ජේසුස් ක්‍රිස්තුස්වහන්සේ කෙරෙහි අපගේ ඇදහිල්ලෙන් උපදින ධෛර්යය
අපි හරි දේ තෝරා ගැනීමට අපගේ ධෛර්යය ප්‍රකාශ කරන විට, ක්‍රිස්තුස්වහන්සේ කෙරෙහි අපගේ ඇදහිල්ල ශක්තිමත් වෙනවා.
සභාවේ ප්රධාන නායකත්වයට රෝස්මරී චිබෝටා සභාපතිනියව අපි සාදරයෙන් පිළිගන්නවා. ඇගේ කතාව ජේසුස් ක්‍රිස්තුස්වහන්සේ කෙරෙහි ඇදහිල්ලෙන් උපන් ධෛර්යයේ උදාහරණයක්.
සිම්බාබ්වේහි පිහිටි ඇගේ නිවසේ දී, ධර්මදූතවරුන් විසින් තබා ගොස් තිබූ ජෝසෆ් ස්මිත් පිළිබඳ පත්‍රිකාවක් දහහත් හැවිරිදි රෝස්මරීට හමු වුණා. ඇය එය කියවූ අතර, එය සත්‍ය බවට වූ ආත්මික සාක්ෂියක් ඇයට වහාම ලැබුණා; ජෝසෆ් දෙවියන් වූ පියාණන්වහන්සේව සහ උන්වහන්සේගේ පුත්‍රයාණන් වන ජේසුස් ක්‍රිස්තුස්වහන්සේව දැක තිබුණා. ඇය ඉගැන්වීම් ලබා බෞතිස්ම වූ අතර, වසර 19කට පසුව සභාවට එක්වූ ඇගේ දෙමාපියන්ට ආදර්ශයක් බවට පත් වුණා.
ඇදහිල්ල සහ ධෛර්යය කියන්නෙ ජේසුස් ක්‍රිස්තුස්වහන්සේගේ ගෝලයන්ගේ ලක්ෂණ.
ජේසුස් ක්‍රිස්තුස්වහන්සේ තමයි දෙවියන්වහන්සේගේ දිව්‍යමය පුත්‍රයාණන්. උන්වහන්සේ ඉතාමත් නිහතමානී වාතාවරණයන් යටතේ පොළොවට පැමිණියා. උන්වහන්සේ පරිපූර්ණ ජීවිතයක් ගත කළා. අපගේ මැරෙනසුලු ජීවිත ගත කරන්නේ කෙසේද සහ අපගේ සදාකාලික ජීවිත සඳහා සූදානම් වන්නේ කෙසේද යන්න උන්වහන්සේ අපට ඉගැන්වූවා. අප සෑම කෙනෙකු කෙරෙහිම උන්වහන්සේ තුළ ඇති අසමසම ප්‍රේමය නිසා, අපගේ පාපයන් වෙනුවෙන් වේදනා විඳිමින්, අපට පසුතැවිලි වී සමාව ලැබීමට මග සලසමින්, උන්වහන්සේට පමණක්ම දිය හැකි වූ දීමනාවක් උන්වහන්සේ ලබා දුන්නා. උන්වහන්සේව කුරුසියේ ඇණ ගසනු ලැබූ අතර, අපගේ ස්වර්ගික පියාණන්වහන්සේගේ සැලැස්මේ තේජසින්, තුන්වන දින නැඟිටියා. උන්වහන්සේ සොහොන් ගෙයින් නැඟිටි නිසා, අපිත් මරණයෙන් නැවත නැඟිටිනු ලබනවා. අපගේ දෙවියන්වහන්සේගේ අරමුණු කෙතරම් උතුම් ද සහ අපගේ ගැලවුම්කරුවාණන් කෙරෙහි අපගේ ගෞරවය කෙතරම් අතිමහත් ද.
අධ්‍යාත්මික ධෛර්යය
උන්වහන්සේගේ සැබෑ ගෝලයෙකු වීම, ලෝකය ජය ගැනීම, උන්වහන්සේගේ අණ පනත් පිළිපැදීම, සහ උන්වහන්සේ සහ උන්වහන්සේගේ පොරොන්දු කෙරෙහි විශ්වාසය තැබීම සාමාන්‍ය ලුහුබැඳීම් නෙමේ. ආධ්‍යාත්මික ධෛර්යය කියන්නේ නිවැරදි දේ තෝරා ගැනීමේදී බාධක, සැකය සහ බිය ජය ගැනීමයි.
ජේසුස් ක්‍රිස්තුස්වහන්සේ කෙරෙහි ඇති විශ්වාසයෙන් උපන් අධ්‍යාත්මික ධෛර්යය, උන්වහන්සේගේ ගෝලයෙකු වීමට සැමවිටම අවශ්‍ය වී තිබෙනවා. මොරෝනායි මෙසේ ලිව්වා, “මම තනිව සිටිමි.” “මාගේ පියා [සහ මගේ පවුලේ සියලු දෙනාවම] සටනේදී මරා දමා ඇත්තේය, … තවද මට මිතුරන් හෝ යා යුතු ස්ථානයක් නොමැත.”
ඔහුගේ විරුද්ධවාදීන් ක්‍රිස්තුස්වහන්සේව ප්‍රතික්ෂේප නොකරන සියල්ලන් මරණයට පත් කරමින් සිටිය දී පවා, ඔහුගේ ධෛර්යයෙන් ඔහු මෙසේ ප්‍රකාශ කළා, “තවද, මම, මොරෝනායි, ක්‍රිස්තුස්වහන්සේ ප්‍රතික්ෂේප නොකරමි.”
අපගේ ලෝකය මොරෝනායිගේ යුගයට වඩා වෙනස් වුණත්, අනුගාමිකත්වය සඳහා සැමවිටම ධෛර්යය අවශ්‍ය වෙනවා. අපේ කාලයේ සැකයන්, අවධානය වෙනතකට යොමු කිරීම් සහ රැවටීම් ප්‍රේරිතවර පාවුල්ගේ වචනවලින් විස්තර කරන්න පුළුවන්: “අපේ පොරබැදීම වනාහී මාංසයට සහ රුධිරයට විරුද්ධව නොව, අධිපතිකම්වලටත් පරාක්‍රමධාරීන්ටත් මේ අන්ධකාරයේ ලෝක මුලාදෑනීන්ටත් එරෙහිවය.”
අපේ ලෝකය නිරන්තර කැලඹීමකට ලක්ව තිබෙනවා. අපේ දුරකථනය අපගේ අතටම සම්බන්ධ වී තිබෙන බවක් පෙනේ, එමඟින් තොරතුරු, වැරදි තොරතුරු සහ දැන් කෘතිම තොරතුරු රාශියක් ගෙන එනවා.
මම හැදී වැඩුණේ කුඩා කිරි ගොවිපලක. එක් කන්නයක් සඳහා අපගේ ගවයින් දුසිම් තුනක් කුඩා කැනිමය අසල රඳවා තිබුණා. ගිම්හානයේ සෑම උදෑසනකම පාහේ කිරි දොවා ගැනීමෙන් පසු, ජංගම දුරකථනයක්, ඉයර්බඩ් එකක්, සංගීතයක් හෝ කෙටි පණිවිඩ යැවීමකින් තොරව, මම මගේ අශ්වයාට සෑදලය දමා එළදෙනුන් තණ කෑම සඳහා උස් තණබිමකට ගෙන යනවා. දවස පුරාම, මගේ සිතුවිලි සමඟ තනිවම, මම සහ එළදෙනුන් විතරයි. කාලය වෙනස් වී තිබෙන නමුත් අපගේ ආත්මයන් වෙනස් වී නැහැ. ක්‍රිස්තුස්වහන්සේ කෙරෙහි අපගේ ඇදහිල්ල පෝෂණය කිරීමට අපට නිශ්චලතාවය අවශ්‍ය වෙනවා.
ඇදහිල්ල සහ ධෛර්යය
අපි ක්‍රිස්තුස්වහන්සේ කෙරෙහි ඇදහිල්ල තෝරා ගන්නා විට, සමහර විට ඉතා දුෂ්කර අවස්ථාවන්හි දී, නිවැරදි දේ තෝරා ගැනීමට උන්වහන්සේ අපට ධෛර්යයෙන් ආශිර්වාද කරන අතර, නිවැරදි දේ තෝරා ගැනීමට අප ධෛර්යය ප්‍රකාශ කරන විට, ක්‍රිස්තුස්වහන්සේ කෙරෙහි අපගේ ඇදහිල්ල ශක්තිමත් වෙනවා.
ලොව පුරා සිටින අපගේ සභාවේ සාමාජිකයන් වන ඔබ තුළ අපි දකින ජේසුස් ක්‍රිස්තුස්වහන්සේ කෙරෙහි ඇදහිල්ල සහ අධ්‍යාත්මික ධෛර්යය ගැන අපි ප්‍රීති වෙනවා.
අපගේ ස්වර්ගික පියාණන්වහන්සේට නිහතමානීව දණ ගසා යාච්ඤා කිරීමට අපට ආශාවක් ලබා දෙන්නේ ජේසුස් ක්‍රිස්තුස්වහන්සේ කෙරෙහි අපගේ ඇදහිල්ලයි. අපි අපගේ ස්වර්ගික පියාණන්වහන්සේ සමඟ පෞද්ගලිකව, ස්වාධීනව කතා කරන ඒ නිහඬ අවස්ථාවන්වල දී, නිවැරදි දේ තෝරා ගැනීමට අපට වැඩි ධෛර්යයක් ලැබෙනවා. තරුණ පිරිමි ළමයෙකු ලෙස, සභාපති ඩේවිඩ් ඕ. මැකේ මෙසේ පවසනවා මට ඇසුණා, “ජීවිතයේ ශ්‍රේෂ්ඨතම සටන සිදුවන්නේ ඔබේම ආත්මයේ නිහඬ කුටි තුළයි.” අපි ආත්මයේ සටන් නිර්භීතව ජය ගන්නා විට, අපගේ ගැලවුම්කරුවාණන් කෙරෙහි අපගේ ඇදහිල්ල වැඩි වෙනවා.
සෑම සතියකම අපි යාච්ඤාවෙන් පිරී සක්‍රමේන්තුව ලබාගෙන දෙවියන්වහන්සේ ඉදිරියෙහි සහ අන් අය ඉදිරියේ මෙසේ සාක්ෂි දරනවා, අපි “[ජේසුස් ක්‍රිස්තුස්වහන්සේගේ] නාමය [අප මතට] ගැනීමට කැමතිව, උන්වහන්සේව සෑමවිටම සිහිකිරීම පිණිසය, තවද උන්වහන්සේගේ එම අණ පනත් පිළිපැදීම පිණිස.” එවිට, ධෛර්යයෙන් යුතුව, අපි අපගේ ගිවිසුම් වලට ඇදහිලිවන්තව සිටින අතර, ඒ වෙනුවට, ස්වාමින්වහන්සේ අපට වැඩි ඇදහිල්ලකින් ආශිර්වාද කරනවා.
වගකීමක් භාර ගැනීමට ප්‍රමාණවත් හැකියාවක් හෝ කාලයක් නොමැති යැයි අපට හැඟෙන විට පවා, අපගේ පූජකවර නායකයන්ගෙන් ලැබෙන කැඳවීමක් පිළිගැනීමට අපට ධෛර්යය ලබා දෙන්නේ ජේසුස් ක්‍රිස්තුස්වහන්සේ කෙරෙහි අපගේ ඇදහිල්ලයි.
තරුණ නීතිඥයෙකු ලෙස, සභාපති ඩැලන් එච්. ඕක්ස්, සවස් කාලයේ සහ සෙනසුරාදා දිනවල වැඩ ඇතුළුව, කීර්තිමත් නීති සමාගමක ජවසම්පන්නව සේවය කරමින් සිටියා. ඔහුගේ ස්ටේක සභාපතිවරයා ඔහුව ස්ටේක ධර්මදූත සභාපතිත්වයේ උපදේශකයෙකු ලෙස කැඳවූ අතර, ඒ සඳහා සතියකට අවම වශයෙන් සවස් වරු තුනක් හෝ හතරක් වෙන් කිරීමට ඔහුට සිදුවුණා. සභාපති ඕක්ස් මෙසේ මෙනෙහි කළා, “මගේ සියලු ඇදහිල්ල එක්රැස් කරගනිමින්, මම කැඳවීම පිළිගත්තා.” සභාපති ඕක්ස් මෙය ඔහුගේ ජීවිතයේ ඉතා වැදගත් තීරණයක් ලෙස විස්තර කළා. ඔහුගේ ඇදහිල්ල ඔහුගේ ධෛර්යය ශක්තිමත් කළ අතර, ඔහුගේ තීරණය ඔහුගේ ඇදහිල්ල වැඩි කළා.
අනපේක්ෂිත අසනීප, මූල්‍යමය කරදර හෝ ස්වාභාවික විපත් අපගේ ජීවිතය උඩු යටිකුරු කරන විට, අන් අයට සේවය කිරීමට, ප්‍රඥාවේ වචනය ජීවත් වීමට, පතිවෘතාවේ නීතිය පිළිපැදීමට, සබත් දවස රැකීමට, අපගේ දසයෙන් කොටස දීමේ දී අවංක වීමට සහ අපගේ පියාණන්වහන්සේ සහ උන්වහන්සේගේ පුත්‍රයාණන් කෙරෙහි විශ්වාසය තැබීමට අපට ධෛර්යය දෙන්නේ ජේසුස් ක්‍රිස්තුස්වහන්සේ කෙරෙහි අපගේ ඇදහිල්ලයි.
මීට මාසයකට පෙර, නිවාස 800කට අධික සංඛ්‍යාවක් ගින්නෙන් විනාශ වූ වොෂින්ටන් හි ස්පොකේන් වෙත සභාපති ඩියේටර් එෆ්. උක්ඩ්‍රොෆ් සමඟ මම ගියා. සම්පූර්ණයෙන්ම විනාශ වූ අසල්වැසි ප්‍රදේශවල සාමාජිකයන් බලන්නට අපි ගියා. කෝඩි සහ හේලි වුඩ්බරි මට මෙසේ කිව්වා, “අපේ පවුල ආරක්ෂිතයි, අපේ ඇදහිල්ල ආරක්ෂිතයි. අපිට තව ගෙයක් හදන්න පුළුවන්.” ජේසුස් ක්‍රිස්තුස්වහන්සේ කෙරෙහි ඔවුන්ගේ ඇදහිල්ල ඔවුන්ගේ ධෛර්යය ඉහළ නැංවූ අතර, ඔවුන්ගේ ධෛර්යය ඔවුන්ගේ ඇදහිල්ල ඉහළ නංවා ඇත.
ලොව පුරා සිටින දස දහස් ගණනක් කැපී පෙනෙන තරුණ පිරිමි ළමුන් සහ ගැහැණු ළමුන්ගේ ඇදහිල්ල, ඉර නැගීමට පෙර නැඟිට සෙමනේරියට යාමට, පසුව ධර්මදූත සේවය කිරීමට සහ නැවත පැමිණි පසු විවාහ වී පවුලක් ආරම්භ කිරීමට ධෛර්යය ලබා දෙනවා. විවාහ වීමට නොහැකි අයට, ඔවුන්ගේ ධෛර්යය ඔවුන්ගේ ගිවිසුම්වලට ඇදහිලිවන්තව සිටීමට උපකාරී වෙනවා.
ක්‍රිස්තුස්වහන්සේ කෙරෙහි ඇදහිල්ලෙන් හා කැපී පෙනෙන ධෛර්යයෙන් යුතුව, තරුණ මවක් තම කුඩා දරුවන් සභාවට ගෙන ඒමට සූදානම් කරන්නේ, සමහර ඉරිදා දිනයන් අධ්‍යාත්මික අලුත් කිරීමකට වඩා පැවැත්මේ පොර බැඳීමක් වනු ඇති බව දන්නා නිසයි.
ගැලවුම්කරුවාණන් ගැන අන් අය සමඟ විවෘතව කතා කිරීමට, ස්වාමින්වහන්සේගේ ගෘහයේ ගිවිසුම් ඇති කර ගැනීමට, පසුතැවිලි වී සමාව ලබා ගැනීමට, ජීවමාන අනාගතවක්තෘවරුන් අනුගමනය කිරීමට සහ ශුද්ධාත්මයාණන්ගේ නිහඬ හැඟීම්වලින් මග පෙන්වීම ලැබීමට අපට ධෛර්යය ලබා දෙන්නේ ක්‍රිස්තුස්වහන්සේ කෙරෙහි ඇති අපගේ ඇදහිල්ලයි.
මෑතක දී දැඩි ඇදහිල්ලක් ඇති උතුම් කාන්තාවක් සභාවේ දී ඇගේ සාක්ෂිය බෙදාගත්තා. රහස්‍යව, ඇගේ සැමියාගේ පාවාදීම නිසා ඇය දැඩි ලෙස කම්පනයට පත්ව සිටි බව මම දැන සිටියා. නමුත් ඇයගේ ඇදහිල්ලෙන් උපන් ධෛර්යයෙන්, සතුටේ දී හෝ කිව නොහැකි ශෝකයේ දී, ඇගේ ගැලවීමේ පර්වතය වන ඇගේ ගැලවුම්කරුවාණන් වන ජේසුස් ක්‍රිස්තුස්වහන්සේ කෙරෙහි විශ්වාසය තබන බව ඇය බලවත් ලෙස ප්‍රකාශ කළා.
ක්‍රිස්තුස්වහන්සේ තුළ අපගේ බලාපොරොත්තුව ජීවමානව තියෙද්දී, ජීවිතයේ අභියෝගවලට මුහුණ දීමට සිදු වුවද, ප්‍රේරිතවර පාවුල් පැවසූ පරිදි, අපටත් “අපි හැම අතින්ම මඩිනු ලබමුව, එහෙත් හිර නොවී සිටිමුව; … වියවුල්ව, එහෙත් බලාපොරොත්තුවක් නැතුව නොවේය.”
පොරොන්දු සහ සාක්ෂි
ජේසුස් ක්‍රිස්තුස්වහන්සේව විශ්වාස කිරීමෙන්, අනුගමනය කිරීමෙන් සහ උන්වහන්සේගේ අන පණත් පිළිපැදීමෙන් ඔබ උන්වහන්සේ කෙරෙහි ඔබේ ඇදහිල්ල ශක්තිමත් කරන විට, ඔබේ පිළිතුරු ලැබෙනු ඇති බවත්, ඔබේ අධ්‍යාත්මික බලය වැඩි වන බවත්, සහ ක්‍රිස්තුස්වහන්සේව අනුගමනය කිරීම තුළ ඔබේ ධෛර්යය ඔබේ සදාකාලික ආත්මය නිර්වචනය කරන බවත් මම ඔබට පොරොන්දු වෙනවා.
ගැලවුම්කරුවාණන් ප්‍රකාශ කළා, “යමෙක් මට ප්‍රේමකරන්නේ නම්, ඔහු මාගේ වචනය රක්ෂාකරන්නේය. මාගේ පියාණන්වහන්සේද ඔහුට ප්‍රේම කරන සේක, අපි ඔහු ළඟට ඇවිත් ඔහු සමඟ වාසය කරමුව.”
උත්ථාන වූ ක්‍රිස්තුස්වහන්සේ ප්‍රේරිතවරුන්ට දර්ශනය වූ විට පේතෘස් සහ යොහන් කාමරයේ සිටියා. ජේසුස්වහන්සේ මෙසේ පැවසුවා, “මාගේ අත් පා බලා, ඒ මමම බව දැනගනිල්ලා. මා අතගා බලාපල්ලා.”
මෙම ශුද්ධ වූ අත්දැකීමෙන් ටික කලකට පසු, විශ්වාස නොකරන පාලකයන් ඇවිදීමට නොහැකි මිනිසෙකු සුව කිරීම සම්බන්ධයෙන් පේතෘස් සහ යොහන්ට මුහුණ දුන්නා. “ශුද්ධාත්මයාණන්ගෙන් පූර්ණව” ඔවුන්ගේ ඇදහිල්ලෙන් උපන් ධෛර්යයෙන්, පේතෘස් සහ යොහන් ප්‍රකාශ කළා: “[මේ මිනිසා] සුවකරනු ලැබුවේ කොයි විධියෙන්දැයි … අද අපි විභාගකරනු ලබමු නම්; නුඹලා විසින් කුරුසියෙහි ඇණගසන ලද්දාවූද දෙවියන්වහන්සේ විසින් මළවුන්ගෙන් නැඟිටුවන ලද්දාවූද නාසරිය ජේසුස් ක්‍රිස්තුස්වහන්සේගේ නාමයෙන්ම මේ මනුෂ්‍යයා නුඹලා ඉදිරියෙහි සුවපත්ව සිටීයයි … සියලු දෙනාම … දැනගනිත්වා.”
පුරාණයේ පේතෘස් සහ යොහන් මෙන්, මමත් “නාසරිය ජේසුස් ක්‍රිස්තුස් වහන්සේගේ” යථාර්ථයට සාක්ෂි දරනවා. උන්වහන්සේ ජීවමානයි. උන්වහන්සේ මෙම ශුද්ධ වූ කාර්යය, එනම් ජේසුස් ක්‍රිස්තුස්වහන්සේගේ නැවත පිහිට වූ ශුභාරංචිය මෙහෙයවනවා. ජේසුස් ක්‍රිස්තුස්වහන්සේගේ නාමයෙන්, ආමෙන්.