ព្រះយេស៊ូវគ្រីស្ទ និងការចាប់ផ្ដើមថ្មីរបស់បងប្អូន
យើងទាំងអស់គ្នាអាចមានការចាប់ផ្ដើមថ្មីមួយតាមរយៈ និងដោយសារព្រះយេស៊ូវគ្រីស្ទ ។ រួមទាំងបងប្អូនផងដែរ ។
សេចក្តីថ្លែងការណ៍ខាងបទគម្ពីរដែលមិនពេញលេញមួយ ៖ ព្រះយេស៊ូវបានយាងចុះឡើងធ្វើការល្អ
ព្រះយេស៊ូវ « បានយាងចុះឡើងធ្វើការល្អ » ។ យើងអានរបាយការណ៍ដ៏សាមញ្ញនោះ នៅក្នុងគម្ពីរកិច្ចការ ។ ឱនោះគឺជាសេចក្តីថ្លែងការណ៍មួយដែលមិនបង្ហាញអត្ថន័យដ៏អស្ចារ្យឲ្យបានពេញលេញឡើយ ! ព្រះយេស៊ូវគ្រីស្ទពិតជាបានយាងចុះឡើងធ្វើការល្អប្រាកដមែន ! ទ្រង់សំខាន់ខ្លាំងណាស់—និងជាប្រភព—នៃសេចក្តីល្អ ! ទ្រង់បានលះបង់ព្រះជន្មរមែងស្លាប់របស់ទ្រង់ទាំងមូលដើម្បីធ្វើការល្អ ។ ទ្រង់ « មានព្រះហឫទ័យមេត្តាករុណា ហើយទន់សន្តោស ទ្រង់យឺតនឹងខ្ញាល់ ហើយមានសេចក្តីសប្បុរស ហើយ » មាននូវសេចក្ដីល្អដែលគ្មានទីបញ្ចប់ និងសេចក្ដីមេត្ដាករុណដ៏អស់កល្បអស់កាលជានិច្ចជាបរិបូរ ។
រាល់ការព្យាយាមនៅក្នុងការពិពណ៌នា ឬសង្ខេបនូវសេចក្ដីល្អ និងសេចក្ដីមេត្ដាករុណារបស់ទ្រង់ នោះគឺជាសេចក្ដីថ្លែងការណ៍ដែលមិនពេញលេញមួយ ! ជាការពិតណាស់ ដូចដែលសាវកយ៉ូហានបានព្យាយាមបង្ហាញ ប្រសិនបើយើងព្យាយាមកត់ត្រារាល់ការបើកសម្តែងពីសេចក្តីល្អរបស់ព្រះអង្គសង្គ្រោះ « នោះលោកីយ៍ទាំងមូលក៏មិនល្មមគ្រាន់ ដើម្បីនឹងដាក់អស់ទាំងសៀវភៅ ដែលត្រូវសរសេរនោះផង » ។
ព្រះយេស៊ូវគ្រីស្ទប្រទានដល់យើងម្នាក់ៗនូវការចាប់ផ្ដើមថ្មីមួយ
ឧទាហរណ៍ជាក់លាក់ដែលមានជាអមតៈនៅក្នុងព្រះគម្ពីរអំពីការយាងចុះឡើងរបស់ព្រះយេស៊ូវដើម្បី « ធ្វើការល្អ » ជំរុញឲ្យមានការស្ញប់ស្ញែង និងភាពអស្ចារ្យជាខ្លាំង ជាពិសេសនៅពេលដែលយើងពិចារណាយ៉ាងពិតប្រាកដថាវាអាចនឹងមានអារម្មណ៍បែបណាដើម្បីនៅទីនោះ ដើម្បីធ្វើជាសាក្សីចំពោះអព្ភូតហេតុរបស់ទ្រង់ ដើម្បីទទួលការបង្រៀន និងទទួលបានបទពិសោធន៍នៃការព្យាបាលរបស់ទ្រង់ ។ ទ្រង់បានសន្ទនាជាមួយនឹងមនុស្សដែលសង្គមពុំរាប់រក ទ្រង់បានពាល់មនុស្សដែលមានជំងឺ និងមិនបរិសុទ្ធ ទ្រង់បាននាំមកនូវការលួងលោមដល់អ្នកដែលនឿយព្រួយ ទ្រង់បានបង្រៀនសេចក្ដីពិតដែលនាំទៅរកការប្រោសលោះ ហើយទ្រង់បានអំពាវនាវឲ្យអ្នកដែលមានបាបធ្វើការប្រែចិត្ត ។ ចំពោះមនុស្សឃ្លង់ម្នាក់ៗ មនុស្សខ្វាក់ និងស្ត្រីដែលផិតក្បត់ ចំពោះមនុស្សខ្វិន មនុស្សថ្លង់ និងមនុស្សល្ងង់ ចំពោះម្តាយដែលសោកសៅ ឪពុកដែលអស់សង្ឃឹម និងស្ត្រីមេម៉ាយដែលកាន់ទុក្ខ ចំពោះអ្នកដែលត្រូវបានគេដាក់ទោស អ្នកដែលទទួលការអាម៉ាស់ និងអ្នកដែលរងទុក្ខ ចំពោះមនុស្សស្លាប់ខាងរូបកាយ និងមនុស្សស្លាប់ខាងវិញ្ញាណ អ្វីដែលទ្រង់បានធ្វើគឺប្រទាននូវការចាប់ផ្តើមថ្មី ។ ពិតប្រាកដណាស់ នេះគឺជាសេចក្តីថ្លែងការណ៍ដែលមិនពេញលេញដ៏គួរឲ្យភ្ញាក់ផ្អើលមួយផ្សេងទៀត !
អ្វីគ្រប់យ៉ាងដែលទ្រង់បានមានបន្ទូល និងបានធ្វើបានប្រទាននូវការចាប់ផ្តើមថ្មីសម្រាប់អ្នកទាំងឡាយណាដែលទ្រង់បានប្រោស ប្រទានពរ បង្រៀន និងរំដោះពីបាប ។ ទ្រង់មិនបានដកព្រះកាយចេញពីពួកគេទេ ហើយទ្រង់ប្រាកដជាមិនដកព្រះកាយចេញពីបងប្អូនដែរ ។ សូមស្រមៃគិតថា នៅគ្រានេះកំពុងស្ដាប់ឮពាក្យផ្ដល់ជីវិតទាំងនេះពីទ្រង់ ៖
« កូនអើយ បាបរបស់ឯងបានអត់ទោសឲ្យឯងហើយ » ។
« កូនស្រីអើយ យើងប្រាប់ឲ្យឯងក្រោកឡើង » ។
« ខ្ញុំក៏មិនកាត់ទោសនាងដែរ អញ្ជើញទៅចុះ តែកុំធ្វើបាបទៀតឡើយ » ។
« កូនស្រីអើយ ដ្បិតសេចក្តីជំនឿនាងបានសង្គ្រោះនាងហើយ ចូរទៅដោយសុខសាន្តចុះ » ។
ព្រះបន្ទូលរបស់ព្រះអង្គសង្គ្រោះចំពោះបុគ្គលទាំងនេះគឺខ្លី ប៉ុន្តែជាមួយពាក្យទាំងនេះទ្រង់បានពិពណ៌នាពីព្រះចេស្តានៃដង្វាយធួន និងការបង្រៀនរបស់ទ្រង់ដើម្បីផ្ដល់នូវការអត់ទោស ការព្យាបាល ការស្ដារឡើងវិញ សេចក្តីសុខសាន្ត និងជីវិតដ៏នៅអស់កល្បជានិច្ច ។ ហើយដំណឹងដ៏អស្ចារ្យគឺ ទ្រង់បានប្រទានការចាប់ផ្តើមថ្មីដូចគ្នាដល់បងប្អូន និងចំពោះរូបខ្ញុំ ។ យើងទាំងអស់គ្នាអាចមានការចាប់ផ្ដើមថ្មីមួយតាមរយៈ និងដោយសារព្រះយេស៊ូវគ្រីស្ទ ។ រួមទាំងបងប្អូនផងដែរ ។ ការចាប់ផ្ដើមថ្មីគឺជាចំណុចសំខាន់នៃផែនការរបស់ព្រះវរបិតាសម្រាប់បុត្រាបុត្រីរបស់ទ្រង់ ។ នេះគឺជាសាសនាចក្រនៃការចាប់ផ្ដើមថ្មី ! នេះគឺជាសាសនាចក្រនៃការចាប់ផ្ដើមថ្មីដ៏ស្រស់ស្រាយ !
នេះគឺជាសាសនាចក្រនៃការចាប់ផ្ដើមជាថ្មី
ជាមួយពិធីបុណ្យជ្រមុជដោយទឹក និងដោយព្រះវិញ្ញាណ យើងអាច « បានកើតជាថ្មី » ហើយអាច « បានដើរក្នុងជីវិតបែបថ្មី » ។ តើការចាប់ផ្ដើមថ្មីនោះផ្ដល់សេចក្ដីសង្ឃឹមដល់អ្នកដែលបានដើរឆ្លងកាត់បន្ទុកនៃអំពើបាបដ៏លំបាក ឬឈឺចាប់ដោយឥទ្ធិពលនៃជីវិតដែលមានបញ្ហា និងទំនាក់ទំនងដែលមិនដំណើរការប៉ុនណាទៅ ? ព្រះយេស៊ូវទ្រង់ផ្ទាល់មិនបានត្រូវការការអត់ទោសដល់អំពើបាប ឬការចាប់ផ្តើមថ្មីក្នុងជីវិតនោះទេ ប៉ុន្តែទ្រង់បានទទួលពិធីបុណ្យជ្រមុជទឹក ដោយបង្ហាញឲ្យយើងឃើញយ៉ាងច្បាស់ពីផ្លូវទៅកាន់ការចាប់ផ្តើមថ្មី ដែលទ្រង់បានធ្វើឲ្យកើតមានឡើងសម្រាប់យើងម្នាក់ៗ ។
ហើយការចាប់ផ្ដើមថ្មីរបស់យើងមិនមែនកើតឡើងតែម្តងនោះទេ ។ យើងមានទំនោរគិតថា ពិធីបុណ្យជ្រមុជទឹករបស់យើង គឺជាឱកាសនៃការចាប់ផ្ដើមថ្មីដែលមានតែម្តង ។ វាមិនមែនដូច្នោះទេ ។ យើងពុំមែនមានឱកាសតែម្តងនោះទេ ។ ការចាប់ផ្ដើមថ្មីនេះអាចកើតឡើងជារៀងរាល់ថ្ងៃ ! ហើយប្រាកដណាស់ ជារៀងរាល់សប្តាហ៍ នៅពេលដែលយើងទទួលទាននំប៉័ងមួយដុំតូច និងផឹកទឹកមួយពែងតូច ដើម្បីរំឭកដល់អំណោយរបស់ព្រះអង្គសង្គ្រោះដ៏ល្អឥតខ្ចោះរបស់យើង ដែលបានសុគតក្នុងគោលបំណងប្រទានឲ្យយើងនូវការចាប់ផ្តើមថ្មីជាច្រើនតាមដែលយើងត្រូវការ ! ព្រះយេស៊ូវប្រទានឲ្យយើងនូវការចាប់ផ្ដើមជាថ្មីជាច្រើនតាមដែលយើងត្រូវការ ។
ដោយមានការតាំងចិត្ដ និងការអររីករាយចំពោះជីវិតថ្មីក្នុងព្រះគ្រីស្ទ នោះយើងអាចក្លាយជាមនុស្ស« កើតជាថ្មី »ដែលរឿងចាស់កន្លងផុតទៅ ហើយអ្វីៗក៏ក្លាយទៅជាថ្មី ។ តើការបន្ធូរបន្ថយអ្វីខ្លះដែលប្រភេទនៃថ្ងៃរះថ្មីនោះនាំមកឲ្យព្រលឹងមួយដែលបន្តព្យាយាម តាមរយៈការបន្តជ្រើសរើសសេចក្តីជំនឿលើព្រះចេស្ដារបស់ព្រះប្រោសលោះរបស់យើងដើម្បីព្យាបាល និងស្ដារឡើងវិញ ទោះបីជាមានការលំបាកយ៉ាងខ្លាំងក្នុងការរស់នៅក្នុងពិភពមួយដែលធ្លាក់ចុះក៏ដោយនោះ ? ព្រះអង្គសង្គ្រោះមិនដែលបោះបង់ការតាំងចិត្តរបស់ទ្រង់ដើម្បីបំពេញតាមព្រះហឫទ័យនៃព្រះវរបិតា ហើយបញ្ចប់បេសកកម្មធួនដ៏ទេវភាពរបស់ទ្រង់ទេ សូម្បីតែឆ្លងកាត់ការឈឺចាប់ដែលបណ្តាលឲ្យទ្រង់ញ័រ ហូរលោហិតចេញពីគ្រប់រន្ធញើស រងទុក្ខទាំងរូបកាយ និងវិញ្ញាណ ហើយអធិស្ឋានសូមឲ្យពែងល្វីងនោះអាចត្រូវបានដកចេញ ។ ជាថ្មីម្តងទៀត ទ្រង់បានបង្ហាញឲ្យយើងឃើញនូវអ្វីដែលជាការស៊ូទ្រាំដ៏ស្មោះត្រង់ជាមួយនឹងព្រះ ។
ជាមួយនឹងរាល់សេចក្ដីសញ្ញាដែលយើងធ្វើ និងរាល់កិច្ចខិតខំដែលយើងលះបង់ដើម្បីរក្សាសេចក្ដីសញ្ញានោះ យើងអាចទទួលបាន« ចិត្តថ្មី » និងរង្វាស់ពេញលេញមួយនៃ« វិញ្ញាណថ្មី » ។ បន្តិចម្ដងៗ កាលណាយើងអញ្ជើញសេចក្ដីល្អរបស់ទ្រង់មកក្នុងដួងចិត្តយើងកាន់តែច្រើន ហើយបណ្ដេញគំនិត ឬជំនឿបែបអវិជ្ជមានខាងក្នុងចេញ នោះយើងកាន់តែក្លាយជារាស្ដ្ររបស់ទ្រង់ ដោយសារយើងពិតជាធ្វើឲ្យទ្រង់ក្លាយជាព្រះរបស់យើង ។ ព្រះយេស៊ូវមានព្រះទ័យចង់ធ្វើជាស្ដេចរបស់យើង និងជាអ្នកគង្វាលរបស់យើង និងជាព្រះនៃមេត្រីភាពរបស់យើង ហើយយើងអាចជ្រើសរើសធ្វើឲ្យទ្រង់ដើរតួនាទីទាំងនោះក្នុងចិត្ត និងគំនិតរបស់យើងផ្ទាល់ ។
ការចាប់ផ្ដើមថ្មីមួយនៅក្នុងរបៀបដែលយើងមើលទៅការប្រែចិត្ត
ការប្រែចិត្តបើកទ្វារទៅកាន់ការចាប់ផ្ដើមថ្មី ការចាប់ផ្ដើមឡើងវិញ និងឱកាសទីពីររបស់យើង ។ ការបង្រៀនរបស់ប្រធាន រ័សុល អិម ណិលសុន ជាទីស្រឡាញ់របស់យើងបានបំភ្លឺការយល់ច្រឡំអំពីអំណោយទានដ៏ទេវភាពនៃការប្រែចិត្ត ហើយខ្ញុំគិតថា នៅទីបំផុតយើងកំពុងចាប់ផ្ដើមយល់វាហើយ ។
វាគួរឲ្យរំភើបដើម្បីស្ដាប់ឮយុវវ័យរបស់យើងពិពណ៌នាពីអត្ថន័យនៃការប្រែចិត្តចំពោះពួកគេ ។ ថ្មីៗនេះ ខ្ញុំបានឮយុវនារីម្នាក់និយាយទាំងស្នាមញញឹមថា « នៅពេលខ្ញុំគិតអំពីការប្រែចិត្ត ការប្រែចិត្ដជាប្រចាំថ្ងៃ ខ្ញុំមានអំណរ និងសេចក្ដីសង្ឃឹមយ៉ាងខ្លាំង ។ ខ្ញុំទទួលអារម្មណ៍នូវសេចក្ដីស្រឡាញ់ និងសុភមង្គលរបស់ព្រះវរបិតាសួគ៌ និងព្រះអង្គសង្គ្រោះរបស់ខ្ញុំ ។ ខ្ញុំមិនខ្លាចនឹងមកឯព្រះវរបិតាសួគ៌នៅក្នុងការអធិស្ឋាន ហើយទូលសូមជំនួយរបស់ទ្រង់ជាមួយនឹងអ្វីៗដែលខ្ញុំកំពុងជួបបញ្ហាឡើយ ។ ខ្ញុំដឹងថា ទ្រង់ទាំងទ្វេមិនព្យាយាមចាប់កំហុសរបស់ខ្ញុំនោះទេ ។ ព្រះហស្ដរបស់ទ្រង់ទាំងទ្វេលាតសន្ធឹងចាំ ។ នាងនិយាយថា « នេះគឺជាការប្រែចិត្តចំពោះខ្ញុំ » ។ យុវនារីម្នាក់នេះយល់ថា ដោយសារតែព្រះយេស៊ូវគ្រីស្ទ នាងអាចមានការចាប់ផ្ដើមថ្មី !
ការចាប់ផ្ដើមថ្មីមួយ គឺសម្រាប់មនុស្សគ្រប់គ្នា គ្រប់ពេលវេលា
តើបងប្អូនត្រូវការចាប់ផ្ដើមថ្មីមួយដែរទេ ? តើបងប្អូនអាចធ្វើការចាប់ផ្ដើមឡើងវិញបានទេ ? សូមគិតពីមនុស្សដែលព្រះអង្គសង្គ្រោះបានធ្វើការងារបម្រើដល់—មនុស្សដែលទ្រង់បានបង្រៀន បានព្យាបាល បានប្រោសឲ្យរស់ឡើងវិញ បានអភ័យទោស និងបានស្ដារឡើងវិញ ។ តើទ្រង់បានជ្រើសរើសពួកគេចេញតាមវណ្ណៈ ឬប្រវត្តិផ្នែកសេដ្ឋកិច្ចជាក់លាក់ដែរទេ ? តើទ្រង់បានបែងចែករវាងអ្នកសុចរិត និងអ្នកមានបាបដែរទេ ? តើទ្រង់បានជ្រើសរើសមនុស្ស ដោយសារតែពួកគេស័ក្ដិសមជាង ឬគួរឲ្យស្រឡាញ់ជាងដែរទេ ? ទេ ។
មនុស្សខ្លះបានមករកទ្រង់ដោយមាននូវសេចក្ដីជំនឿដ៏អស្ចារ្យ ដោយជឿលើអំណាចរបស់ទ្រង់ដើម្បីបានជាសះស្បើយ—ដូចស្ត្រីដែលមានបញ្ហាធ្លាក់ឈាម មេទ័ពរ៉ូមដែលអ្នកបម្រើរបស់គាត់ហៀបនឹងស្លាប់ មនុស្សឃ្លង់ យ៉ៃរ៉ុស និងមនុស្សខ្វាក់ឈ្មោះបារទីមេ ។ ពួកគេម្នាក់ៗដាក់សេចក្ដីជំនឿរបស់ខ្លួនដើម្បីទទួលការសាកល្បង ដោយសង្ឃឹមថា សេចក្ដីល្អ និងព្រះចេស្ដារបស់លោកគ្រូមកពីស្រុកណាសារ៉ែតនឹងផ្លាស់ប្ដូរជីវិតរបស់ពួកគេ និងការរំពឹងទុករបស់ពួកគេ ។ ហើយទ្រង់ពិតជាបានធ្វើរឿងនោះមែន ។ ទ្រង់បានប្រើអំណាចនៃការព្យាបាលរបស់ទ្រង់ ។
ប៉ុន្តែព្រះយេស៊ូវក៏បានប្រទានពរដល់អស់អ្នកដែលមានសេចក្ដីជំនឿងាករេដែរ ដូចជា ឪពុកដែលមានកូនឈឺដែលស្រែកយំ ប្រហែលដូចជាបងប្អូនដែរថា« លោកម្ចាស់អើយ សូមជួយចំពោះសេចក្តីណាដែលខ្ញុំមិនជឿផង » ។ ហើយទ្រង់ថែមទាំងបានប្រទានសេចក្ដីមេត្តាករុណាដល់អស់អ្នកដែលមិនបានស្វែងរកទ្រង់សោះ ដូចជាស្ត្រីដែលប្រព្រឹត្តសហាយស្មន់ ស្ត្រីមេម៉ាយនៅក្រុងណាអ៊ីន បុរសពិការនៅឯស្រះបេថែសដា និងបុរសពិការពីកំណើត ។ តើបងប្អូនធ្លាប់មានអារម្មណ៍ថាទ្រង់កំពុងចេញទៅធ្វើការល្អនៅក្នុងជីវិតរបស់បងប្អូន សូម្បីតែពេលដែលបងប្អូនមិនបានស្វែងរកទ្រង់ ឬធ្វើតាមទ្រង់ដែរទេ ?
ចំពោះតួអង្គនៅក្នុងព្រះគម្ពីរម្នាក់ៗទាំងនេះ និងចំពោះអស់អ្នកដែលស្ដាប់ ហើយឆ្លើយតប ទ្រង់បានប្រទានការចាប់ផ្ដើមថ្មីមួយ មិនថាវាជាការចាប់ផ្ដើមជីវិតថ្មីមួយតាមរយៈការអត់ទោសពីអំពើបាប ឬជីវិតថ្មីដែលបានព្យាបាលពីជំងឺ ឬជីវិតថ្មីដែលបានប្រោសឲ្យរួចពីសេចក្ដីស្លាប់យ៉ាងណានោះទេ ។
តើការណ៍នេះមានន័យយ៉ាងចំពោះបងប្អូន និងចំពោះខ្ញុំ ? សេចក្ដីល្អ និងសេចក្ដីមេត្តាករុណា និងព្រះទ័យគួរឲ្យស្រឡាញ់របស់ទ្រង់គ្មានដែនកំណត់ឡើយ ។ ការចាប់ផ្ដើមថ្មីគឺជាចំណុចសំខាន់នៃផែនការរបស់ព្រះវរបិតា ! ការចាប់ផ្ដើមឡើងវិញគឺជាបេសកកម្មរបស់ព្រះរាជបុត្រា ! ថ្ងៃរះថ្មី ជំពូកថ្មី និងឱកាសថ្មី គឺជាស្នូលដ៏សាមញ្ញនៃដំណឹងល្អ !
ដូច្នេះតើបងប្អូនបាននៅឆ្ងាយពីសេចក្ដីសញ្ញារបស់បងប្អូនយូរពេកដែលពិបាកទទួលបានការចាប់ផ្ដើមថ្មីមួយឬ ? អត់ទេ ! តើបងប្អូនបានធ្វើរឿងនេះ ឬរឿងនោះច្រើនដងពេកដែលពិបាកទទួលបានឱកាសថ្មីមួយទៀតឬ ? អត់ទេ ! តើបងប្អូនឃ្លាតឆ្ងាយពីព្រះគ្រីស្ទខ្លាំងពេកដែលពិបាកឲ្យទ្រង់ជួយបងប្អូនសរសេរដំណើររឿងថ្មីមួយពីត្រង់ចំណុចនោះឬ ? អត់ទេ ! មារសត្រូវគឺជាបុគ្គលតែម្នាក់គត់ដែលទទួលប្រយោជន៍មកពីគំនិតដែលថា បងប្អូនបរាជ័យហើយ ។ បងប្អូនមិនបរាជ័យទេ ។
ហើយការចាប់ផ្ដើមថ្មីគឺលើសពីអំពើបាប និងកំហុសយើងទៅទៀត ។ តាមរយៈសេចក្ដីល្អ និងព្រះគុណរបស់ព្រះអង្គសង្គ្រោះ យើងអាចមានការចាប់ផ្ដើមឡើងវិញដែលជំរុញការផ្លាស់ប្តូរនៅក្នុងផ្នត់គំនិតចាស់ ទម្លាប់អាក្រក់ អាកប្បកិរិយារអ៊ូរទាំ អាកប្បកិរិយាអវិជ្ជមាន អារម្មណ៍នៃការគ្មានអំណាច និងទំនោរក្នុងការស្តីបន្ទោសអ្នកដទៃ និងការចៀសវាងពីការទទួលខុសត្រូវផ្ទាល់ខ្លួន ។ បងប្អូនពិតជាអាចផ្លាស់ប្ដូរអ្វីៗអំពីខ្លួនឯងដែលធ្វើឲ្យបងប្អូនចុះខ្សោយជាច្រើនមកហើយនោះបាន ។ បងប្អូនអាចចាប់ផ្ដើមម្ដងទៀតតាមរយៈកម្លាំងរបស់លោកចៅហ្វាយនៃការចាប់ផ្ដើមថ្មី ។ ទ្រង់មិនដែលនឿយណាយនៅក្នុងការប្រទានការចាប់ផ្ដើមទាំងនោះមកដល់យើងឡើយ ។
ចំពោះអ្នកដែលតស៊ូនឹងអំពើបាប ឬការធ្លាក់ចុះដដែលៗម្តងហើយម្តងទៀត សូមបងប្អូនបន្តដំណើរទៅមុខ ។ ទ្រង់មិនបានដាក់ថ្មជំពប់នៅពីមុខបងប្អូនទេ ។ ទ្រង់មិនបានដាក់ការកំណត់មួយចំពោះឱកាសទីពីររបស់បងប្អូនទេ ។ សូមបងប្អូនឆ្ពោះទៅមុខ ។ ចូរបងប្អូនបន្ដខិតខំ ។ ចូរបងប្អូនបន្តរកជំនួយពីមនុស្សជុំវិញខ្លួន ។ ហើយសូមបងប្អូនទុកចិត្តលើការចាប់ផ្ដើមថ្មីដែលមាននៅទីនោះសម្រាប់បងប្អូនគ្រប់ពេលដែលបងប្អូនងាកត្រឡប់មករកព្រះវរបិតារបស់បងប្អូនវិញដោយដួងចិត្ដស្មោះសរ ។ ចូរលះបង់ចោលនូវអំពើបាបដោយចេតនា ការនិយាយដដែលៗ និងការបះបោរដោយភាពឆ្មើងឆ្មៃ ។ បងប្អូនមិនចាំបាច់ធ្វើជាមនុស្សដូចកាលពីមុនទៀតទេ ។ សូមឱបក្រសោបនឹងការចាប់ផ្ដើមឡើងវិញរបស់បងប្អូន ជាឱកាស—ទីពីរ ឬទីបី ឬទីបួន—ឬទីមួយរយរបស់បងប្អូន ដែលបានប្រទានដល់បងប្អូនតាមរយៈព្រះលោហិតដ៏ធួនរបស់ព្រះយេស៊ូវគ្រីស្ទ ។
ខ្ញុំមានអំណរគុណលើសពីការពិពណ៌នាសម្រាប់ការចាប់ផ្តើមថ្មីទាំងនោះ ដែលបានប្រទានដល់ខ្ញុំ និងអស់អ្នកដែលខ្ញុំមិនទាន់បានផ្តល់ឲ្យ ។
សេចក្ដីបញ្ចប់
ព្រះអង្គសង្គ្រោះរបស់យើងបានធ្វើសេចក្តីថ្លែងការណ៍មិនពេញលេញចុងក្រោយមួយ ដែលបើមិនដោយសារការណ៍នោះទេ គឺគ្មានហេតុផលណាមួយសម្រាប់ក្តីសង្ឃឹម ឬភាពរីករាយនៅថ្ងៃនេះឡើយ ។ បន្ទាប់ពីការឈឺចាប់នៅគែតសេម៉ានី និងនៅពេលបញ្ចប់នៃការធ្វើទារុណកម្មលើឈើឆ្កាង ទ្រង់មានបន្ទូលយ៉ាងសាមញ្ញថា « ការស្រេចហើយ » ។ ការព្យាកររបស់ព្រះមែស៊ីត្រូវបានបំពេញ ហើយការបង់ថ្លៃពេញលេញសម្រាប់អំពើបាប និងការរងទុក្ខរបស់មនុស្សលោកក៏បានបង់រួចរាល់ ។ ទ្រង់បានប្រកាសថា« ការស្រេចហើយ »ដែលជាពលិកម្មដ៏និរន្តរ៍ និងអស់កល្បជានិច្ចរបស់ទ្រង់ ។ ប៉ុន្តែ ដង្វាយធួនរបស់ទ្រង់នឹងមិនពេញលេញទេ រហូតដល់ទ្រង់ផ្ទាល់បានដកពិសោធនូវជីវិតថ្មីនៅថ្ងៃទីបី ដែល ជា ការចាប់ផ្តើមថ្មីក្នុងនាមជាអង្គដែលបានមានព្រះជន្មរស់ឡើងវិញដ៏រុងរឿងតាមរយៈព្រះចេស្ដានៃព្រះវរបិតា ។
ដោយសារទ្រង់តែងធ្វើការ ដែលគាប់ដល់ព្រះហឫទ័យរបស់ព្រះវរបិតាទ្រង់ជាដរាប ហើយដោយសារទ្រង់« បានស៊ូទ្រាំតាមព្រះហឫទ័យនៃព្រះវរបិតាចំពោះគ្រប់ការណ៍ទាំងអស់ » នោះបងប្អូន និងខ្ញុំអាចមានការចាប់ផ្ដើមថ្មី ។ សូមទទួលយកការចាប់ផ្តើមថ្មីរបស់បងប្អូន នៅថ្ងៃនេះ ពេលនេះ ។ ព្រះយេស៊ូវគ្រីស្ទគឺជាមេផ្ដើម ហើយជាមេសម្រេចនៃសេចក្តីជំនឿរបស់យើង ដោយបាននិពន្ធជំពូកថ្មីជាច្រើនរាប់មិនអស់ជាមួយយើង ។ ទ្រង់គឺជាដើម ហើយជាចុង—ជាទីបញ្ចប់នៃសេចក្តីអាម៉ាស់ និងការរងទុក្ខរបស់យើង ហើយការចាប់ផ្តើមជីវិតថ្មីនៅក្នុងទ្រង់ អនុញ្ញាតឲ្យយើងទទួលព្រះគុណរបស់ទ្រង់ បោះចោលអតីតកាល ហើយចាប់ផ្តើមម្តងទៀតជាមួយនឹងថ្ងៃរះថ្មីជាច្រើនដងតាមដែលយើងត្រូវការ ។ ពិតប្រាកដណាស់ « សេចក្តីសប្បុរស និងសេចក្តីមេត្តាករុណានឹងជាប់តាម [ យើង ] រាល់តែថ្ងៃ ដរាបដល់អស់មួយជីវិត [ របស់យើង ] » ។ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕