Ang Imong Paghinulsol Dili Makapabug-at ni Jesukristo; Kini Makapabati Niya og Kamaya
Ang pagdapit sa paghinulsol usa ka pagpahayag sa gugma sa Dios. Ang pagsulti og oo niana nga pagdapit usa ka pagpahayag sa atong gugma.
Pipila ka tuig ang milabay, sa usa ka biyahe sa Florida, naglingkod ko sa gawas nga nagbasa og usa ka libro. Ang ulohan niini nagsugyot nga mahimo gihapon kitang malangit bisan pa og dili kita hingpit karon. Usa ka babaye nga miagi nangutana, “Sa imong hunahuna posible kaha?”
Mihangad ko, naglibog, dayon nakaamgo ko nga nag-istorya siya bahin sa libro nga akong gibasa. Misulti ko og morag komedya, “Layo pa kaayo ko sa akong gibasa, apan pahibaloon ko ikaw kon giunsa sa pagtapos niini.”
O, kaanindot kon makabalik ko sa nangagi nga panahon! Ako siyang ingnan, “Oo, posible kini! Tungod kay ang langit dili para sa mga tawo nga nahimo nang hingpit; para kini sa mga tawo nga gipasaylo, kinsa nagpili ni Kristo balik ug balik-balik.”
Karon gusto ko mamulong kanato nga usahay mobati, “Ang paghinulsol ug pagpasaylo morag epektibo alang sa tanan gawas kanako.” Niadtong kinsa sa pribado naghunahuna, “Tungod kay ako nagbalikbalik sa paghimo sa sama nga mga sayop, tingali ingon niini gyod ko.” Alang niadto, nga sama nako, adunay mga adlaw nga ang dalan sa pakigsaad tungason kaayo, kini hapit usa ka pagbaktas nga pakigsaad!
Usa ka talagsaon nga misyonaryo sa Australia, si Elder QaQa gikan sa Fiji, mipakigbahin og sama nga pagbati atol sa iyang pagbiya nga pagpamatuod: “Ako nasayod nga ang Dios nahigugma nako, apan usahay maghunahuna ko, ‘Nasayod ba ang Dios nga nahigugma ko Niya?’ Tungod kay dili ko hingpit, ug makahimo gihapon ko og mga sayop.”
Nianang usa ka malumo, makabalaka nga pangutana, eksaktong gisumada ni Elder QaQa ang unsay kanunay nakong gikabalak-an. Tingali naghunahuna pod ka, naghunahuna nga, “Hilabihan man kaayo akong paningkamot, apan nasayod kaha ang Dios nga hilabihan gyod ang akong paningkamot? Kon pakyas ko kanunay sa pagkab-ot, nasayod kaha ang Dios nga ako gihapon Siya nga gihigugma?”
Makapaguol kini kanako ang pag-angkon niini, apan gisukod nako ang akong relasyon sa Manluluwas pinaagi sa unsa ka hingpit ang akong pagpakabuhi. Nagtuo ko nga ang kinabuhi nga masulundon nagpasabot nga dili na ko kinahanglang maghinulsol. Ug sa dihang nakahimo ko og mga sayop, sa matag adlaw, gipalayo nako ang akong kaugalingon gikan sa Dios, gahunahuna, “Seguro nasagmuyo gyod Siya og maayo kanako.”
Dili kana tinuod.
Akong nakat-onan nga kon mohulat ka hangtod sakto na ang imong pagkalimpyo o saktong hingpit na nga moduol sa Manluluwas, wala nimo masabtan ang nag-unang buot ipasabot!
Unsa kaha kon maghunahuna kita mahitungod sa mga sugo ug sa pagkamasulundon diha sa lahi nga paagi?
Ako mopamatuod nga samtang ang Dios naghunahuna mahitungod sa atong mga sayop, Siya labaw nga nagpakabana sa unsay mahitabo human kita nakahimo og sayop. Mobalik-balik ba kita ngadto Kaniya? Mopabilin ba kita niining relasyon sa pakigsaad?
Seguro nadungog na nimo ang mga pulong sa Ginoo “Kon [ikaw] nahigugma nako, sunda akong mga sugo” ug mobati og kasagmuyo tungod kay wala nimo masunod ang tanang mga sugo. Pahinumdoman ko ikaw nga usa usab ka sugo ang paghinulsol! Sa pagkatinuod, tingali kini ang labing gibalik-balik nga sugo diha sa mga kasulatan.
Sa pakig-istorya ni Alma sa iyang kaugalingon, “O nga ako unta usa ka anghel, ug makaangkon sa pangandoy sa [akong] kasingkasing … ug [mo]sangyaw og paghinulsol,” wala siya misulay sa pagpakaulaw kanato pinaagi sa paghisgot sa atong mga sayop. Siya nagtinguha sa pagtudlo og paghinulsol aron nga ikaw ug ako makalihay sa pag-antos niini nga kalibotan. Usa ka rason ngano nga si Alma nasilag sa sala tungod kay kini mosangpot sa atong kasakit.
Usahay akong hinumdoman, sama sa usa ka Post-it note diha sa akong agtang, nga ang mga sugo mao ang dalan palayo gikan sa kasakit. Ug mao usab ang paghinulsol. Ang atong propeta misulti, “Ang Manluluwas kanunay nga nahigugma kanato apan ilabi na kon kita maghinulsol.”
Mao nga kon ang Ginoo mosulti, “Paghinulsol kamo, paghinulsol kamo,” unsa kaha kon ikaw maghanduraw Kaniya nga mosulti, “Gihigugma Ko ikaw. Gihigugma Ko ikaw.” Handurawa Siya, naghangyo kanimo, sa pagbiya sa binuhatan nga maoy nakaingon sa imong kasakit, nagdapit kanimo sa pagbiya diha sa kangitngit ug mobalik sa Iyang kahayag.
Sa ward sa akong anak nga babaye nga si Carly, adunay bag-o nga priest nga miluhod sa pagpanalangin sa sakramento, ug imbis moingon , “Nga sila mohimo niini agi og paghinumdom sa dugo sa imong Anak,” sa wala tuyoa siya miingon, “Nga sila mohimo niini agi og paghinumdom sa gugma sa imong Anak.” Nanglugmaw ang mga luha sa mga mata ni Carly nga nakaamgo ug nakasabot sa kamatuoran niadto nga mga pulong.
Ang atong Manluluwas andam nga mag-antos sa kasakit sa Iyang Pag-ula tungod kay Siya nahigugma kanimo. Sa pagkatinuod, ikaw ang “kalipay nga gibutang sa iyang atubangan” samtang Siya miantos.
Ang pagdapit sa paghinulsol usa ka pagpahayag sa gugma sa Dios.
Ang pagsulti og oo niana nga pagdapit usa ka pagpahayag sa atong gugma.
Handurawa ang imong paboritong imahe ni Kristo. Karon handurawa Siya nga sanag nga mipahiyom uban ang kamaya sa matag higayon nga imong gamiton ang Iyang gasa tungod kay Siya mao ang “hingpit nga kahayag sa paglaom.”
Oo, ang imong paghinulsol dili makapabug-at ni Jesukristo; kini makapabati Niya og kamaya!
Itudlo nato kana!
Tungod kay ang paghinulsol mao ang labing maayo nato nga mensahe!
Dili kita makapabilin sa dalan sa pakigsaad pinaagi sa dili paghimo og sayop. Makapabilin kita sa dalan pinaagi sa paghinulsol sa matag adlaw.
Ug kon kita maghinulsol, ang Dios mopasaylo nga dili mopakaulaw kanato, dili motandi kanato ni bisan kinsa, o mangasaba kanato tungod kay mao ra kini ang butang nga atong gihinulsolan sa miagi nga semana.
Siya mahinamon sa matag higayon nga Siya nakakita kanato nga nagluhod sa pag-ampo. Gusto Siya nga mopasaylo kanato tungod kay kita Iyang gihigugma!
Wala ba kamo mobati nga kana tinuod?
Nan nganong lisod man kaayo para kanato nga motuo?!
Si Satanas, ang bantogang magsusumbong ug manglilimbong, naggamit og kaulaw aron kita mopalayo sa Dios. Ang kaulaw usa ka kangitngit nga bug-at kaayo nga palas-anon nga kon imo kining kuhaon sa imong lawas, kini adunay tinuod nga gibug-aton o adunay kabug-at niini.
Ang kaulaw usa ka tingog nga mokasaba kanimo, nag-ingon, “Unsa ang imong gihunahuna?” “Wala na gyod kay sakto nga mahimo?”
Ang kaulaw wala magsulti kanato nga kita mihimo og sayop; kini nagsulti kanato nga kita mao ang mga sayop. Posible gani nga kita makadungog og, “Tago.” Gibuhat sa kaaway ang tanan sa iyang gahom aron magpabilin ang kabug-at diha sa sulod, nagsulti kanato nga ang bugti sa paghinulsol dako kaayo, nga mas sayon kon kini magpabilin sa kangitngit, magwagtang sa tanang paglaom.
Si Satanas mao ang usa ka dako nga limbongan sa paglaom.
Ug kinahanglan nimo kini nga masabtan, mao nga isulti nako og kusog kini nga mga pulong: Dili ikaw ang tingog sa imong ulo o ang mga sayop nga imong nahimo. Tingali kinahanglan nimo nga isulti kana og kusog usab. Ingna ang Satanas, “Dili karon.” Papahawaa siya.
Batia kanang pagbira, ang diosnong kasubo nga mopabalik kanimo ngadto sa imong Manluluwas, ug tan-awa ang Iyang grasya nga mosulod sa imong kinabuhi ug sa mga kinabuhi niadtong imong gimahal. Mosaad ako nga sa higayon nga kita kusganon nga modala og masulub-on nga kasingkasing ngadto Kaniya, anaa dayon Siya.
Kon ikaw nakakita og tawo nga malumos, dili ka ba motuy-od sa imong kamot ug luwason siya? Makahanduraw ka ba sa imong Manluluwas nga nagsalikway sa imong gituy-od nga kamot? Sa pagkatinuod, naghanduraw ko Kaniya nga nagsalom ngadto sa tubig, nagkunsad ngadto sa tanang butang nga nagbira kanato aron aduna kitay higayon nga dili na mobati og kaulaw! Imposible nga ang mahangtorong kahayag sa Pag-ula ni Kristo dili moabot [kanimo].
Ang Manluluwas mao ang mahangtoron nga mas hayag kaysa kangitngit sa kaulaw. Dili gayod Niya sawayon ang imong bili. Mao nga bantayi og maayo.
-
Handurawa nga kining kamot nagrepresentar og usa ka bili.
-
Kini nga kamot nagrepresentar og pagkamasulundon. Seguro sa imong pagmata ganinang buntag, misulti ka og sinserong pag-ampo, ug mituon sa mga kasulatan aron makapaminaw sa tingog sa Dios. Nakahimo ka og maayo nga mga desisyon ug nagtagad sa mga tawo sa imong palibot uban ang pagka-Kristohanon. Naminaw ka sa kinatibuk-ang komperensiya! Ang imong pagkamasulundon ania dinhi!
-
O tingali ang mga panghitabo dili kaayo maayo. Nanlimbasog ka karong bag-o sa paghimo sa mga gagmay, yano nga mga butang aron maduol sa langit. Nakahimo ka og pipila ka desisyon nga gikaulaw nimo.
-
Asa ang imong bili? Kini ba nga kamot nakalihok?
Ang imong bili wala mahigot sa imong pagkamasulundon. Ang imong bili kanunayng magpabilin, ug kini dili mausab. Gihatag kini sa Dios kanimo, ug wala kay mahimo o ni bisan kinsa nga makahimo sa pag-usab niini. Ang pagkamasulundon magdala og mga panalangin; tinuod kana. Apan ang bili wala niana. Ang imong bili kanunay nga “mahinungdanon sa panan-aw sa Dios,” bisag unsa pa ang nahitabo tungod sa mga sangpotanan sa imong mga desisyon.
Bisan og nakabuhat ko og mga sayop, gusto ko nga magpabilin sa relasyon sa pakigsaad uban ni Kristo, ug sultihan ko kamo ngano.
Nagdako ko nga nagkuha og mga leksiyon sa pag-dive ug nakakat-on nga kon ang mga maghuhukom mohatag og grado sa pag-dive, ilang tan-awon ang mga pasundayag. Sa dihang ang diver misulod sa tubig, ang ilang lawas hingpit ba nga pinatindog, nga ang kumagko sa tiil nagtudlo sa ibabaw ug diyotay ra ang pisik sa tubig? Dayon adunay silay buhaton nga talagsaon. Apilon nila pag-grado ang ang-ang sa kalisod.
Ang tanan nag-dive nga adunay ilang kaugalingon nga ang-ang sa kalisod. Ang imong Manluluwas mao lamang ang nasayod sa kalisod nga imong gi-dive. Gusto ko og relasyon uban ang usa ka tawo nga nakasabot kanako, kinsa nasayod sa akong kasingkasing ug unsa ang akong pagpaningkamot!
Siya nasayod sa mga gabon sa kangitngit nga motabon kanatong tanan nga biyahedor ug nga ang atong biyahe nag-agi subay sa hugaw nga tubig—mao nga bisan pa og kita naggunit sa gunitanan nga puthaw, kita maapektohan gihapon sa pagkadaotan sa atong palibot.
Ang pagduol ngadto ni Kristo sama ra sa pagsulti, “Mahimo ba nga tabangan mo ako?” nga adunay paglaom, usa ka gipadayag nga kaseguroan nga ang Iyang mga bukton gitanyag kanimo kanunay. Nagtuo ako nga kining bag-o nga panglantaw mahitungod sa paghinulsol nagpasabot nga bisan pa og wala kitay hingpit nga pagkamasulundon apan, kita mosulay og mahigugmaon nga pagkamasulundon karon, mopili sa pagpabilin, balik ug balik-balik, tungod kay kita nahigugma Kaniya.
Nakahinumdom ka ba sa katawhan ni Hari Benjamin kinsa wala nay hilig sa pagbuhat og daotan apan sa pagbuhat lamang og maayo sa kanunay? Sa imong pagtuo sila mihipos ba sa ilang mga tolda, miuli sa ilang panimalay, ug wala na makabuhat og sayop? Siyempre dili! Ang kalainan mao nga sila dili na gustong magpakasala. Sila adunay mahigugmaon nga pagkamasulundon! Ang ilang mga kasingkasing nakapunting ug naminaw sa Dios samtang sila nanlimbasog!
Kausa, diha sa baybayon, akong nakita ang usa ka langgam nga naglupad diha sa hangin, kusog nga nagkapa-kapa sa iyang mga pako, hapit nataranta, apan nagpabilin diha sa sama nga dapit. Dayon nakakita ko og lain nga langgam, mas habog pa. Nasapon kini sa pataas nga paglihok sa hangin ug dali nga naglutaw nga wala mabalda sa hangin. Mao kana ang kalainan tali sa pagsulay sa pagbuhat niini nga kita ra ug sa pagdangop ngadto sa atong Manluluwas, sa pagtugot Kaniya sa pagbayaw kanato, uban sa “kaluwasan sa iyang mga pako.”
Isip mga lider sa misyon sa Australia, atol sa among kataposang pagbisita sa matag misyonaryo, among gihisgotan ang mahitungod sa 3 Nephi 17, diin ang mga tawo duol sa Manluluwas ug nakadungog Kaniya nga nag-ampo alang kanila. Kami nangutana, “Kon imong madungog ang Manluluwas nga nag-ampo para kanimo, sa imong hunahuna unsa kaha ang Iyang isulti?”
Ang pagkadungog sa ilang mga tubag mao ang usa sa labing nindot nga Espirituwal nga mga kasinatian sa akong kinabuhi. Ang matag usa niadto nga mga misyonaryo mohunong, ug ang mga luha mipuno sa ilang mga mata samtang kami mipahinumdom kanila, “Ang inyong Manluluwas nasayod sa ang-ang sa kalisdanan nga inyong nasinati. Gibati Niya kining tanan!”
Mao kini ang hilom ug malumong gipakigbahin niadtong mga misyonaryo: Usa ka sister misulti, “Si Jesus mosulti sa Amahan, ‘Siya nagbuhat sa iyang labing maayo. Ako nahibalo unsa ang iyang pagpaningkamot.’” Usa ka elder miingon, “Sa tanan nga nahitabo sa iyang kinabuhi, mapasigarbuhon kaayo ko niya.”
Sulayan nato ni. Karong gabii, sa dili pa ikaw mag-ampo, handurawa si Jesukristo nga anaa sa duol. Siya ang imong Manlalaban sa Amahan. Pangutan-a ang imong kaugalingon, “Unsa man ang isulti sa akong Manluluwas ngadto sa Amahan mahitungod kanako?”
Ug dayon paghilom.
Paminaw niana nga tingog nga nagsulti og maayo nga mga butang mahitungod kanimo—ang tingog sa Manluluwas, ang imong labing maayo nga higala, ug ang imong Amahan sa Langit, kinsa anaa gayod dinha. Hinumdomi, ang Ilang gugma ug ang imong bili mahinungdanon kanunay, bisan unsa ang mahitabo!
Nagbarog ko dinhi aron sa pagsaksi nga si Jesukristo naghatag og kahayag niadtong kinsa anaa sa kangitngit. Mao nga, sa mga adlaw nga gibati nimo kana nga tingog nga nagsulti kanimo sa pagtago, nga kinahanglan ka magtago sa usa ka mangitngit nga kwarto nga mag-inusara, ako nagdapit kanimo nga magmaisogon ug motuo ni Kristo! Padayon sa unahan ug pasigaa ang Kahayag—atong Hingpit nga Kahayag sa Paglaom.
Napuno sa Iyang kahayag, makakita ka og mga tawo sa imong palibot kinsa mibati usab nga nag-inusara, apan karon, uban sa kahayag, ikaw ug sila mangutana, “Nganong nahadlok man kami pag-ayo sa kangitngit? Ug nganong nagdugay man kaayo mi dinha?”
“Hinaot nga ang Ginoo sa mga Kahayag mogakos kanimo sa Iyang mga bukton ug maghupay ug mahigugma kanimo sa kanunay.” Hinaot nga kita mohigugma Kaniya og balik ug balik-balik. Sa ngalan ni Jesukristo, amen.