Uouotan Aran Iesu Kristo

Iroun Unimwaane Dale G. Renlund

Man te Kooram n Abotoro n te Tengaun ma Uoman

Rakan aron reitakira ma Iesu Kristo ao ururingana, bon rakan riki nanora n tangiria n kan riki n ai Arona.

Inanon 2018, n te University i Utah, e karaoaki te nakoa n burobeetia ae raka arona n aranaki bwa “Dr. Russell M. Nelson ao Dantzel W. Nelson Presidential Chair in Cardiothoracic Surgery”—cardio, nanona buro, ao thoracic, nanona bwabwaa. E karinea kakawakin ana mwakuri Beretitenti Nelson ae te tia korokoro n te buroo ao te boutoka are e a tia n karekea maiiroun buuna are e tia n motirawa, Dantzel. Te nakoa n burobeetia aio e kabwakaaki mwanena man te mwane ae e a tia arona n barongaaki are e reitinako n karokoa taai rimwi. Te aomata are e rineaki nakon te nakoa n burobeetia ae raka arona aio e na karekea kinakina, ana bwakabwai, mwaane ibukin taian mwakuri n kakae.

Te moan tia korokoro ae rineaki ae taua te nakoa n burobeetia bon Dr. Craig H. Selzman, te tia korokoro n te buroo ae rang mwaatai are tiaki ngaia kaain ara ekaretia. N te bootaki are e na kanuanganaki n te nakoa n burobeetia Dr. Selzman, a rawata iruwaa aika kakawaki ake a roko, n raonaki ma Beretitenti Nelson ao kainabana Titita Wendy W. Nelson. Inanon tain te boowi, Beretitenti Nelson e taetae iaon arona n moan waakina nakoana n tia korokoro.

Ngkanne Dr. Selzman e tibwaia bwa tera ae nanonaki irouna ngkai e rineakina nakon te nakoa ni bubobeetia aio. E taekinna bwa abong i mwaina, i mwiin abwabwakin ana bong i nanon te ruu n korokoro, e kunea bwa temanna ana aoraki e tangira te manga korokoro riki. E kua man aki kukurei, n ataakin ae e na manga kabanea naba teuana riki te tairiki n onaoraki.

N te tairiki aei. E karaoa te marooro Dr. Selzmani bon irouna ae bita-maiuna. N te tai anne, e iangoia, “N te Kanimabong, N na rineaki nakon te nakoa n burobeetia are e aranaki n aran Dr. Nelson. E kinaaki n taainako bwa te aomata ae e aki kakaota ana namakin, e karineia aomata ni bane, ao e aki unuun. Ngkai e nang tomaaki arau nakon arana, N na kataia n riki n ai arona.” Dr. Selzman bon te tia korokoro ae rang bobo ma aomata. Ma e tangiria bwa e na karekea ae tamaroa riki.

Mai imwaina, kain ana tiim ni korokoro a ata aron kuana ma kainnanona bukina bwa e kakaotia n aroarona ma tein bwanaana. Ma n te ruu ni korokoro n te tairiki anne, Dr. E taua ma nanona Selzman ni mwakuri korakora n rang boutoka ma te ataatai nakoia kain ana tiim. E namakina te kaokoro ao n motikia bwa e na reitinako n kataia n riki n ai aron Dr. Nelson.

Nimaua te ririki i mwiina, e anga ana beebwa n rabakau Beretitenti Nelson nakon te University i Utah. Aomata aika rine man te reirei aei a roko n karabwa Beretitenti Nelson. N te bootaki aei, E manga taetae riki Selzman. N taekinan kauarerekean aran Beretitenti Nelson ae, RMN, e taku, “Iai anuan RMN ae e a rinnakoa ngkai Mwaangan te Korokoro i aon Bwain Nanon te Rabwata n te University i Utah.”

N taai aika a kaun Dr. Selzman e kabwarabwara, “I karaoa ngkai ae ti reiakiniia aika a tibwa kakataneiai—kabanei ami iango iai, katokanikaiko iaona ao karaoa am kabanea n tamaroa. Te anua aio e mwakuri inanora ni katoa bong. Ti anga kanikinaa nakoia ni kabane kain ara mwaanga ao ake a tibwa kakataneiai. N tabon te biin mai nano ao e mwakoro ‘RMN.’ Te anua n RMN bon aan ara kataneiai; ti reiakinna nakoia aomata ni kabane.” Dr. Selzman e a tia mai nanona bwa e na katamaroa anuana are mai imwaina ma ana kantaninga bukina ngkai arana e a tomaaki ma aran Beretitenti Nelson.

Waaki aikai are e a mena i nanon Dr. E kaira au iango Selzman bwa N na titirakinai i bon irou, “Tera te bitaki irou ae riki imwiin toomakin arau ma aran Iesu Kristo?? I a tia n karekea anuan Kristo imwiin anne? I a tia n kabanea au konaa ni katamaroa ni kona n riki n ai Arona?”

N ana taneiai Dr. Selzman, ti kona n noori nimaua aanga ibukin mwakuriian arora n katokaa iaora aran Iesu Kristo. E ngae ngkana te mwakuri anne e moa man te bwabetito, e bon aki tabwanin ni karokoa ti riki n itiaki man tabu ao n riki n ai Arona.

Te moan kawai bon waakin kinaakira. Rinean Dr. Selzman nakon te nakoa n burobeetia n aran Nelson e reita arana nakon aran Beretitenti Nelson, ao Dr. Selzman e waaki kinakina ma Beretitenti Nelson. Ngkana ti katokaa i aora aran Iesu Kristo, ti katomaa arara ma Arana. Ti waaki ni kinaira ma Ngaia. Ti kukurei n riki bwa Kiritian. Ti butimwaea te Tia Kamaiu ao n ninikoria n tei man warekaki bwa Ana aomata.

N reitan waakin kinaakira ao teuana riki te anga bon—te ururing. Ngke Dr. Selzman e rinnako n ana aobiti, matana a katikaki nakon ana meetera are e karekea ngke e rineaki nakon te nakoa n burobeetia n aran Nelson. Te meetera aio e kakauringnga ni katoabong te anua n RMN. Iroura, kanakin te toa ni katoa wiiki e buokiira ni kauringiira taekan Iesu Kristo inanon te wiiki. Ngkana ti kana te toa, ti karaoia ni kauringa boon kamaiuakira are E kabooa. Ti kabooui ara berita n Ururingnga, kinaa Korakorana, ao n kakaitau n Tamaroana. Ti kaokioka ara kakaitau bwa bon ti rinanon Ana akoi ao ti kamaiuaki man te mate n rabwata ao n tamnei.

E nanonaki ururingana bwa ti na iriiri taeka n reirei ake ti anganaki mairoun te burabeti ae Aramwa n Ana Boki Moomon. Ti na “tarai [ara] mwakuri ni kabane bwa ko karaoi nakon te Uae, ao taraia bwa taabo nako ake [ti kawari, ti] nako iai ibukin te Uea; … [ti] taraia bwa [ara] iango ni kabane a kaineta te Uea; … taraia bwa [ara] namakin i [nanora] e mena iaon te Uea n taai nako.” E ngae ngkana ti tabe n bwaai tabeua, ti riai n teimatoa n iaiangoia, n ai aron ururingan oin arara, n aki tabe ma bwaai nako ake ti iangoi.

Ae reke man ururingan ae karaoia te Tia Kamaiu ibukira bon te kateniua n kawai—te katooto. Dr. Selzman e moana katootongan Beretitenti Nelson ao te anua n RMN. I kakoaua bwa anuan Beretitenti Nelson bon kaotan rikina bwa ana reirei Iesu Kristo inanon abwabwakin bongin maiuna. Iroura, rakan aron kinaakira ma Iesu Kristo ao ururingakina, bon rakan riki nanora n tangiria n kan riki n ai Arona. Ngkai ngaira Ana reirei, ti na bitiira nakon ae tamaroa riki ao ni kabanei ara iango Irouna, riki nakon kabaneana iaora. Ti keiaki n riki n ai Arona ao n ukora kakabwaiaakira man Anuana. Ti tataro mwaaka bwa ti na kaonaki n te tangira ae kororaoi, ana tangira Kristo ae itiaki.

N aron ae reireiniira Beretitenti Nelson i nanon Eberi: “Ngkana e riki te tangira ae kororaoi bwa mwakoron aroarora, ti na kabuaa kan kamemerean aroia tabeman. E na toki arora ni motikitaekaia tabeman. Ti na karekea te tangira ae kororaoi ibukiia aomata nako. Te tangira ae kororaoi nakoia ni kabane … e bon kakaawaki riki nakon rikirakera. Te tangira ae kororaoi bon aan te anua n Atua.” N irianaki ma te tangira ae kororaoi, ti ukoria n, “ karikirakei, … ao ni karababai” bwaintituaraoi n te tamnei mairoun te Tia Kamaiu, n raonaki ma te itiaki, etieti, taotaonakinnano, nanorinano, ao te botumwaaka.

Katootongan Iesu Kristo e na kairiira nakon te kaaua ni kawai—kaetakira ma Ana kaantaninga. Ti Raonna i nanon Ana mwakuri. Ngkai te tia korokoro, Dr. Nelson bon te tia reirei,ae kinaaki te tia kamarurung, ao te tia kakae. Te biin ni kanikinaa ae kabongaa Dr. Selzman n ara mwaanga e boboto iaon mwakuri aikai, n kaoti taeka aika reirei, kamarurung, ao kunea. I bukira, mwakoron katokaan aran Iesu Kristo iaora e irianaki ma te nano ae kukurei, ae nanonaki raoi, ao te ingaingai n kabooraoi ara koura ma Ngaia. Ti raonna inanon Ana mwakuri ngkana ti “tangira, tibwatibwa, ao kakao.” Ti Raonna n Ana mwakuri ngkana ti mwakuri n ibuobuoki nakoia tabeman, moarara riki nakoia ake akea aia anga ni kamanoia ao ake a rootaki, uruaki, ke n taonakinako n aia taneiai iaon te aba.

Ngaia are ti katoka i aora bwaninin aran Iesu Kristo rinanon te kikina, ururing, katooto, ao kaetakira. Karaoan aika aua aikai a kairiira nakon te kanimaua n kawai—te kakorakoraaki. Ti karekea mwaakan te Atua ao ana kakabwaia inanon maiura. Te nakoa ni burobeetia iaan Nelson e karekea nakon Dr. Selzman kinaakina ao mwaane ni buoka are e kabonganai n bita katein ana mwaanga. E kamwakura “mwaakan te entaumente” ni buokiia tabeman. N ai aron naba anne, ti katoka iaora aran te Tia Kamaiu, Tamara are i Karawa e kakabwaiara n Mwaakana ni buokiira ni kakoroa nanon ara mition n te maiu ae mamate aei.

Ngkai ti karaoi tabeua riki beita aika tabu ma te Atua, ti katoka i aora aran Iesu Kristo n te aro ae bwanin. Tokina, te Atua e na kakabwaiaira ma Mwaakana ae korakora riki. N aron ae reiakiniira Beretitenti Nelson: “Aomata nako ake a karaoi aia berita aika tabu n te tabo ni bwabetito ao n te tembora—ao ni kawakinii—e a tia ni karikirakea karekean mwaakan Iesu Kristo. … Te kaniwanga ibukin kawakinan ara berita ma te Atua bon te mwaaka mai karawa … te mwaaka are e na kakorakoraira ni kaitarai ara kangaanga nako, kariiri, ao ni kabebetei rawawatan nanora ni kanakoraoi.”

Ti rikirake riki n tatauraoi n te maiu n tamnei. Ti karekea riki te ninikoria n kaitarai kangaanga aika ana taraa n riaon ara konabwa Ti kakorakoraaki riki n nanora n iriira Iesu Kristo. Ti waekoa riki n rairi nanora ao n Okiria ngkana ti kaairua. Tia nakoraoi riki i nanon konabwaira n tibwauaa Ana euangkerio man Mwaakana ao Ana kariaia. Ti buokiia naake a kainnano ngkai ti aki waekoa ni motikitaeka, n aki tiribure. Ti teimatoa ni kakarekea kaitiakara man ara bure. Ti karekea te rau ae korakora riki, ao tia unga riki ibukina bwa ti kona ni kukurei n tainako. Mimitongina e katoomimira, ao Ana anera a tararua i aora.

E kaoira te Tia Kamaiu, “Nakon te Tama n arau, ao n te tai ae riai kam na karekea bwaninina.” I kairoroi ngkami bwa kam na karaoa aei. Nakomai nakon Tamara are i Karawa. Katoka iaomi aran Iesu Kristo. Waaki ma Mangaia. Ururingnga n taainako. Keiaki n riki n ai Arona. Raonna inanon Ana mwakuri. Karekea Mwaakana ao Ana kakabwaia i nanon maium. Korea Arana i nanomi, ma te kukurei ao aenanonaki raoi. Aio e anganiko “te mwiokoaki” i matan te Atua ao ko tau nakon tein te Tia Kamaiu ibukim. Ko na riki bwa te tia bwaibwai i eta n abanuean Tamara are i Karawa, ao taan-uaia n ababa ma Kristo, ara Tia Kamaiu ao Kabooi maiura ae tangiraki.

E maiu. I ataia raoi. E Tangiriko. E anga Maiuna ibukim. E butiira bwa ti na nakon te Tama Rinanona. N aran Iesu Kristo, amen.

Bwaai aika a na taraaki

1. Te mwane aei e kaineti nakon te entaumente.

2. Teuana kamoamoakin ana mwakuri Beretitenti Nelson ae tanoata bon karikirakean te moan mitiin are e maiu iai te buroo-maama n tain te korooro n te buroo.

3. Beretitenti Nelson e ribootinna bwa i nanon ana tai ni kataneiai ibukin te korokoro, te tia korokoro n te ruu ni korokoro e un ao e karenakoa ana biti ni korokoro are e a teke iai bain Beretitenti Nelson. E taku Beretitenti Nelson: “Ma te taneiai aei e tiku mwiina ae teimatoa i aou. N te tai naba anne, I berita bwa tera ae e na riki inanon au ruu ni korokoro, n na bon aki kabua au iango. I berita naba n te bong anne bwa N na aki manga karenakoi bwaai n au tai n un—tao biiti ni korokoro aika kakang ke taeka n un” (“A Kainnanoaki Taan Raoi,” Riaona, Meei 2023, 98).

4. Te angabwai ae e airi ma 7,000 ribooti ni korokoro, n raonaki ma beeba n kakae ao tabeua riki koroboki ake a bootaki inanon ana mwakuri n taokita Beretitenti Russell M. Nelson ae rianako arona.

5. Tabeman aomata arana Beretitenti Russell M. Nelson, n raonaki ma te beretitenti n te University i Utah, Beretitenti Taylor R. Randall, are e a arana Beretitenti Nelson bwa ataein ngkoa University i Utah ae rianako kinaakina.

6. Te taeka ae ethos e kabwarabwara “te anua ae rianako arona, namakin, aroaro ae riai, ke koaua aika a kaira te aomata, kurubu, ke taabo” (Merriam-Webster.com Dictionary, “ethos”).

7. Inanon 2018, kainnabau, Ruth, ao ngai tia kona n ira te bukamaru are Dr. Selzman e a kamatoaki nakon te Nelson professorship. Inanon 2023, I a kona n ira te babaronga ae kinaaki ngke Beretitenti Nelson e anga ana beeba ni burobeetia nakon te University i Utah.

8. Taraa Moronaai 7:48.

9. Te taetae n Ebera ae rairaki bwa “katokaa” n te kibuntaeka ae “katokaa aran Kristo” e nanonaki n “tabekiarake” ke “uotia” n aron temanna ae uota te baana are e kinaaki iai i bon irouna ke n ana kurubu (taraa James Strong, The New Strong’s Exhaustive Concordance of the Bible [1984], Hebrew dictionary section, page 80, number 5375).

10. Taraa 2 Nibwaai 10:24; Moronaai 10:32–33; Reirei ao Berita aika Tabu 76:69.

11. Aramwa 37:36.

12. Dr. Selzman e a tia n taekinaki bwa e taekina: “Ngkana ko waaki n taetae iaon tararuaan te marurung ma [Beretitenti Nelson], e raneanea matana. … E kamiimi nooran maiureireina are e [reke] man marooroakinan bwaai aikai” (n Sydney Walker, “As President Nelson Turns 100, His Family and Associates Reflect on His Life and Legacy,” Church News, Sept. 7, 2024, thechurchnews.com). I a tia ni bon noora te “raneanea ibukin tararuaan te marurung” anne ni matan Beretitenti Russell M. Nelson, ma e bon aki kona ni kabotauaki ma raneanean matana ngkana e taetae ibukin Iesu Kristo.

13. Taraa Moronaai 7:47–48.

14. Russell M. Nelson, “Matoan te Nano i Matan te Atua,” Riaona, Meei 2025, 128.

15. Taraa 1 I‑Korinto 12:31; Reirei ao Berita aika Tabu 46:8.

16. Russell M. Nelson, “Sisters’ Participation in the Gathering of Israel,” Riaona, Nobembwa. 2018, 69.

17. Taraa Tataekina Au euangkerio: Te Kairi nakon Tibwaan Ana Euangkerio Iesu Kristo (2023), 123–38.

18. Taraa Mote 1:39. Ana Boto n Iango te Kooram n Nakoanibonga ae te Aaron e moanaki n “Ngai te nati te mwaane iroun te Atua ae tangiraki, ao iai Ana mwakuri ibukiu ae N na karaoia” (Gospel Library). Ana Boto n Iango te Bootaki n Ataeinnaine e taekinna: “Ngkai ana reirei Iesu Kristo, I kataia n riki n ai Arona. I ukoukori ao ni mwakuriia oin au kaotioti ao ni buokiia tabeman n Arana ae tabu” (Gospel Library).

19. Taraa Dieter F Uchtdorf, “Mwakuri ni Mitinare: Tibwaan are i Nanom,” Riaona, Meei 2019, 16–18; Gary E Stevenson, “Tangira, Tibwatibwa, Kakao,” Riaona, Meei 2022, 84–87.

20. N moan waakin Ana mwakuri n ibuobuoki n te maiu iaon te aba, te Tia Kamaiu e kabwarabwara Ana botoniango nakoira man taekinan kanoan ana boki Itaia: “E mena Tamnein te Uea iaou, bukina bwa e a tia ni kabirai bwa n na tataekina te euangkerio nakoia akana aki kaubwai; e kanakomaiai ni kamaiuia ake a uruaki nanoia, N na tuangiia taenikai te kainaomataaki nakon te tautoronaki, ao akana a mataki te manga nooraba, [ao] ni kainaomataia akana a uruaki nanoia.” (Ruka 4:18).

21. Riki ara tataro nakon Tamara are i Karawa e na bitaki. N aron are e taekinaki n te Bible Dictionary entry “Prayer”: “Kiritian a reireinaki bwa a na tataro n aran Kristo. Ti tataro n aran Kristo ngkana ara iango e riki bwa ana iango Kristo, ao ara kantaninga ana kantaninga Kristo —ngkana Ana taeka e tiku iroura. Ti titiraki ngkanne ibukin bwaai aika e kona te Atua n anga. A mwaiti tataro aika teimatoa n aki kaekaki ibukina bwa aki taekinna n aran Kristo; aki tei ibukin Ana iango ma bon mwiin ana babaka ni kawai te aomata ae korakora.”

22. Taraa Reirei ao Berita aika Tabu 109:26.

23. Russell M. Nelson, “Overcome the World and Find Rest,” Liahona, Nov. 2022, 96; e kairaki ma katuruturuana.

24. Taraa Reirei ao Berita aika a Tabu 109:21–22. Te kibuntaeka “ngkana a kairua am aomata, iai mai ibuakoia ” kabongana te taeka “ngkana” tiaki “ngke arona.” Aio e kaotaki bwa te Tia Kamaiu e ataia bwa tina bon bane n tibanako, ni karaoi kairua, ao ni bure. Ma te baire bwa ti na “waekoa n rairannano” ni kona ni “kaoki kakabwaia” ae a tia n taekinaki n te berita nakoira.

25. Taraa Ioane 16:33; Motiaea 4:11; 18:26; Aramwa 36:2, 28–29; Ita 7:27; Moronaai 9:25.

26. Taraa Reirei ao Berita aika Tabu 109:22.

27. Reirei ao Berita aika Tabu 93:19.

28. Moomon e kabwarabwara te bwai ae riki nakoia ana botanaomata ngke akea Kristo inanon maiuiia. Ana botanaomata “bon aomata aika a tikiraoi ngkoa, ao bon aia tia kaawakin tiibu Kristo; eng, ao a bon kairaki iroun te Atua te Tama. Ma ngkai, nooria, a bon kairiraki iroun Tatan, n aron kunin te wiita are e ukaki n te ang, ke n aron te kaibuke are e kibakiba n aki akaaka iaon te nao, n akea iena ke roona, ke akea te bwai are e na bwenaki iai; ao a katotonga arona” (Moomon 5:17–18). Ma te Tia Kamaiu i nanon maiura, ti kakabwaiaaki ma te mwaaka, te teimatoa, ao te kairiri.

29. Reirei ao Berita aika Tabu 109:24.

30. Taraa Reirei ao Berita aika Tabu 45:3–5.

31. Taraa I-Rom 8:17.