පොරොන්දුවේ ශුද්ධාත්මයාණන් මගින් මුද්‍රා කර ඇත
පූජකවර වත්පිළිවෙත් ලබා ගැනීම සහ පූජනීය ගිවිසුම්වලට ඇතුල් වීම අපේ හදවත්, මනසත්, ජීවිතත් දෙවියන්වහන්සේගේ කැමැත්තට අනුව පෙළගැස්වීමේ “ජීවිත කාලය පුරාම ගවේෂණයේ” අත්‍යාවශ්‍ය පියවර වෙනවා.
මම වසර ගණනාවකට පෙර සභාපති බොයිඩ් කේ. පැකර්ගෙන් වැදගත් පාඩමක් ඉගෙන ගත්තා. ඔහු මෙසේ කිව්වා:
“පුරවැසිභාවය නැතිනම් ජාතිය කුමක් වුනත්, පිරිමි හෝ ගැහැණු වේවා, කුමන රැකියාවක් කළත්, ඔබේ අධ්‍යාපනය කුමක් වුනත්, කෙනෙකු ජීවත් වන පරම්පරාව කුමක් වුනත්, ජීවිතය කියන්නේ දෙවියන්වහන්සේගේ අභියසට නැවත, අප හැමෝම ආපසු යන ගමනක්.
“උන්වහන්සේගේ අභියසට ඇතුළත් වීමට වත්පිළිවෙත් සහ ගිවිසුම් අපේ සහතික බවට පත්වෙනවා. ඒවාට සුදුසු ලෙස හිමිකම් කීම ජීවිත කාලය පුරාම ගවේෂණයක්; ඉන්පසු ඒවා තබා ගැනීම යනු මැරෙනසුලු බව හමුවේ ඇති අභියෝගයයි.”
ස්වර්ගික පියාණන්වහන්සේ වෙතට ගෙදර යන ගමනේ දී අපේ ආත්මික සහතික ලෙස වත්පිළිවෙත් සහ ගිවිසුම්වල වැදගත්කම සලකල බලන විට, ශුද්ධාත්මයාණන්වහන්සේ අප සෑම කෙනෙකුටම උපදෙස් දී ආලෝකමත් කරනු ඇතැයි මම යාච්ඤා කරනවා.
ගමන් බලපත්‍රය පිළිබඳ උපමාව
මම කෙටි කතාවකින් පටන් ගන්නම්. කලක මිනිසෙකුට දුර රටක සිටින පවුලේ සාමාජිකයන් බලන්න අවශ්‍ය වුණා. ඔහු තම ගමන සැලසුම් කර, තමන්ගේ ගමන් මල්ල ඇසුරුම් කර, සිය නෑයන් ජීවත් වූ නගරයට ගුවන් යානයෙන් ගමන් කළා.
ඔහු ඉතා උනන්දුවෙන් ගුවන් යානයෙන් බැහැලා විදේශ ගමන් බලපත්‍ර පාලන මුරපොළට ඇවිද ගියා. ඔහු සතුව ඔහුගේ රටේ රජයේ බලයලත් ආයතනයක් විසින් නිකුත් කළ වලංගු විදේශ ගමන් බලපත්‍රයක් තිබුණා. ඔහු තමන්ගේ විදේශ ගමන් බලපත්‍රය දේශසීමා නිලධාරියෙකුට ඉදිරිපත් කළා, ඔහු එම පුද්ගලයාගේ අනන්‍යතාවය, ජාතිකත්වයත් රටට පැමිණීමට හේතු ස්ථිර කළා. නමුත් ඒ මනුෂ්‍යයා තමාගේ විදේශ ගමන් බලපත්‍රය හොඳින් රැකබලා ගෙන තිබුණේ නැහැ. පුද්ගලික තොරතුරු පිටුව පැල්ලම් වැදිලා හානි වෙලා තිබුණා. ඉරුණු පිටුවකුත් අනවසර ආකාරයෙන් ටේප් හා මැලියම් දාලා අලුත්වැඩියා කරලා තිබුණා.
ඒකේ විපාකයක් වශයෙන්, දේශසීමා නිලධාරියා ඔහුගේ විදේශ ගමන් බලපත්‍රය ප්‍රතික්ෂේප කර ඔහුට රට තුළට ඇතුළු වීමට අවශ්‍ය මුද්‍රාව ලබා දීම ප්‍රතික්ෂේප කළා. එම මිනිසා කලකිරීමට පත් වී ඊළඟට කළ යුතු දේ ගැන හිතා ගන්න බැරි වුණා.
මේ කතාවෙන් උගන්වන පාඩම හරිම සරලයි: විදේශ ගමන් බලපත්‍රයක පූර්ණත්වය කාලයත් සමඟ පවත්වා ගත යුතු වෙනවා. වලංගු විදේශ ගමන් බලපත්‍රයක් තිබීම ඒ මිනිසාට රටට ඇතුළු වන්න අවස්ථාව සැපයුවා, ඒ වුණත් විදේශ ගමන් බලපත්‍රය පමණක් එකට ඔහුට රටට ඇතුළු වීමට ඇත්තටම අවසර ලැබීම සහතික කළේ නැහැ.
ඇත්තෙන්ම, මේ සරල උපමාවට සීමාවන් තිබෙනවා. භෞතික ගමන් බලපත්‍රයකට සිදුවන හානි වගේ නොව, අපේ වරදක් නැතිව අපට අත්විඳීමට සිදුවන විපත් සහ පීඩා, දෙවියන්වහන්සේ අපට දුන් පොරොන්දුවල වටිනාකම අඩු නොකරනව වගේම අපේ ගිවිසුම් ද අවලංගු නොකරනවා.
ගිවිසුම්, වත්පිළිවෙත්, සහ පොරොන්දු වූ ආශිර්වාද
ජේසුස් ක්‍රිස්තුස්වහන්සේගේ ගෝලයන්ට, පූජකත්ව වත්පිළිවෙත් ලබා ගැනීම සහ පූජනීය ගිවිසුම්වලට ඇතුල් වීම අපේ හදවත්, මනසත්, ජීවිතත් දෙවියන්වහන්සේගේ කැමැත්තට අනුව පෙළගැස්වීමේ “ජීවිත කාලය පුරාම ගවේෂණයේ” අත්‍යාවශ්‍ය පියවර වෙනවා.
ගිවිසුමක් කියන්නේ බැරෑරුම් පොරොන්දුවක්—දෙවියන්වහන්සේ සහ උන්වහන්සේගේ පුත්‍රයන් සහ දියණියන් අතර කල් පවතින කැපවීමක්. දෙවියන්වහන්සේ සියලු ශුභාරංචි ගිවිසුම්වල කොන්දේසි තහවුරු කරනවා, උන්වහන්සේගේ දරුවන් උන්වහන්සේ ඔවුන්ගෙන් ඉල්ලා සිටින දේ ගැන ඉගෙන ගන්න හා ඒවාට එකඟ වන්න ඔවුන්ගේ සදාචාරාත්මය තෝරාගැනීමේ නිදහස ක්‍රියාත්මක කරනවා.
ගිවිසුම් ලැබෙන්නේ පූජනීය වත්පිළිවෙත් හරහා. වත්පිළිවෙතක් කියන්නෙ පූජකවරයේ අධිකාරි බලය විසින් සිදු කරන ශුද්ධ වූ ක්‍රියාවක් වනවා. එයට අධ්‍යාත්මික අරමුණක් සහ සදාකාලික වැදගත්කමක් තියෙනවා වගේම, එය දෙවියන්වහන්සේගේ නීති සහ ව්‍යවස්ථාවන්ට සම්බන්ධ වෙනවා. අපගේ ජීවිත තුළ අප පිළිගන්නා ගිවිසුම්වල ස්වභාවය පිළිබඳවත් වත්පිළිවෙත් අපට උගන්වනවා.
ගැලවුම්කරුවාණන්ගේ නැවත පිහිටුවන ලද ශුභාරංචියේ ගිවිසුම් සහ වත්පිළිවෙත්, අපේ ජීවිතවලට දිව්‍ය අරමුණ, මඟ පෙන්වීම, සහ ශක්තිය ලබා ගැනීමේ අවස්ථාවෙහි ස්වර්ගීය කවුළු පුළුල් ලෙස විවෘත කළ හැකි අධ්‍යාත්මික සාක්ෂිපත්‍ර වෙනවා. ජේසුස් ක්‍රිස්තුස්වහන්සේගේ ශුභාරංචියේ නීති හා වත්පිළිවෙත්වලට කීකරු වීම ඇතුළුව, ගිවිසුම්වලට ගරු කිරීම වෙනුවෙන් දෙවියන්වහන්සේ උන්වහන්සේගේ පුතුන්ට සහ දියණියන්ට දිව්‍යමය ආශිර්වාද පොරොන්දු වනවා. එම සහතික වලංගු වන්නත් පොරොන්දු වූ ආශිර්වාද ලබන්නත් අඛණ්ඩ ඇදහිලිවන්තකම අවශ්‍ය වෙනවා.
ශුද්ධාත්මයාණන් පොරොන්දුවේ ශුද්ධාත්මයාණන්ය.
ශුද්ධාත්මයාණන් දේවශීර්ෂයේ තුන්වන සාමාජිකයා වෙනවා. උන්වහන්සේ ආත්මික පුද්ගලයෙක්, සෑම සත්‍යයක් ගැනම සාක්ෂි දරනවා, පියාණන්වහන්සේ සහ පුත්‍රයාණන් වෙනුවෙන් සාක්ෂිකරුවෙකුත් පණිවිඩකරුවෙකුත් වෙනවා.
ශුද්ධ ලියවිල්ලේ ශුද්ධාත්මයාණන් පොරොන්දුවේ ශුද්ධාත්මයාණන් ලෙසත් විස්තර කර තිබෙනවා, එතුමන් දෙවියන්වහන්සේගේ දරුවන්ගේ ධර්මිෂ්ඨ ක්‍රියාවන් පිළිගත හැකි බවට තහවුරු කරනවා. අවසාන වශයෙන්, සියලුම ශුභාරංචි වත්පිළිවෙත් සහ ගිවිසුම් පොරොන්දුවේ ශුද්ධාත්මයාණන් විසින් මුද්‍රා තැබිය යුතු වෙනවා. ස්වාමින්වහන්සේ අනාගතවක්තෘ ජෝසෆ් ස්මිත්ට හෙළි කළ පරිදි, “සියලුම ගිවිසුම් … පොරොන්දුවේ ශුද්ධාත්මයාණන්වහන්සේ මගින් මුද්‍රා වී සහ ඒවා තබා ඇතුළත් නොවූයේ නම් … ඒවාට කිසිදු සඵලත්වයක්, යහපත්කමක්, හෝ මරණයෙන් නැවත නැගිටීමේදී සහ ඉන්පසු බලයක් නොමැත්තේය.”
පොරොන්දුවේ ශුද්ධාත්මයාණන් විසින් මුද්‍රා තැබූ විට, නියෝගයක්, භාරයක් හෝ ගිවිසුමක් පොළොවෙහි සහ ස්වර්ගයෙහි බැඳී පවතිනවා. මෙම මුද්‍රාව මැරෙනසුලු බව තුළ කොන්දේසි සහිත වන අතර අධර්මිෂ්ඨකම නිසා කැඩී යා හැක හෝ අහිමි වෙන්න පුළුවන්.
ශුද්ධාත්මයාණන් විසින් මෙම අනුමත කිරීමේ මුද්‍රාව ලබා ගැනීම සාමාන්‍යයෙන් එක් වරක් සිදුවන සිදුවීමක් නොවේ; ඒ වෙනුවට, අපි අවංකව හා නිරන්තරයෙන් පසුතැවිලි වන විට, අපගේ ගිවිසුම්වලට ගරු කරන විට, සහ අපගේ හදවත් දෙවියන් වහන්සේට භාර දෙන විට, එය කාලයත් සමඟ පැමිණෙනවා. සභාපති පැකර් විසින් විස්තර කරන ලද පරිදි, “මරණීයත්වයේ අභියෝගය” මෙම ආශිර්වාදය ධර්මිෂ්ඨ ලෙස සෙවීමයි.
මගේ විදේශ ගමන් බලපත්‍ර කතාවේ මිනිසාට විදේශ රටකට ඇතුළු වීමට ඔහුගේ විදේශ ගමන් බලපත්‍රයේ බලයලත් මුද්‍රාවක් අවශ්‍ය වුණා මෙන්, ගැලවුම්කරුවාණන්ගේ ශුභාරංචියේ ගිවිසුම් හා වත්පිළිවෙත් සමඟ සම්බන්ධ සදාකාලික ආශිර්වාද ලබා ගැනීම සඳහා අප සෑම කෙනෙකුටම පොරොන්දුවේ ශුද්ධාත්මයාණන්ගේ තහවුරු කරන සාක්ෂිය අවශ්‍ය වෙනවා.
“ස්වාමින්වහන්සේගේ සියලු ආඥා හා විධිවිධාන අනුව ගමන් කිරීමටත්,” පොරොන්දු වූ සියලු ආශීර්වාද සහතික කරන තහවුරු කිරීමේ මුද්‍රාව “කාලයාගේ ඇවෑමෙන්” ශුද්ධාත්මයාණන් මාර්ගයෙන් ලබා ගැනීමටත් ලැබෙන ශුද්ධ වූ අවස්ථා වෙනුවෙන් අප සෑම කෙනෙකුම නිරතුරුවම කෘතඥ විය යුතු වෙනවා.
මුද්‍රා තැබීමේ වත්පිළිවෙත
ස්වාමින්වහන්සේගේ ගෘහයේ පුරුෂයෙකු සහ ස්ත්‍රියක් මුද්‍රා තැබීම ගැලවුම්කරුවාණන්ගේ නැවත පිහිටුවන ලද ශුභාරංචියේ ඔටුනු පළඳවන ගිවිසුමක් සහ වත්පිළිවෙතක් වෙනවා. වැදගත්ම දෙය නම්, පොරොන්දුවේ ශුද්ධාත්මයාණන් විසින් මුද්‍රා තැබීමේ වත්පිළිවෙතක් මුද්‍රා කිරීමේ ධර්මීය වැදගත්කම වටහාගැනීම, එක්තරා දුරකට, වෙනත් කෙනෙකුගේ තීරණ නිසා ඇදහිලිවන්ත ගිවිසුම් රකින්නෙකුගේ සදාතනික ආශිර්වාද අහිමි වනවා ද, වැනි ඉතා පෞද්ගලික ප්‍රශ්නවලට පිළිතුරු ලබා දෙනවා.
මුද්‍රා තැබීමේ වත්පිළිවෙතට මූලික හා බද්ද කොටස් දෙකක් ඇතුළත් වෙනවා: (1) විවාහයේ දී පුරුෂයෙකු සහ ස්ත්‍රියකගේ සදාකාලික එකමුතුව—එය පාර්ශ්වීය මුද්‍රාවක් ලෙස තේරුම් ගන්න පුළුවන්—සහ (2) ස්වාමිපුරුෂයා සහ භාර්යාව දෙවියන්වහන්සේගේ සදාකාලික පවුලට මුද්‍රා තැබීම සහ සියලු පරම්පරා හරහා මිනිස් සංහතිය සම්බන්ධ කිරීම—එය සිරස් මුද්‍රාවක් ලෙස තේරුම් ගන්න පුළුවන්. වත්පිළිවෙතේ අංග දෙකම ඉතා වැදගත්.
පුරුෂයෙකු හා ස්ත්‍රියක් අතර දේවමාළිගාව මුද්‍රා තැබීමේ අපේක්ෂිත හා යාච්ඤා-කරන ලද ප්‍රතිඵල අතරට ජීවිත කාලය පුරාම අධ්‍යාත්මික වර්ධනය, විවාහ කැපවීම, විශ්වාසවන්තභාවය, මරණීය බවේ අවිනිශ්චිතතාවයන් සහ අභියෝග ජය ගැනීමට එකට එක්ව වැඩ කිරීම සහ කල් පවතින සතුට ද ඇතුළත් වෙනවා.
සමහර විට, අවාසනාවට, අපේක්ෂිත සහ ප්‍රාර්ථනා කරන ප්‍රතිඵල සිදු වෙන්නේ නැහැ. අඹුසැමියෙකුගේ පාප, ද්‍රෝහිකම, පුද්ගලික ඇදහිල්ල අත්හැරීම හෝ වෙනත් දුෂ්කරතා නිසා මතභේද, විරසක වීම, ඒ වගේම දික්කසාද වීමට පවා හේතු වෙන්න පුළුවන්. මෙවැනි අවස්ථාවල දී, ඇදහිලිවන්ත සැමියා හෝ බිරිඳ මෙසේ අසන්නට පුළුවන්, “තවත් පුද්ගලයෙකු අධර්මිෂ්ඨ ලෙස තෝරාගැනීමේ නිදහස භාවිත කිරීම නිසා දෙවියන්වහන්සේ විසින් පොරොන්දු කර ඇති දේ මට අහිමි වන්නට පුළුවන් ද?” මෙම ප්‍රශ්නයට පිළිතුර බලවත් නැහැ කීමක්!
අඹුසැමියෙකුගේ නුසුදුසු ක්‍රියාවන් නිසැකවම අනෙක් පුද්ගලයාට සහ පවුලේ සාමාජිකයින්ට සිත් වේදනාවක් සහ ශෝකයක් ගෙන දෙනවා. ඒත්, එක් පුද්ගලයෙකු විසින් කරන අධර්මිෂ්ඨකමට දෙවියන්වහන්සේගේ ප්‍රේමය, ශක්තිය සහ ආශිර්වාද තවත් පුද්ගලයෙකුට ගලා ඒම බාධා කිරීමට හෝ වළක්වා ගන්න බැහැ. ස්වාමින්වහන්සේගේ අනන්ත හා සදාකාලික වන්දිගෙවීමේ බලයට, උන්වහන්සේ සමඟ ඇති කරගත් ගිවිසුම් තදින් අල්ලාගෙන සිටින සෑම පුද්ගලයෙකුටම, සෑම විටම, සෑම තැනකම සියල්ල ජය ගත හැකි වෙනවා.
ගිවිසුම් කඩ කරන සහ පසුතැවිලි නොවන සැමියා හෝ බිරිඳ, මුද්‍රා තැබීමේ නියෝගයේ පාර්ශ්වීය සහ සිරස් අංශ දෙකටම පොරොන්දුවේ ශුද්ධාත්මයාණන්ගේ සහතික කිරීමේ මුද්‍රාව ලබා ගැනීමේ අවස්ථාව අත්හරිනවා.
ගිවිසුම්වලට ගරු කරන සහ ඇදහිල්ලෙන් ඉදිරියට යන විශ්වාසවන්ත අඹුසැමියෙකු, මුද්‍රා තැබීමේ නියෝගයේ සිරස් අංගය සඳහා පොරොන්දුවේ ශුද්ධාත්මයාණන්ගේ තහවුරු කිරීමේ මුද්‍රාව තමාට හෝ ඇයට ලැබීමට සහ ඒ හා සම්බන්ධ අනෙකුත් සියලුම පුද්ගලික ආශිර්වාද ලබා ගැනීමට සුදුසු වෙනවා.
“දේවමාළිගා විවාහයක් කල් පවතින්නේ නැත්නම් මෙය කෙසේ විය හැකි ද?” යනුවෙන් ඔබ අසන්න පුළුවන්.
ජේසුස් ක්‍රිස්තුස්වහන්සේගේ පසුදවස්වල ශුද්ධවන්තයන්ගේ සභාවේ එළිදරව් කරන ලද මූලධර්මයේ එවැනි අවස්ථා පිළිබඳ සියලු විස්තර සහ සියුම් කරුණු ආමන්ත්‍රණය කරන්නේ නැහැ. පොරොන්දු වූ ආශිර්වාද ලැබෙන්නේ කෙසේ ද සහ කවදා ද යන්න මම හරියටම දන්නේ නැත, ඒ වගේම මට එය පැහැදිලි කරන්න බැහැ. නමුත් පොරොන්දු වූ ආශිර්වාද ලැබෙන බව මම දන්නවා. වෙනත් පුද්ගලයෙකු අධර්මිෂ්ඨව තෝරාගැනීමේ නිදහස භාවිතා කිරීම නිසා, දෙවියන්වහන්සේගේ කිසිම විශ්වාසවන්ත ගෝලයෙකුට පොරොන්දු වූ සදාකාලික ආශිර්වාදයක් අවසානයේ අහිමි වන්නේ නැහැ.
මොර්මන්ගේ පොතේ බෙන්ජමින් රජු දුන් සැනසිලිවන්ත සාක්ෂියෙන් මම අවසන් කරන්නම්: “දෙවියන්වහන්සේගේ අණ පනත් පිළිපදින්නාවූ අයගේ ආශිර්වාදමත් හා සන්තෝෂවත් ස්වභාවය පිළිබඳ නුඹලා සලකා බලනවාට මම කැමතියි. මක්නිසාද බලන්න, ඔවුන් ලෞකික හා අධ්‍යාත්මික යන සෑම දෙයකදීම ආශිර්වාද ලබා තිබෙනවා; තවද ඔවුන් අවසානය දක්වා ඇදිහිලිවන්තව සිටින්නේ නම් ඔවුන්ව ස්වර්ගය තුළට ලබාගන්නේය, එනම් එමගින් ඔවුන් දෙවියන්වහන්සේ සමඟ නිමක් නැති සතුටකින් වාසය කරනු ඇත්තේය. අහෝ, එනම් මෙම දේවල් සත්‍ය බව මතක තබාගන්න, මතක තබාගන්න; මක්නිසාද දෙවි වූ ස්වාමීන්වහන්සේ එය පවසා ඇති සේක.”
ස්වාමින් වන ජේසුස් ක්‍රිස්තුස්වහන්සේගේ ශුද්ධ වූ නාමයෙන් මෙම සත්‍යයන් ගැන මම ප්‍රීතියෙන් යුතුව සාක්ෂි දරනවා, ආමෙන්.