Dawata ang Iyang Gasa
Kamo mga hinigugmang anak nga babaye sa Dios, kamo gimahal nga anak nga lalaki sa Dios, ug Siya migasa kaninyo sa Iyang hingpit, balaan nga Anak.
Paghinatagay og Gasa
Ang paghinatagay og gasa usa ka katilingbanon nga kustombre nga naglangkob sa tanang kultura, mga sibilisasyon, ug sa tanang kapanahonan. Sa tibuok panahon, ang mga tawo naghinatagay og mga gasa sa usag usa aron sa paglig-on sa mga relasyon, pagpakita og gugma ug pasalamat, ug pagtimaan sa importante nga mga panghitabo sama sa mga kasal, mga adlawng natawhan, ug mga kapistahan. Ug ang mga tawo dili lamang mao ang mga nilalang sa Dios nga maghinatagay og mga gasa sa usag usa! Sa daghang mga ehemplo nga atong matudlo, ang mga penguin nailhan nga mohatag og sinaw nga gagmayng mga bato ngadto sa ilang posible nga makauban, ang mga unggoy (mga ig-agaw sa chimpanzee) mohatag og prutas aron mapadaghan pa ang ilang higala.
Unsa nga mga gasa ang inyong nahatag? Paghunahuna og usa ka panahon sa dihang inyong nakaplagan—o gihimo—ang hingpit nga gasa alang sa usa ka tawo nga inyong gimahal. Kamo nasayod lang gayod nga ang gasa mao ang eksakto nga gusto niini nga minahal ug usa ka butang nga ilang ibahandi. Unsa man ang gasa? Alang ba kini sa inyong inahan? sa usa ka higala? sa inyong anak? sa usa ka magtutudlo? sa inyong lolo? Unsay inyong gibati sa dihang nakita ninyo kini nga gasa? Unsa ang inyong gibati sa dihang naghunahuna kamo mahitungod niini nga tawo nga inyong gimahal nga nag-abli sa gasa? Sa samang paagi, kanus-a ang usa ka tawo mihatag ninyo og hingpit nga gasa, ug unsa kaha ang pagbati sa pagdawat niini?
Ang Gasa sa Akong Amahan Kanako
Sa dihang mga siyete anyos ako, nagpuyo uban sa akong mga ginikanan sa Arabia, usa ka salida sa mga bata nga gitawag og Chitty Chitty Bang Bang ang gipagawas. Ang salida mahitungod sa usa ka sakyanan nga adunay mahika makamaniho ra og iya, molutaw sa tubig ug gani makalupad! Nakahibalo ko nga didto sa panimalay sa England naghimo sila og gamitoy nga trak-trak sama gayod sa Chitty Chitty Bang Bang, ug oh, gusto kaayo kong makaangkon og usa! Pwede nimong birahon ang ligwat, ug ang pako sa trak-trak mobukhad dayon! Ang akong amahan miadto sa usa ka biyahe sa trabaho ngadto sa England ug nangutana kon gusto ba ko nga dad-an niya og bisan unsa para kanako, ug ako siyang gisultihan kon usa nako kagusto nga makaangkon og usa niadtong Chitty Chitty Bang Bang nga sakyanan.
Mibalik siya gikan sa iyang biyahe, ug walay sakyanan nga nakita. Ako naguol kaayo ug naghunahuna nga tingali nakalimot siya. Apan paglabay og mga 10 ka adlaw mao na ang akong adlawng natawhan, ug usa ka gamay nga kahon, nindot kaayo nga pagkaputos, ang naghulat kanako. Uban sa dakong pagdahom, wala kaayo maglaom nga nindot kaayo, akong giablihan ang gasa ug nakita ang akong trak-trak. Ako malipayon kaayo nga nakahilak ko. Akong gibira ang ligwat, ug ang pako kalit nga migawas, sama gayod sa sakyanan sa salida! Mapasalamaton kaayo ko sa akong amahan alang niining labing gibahandi nga gasa. Akong gidulaan ang maong trak-trak sa mga tuig ug gitagaon kini sa mas daghan pang katuigan. Ako naghunahuna nga ang akong papa ganahan kaayo nga mohatag nianang trak-trak ngari kanako labing minos ingon og ako gusto kaayo sa pagdawat niini.
Paghatag, Pag-aksiptar ug Pag-abli, ug Pagdawat
Kita makahunahuna sa paghatag og gasa nga may tulo ka bahin ngadto niini:
-
Ang paghinatagay sa gasa, diin ang tighatag mopili, mohimo, o moandam sa gasa ug mopresentar niini ngadto sa minahal. Kini naglakip sa mahunahunaon nga katuyoan sa habig sa tighatag aron sa paghatag og usa ka butang nga makahuloganon.
-
Ang pag-aksiptar ug pag-abli sa gasa, sa dihang ang tigdawat modawat sa gasa gikan sa tighatag—kasagaran inubanan sa mga ekpresyon sa kasorprisa, pasalamat, ug sa kahinam—sa dili pa moabli niini, usahay mobadbad sa laso ug tangtangon ang putos sa kahon aron madiskobrehan kon unsa ang gasa.
-
Ug dayon diha tingali ang labing importanteng bahin, ang pagdawat sa gasa. Ang pagdawat sa gasa nga sinserong gihatag mas labaw pa kaayo kaysa pag-angkon ug pag-abli niini. Kini labaw pa, gani, kaysa pag-ila sa bili sa gasa ug magpasalamat ngadto sa tighatag. Aron matinud-anong modawat sa gasa, kita mohatag og bili niini sa atong kaugalingon, hingpit nga mogamit niini sa atong mga kinabuhi, ug dayon hinumdoman uban sa pagpasalamat ang tighatag.
Ang pagdawat og usa ka gasa dili kay lumalabay apan usa ka tinuyo ug makahuloganong proseso nga labaw pa kaysa pag-abli lang sa kahon. Ang pagdawat mao ang pagdayeg ug pagkonektar ngadto sa gasa ug sa sinsero nga tinguha sa tighatag sa paagi nga molig-on sa kasuod tali sa tighatag ug sa tigdawat. Ang paghunahuna nianang trak-trak nakapahinumdom og daghang gimahal nga mga panumdoman, sama nga akong nabati pag-usab ang lawom nga gugma ug pagpakabana kanako sa akong amahan, nga girepresentaran niana nga gasa ug sa dili maihap nga uban pang mga buhat sa pagkamanggihatagon.
Ang mga Gasa sa Atong Langitnong Amahan
Ang atong Langitnong Amahan adunay dili maihap nga giandam nga mga gasa sa kahayag ug kamatuoran nga ibubo alang sa matag usa kanato, Iyang gibahandi nga mga anak. Kini modagayday gikan sa atong Manggihatagon nga Tighatag sama sa usa ka tabay diha sa kamingawan gikan sa Iyang manggiluy-on nga kasingkasing. Ang “tanang hingpit nga gasa nagagikan sa kahitas-an, gikan sa Amahan sa mga kahayag.” Sa atong nabugkos nga pakigsaad uban sa Amahan, Siya sa kanunay ang Tighatag ug kita ang mapainubsanong modawat.
Ang Labing Mahinungdanon sa Tanang Gasa sa Amahan, Diin Naggikan ang Tanang Ubang Gasa
Apan kita walay madawat kon wala ang labing mahinungdanon sa tanang gasa sa Amahan, ang Iyang hinigugmang Kordero, Iyang Anak, si Jesukristo. Ang tanang gasa sa atong Amahan nagdagayday gikan ug nadasig pinaagi sa andam nga halad sa Manluluwas diha sa Getsemane ug sa krus ug ang Iyang madaogong Pagkabanhaw. Si Jesukristo, atong maluluy-on nga Manunubos, mao ang kinatas-ang gasa gikan sa Amahan sa mga kahayag. “Sa gasa sa iyang Anak ang Dios miandam [alang kanato] og mas maayo nga paagi.”
Usa ka Naglangkob sa Tanan nga Gasa sa Mahangtorong Kamatuoran
Ako ganahan nga maghisgot kabahin sa usa ka naglangkob sa tanan nga gasa sa mahangtorong kamatuoran nga moabag sa atong abilidad sa pagdawat sa tanang gitinguha sa atong Amahan nga ihatag kanato uban sa—usa ka importante nga gasa sa kahibalo nga, kon hingpit nga angkonon ug dawaton sa kahiladman sa kalag, mopahimutang sa mga kalipay ug mga kalisod sa kinabuhi ug sa atong wala pa matubag nga mga pangutana: Kini mao nga kita mga anak gayod sa Dios. Kana nga kamatuoran makapahinam! Makapahingangha! Ug kini dili sambingay.
Hunahunaa nga inyo kining nadungog sa unang higayon! Kamo gayod ang Iyang gimahal nga anak nga babaye. Kamo gayod ang Iyang bililhon nga anak nga lalaki. Ug ang dalan nga inyong giagian mao ang Iyang plano sa kalipay. Pinaagi sa Iyang nahibalo sa tanan nga gugma, Siya nasayod gayod kinsa kamo kaniadto sa wala pa kamo gipadala sa yuta ug unsa ang inyong nasinati sukad sa inyong mortal nga kinabuhi, ug Siya maluluy-on nga miplano sa matag detalye sa inyong umaabot. Ug oh, Siya nangandoy gayod nga usa ka adlaw kamo mobalik ngadto Kaniya, nga modawat sa kinatibuk-ang katuyoan sa tanan Niyang matahom nga mga gasa, ang kinabuhing dayon uban Niya.
Ang pangutana dili kon kini nga gasa sa kamatuoran tinuod ba apan kon kita modiskobre ug modawat ba niini. Ang gasa gihatag na ngari kanato pinaagi sa Amahan. Ang bili alang sa kinatibuk-ang katuyoan sa gasa nabayran na pinaagi sa Manuluwas. Apan kon kamo natudloan na niini, misulti niini, ug mikanta niini nga kamatuoran sa mga katuigan, tingali ang dakong katingala niini dugay nang nawala ug kamo wala na mobati sa gahom ug kalinaw niini.
Kon kini nga bililhong gasa sa pagsabot—ug ang tanang kamaayo, kalinaw, ug paglaom nga nagdagayday gikan niini—nagpabiling wala giangkon, wala giablihan, ug wala gidawat, pagkadakong usik! Pagkaguol sa Tighatag! “Kay unsay kaayohan nga makuha sa usa ka tawo kon ihatag ang gasa kaniya, ug dili siya modawat sa gasa? Tan-awa, wala siya malipay nianang gihatag diha kaniya, ni malipay kaniya nga naghatag sa gasa.”
Ako modapit kaninyo sa pagdawat, alang sa unang higayon, o sa mas dakong gidak-on kaysa kaniadto, sa matahom nga pagsabot nga kamo sa pagkatinuod mao ang anak nga hiniguma sa Dios. Kinahanglang inyong badbadron ang laso, gision ang putos nga papel, ablihan ang kahon, ug aktibong modawat uban sa mapainubsanong pasalamat sa usa ka tinuod, putli nga pagsabot niining sukaranan nga kamatuoran. Ang Balaang Espiritu mahimong mopadayag og pagsaksi sa inyong kasingkasing nga kamo sa pagkatinuod mao ang anak sa Labing Halangdon.
Kon kamo mainitong modawat ug mosabot niining halangdong reyalidad ug mobati sa kahupay ug kahinam niini, ang inyong tibuok panglantaw mausab! Inyong mabati ang Iyang gugma, madungog ang Iyang tingog, ug makita ang Iyang impluwensiya, bisan unsa pa ang nahitabo, o wala mahitabo, sa inyong kinabuhi. Mahimo ninyong sutaon pag-usab unsa ang inyong pagtan-aw sa inyong kaugalingon ug sa uban. Ang inyong bugkos sa pakigsaad sa inyong Manluluwas mahimong mas lig-on, ug pinaagi sa mga lente niining matam-is nga gasa, ang kinabuhi magsugod og bag-ong kahayag, katahom, ug paglaom.
Palihog, buhaton ba ninyong mag-ampo aron makasabot kon kamo tinuoray nga nagdawat niining makapausab nga kahibalo ilawom sa inyong kalag? Palihog dawaton ba ninyo ang gasa? Buhaton ba ninyo nga mas lawom, mas gawasnon, mas madagayaon ang inyong pag-angkon kaysa kaniadto—ug ang pagbuhat sa ingon modagayday uban sa tanan niadtong ubang mga gasa nga moabot uban niini?
Pagdawat Niini nga Gasa sa Mahangtorong Kamatuoran
Kamo tingali maghunahuna, “Unsa ang akong kinahanglang buhaton aron makadawat niini nga gasa gikan sa Dios?” Nan, sa tinuod, wala. Usa kini ka gasa gikan sa Tighatag. Kini yano nga kamatuoran. Kinahanglan lamang nga sabton ug dawaton kini. Kamo mao ang Iyang anak. Kamo mao ang Iyang hinigugma. Ayaw himoang komplikado kini. Ayaw babagi ang pagdawat niini nga gasa uban sa mga hunahuna nga tingali kamo dili angayan. Ang reyalidad mao nga walay usa kanato ang “angayan”—tanan nga mga gasa sa Amahan madawat lamang pinaagi sa mga maayong buhat, kaluoy, ug grasya sa Balaang Mesiyas, apan pagkadako sa Iyang tinguha alang sa matag usa sa Iyang mga anak nga modawat niini! Dayon, samtang ang inyong bag-o o gibag-o nga pagsabot magsugod diha kaninyo, maglipay pinaagi sa pagpasalamat sa Tighatag niini nga gasa.
Sukad nga akong nakaplagan ang akong pagtuo sa akong pangidaron nga tungatunga sa 20-30, sa hinayhinay mas nakasabot ug nakaamgo ko nga sa tinuod ako anak sa Dios. Kon mas lawom ug sinsero ang akong pagsabot niini nga gasa, mas hingpit nakong nasayran kon kinsa ako ug kon sa unsang paagi hingpit kaayo ako gihigugma. Ang pipila ka butang nga nakatabang nako nga masabtan ang usa ka butang nga mas lawom ug hingpit mao ang mga pulong sa kasulatan, ang akong patriyarkal nga panalangin, pagsimba sa templo, pagserbisyo sa uban, pagpadayag sa pagpasalamat, ug ang sagradong pag-ampo diha sa Amahan. Ako nahingangha kon sa unsang paagi ang nangagi nga kasubo, kasakit, ug kagul-anan sa akong kinabuhi nausab ug nahupay, ug ang kadaghanan unta niini mabuntog kon ako nasayod niining matahom nga kamatuoran.
Duol ngadto Kristo ug Dawata
Si Moroni nag-awhag kanato nga “ayaw ninyo ilimod ang mga gasa sa Dios,” apan sa “[pag]duol kang Kristo, ug mohupot sa matag maayo nga gasa.” Kamo makaduol ngadto ni Kristo uban sa kamasaligon sa Iyang mahigugmaong kaayo ug modawat sa tanan Niyang mga gasa sa kalipay, kalinaw, paglaom, kahayag, kamatuoran, pagpadayag, kahibalo, ug kaalam—uban sa inyong ulo nga gipataas, inyong mga bukton nga gituyhad, ug inyong mga kamot nga bukas, andam sa pagdawat. Ug madawat ninyo kini nga mga gasa tungod kay kamo luwas ug nakagamot diha sa kahibalo nga kamo mga hinigugmang anak nga babaye sa Dios, kamo gimahal nga anak nga lalaki sa Dios, ug Siya migasa kaninyo sa Iyang hingpit, balaan nga Anak sa pagtubos kaninyo, paghatag og kaangayan kaninyo, ug pagbalaan kaninyo.
Kamo mao ang anak sa Dios. Dili lang kini usa ka maanindot nga awit nga atong kantahon. Palihog mahimo ba ninyong angkonon, ablihan, ug dawaton kini nga gasa sa kahibalo ug pagsabot gikan Kaniya? Mahimo ba ninyong hugot nga huptan kini sama sa bililhong bahandi nga kini mao? Dawata kini nga gasa pag-usab, o tingali matinud-anong dawaton kini sa labing unang higayon, ug tugoti kini nga mousab sa matag aspeto sa inyong kinabuhi. Kini mao ang mas maayo nga paagi sa Dios nga giandam alang kaninyo pinaagi sa gasa sa Iyang Anak. Kamo mao nga kamo makabaton og kamaya! Sa ngalan ni Jesukristo, amen.