාරණය කර තිබෙනවා. පසුගිය ප්රධාන සම්මන්ත්‍රණයේ දී ඔහු එම අභියෝගය මෙසේ පැහැදිලි කළා, “අපි අපගේ පෞද්ගලික ජීවිතයේ සියලු අණ පනත් පිළිපැදීමට උත්සාහ කරන විට, එසේ නොකරන අයට අප ප්‍රේමයක් නොදක්වනවා යැයි සමහර විට අපට චෝදනා එල්ල වෙනවා. අපි පෞද්ගලික ආදරය පෙන්වන විට සහ ප්‍රේමනීය අරමුණු සඳහා සහයෝගය දක්වන විට, අපගේ … ආගමික යුතුකම්වලට පටහැනි ප්‍රතිඵල සඳහා සහයෝගය දැක්වීමක් ලෙස අපිව සමහර විට වරදවා වටහා ගනු ලැබෙනවා.”
අද මගේ පණිවිඩය සකස් කිරීමේ දී, සමහරු තෝරා බේරා සත්‍යය මත පමණක් රැඳී හෝ අනෙක් අය ප්‍රේමය මත පමණක් රඳා පවතිනු ඇතැයි මම කනස්සල්ලට පත්ව සිටිනවා. අන් අයගේ අඩුපාඩු පමණක් සමහරුන්ට පෙනී තමන්ගේ දුර්වලතා අමතක ඇති කියලා මම දුක් වුණා. මට මතකයි සභාපති රසල් එම්. නෙල්සන් සාමය ඇති කිරීම පිළිබඳ ඔහුගේ කතාව කළ විට, ඔහුගේ පණිවිඩය අවශ්‍ය යැයි මා සිතූ සෑම කෙනෙකුම මම මනසින් ලැයිස්තුගත කරන්න පටන් ගත්තා. ඉන්පසු ඔහු මෙසේ අවවාද කළා: “ඔබ දන්නා [වෙනත්] කෙනෙකුට මෙම පණිවිඩය සැබවින්ම උපකාරී වනු ඇතැයි ඔබ සිතනවා වෙන්න පුළුවන්. … නමුත්, ඔබ [ඔබේම] හදවත ගැඹුරින් විමසා බලා සාමය ඇති කරන්නෙකු වීම වළක්වන අහංකාරකමේ හෝ ඊර්ෂ්‍යාවේ යම් කොටස් ඔබතුළ තිබේදැයි ඔබ සොයා බලනු ඇතැයි මම බලාපොරොත්තු වෙනවා.”
අදත් මම එම ආරාධනාවම අප සැමටම සිදු කරනවා.
ප්‍රේමයෙන් යුතුව සත්‍යය වෙනුවෙන් පෙනී සිටීමේ මූලධර්ම පහක්
වසර කිහිපයකට පෙර මට එන්සයින් විද්‍යාලයේ කතාවක් කිරීමට පැවරුමක් ලැබුණා. ප්රධාන භක්ති වැඩසටහනේ කථිකයා වූයේ සභාපති ඕක්ස් වන අතර, දවසේ අභියෝගාත්මක මූලධර්ම මාතෘකා කිහිපයක් පිළිබඳව ඔහු සමඟ කතා කරන ලෙස ඔහු මගෙන් ඉල්ලා සිටියා. මෙය දුෂ්කර පැවරුමක් වුණා. විධිමත් ලිඛිත ප්‍රකාශ අපි භාවිතා නොකරන ලෙස ඔහු යෝජනා කළා. දැන්, අපි අනාගතවක්තෘවරයා අනුගමනය කරන බව මම දන්නවා, නමුත් සභාව වෙනුවෙන්, සමහරවිට අපි අඩුම වශයෙන් මා පැවසූ දේ ලියා තැබිය යුතු යැයි මම පැකිලීමකින්, යම් තරමක ලැජ්ජාවකින් යුතුව පිළිතුරු දුන්නා. ඔහු ඔහුගේ ස්ථාවරය ලිහිල් කළා, භක්ති වැඩසටහන මාතෘකාව වුණේ “සත්‍යය ප්‍රකාශ කිරීමේදී ප්‍රේමයෙන් ස්ථිරව සිටීම” යන්නයි. දේශනයේ දී, සභාපති ඕක්ස් අද දින තවත් විස්තර කිරීමට මා තුළ පැහැදීමක් ඇති කළ මූලධර්ම පහක් බෙදා ගත්තා.
1 මූලධර්මය: වඩාත් විවාදාත්මක පරිසරයන්ගෙන් වළකින්න
පළමුව, වඩාත් විවාදාත්මක පරිසරයන්ගෙන් වළකින්න. වැඩිහිටි නීල් එල්. ඇන්ඩර්සන් ප්‍රාකශ කළ විදිහට, “යම් අවස්ථාවල සාමය ඇතිකරන්නෙකු වීම යන්නෙන් අදහස් වන්නේ ප්‍රතිචාර දැක්වීමේ ආවේගයට අප විරුද්ධ වී, ඒ වෙනුවට ගෞරවාන්විතව නිහඬව සිටීමයි.”
ක්‍රිස්තුස්වහන්සේ සහ මහා විමර්ශකයා පිළිබඳ දොස්තයෙව්ස්කිගේ සාහිත්‍යමය විස්තරය සලකා බලන්න. නැවත නැවතත් හෙළා දැකීමෙන් පසු, ගැලවුම්කරුවාණන් තම චූදිතයා සිප ගත්තේ තවත් ප්‍රතිචාරයක් නොකරයි. අඩුවෙන් කිවහොත්, මෑතක දී ජාතික ශාස්ත්‍රීය නායකයින් පිරිසක් උසස් අධ්‍යාපනයේ ඇදහිල්ලේ කාර්යභාරය ආක්‍රමණශීලී ලෙස විවේචනය කළ විට මට මෙය දැනුනා. එම මොහොතේ වැඩිවන නොඉවසුම් ගතිය හඳුනා ගනිමින්, පවසන දේ සමඟ මගේ දැඩි විරුද්ධත්වයක් තිබුණ ද එම අවස්ථාවට පමණක් හෝ සාකච්ඡාව පසෙක තබන්න මම තීරණය කළා.
සමහර විට රීස්සුම් නැති අවස්ථාවන් නිසා කෙනෙකුගේ විරෝධතාවන්ට සැබවින්ම හේතුව කුමක්දැයි වටහා ගැනීම වඩාත් අපහසු වෙනවා. සභාපති නෙල්සන් මෙසේ ඉගැන්වූවා: “මිතුරන් සහ පවුලේ අය සභාවෙන් ඉවත් වුවහොත්, ඔවුන්ට දිගටම ප්‍රේම කරන්න. … ඔබට නොපෙනෙන ඔවුන්ගේ ජීවිත තුළ ඇති දේවල් මගින් සැකයන් ඇති කළ හැකි අය විසින් නොමඟ නොයන්න.” මට මතක් වෙන්නේ ඇනට් ඩෙනිස් සහෝදරියගේ තුවාල ලැබූ අසාමාන්‍ය ලෙස තම හිමිකරුට ප්‍රතිචාර නොදක්වන බල්ලෙක් ගැන කතාව. සමහර විට අපි සතුරුකම ලෙස දකින දෙය ඇත්ත වශයෙන්ම යමෙකුගේ සැඟවුණු වේදනාව හෝ පසුතැවිල්ල වෙන්න පුළුවන්.
එක් කලෙක අධ්‍යාත්මිකව ඇදහිලිවන්තව සිටි නමුත් දැන් සභාවට පහර දෙන මිතුරෙකු සමඟ මට මෙය දැකීමට නොහැකි වුණා. මගේ කලකිරීම ඇති වුණේ ඔහුගේ තිත්තභාවය නිසා පමණක් නෙමේ, ඒත් ඔහු ඊට වඩා හොඳින් දන්නා බව මා දැන සිටි නිසා. අවාසනාවට, ඒ මොහොතේ ඇති ආතතිය හෝ මා නොදකින යම් හේතූන් නිසා ඔහුට වේදනාවෙන් සිටිය හැකි බව හඳුනා ගැනීම වෙනුවට, මම කෝපයෙන් ප්‍රතිචාර දැක්වුවා. ඒ මොහොතේ මම විවාදය ජය ගත්තා වෙන්න පුළුවන්, නමුත් මට ආත්මයාණන් නැති වුණා. අසීරුතාවකට මුහුණ දෙමින් සිටි මගේ මිතුරාට උපකාර කිරීමට මට බැරි වුණා. ඒ දවසේ මම සත්‍යය වෙනුවෙන් පෙනී සිටියා, නමුත් මම ඒක කළේ ප්‍රේමය සහ දයාව නැතිවයි.
2 මූලධර්මය: පොදු පදනමක් සොයා ගන්න
ප්‍රේමයෙන් යුතුව සත්‍යය වෙනුවෙන් පෙනී සිටීමට දෙවන ක්‍රමයක් නම් පළමුව පොදු පදනමක් සොයා ගැනීමයි. ස්ටේක සභාපතිවරයෙක් වරක් දේවසේවා බැහැදැකීම් සඳහා දිගු ලැයිස්තුවක් මට ගෙනාවා. අපේ කාල සීමාවන් නිසා, මම ඔහුට එක නිවසක් පමණක් තෝරා ගැනීමට යෝජනා කළා. පාරිභාෂිකව ඔහු ඉල්ලීමට ගරු කළා. නමුත් අපි නිවසට පැමිණෙන විට, සම්පූර්ණයෙන්ම වෙනස් ආකාරයේ ගැටලු සහිත පුද්ගලයින් පස් දෙනෙකු, ඇතුළේ බලා සිටියා. මම මෙසේ ඇසුවා, “හොඳයි, ඔබ කොහෙන්ද පටන් ගන්න කැමති?” මම ඔවුන්ගේ කතාවලට සවන් දෙන විට, ඇතැම් විට බාධා කරන්න මට පරික්ෂාවක් ඇති වුණා, නමුත් ආත්මයාණන් මට බලා සිටීමට දිගටම පෙළඹවූවා. පැය දෙකකට ආසන්න කාලයක් සවන් දීමෙන් පසු, අපගේ මීළඟ රැස්වීමේ කාලය පසුවී, මට ඔවුන්ගේ අපහසුතා වඩා හොඳින් අවබෝධ වීමට පටන්ගත් අතර ඔවුන්ගේ හෘදයාංගම උත්සාහයන් දැනුණා. ඒ සැන්දෑවේ මම ඔවුන්ට ස්ටේක සම්මන්ත්‍රණයට පැමිණෙන ලෙස ආරාධනා කළ විට, ඔවුන් සෑම කෙනෙක්ම පිළිගත්තා.
මුලින්ම ප්‍රතිචාර දැක්වීමට ඇති වූ ආවේගය පාලනය කිරීමෙන් පොදු පදනමක් ගොඩනඟා ගැනීමට හැකි වූණා, එය පසුව ප්‍රේමය මුල් කරගෙන ඉගැන්වීමට මට ඉඩ සැලසුවා. ගැලවුම්කරුවාණන් සමඟ මෙන්, “අප ප්‍රේම කරන්නේ, උන්වහන්සේ [පළමුකොට අපට ප්‍රේම කළ] නිසාය.”
3 මූලධර්මය: ආලෝකයක් වන්න
තුන්වන මූලධර්මය වන්නේ ආලෝකයක් වීමයි. සභාපති නෙල්සන් මෙසේ ඉගැන්නුවා: “ඔබේ සැක සහිත මිතුරන්ට ඔබ ස්වාමින්වහන්සේට සහ උන්වහන්සේගේ ශුභාරංචියට කොපමණ ප්‍රේම කරනවා දැයි බැලීමට ඉඩ දෙන්න. ඔබේ විශ්වාස කරන හදවතින් ඔවුන්ගේ සැක සහිත හදවත් පුදුමයට පත් කරන්න!” තවත් කෙනෙකුට ඔවුන්ගේ ගිවිසුම් තබා ගැනීමට උදව් කිරීමට හොඳම ක්‍රමය ඔබගේ ගිවිසුම් තබා ගැනීමයි. ටමාරා රූනියා සහෝදරිය අපට මෙසේ මතක් කළා, “ගස ළඟට ගොස්, … ඔබ ආදරය කරන අයට දිගටම කතා කරන්න … එනම් පලතුර අනුභව කිරීම සතුටක් බව!”
අධ්‍යාපන ක්ෂේත්‍රයේ නායකයින් සමඟ ඇති වූ ආතති සහගත තත්වයක් පිළිබඳ කතාව මම මීට පෙර බෙදා ගත්තා. සමහරවිට මම ඒ මොහොතේ ඊට මැදි නොවන්න තීරණය කළ නිසා, පසුව විශ්ව විද්‍යාල කුලපතිවරයෙක් රටේ වඩාත්ම කීර්තිමත් අධ්‍යාපන ආයතනයක චරිතය පිළිබඳ පාඨමාලාවක් නිර්මාණය කිරීම සඳහා උපදෙස් ලබා ගැනීමට කතා කළා. ආලෝකයක් වීම, කිසිඳු තියුණු තර්කයකට කිසිදා කළ නොහැකි තරම් වැඩි දොරටු ප්‍රමාණයක් විවෘත කරනවා.
4 මූලධර්මය: අපගේ සමාජ සම්බන්ධතාවල දී පවා සත්‍යයට ඇලී සිටින්න
දැන්, සිව්වන මූලධර්මය නම් අපගේ සමාජ සම්බන්ධතාවලදී පවා සත්‍යයට ඇලී සිටීමයි. අප්‍රේල් මාසයේ දී සභාපති ඕක්ස් ප්‍රකාශ කළේ අන් අයට ප්‍රේමය පෙන්වීම කියන්නේ “අපගේ වටිනාකම් අත්හැරීම නොවන” බවයි. අප විසින් ඇති කරගත් ගිවිසුම්, සත්‍යය සහ වැරැද්ද අතර පවතින සදාකාලික තරඟයේ කැපවූ සහභාගිවන්නන් ලෙස අපව අනිවාර්යයෙන්ම ස්ථානගත කරනවා.
සභාපති ජෙෆ්රි ආර්. හොලන්ඩ් එසේම අපට මතක් කළා, “අපේ නූතන සංස්කෘතියේ බොහෝ දෙනෙකුට අමතක වී ඇති බවක් පෙනෙන්නට තිබෙන දෙය ජේසුස්වහන්සේ පැහැදිලිව අවබෝධ කරගත්තා: එනම් පාපයට සමාවදෙන ලෙස දුන් අණ පනත (උන්වහන්සේට කිරීමට අසීමිත හැකියාවක් තිබුණ) සහ එයට අනුබල දීමේ අනතුරු ඇඟවීම (උන්වහන්සේ විසින් කිසිවිටෙකත් එක වරක්වත් නොකළ) අතර තීරණාත්මක වෙනසක්” ඇති බවයි.
සභාපති හොලන්ඩ් මෙය තවදුරටත් සරල කරමින් මෙසේ පැවසුවා, “මට වැටහෙන තාක් දුරට, ක්‍රිස්තුස්වහන්සේ කිසිවෙකුගෙන් තම ප්‍රේමය කිසි දිනෙක අහිමි නොකළ සේක; එහෙත්, ‘මා ඔබට ප්‍රේම කරන නිසා මාගේ අණ පනත් පිළිපැදීමෙන් ඔබ නිදහස්ය’ යැයි උන්වහන්සේ කිසිවෙකුට කිසි දිනෙක නොපැවසූහ.’”
අපගේ අසල්වැසියාට ප්‍රේම කිරීම (දෙවන අණ පනත) කෙසේ හෝ දෙවියන්වහන්සේට ප්‍රේම කිරීමට (පළමු අණ පනත) වඩා ප්‍රමුඛතාවයක් ගන්නා බව සමහරු තර්ක කර තිබෙනවා. නමුත් සභාපති ඩී. ටොඩ් ක්‍රිස්ටෝෆර්සන් මෙසේ පෙන්වා දුන්නා: “පළමු අණ පනත පළමුවෙන් තැබීමෙන් දෙවන අණ පනත පිළිපැදීමට අපට ඇති හැකියාව අඩු නොවේ හෝ සීමා නොවේ. ඊට පටහැනිව, එය එම ආදරය තීව්‍ර කර ශක්තිමත් කරයි. … දෙවියන්වහන්සේ කෙරෙහි අප තුළ ඇති ආදරය, අන් අයව වඩාත් පූර්ණ හා පරිපූර්ණ ලෙස ප්‍රේම කිරීමට අපට ඇති හැකියාව ඉහළ නංවයි; මන්ද, උන්වහන්සේගේ දරුවන් රැකබලා ගැනීමේ දී අපි සැබවින්ම දෙවියන්වහන්සේ සමඟ හවුල්කරුවන් වෙනවා.”
දෙවියන්වහන්සේගේ නීති අවම කිරීමෙන් අන් අයට ප්‍රේම කිරීමට උත්සාහ කරන විට, අපි ඔවුන්ට වඩාත්ම ප්‍රේම කරන තැනැන්වහන්සේගෙන් අපව වෙන් කර ගන්නවා. කාමමිථ්‍යාචාරයේ යෙදී සිටිය දී අල්ලා ගන්නා ලද කාන්තාව කෙරෙහි ගැලවුම්කරුවාණන් ප්‍රේමය පෙන්වුවා. නමුත් උන්වහන්සේ ඇයට “යන්න, මෙතැන් පටන් තවත් පව් නොකරන්න” කියාද අණ කළා.
5 මූලධර්මය: ජේසුස් ක්‍රිස්තුස්වහන්සේ තුළ ස්ථීරව පිහිටා සිටින්න
සභාපති නෙල්සන් අනතුරු ඇඟවූයේ “[සතුරාගේ] පණිවිඩ ඝෝෂාකාරී, නිර්භීත සහ පුරසාරම් දොඩන” බවයි, නමුත් ස්වර්ගික පියාණන්වහන්සේ “සරලව, නිහඬව හා ඉතා පැහැදිලිව සන්නිවේදනය කරන්නේ අපට වරදවා වටහාගත නොහැකි ලෙසයි.” ක්‍රිස්තුස්වහන්සේ අප සඳහා මෙය පරිපූර්ණ ලෙස ආදර්ශයට ගත්තා.
එසේ නම් පස්වන මූලධර්මය නම් ජේසුස් ක්‍රිස්තුස්වහන්සේ තුළ ස්තීරව පිහිටා සිටීමයි. ප්‍රේමයෙන් යුතුව සත්‍යය වෙනුවෙන් පෙනී සිටීමට ඔබ වෙර දරන විට මෙම ක්‍රිස්තුස්වහන්සේ වැනි ගුණාංග රැගෙන යනවාදැයි ඔබෙන්ම අසන්න: “තවද දයාව බොහෝ කල් ඉවසයි, කරුණාවන්තයි, ඊර්ෂ්‍යා නොකරයි, උඩඟු නොවෙයි, ඇයගේම දේ නොසොයයි, පහසුවෙන් කෝප නොවෙයි, නපුර නොසිතයි, අයුතුකම ගැන ප්‍රීති නොවී සත්‍යය ගැන ප්‍රීති වේ, සියල්ල දරා ගනී, සියල්ල විශ්වාස කරයි, සියල්ල බලාපොරොත්තු වේ, සියල්ල විඳදරා ගනී.”
නිම කිරීම
ජේසුස් ක්‍රිස්තුස්වහන්සේගේ ගෝලයන් සඳහා, සත්‍යය සහ ප්‍රේමය සැමවිටම එකට ගමන් කරනවා. අවසාන කාලයේ ක්‍රිස්තුස්වහන්සේගේ ගෝලයන්ගේ ප්රධාන ලක්ෂණය වන්නේ ප්‍රේමයෙන් යුතුව සත්‍යය ඉගැන්වීම බව මම විශ්වාස කරනවා. සමහරුන්ට මේ සඳහා දැඩි විශ්වාසයක් අවශ්‍ය වනවා. තවත් සමහරුන්ට දැඩි දයාවක් ඉල්ලා සිටිනු ඇත. අපි ප්‍රේමයෙන් යුතුව සත්‍යය ඉගැන්වීමට උත්සාහ කරන විට ස්වාමින්වහන්සේ අපට උපකාර කරන බව මම දන්නවා. ජේසුස් ක්‍රිස්තුස්වහන්සේගේ නාමයෙන්, ආමෙන්.