Pagsalig diha sa Presensya sa Dios
Samtang kita makugihon nga nagtinguha nga makabaton og gugmang putli ug hiyas nga mopuno sa atong mga kinabuhi, ang atong pagsalig sa pagduol sa Dios molambo.
Minahal kong mga kaigsoonan, mapasalamaton ko nga makapamulong nganha kaninyo karon, niining importanteng kinatibuk-ang komperensiya. Ang akong mga mata nagkatigulang na. Salamat sa inyong pagsabot samtang ako mohatag sa akong mensahe.
Kita nagpuyo sa panahon sa talagsaong kapaspas diha sa Ang Simbahan ni Jesukristo sa mga Santos sa Ulahing mga Adlaw. Ako napuno sa kalipay samtang nagtan-aw sa pag-uswag diha sa daghan kaayong mga dapit.
Nadasig kaayo ko sa atong mga kabatan-onan. Daghan kaayo nila ang nagserbisyo sa daghang tawo. Sila nangita sa ilang mga katigulangan ug naghimo sa mga ordinansa diha sa templo. Ang atong batan-ong mga lalaki ug mga babaye nagsumiter og mga aplikasyon alang sa misyonaryo nga pagserbisyo diha sa talagsaong kadaghanon. Ang nagtubo nga henerasyon mitubag sa tawag nga magmaisogon nga mga sumusunod ni Jesukristo.
Bag-ohay lang akong nahimamat ang usa ka bag-ong apo sa tuhod nga babaye. Kon mamalandong ko sa mga hagit nga iyang masinati sa iyang kinabuhi, ako mobati og dakong tinguha sa pagtabang niya nga mapalig-on ang iyang pagtuo diha ni Jesukristo. Ang pagsunod sa Iyang ebanghelyo mahinungdanon alang sa iyang umaabot nga kalipay.
Siya, sama sa matag usa kanato, mag-atubang og mga hagit. Kitang tanan makasinati og sakit, kasagmuyo, tintasyon, ug kapildihan. Kini nga mga hagit makapaluya sa atong pagsalig sa kaugalingon. Apan, ang mga disipulo ni Jesukristo adunay dalan ngadto sa usa ka lahi nga matang sa pagsalig.
Kon kita mohimo ug motuman sa mga pakigsaad ngadto sa Dios, kita makabaton og pagsalig nga dinasig sa Espiritu. Ang Ginoo misulti ni Propeta Joseph Smith nga ang atong pagsalig “mosamot pagkalig-on sa atubangan sa Dios.” Hunahunaa ang kahupayan sa pagbaton og pagsalig diha sa presensya sa Dios!
Kon mosulti ko kabahin sa kamasaligon diha sa atubangan sa Dios, ako nagpasabot ngadto sa pagbaton og pagsalig diha sa pagduol sa Dios karon mismo! Nagpasabot ko sa pag-ampo inubanan sa pagsalig nga ang Langitnong Amahan maminaw kanato, nga Siya mas nakasabot sa atong mga panginahanglan labaw pa sa atong panabot. Nagpasabot ko sa pagbaton og pagsalig nga Siya nahigugma kanato labaw pa kay sa atong masabtan, nga Siya mopadala og mga anghel aron makauban nato ug niadtong atong gimahal. Ako nagpasabot sa pagbaton og pagsalig nga Siya nangandoy sa pagtabang sa matag usa kanato nga makab-ot ang atong labing taas nga potensiyal.
Karon, unsaon nato pag-angkon ang maong pagsalig? Ang Ginoo mitubag niining pangutana gamit kining mga pulong: “Himoa usab ang inyong mga kasingkasing nga … mapuno sa gugma nga putli ngadto sa tanan nga mga tawo, … ug himoa ang hiyas modayan-dayan sa inyong mga hunahuna nga walay paghunong; unya ang imong pagsalig mosamot pagkalig-on sa atubangan sa Dios.”
Mao kana ang yawe! Diha sa kaugalingong mga pulong sa Ginoo, ang gugma nga putli ug hiyas moabli sa dalan sa pagbaton og pagsalig sa atubangan sa Dios! Mga kaigsoonan, makahimo kita niini! Ang atong pagsalig tinuod nga molig-on diha sa presensya sa Dios, karon mismo!
Atong ikonsiderar ang gugmang putli ug hiyas.
Una, gugmang putli. Duha ka tuig na ang milabay, nanawagan ko kanato, isip mga sumusunod sa pakigsaad ni Jesukristo, nga mahimong tigpasiugda og kalinaw. Akong balikon kon unsay akong gisulti kaniadto: “Ang kasuko dili gayod makaawhag. Ang pagpakig-away dili makapalig-on sa usa ka tawo. Ang panagbingkil dili gayod mosangpot ngadto sa dinasig nga mga kasulbaran.”
Ang tinuod nga gugma nga putli ngadto sa tanang tawo maoy simbolo sa mga tigpasiugda og kalinaw! Mahinungdanon gayod nga kita magbaton og gugmang putli sa atong panaghisgotanay, sa publiko ug sa pribado. Akong gipasalamatan kadtong kinasingkasing nga midawat sa akong kanhi nga tambag. Apan makahimo gihapon kita og mas maayo.
Ang kasamtangan nga panagsumpaki sa dayalogo sa publiko ug sa social media makapaalarma. Ang mga pulong sa kasilag makamatay nga mga hinagiban. Ang panagbingkil mopugong sa Espiritu Santo isip atong kanunay nga kauban.
Isip mga sumusunod ni Jesukristo, kita kinahanglan mangulo sa dalan isip mga tigpasiugda sa kalinaw. Kon ang gugmang putli nahimong kabahin sa atong kinaiyahan, mawala ang pagbati sa pagpakaulaw sa uban. Kita mohunong sa paghukom sa uban. Magbaton kita og gugmang putli alang niadtong gikan sa tanang matang sa kinabuhi. Ang gugmang putli ngadto sa tanang katawhan mahinungdanon sa atong pag-uswag. Ang gugmang putli mao ang pundasyon sa diosnon nga kinaiya.
Mangamuyo kita ngadto sa atong Langitnong Amahan nga pun-on ang atong mga kasingkasing sa mas dakong gugmang putli–ilabi na niadtong lisod higugmaon–kay ang gugmang putli usa ka gasa gikan sa atong Langitnong Amahan alang sa tinuod nga mga sumusunod ni Jesukristo. Ang Manluluwas mao ang Prinsipe sa Kalinaw. Kita kinahanglan nga mahimong Iyang mga instrumento alang sa kalinaw.
Karon, maghisgot kita bahin sa hiyas. Ang Ginoo nagsulti kanato sa pagdayandayan og hiyas sa atong mga hunahuna sa walay paghunong. Hunahunaa ang pagdasig nga imong madawat sa bisan unsang positibo nga hunahuna, kon imong palamboon kini gamit ang hiyas. Ang hiyas makapahimo sa tanang butang nga mas maayo ug mas malipayon! Sa laing bahin, hunahunaa kon unsay mahitabo kon imong idugang ang hiyas ngadto sa dili putli nga hunahuna, mabangis nga hunahuna, o makapaguol nga hunahuna. Ang hiyas mopapahawa niadtong mga hunahuna. Ang hiyas mopalingkawas kaninyo gikan sa makapabalaka, makahasol nga mga hunahuna.
Mga kaigsoonan, samtang ang kalibotan nagkagrabe ang kadaotan, kinahanglan kitang molambo nga mas magkaputli. Ang atong mga hunahuna, mga pulong, ug mga buhat kinahanglan nga dili mapakyas nga mahiyason, ug puno sa gugmang putli ni Jesukristo ngadto sa tanang tawo. Ang dakong oportunidad sa atong atubangan mao ang pagkahimong mga tawo nga gusto sa Dios nga kita mamahimo.
Ang kanunay nga pagsimba diha sa balay sa Ginoo magdugang sa atong kapasidad alang sa hiyas ug gugmang putli. Sa ingon, ang panahon sulod sa templo makadugang sa atong pagsalig sa atubangan sa Ginoo. Ang pagdugang og panahon diha sa templo makatabang kanato nga maandam alang sa Ikaduhang Pag-anhi sa atong Manluluwas, si Jesukristo. Wala kita masayod sa adlaw o takna sa Iyang pag-abot. Apan ako nasayod nga ang Ginoo nag-aghat kanako sa pag-awhag kanato nga mangandam alang nianang “mahinungdanon ug makalilisang nga adlaw.”
Samtang kita makugihon nga nagtinguha nga makabaton og gugmang putli ug hiyas nga mopuno sa atong mga kinabuhi, ang atong pagsalig sa pagduol sa Dios molambo. Dapiton ko kamo sa paghimo og tinuyo nga lakang sa pagpalambo sa inyong pagsalig diha sa atubangan sa Ginoo. Unya, kon kita modangop sa atong Langitnong Amahan uban sa dugang nga pagsalig, mapuno kita sa dugang nga kalipay, ug ang atong hugot nga pagtuo ni Jesukristo molambo. Magsugod kita sa pagsinati og espirituhanong gahom nga molabaw sa atong labing dako nga mga paglaom.
Kita mapasalamaton ngadto sa Ginoo alang sa pagpadali sa pagtukod og templo sa bag-ohay nga katuigan. Ubos sa Iyang direksiyon, karon atong ipahibalo ang mga plano sa pagtukod og templo sa matag usa niining 15 ka lokasyon:
-
Reynosa, Mexico
-
Chorrillos, Peru
-
Rivera, Uruguay
-
Campo Grande, Brazil
-
Porto, Portugal
-
Uyo, Nigeria
-
San Jose del Monte, Philippines
-
Nouméa, New Caledonia
-
Liverpool, Australia
-
Caldwell, Idaho
-
Flagstaff, Arizona
-
Rapid City, South Dakota
-
Greenville, South Carolina
-
Norfolk, Virginia
-
Spanish Fork, Utah
Ako mopamatuod nga si Jesukristo, ang Manunubos sa Israel, naggiya niini, Iyang Simbahan. Siya nangandam aron moanhi pag-usab. Hinaot nga kita sa samang paagi mangandam sa pagdawat Kaniya. Alang niini ako nag-ampo sa ngalan ni Jesukristo, Amen.