Te Retibii Ibukin te Rongorongo ae Raoiroi
E na tera aron taraakina ngkana ti karina riki Iesu Kristo i nanon maiura?
Ngkana ko a tia n kawara mwengau i Louisiana, ko na bae n atai angiin nako ara amwarake—gumbo, jambalaya, étouffée, ao karinanna riki aika mwaiti.
N te tai teuana ma teuana, I namakina ae na bon riai ni kukana teuana mai buakon amwarake akanne. Te kabanea ni mwaneka ae aki koreaki imwin renganan bwaina ni kabane ao iran aron karaoana bon katoongana n tuoia ao n noria ngkana iai ae aki karinaki. N te kabanea ni mwaneka anne, I kona n ongo te maningongo i taningau irouia taan kuka aika mwatai n te Creole, “Karawataa ni kabwaka riki te Tony.” Te Tony bon te rengarenga ni creole ae karaoaki mai Opelousas, Louisiana, are bon au kaawa. E aki toki ni kabonganaaki bwa te “rengarenga ae raba” ni karaba aki nakoraoin te amwarake imwin irakin te retibii.
Ti kakabwaiaaki Ngai ma kainnabau ae Michelle ni beku bwa mataniwi n te mition i Louisiana. Iai kateira ae ti kakaraoia n reireiniia mitinare aron kukanakin te jambalaya n aia kabanea ni katairi n te mission home imwain okiia nakoia aia utu. Irarikin aia kakoaua n ana euangkerio Iesu Kristo ae kaokaki, a kitana te mition ara mitinare ma te kakaitau ibukin te retibii.
Tabeua te namwakaina n nako, I mamataku rinanon te Church Media Library ao I noora te ringke ae witeo aika a uarereke ae arana te Restoration Conversations with President Russell M. Nelson. Atuun teuana te witeo ae kimototo n te karinan anne e katika matau ao ni karika ngareu. E aranaki bwa “Scritpures Are God’s Recipes for Happy Living ke Koroboki aika Tabu bon Ana Retibi te Atua ibukin te Maiu ni Kukurei.” I waekoa n taona te witeo ae uoua minitina ao ni mataku iroun Beretitenti Nelson n reireiniia ataein te Moanrinan te rongorongo ae bebete man korakora iaon arom ni kukurei. E reirei: “Ngkana ko karaoa te keeke, ko ira te kaetieti, eti anne? Ao ko karekea mwiina ae tamaroa ni katoa tai, tiaki ngaia?”
E reitia, n taekina ae nang koron 95 te ririki: “Aomata a taku, ‘Tera ae ko kakanna? Tera am karaba?’” E kaeka, “Au karaba bon koroboki aika tabu. Ko kona ni warekii ao karaoa nanoia.”
Eng, bon aio raoi. Te karaba ae bebete ibukin te maiu ni kukurei bon ti irakin ana retibii te Atua ake a kabwarabwaraaki inanon booki aika tabu. I atongnga bwa “Retibii Ibukin te Rongorongo ae Raoiroi.”
Tera ae kona karaoia ngkana e bure aron irakin te retibii? Eng, ni karinaki inanon te Retibii ibukin te Rongorongo ae Raoiroi bon te “rengarenga ae raba” ni kakoauaa bwa ko karaoa ae eti n tokina. Te Kaeka n Tainako bon Iesu Kristo.
I taku bwa ti bane n tia n rinanon taai ae ti namakinna ae ara rengarenga aki rangi n tamaroa, ke ti korakai n ira te kaetieti, ke tao e bure aron karaoakina, ke e riki te bwai ae ti aki kona n taobaraia, ao a mwaiti riki.
Tera katokana? Bon ti karinan riki ake e kakao iai Iesu Kristo inanon maiura.
Ngaia are, e na kanga aron tarakin karinan riki Iesu Kristo i nanon maium?
Ngke I beku bwa te beretitenti n te mition, I kukurei ngke e reke au tai ni marooro ma ara mitinare n tatabemaniia ni katoa onoua te wiiki. N tain ara marooro temanna imwin temanna, e bati irouia mitinare kainnanoan karekean te kairi n aron kanakoraoan aroia ni itoatoa.
N teuana te marooro, e roko te mitinare nakon ana intawiu ae onoti ao n tekateka. I kona n ataia man tein mwaingingin rabwatana bwa iai te bwai ae karawawataa ana iango. I titiraki, “Elder, tera ae ko tangiria ni maroroakinna n te tai aei?” E reitia nako ni kabwarabwarai tabeua kakaewenako ake a riki ma toana ao a kanga baikai n roota aia waaki ni karaoan te mwakuri ni mitinare. Ma matana aika ranran, e taraai ao n titiraki, “Beretitenti, tera ae I riai ni karaoia?”
N te tai anne, I bon aki ataia bwa N a kanga ni kaekaa. Imwin tabeua te tai, I tuangnga ngkana e tamaroa irouna bwa ti na katorobubua n tataro ibukin kairara iroun te Tamnei. E kariaia, ao ti a uaia ni katorobubua ao n tataro ibukin kairara.
Imwin te tataro, ti teimatoa ni katorobubua inanon te tai ae uarereke ao imwina ti a tekateka ni kaitara n te kaintekateka. I tuanga ngkana ti kona n uaia ni wareware ni koroboki aika tabu. Ngke ti kaukii ara boki aika tabu, I tei teutana ao n tuangnga, “Elder, ngkai ti wareka te mwakoro aei, taiaoka titirakiniko titiraki aikai: Ngkana I maiuakin anua aikai, e na kona ni katamaroaa reitakiu ma toau ao ara mwakuri ni mitinare?”
Imwina ti kauka Moronaai 7:45 ao ni kabaibati ni wareka: “Ao te tangira ae kororaoi e taotaonaki n nano, ao e akoi, ao e aki bakantang, ao e aki kainikatonga, ao e aki ukoukora oin nanona, e aki kakai un, e aki iangoa te buakaka, ao e aki kimwareirei n te buakaka ma e kimwareirei n te koaua, e keiakin bwaai ni kabane, e kakoauai bwaai ni kabane, e kantaningai bwaai ni kabane, ao e teimatoa n nanomwaka ni bwaai ni kabane.”
E taraai imwina te elder ma matana aika ranran ao e taku, “Eng, Beretitenti, ma e bon matoatoa karaoan aio.” I boraoi iai ao I kauringnga bwa ngaia bon natin te Atua ma ana konabwai ae mairoun te Atua ni kakoroi nanoia ma te Uea.
Imwina ti maroroakina te kaikonaki n taekan te kabwatete are e reiakinaki iroun Unimwaane Clark G. Gilbert man te Itingaun, are e kauringiira bwa ti riai ni moanna man te tabo are ti mena iai ao, ma te Uea, ti na mwaing n nako mooa ao n nako eeta n te kawai ae eti. I kona n noria bwa e bon namakina naba rawawatan te mwaneka are imwina, ngaia are I tuangnga bwa e na kabwarabwara matatana n te kibu are “a riki bwaai aika a korakora man bwaai aika a uarereke man aki kaangaanga.” E taekina kabwarabwaraan are e nanonaki bwa man karaoan bwaai aika a uarereke man bebete, a riki bwaai aika korakora. I tuangnga bwa e na iango n te tai ae uarereke ao ni kaoti uoua bwaai aika uarereke man bebete are e kona ni karaoi ni kaota te akoi nakon toana.
Imwiin te tai ae uarereke, e tibwa ana iango. I tuangnga bwa e na iango n te tai ae uarereke ao ni kaoti uoua bwaai aika uarereke man bebete are e kona ni karaoi bwa e na taotaona nanona nakon toana. E waekoa ni tibwai uoua ana iango. E mataata bwa e a kaman iangoi bwaai aikai imwaain ara marooro. I anganna au kakao bwa e na uoti bwaai akana tabeua akanne nakon te Atua n te tataro ao ni bubuti ibukin kamatoaaia, kairana, ao ana kairi te tamnei bwa e na kanga ni karaoa ana babaire ma nanona ni koaua. E kariaia. Ni kainan ara marooro, I tuangnga bwa E na tuangai mwiina n ana reta are katoa wiiki.
Inanon wiiki ake imwina, I kona n noria n ana reta ni katoa wiiki bwa a nakoraoi bwaai. Ma tiaki ae I tii kona nora te rikirake inanon ana reta ni katoa wiiki, I bon kona naba n noria n ana reta toana ni katoa wiiki. N tain ara intawiu ma ngaia n are imwina, I nora te okoro i moana ao n tamneina n arona n te ngaina ao te bong. I titirakinna, “Ngaia, Elder, e bon koaua ae akea kabwakan te tangira?’” E kaeka ma te moangare ae korakora: “Eng, ao ma bwaai aika uarereke man bebete a riki bwaai aika korakora.”
Ngkai ko iriira te Retibii n te Rongorongo ae Raoiroi ibukin te maiu ae kukurei, uringa ana reirei Beretitenti Nelson “Tao tera am titiraki ke am kangaanga, te kaeka e aki toki ni kuneaki ni maiun ao n ana reirei Iesu Kristo. Reiakina riki aron Ana Mwakuri ni Kamaiu, Ana tangira, Ana nanoanga, ao Ana euangkerio ni kamarurung ae kaokaki, ao n rikirake. Rairaki Nakoina! Iriiria!”
Ngkana ko tangiria n “ongo Irouna” ao n ata aron kaoakin Iesu Kristo inanon maium, iangoa irakin mwaneka ake e reireiniira Beretitenti Nelson iaon oin ara kaotioti:
“Kakaea te tabo ae rau ae ko kona n nako iai n taainako. Nanorinano imatan te Atua. Tataro i nanom nakon Tamam are i Karawa. Nakoina ibukin te kaeka ao ibukin mwengaraoim.
Tataro n aran Iesu Kristo ibukin tabeaiangam, maakum, mamaaram—eng, te bwai ae tangiria nanom. Ao imwiina kakauongo! Koroi iango ake a roko n am iango. Taui mwiin am namakin ao rinanoi ma te mwakuri aika ko kaungaaki bwa ko na karaoi. Ngkana ko teimatoa ni kakaraoa te kawai aei ni katoa bong, ni katoa namwakaina, ni katoa ririki, ko na “rikirake inanon karekean te kaotioti.”
I kakoaua bwa Iesu Kristo bon ara Tia Kamaiu ao ara Tia Kabooira. E a tia n “kakoroi nanon bwaai ni kabane ake ti kainnanoi bwa ti aonga ni kona n okira Tama[ra] are i Karawa.” N aran Iesu Kristo, amen.