Dili Mopatig-a sa Inyong mga Kasingkasing
Kon kita sinsero nga maghinulsol, magpaubos sa atong mga kaugalingon, ug mosalig sa Ginoo, ang atong mga kasingkasing pahumokon.
Ang Pagpahiuli sa ebanghelyo ni Jesukristo nagsugod sa dihang ang Dios nga Amahan ug ang Iyang Pinalangga nga Anak nagpakita sa batan-ong si Joseph Smith, nagtubag sa iyang mapaubsanong pangutana. Isip kabahin sa Pagpahiuli, si Joseph Smith mihubad sa karaang talaan pinaagi sa gasa ug gahom sa Dios. Kini nga talaan naglangkob sa “mga gibuhat sa Dios sa karaang mga lumulupyo sa Amerika ug naglangkob sa kahingpitan sa walay kataposang ebanghelyo.”
Sa batan-on pa ko, samtang nagbasa ko sa Basahon ni Mormon, kanunay kong naghunahuna kon ngano nga si Laman ug si Lemuel wala motuo sa mga kamatuoran nga gihatag ngadto nila, bisan kon ang anghel sa Ginoo direktang nagpakita ug namulong nila. Nganong dili man makahimo si Laman ug si Lemuel nga mas magpaubos ug masulundon sa mga pagtulun-an sa ilang amahan, si Lehi, ug sa ilang manghod nga igsoong si Nephi?
Akong nakit-an ang usa sa mga tubag niini nga pangutana sa 1 Nephi, nga nag-ingon nga si Nephi “nasubo tungod sa katig-a sa ilang mga kasingkasing.” Si Nephi nangutana sa iyang mga magulang nga igsoon, “Nganong tig-a kaayo ang inyong mga kasingkasing, ug nabutaan kaayo ang inyong mga salabotan?”
Unsa ang ipasabot sa tig-a nga kasingkasing?
Ang Korean nga hubad sa “tig-a” diha sa Basahon ni Mormon 완악 (Wan-Aak: 頑惡). Kini nga hugpong sa mga pulong naggamit og Chinese nga karakter “Wan” (頑), nagpasabot nga “gahig ulo,” ug “Aak” (惡), nagpasabot nga “daotan.” Kon kita mopatig-a sa atong mga kasingkasing, kita mabutaan, ug ang maayo nga mga butang dili makasulod sa atong mga kasingkasing o atong mga hunahuna. Mahimo kitang gahig ulo ug mas motutok sa kalibotanong mga tinguha, sirado ang atong mga kasingkasing sa mga butang sa Dios. Mopili kita sa pagtutok lamang sa atong kaugalingong mga hunahuna samtang dili modawat sa mga opinyon ug giya sa uban. Mopili kita nga dili moabli sa atong mga kasingkasing sa mga butang sa Dios kondili ngadto sa impluwensya sa mga butang sa kalibotan ug sa kaaway. Kon ang atong mga kasingkasing tig-a, modumili kita sa impluwensya sa Espiritu Santo. Kita “dugay nga mohinumdom sa Ginoo,” ug paglabay sa panahon kita mahimong “walay espirituhanong pagbati” sa Iyang mga pulong.
Si Alma mitudlo sa katawhan sa Ammonihah nga ang uban “nagdumili sa pagdawat sa Espiritu sa Dios tungod sa katig-a sa ilang mga kasingkasing.” Siya usab mitudlo nga “sila nga mopatig-a sa ilang mga kasingkasing, kanila ihatag ang mas gamay nga bahin sa pulong hangtod nga sila wala nay mahibaloan mahitungod sa iyang mga misteryo.” Sa kaulahian, ang Espiritu mopalayo, ug ang Ginoo “[mokuha sa Iyang] pulong gikan kanila,” gikan niadtong kinsa mipatig-a sa ilang mga kasingkasing sama ni Laman ug ni Lemuel. Tungod kay si Laman ug si Lemuel nagpadayon sa pagpatig-a sa ilang mga kasingkasing, midumili sa mga pagbati sa Espiritu Santo, ug wala mopili sa pagdawat sa mga pulong ug mga pagtulun-an sa ilang amahan ug ni Nephi, sa kaulahian ilang gisalikway ang mahangtorong mga kamatuoran gikan sa Dios.
Agi og sukwahi nila ni Laman ug Lemuel, si Nephi nagpadayon sa pagpaubos sa iyang kaugalingon, nagtinguha sa giya sa Espiritu sa Ginoo. Agig balos, ang Ginoo mipahumok sa kasingkasing ni Nephi. Si Nephi mipakigbahin nga siya “nangamuyo sa Ginoo; ug tan-awa siya mipabatyag kanako, ug mipahumok sa akong kasingkasing nga ako mituo sa tanan nga pulong nga gilitok sa akong amahan.” Ang Ginoo mitabang ni Nephi sa pagdawat, sa pagsabot, ug sa pagtuo sa tanang misteryo sa Dios ug sa Iyang mga pulong. Si Nephi nakabaton sa padayon nga pagpakig-uban sa Espiritu Santo.
Unsa ang atong mahimo aron dili magpatig-a sa atong mga kasingkasing?
Una, buhaton ang inadlaw nga paghinulsol.
Ang atong Manluluwas mitudlo, “Kinsa kadtong maghinulsol ug moduol kanako sama sa usa ka gamay nga bata, kaniya ako modawat.” Ang atong minahal nga propeta, si Presidente Russell M. Nelson, mitudlo:
“Ang paghinulsol mao ang yawe sa kalamboan. Ang lunsay nga hugot nga pagtuo maghimo nga makapadayon kita sa dalan sa pakigsaad.
“Palihog ayaw kahadlok o ilangay ang paghinulsol. Si Satanas mahimuot sa inyong kaalaotan. … Sugdi karon ang pagsinati og hingpit nga kalipay sa pagsalikway sa kinaiyanhon nga pagkatawo. Ang Manluluwas nahigugma kanato kanunay apan labaw pa kon kita maghinulsol.”
Samtang nagsinati kita sa kalipay sa pagpahumok sa atong kasingkasing ug sa pagduol ngadto sa Ginoo, kita mamahimong “sama sa usa ka bata, manunoton, maaghop, mapainubsanon, mapailobon, puno sa gugma, mauyonon sa pagtugyan sa tanan nga butang diin ang Ginoo makakita nga angay ipahamtang nganha kaniya, sa samang paagi nga ang usa ka bata motugyan sa iyang kaugalingon ngadto sa iyang amahan.”
Ikaduha, kita makahimo sa pagpaubos.
Ang inadlaw nga paghinulsol magdala og kamapaubsanon sa atong mga kasingkasing. Gusto kita nga magpaubos sa atubangan sa Ginoo, sama sa usa ka gamayng bata nga mosunod sa ilang amahan. Dayon makabaton kita sa Balaang Espiritu nga magauban kanato, ug ang atong mga kasingkasing mohumok.
Ang akong asawa, si Sue, ug ako adunay nakaila nga nindot nga magtiayon sa miaging upat ka tuig. Sa dihang una namo silang nahimamat, ang bana bag-ong miyembro sa Simbahan, ug ang iyang asawa nakigkita sa mga misyonaryo aron magtuon sa ebanghelyo. Daghang misyonaryo ang nakigkita niya aron motabang niya sa pagduol ngadto kang Kristo. Gibati namo nga siya adunay lig-ong pagpamatuod sa ebanghelyo ug nasayod nga ang Simbahan tinuod. Gibati niya ang Espiritu kanunay atol sa among mga pagbisita ug aktibong miapil sa tanang miting. Ganahan siya makighinabi sa buotan nga mga miyembro sa ward. Pero, naglisod siya sa pagpasalig sa iyang kaugalingon nga magpabunyag. Usa ka adlaw nagbasa siya sa Moroni 7:43–44, nga mabasa:
“Ug usab, sultihan ko kamo nga dili siya makabaton og pagtuo ug paglaom, gawas kon siya magmaaghop, ug magmapainubsanon sa kasingkasing.
“Kon mao, ang [inyong] pagtuo ug paglaom kawang, kay walay madawat sa atubangan sa Dios, gawas sa maaghop ug mapainubsanon nga kasingkasing.”
Human sa pagbasa niini nga mga bersikulo, siya nakaamgo kon unsay kinahanglan niyang buhaton. Nagtuo siya nga nakasabot na siya sa kahulogan sa pagkamaaghop ug pagkamapaubsanon. Pero, ang iyang pagsabot dili igo aron makabaton og pagtuo ug paglaom aron mosunod sa mga sugo sa Dios. Kinahanglan niyang isalikway ang iyang pagkagahig ulo ug ang iyang kaugalingong kaalam. Misugod siya sa pagpaubos sa iyang kaugalingon pinaagi sa sinsero nga paghinulsol. Nasabtan niya og sugod ang pagkamapaubsanon diha sa panglantaw sa mga mata sa Dios. Misalig siya sa Langitnong Amahan ug nag-ampo nga pahumokon ang iyang kaugalingong kasingkasing. Pinaagi niini nga mga pag-ampo, gibati niya ang Espiritu nga nagsaksi kaniya nga gusto sa Langitnong Amahan nga siya magpabunyag.
Ang bana ug asawa mipakigbahin nga sa dihang mas nagpaubos sila, mas nasabtan nila ang mga pulong sa Dios, ug ang ilang mga kasingkasing nahumok sa pagsunod sa mga pagtulun-an sa atong Ginoo nga si Jesukristo.
Ikatulo, makasalig kita sa atong Manluluwas.
Si Nephi usa ka maayong ehemplo sa pagtugot sa iyang kasingkasing nga mohumok pinaagi sa pagsalig sa Ginoo. Siya mitudlo, “O Ginoo, ako misalig kanimo, ug ako mosalig kanimo sa kahangtoran. Ako dili mobutang sa akong pagsalig diha sa gahom sa tawo.” Sa samang paagi, sa pagpadayag nga gihatag ngadto ni Propeta Joseph Smith, ang Ginoo miingon, “Itugyan ang imong pagsalig diha niana nga Espiritu nga nagtultol sa pagbuhat og maayo—oo, sa paghimo sa makiangayon, sa paglakaw nga mapainubsanon.” Kon atong itugyan ang atong pagsalig diha sa Ginoo ug mosalig Kaniya, Siya mopahumok sa atong mga kasingkasing, ug kita suportahan diha sa atong mga pagsulay, mga problema, ug mga kasakit.
Kon kita sinsero nga maghinulsol, magpaubos sa atong mga kaugalingon, ug mosalig sa Ginoo, ang atong mga kasingkasing pahumokon. Dayon Siya mobu-bu sa Iyang Espiritu ug mopakita kanato sa mga misteryo sa langit. Kita motuo sa tanang pulong nga Iyang gitudlo, ug ang atong panabot molawom.
Ang atong Manluluwas, si Jesukristo, mao ang labing maayo nga ehemplo sa kaaghop. Sa 2 Nephi 31:7, atong mabasa, “Apan bisan pa sa iyang pagkabalaan, iyang gipakita ngadto sa mga anak sa katawhan nga, sumala sa unod gipaubos niya ang iyang kaugalingon atubangan sa Amahan, ug gipamatud-an niya ngadto sa Amahan nga siya magmasulundon ngadto kaniya sa pagtuman sa iyang mga sugo.” Bisan kon Siya balaan ug hingpit, Siya mipaubos sa Iyang kaugalingon sa atubangan sa Amahan ug nagmasulundon Kaniya pinaagi sa pagpabunyag.
Sa kataposan sa Iyang mortal nga kinabuhi, si Jesukristo mitugyan sa Iyang kaugalingong pagbuot ngadto sa Iyang Amahan pinaagi sa pag-inom sa mapait nga kopa. Kini nga pag-antos nakapahimo Niya “sa pagkurog sa kasakit, ug sa pagpaagas sa dugo sa matag lungag sa panit, ug sa pag-antos sa lawas ug sa espiritu.” Ang Manluluwas mihangyo nga Siya “unta dili moinom sa mapait nga kopa, ug mobiya.” “Bisan pa niana, Siya miingon, “himaya ngadto sa Amahan, ug [Siya] [mi]ambit ug mihuman sa [Iyang] mga pagpangandam alang sa mga anak sa katawhan.”
Mga kaigsoonan, gihatagan kita og moral nga kabubut-on. Makapili kita sa pagpatig-a sa atong mga kasingkasing, o makapili kita sa pagpahumok sa atong mga kasingkasing. Sa atong inadlaw nga kinabuhi, makapili kita sa pagbuhat sa mga butang nga makadapit sa Espiritu sa Ginoo nga mosulod ug mopuyo sa atong mga kasingkasing. Ako nasayod nga niini nga mga pagpili, adunay kalinaw ug kalipay.
Atong sundon ang ehemplo sa atong Manluluwas, si Jesukristo, kinsa misunod sa kabubut-on sa Amahan. Kon kita mobuhat niana, ang Ginoo nagsaad nato, “Kay, tan-awa, pundokon nako sila sama sa himungaan nga nagpundok sa iyang mga piso sa ilawom sa iyang mga pako, kon dili sila magpatig-a sa ilang mga kasingkasing.” Sa ngalan ni Jesukristo, amen.