Ewe Kapasen Pwarata usun Jises
Ai tingor pwe oupwe fori iei oupwe onukunukano neniemi ussun emon mi nukuchar non ewe kapasen pwarata usun Jises.
Non 1832, Joseph Smith me Sidney Rigdon ra kuna ew amwararen nemesepwi ussun fetanin manauen Noun Kot kewe semirit ese much. Ei pwarata a kapas ussun unungat muun nang. Preseten Dallin H. Oaks a kapas ussun ekkei “muun ning” non ewe October a no,1 a pwarata pwe “seni ewe wachemuken win me ewe ningen ewe Apanen Siip,”2 meinisin nge ew kinikinin ekkoch aramas ra manau me non ew me nein kewe muu, , “anongonong won ewe mochen a pwa me non ar finata.”3 An Kot kokoten ngaseno a forata ew tufich faniten meinisin Noun semirit, inetenan me ianan ra nom ia won ei fonufan.
Nupwen ewe muu ewe kukkunun me nein ekkewe unungat muu, ewe telestial, “a nununo seni meinisin mine sia weweiti,”4 an Samach epinukunuk pwe sipwe fini—me, seni ewe chen An Noun We a otufichikich ngeni—ewe asechikin me a kon ning me nein ekkei muu, celestial, ikewe sa tongeni sipwe ani pwapwan manau esemuch ren “aea-fengen ngeni Kraist.”5 Preseten Russell M. Nelson a fen pesekich pwe sipwe “ekieki muun celestial,” anganga pwe ewe muun celestial ina Ach ewe mochenin esemuch me iwe murin “ekiekiochu eu me eu [ach] finata me ikei won fonufan epwe enenia [kich] non ewe fonufan mwirin.”6
Ekkewe non ewe muun celestial “ir ekkewe ra angei ewe kapasen pwarata usun Jises, … ekkewe aramas ra unusoch meren Jises ewe chon affor ren ewe minafon pwon.”7 Ekkewe re choni non ewe oruan, ika muun terrestial, muu ra awewei pun mi napngeni och, pachenong ekkewe “chon aramas sufon, ekkewe ra chununo ren tipacheman sonan aramas.” Ar koukun nongonong ren nikinikir “rese pochokun non ewe kapasen pwarata usun Jises.”8 Ren sokofesenir, ekkewe non ewe fanchikin, muun telestial ir ekkana “rese angei ewe kapas allim, esap pwan kapasen pwarata usun Jises.”9
Weweiti pwe ewe sokofesen nefinen ekkewe mi choni eu me eu ekkewe muu ren ifa ussun ar atononga ar “pwarata usun Jises,” a teten seni (1) mine mi nukuchar ngeni (2) mi nipwakingaw ngeni (3) mine rese fokun etiwa. Won an emon me emon aramas napanap a nom wor ar nonomun esemuch ren ekkan ran mwer.
I.
Met ewe kapasen pwarata usun Kraist?
Iei ewe pwarata meren ewe Ngun mi Fel pwe I ewe Noun Kot seni nang, ewe Messiah me Chon Angasano. Iei an John kapasen pwarata pwe Jises I ewe nepoputan ren Kot, pwe I ewe Chon fori nang me fonufan, me “non i ewe kapas allim, me ewe kapas allim ina ewe manau, me ewe manau ina ewe saramen aramas.”10 Iei “ewe kapasen pwarata an ekkewe Aposel me Soufos, … pwe I a mano, a peiasino, me ounungatin ran a manausefan, me feita nang.”11 Iei ewe mirit minne “ese pwan wor ew it epwe kawor minne epwe amanaua kich.”12 Iei ewe “kapasen pwarata, omuchunon me nein meinisin,” a kawor seni ewe Soufos Joseph Smith, “pwe i mi manau! … Pwe i ewe Noun Kot Anamon—pwe ren i, me seni i, me pokiten i, ekkewe fonufan ra foruta, me ekkewe chochon fonufan ir wesewesen noun Kot kewe at me nengin.”13
II.
Pekinon ei kapasen pwarata ina ewe kapaseis: Met sipwe ne fori ren ei?
Ekkewe chon nom non ewe muun selestial ra “angei” ewe kapasen pwarata usun Jises non ewe unusochun memef ren ach papatais, angei ewe Ngun mi Fel, me wineni ren nuku.14 Ekkewe nongonong me ennet ren ewe kapas allimen Jises Kraist a nemeni tetenin auchean me kewe pekin finata. Ewe kapasen pwarata ussun Jises a pwano non met ir me met ra winiti. Tong ennet ina ar popun, “ewe tong an Kraist mi unusoch.”15 Ra anonga ar ekiek ne tapwei “ewe koukun ewe napanapen inisin ewe unusochun Kraist.”16
Ika mo ekkoch me nein ekkana repwe pwa me non ewe muun terrestial ra pwan etiwa ewe kapasen pwarata ren Jises, nge ra sokofesen ren met ir rese fori usun. Ren ar rese nipwakoch ne pwarata ussun ewe Chon Amanau a esisinata ew koukun nipwakingawan tunono Ika tumunungaw—nonomun “rese kon pwichikar”17— rese usun ekkewe aramasen Ammon non ewe Puken Mormon, awewe ren, ekkewe ra “itefouno ren ar pwapwaiti Kot.”18
Ekkewe ra nom non ewe muun telestial ir ekkewe rese etiwa ewe kapasen pwarata ussun Jises fiti An ewe kapas allim, An pwon, me Noun kewe soufos. Abinadi a awewei ekkei ussun aramas “ren mine a fis anongonong won pusin nonomun tipisin ar mokutun ekiek me mochen; rese mo nge kori ewe Samon nupwen ewe poun umoumoch mi keitiu ngenir; pokiten ekkewe poun umoumoch ra keitiu ngenir, me rese mochen angei.”19
III.
Met wewen ach sipwe pworachou non ewe kapasen pwarata usun Jises?
Mi wor ekkoch tufich sia tongeni ekieki ren ponuen ei kapaseis. Upwe apasa ekkoch. Ren ach porachou non ewe kapasen pwarata ussun Jises ennetin a pachenong tumunun me apochokunen ena kapasen pwarata. Chon kuno mi ennet rese omonungaw seni ekkewe kukunun mettoch mi sapata me apochokuna ar kapasen pwarata usun Jises, awewe ren iotek, kaeo ekkewe pukefel, fori pungunon Raninifen, angei ewe sakrament, aier, iamwir, me fel ngeni non imwen ewe Samon. Preseten Nelson a achema ngenikich pwe “fiti mwitirin nuokus, ew pekin kapasen pwarata ena ese tumun iteiten ran ‘ren ewe murinon kapasen Kot ’ [Moroni 6:4 a tongeni tano. Ina ren, …a auchea sipwe sinei fel ngeni ewe Samon me kaeo An kapas allim.” Iwe a apachata: “Ua sio ngeni kemi opwe mut ngeni Kot epwe nemenem non manuemi. Ngeni I ekis nafochun om fansoun. Nupwen ka fori, nengenochu met a fis ngeni om amwokutun pekin ngun mi och.”20
Ren pworachou a pwan apochokuna ren sipwe pwarano me nein aramas usun an emon pekin pwarata. Non papatais, sia opungano ach mochen “ne uta ussun emon chon pwarata ussun Kot fansoun meinisin me non mettoch meinisin, me non neni meinisin pwe [kich] sipwe tongeni nom non, pwan mwo tori mano.”21 Non ei fansoun Easter akaewin, sia pwapwa, non pwapwano, me ounusochuono ne oporousa ach pwarata usun ewe Jises Kraist mi manausefan.
Ew kinikinin ach pworachou non ewe kapasen pwarata usun Jises ach sipwe rongosich ngeni Noun kewe chon kuno. Kot ese ouwesikich non ewe an mi kon murinno, ewe annen pwon, nge I a kapas ourour ngeni Noun kewe soufos ar repwe fori ach sipwe sineiochu pungunon ach kewe finata. Me esap chok ekkewe chon An Mwichefen. Seni Noun kewe soufos me aposel, I a tingor non an tong ngeni unusen ewe fonufan ar repwe tumunoch ngeni ewe ennet minne epwe fori ar repwe pichino,22 epichireno seni namotongawen riaffou, me wato rer pwapwa fochofoch.
Ach sipwe pworachou non ewe kapasen pwarata usun Jises wewen apochokuna ekkoch, ren kapas me minen apiru, usun chok pwan pworachou, akaewin ren ekkewe pusin chon ach famini. Elter Neal A. Maxwell a fen afanafana “ewe koukun memper mi ‘sufon’ [non ewe Mwichefen] ekkewe ir mi angei chok me won nge rese fen anganga ngeni repwe anonon ar fofor mwirino usun emon noun Kraist chon kuno me ekkewe fan ekkoch chok ar fifiti rese nikitu Doctrine and Covenants 76:7558:2723 Ese wor pwe meinisin ese kamo ach sipwe fini, Elter Maxwell a pwarano non an netipengaw: “Ngawan, pwe, nupwen ekkoch ra fini chipwang, rese chok fini faniter, nge ren pwan ekkewe tapin aramaser repwe feito. Ekis an sam me in pesepesengaw mi tongeni wate an nour semirit mwanino. Tapin aramas me nom non ew famini a pwano achocho, nupwen ekkoch non ei tapin aramas iei a pwano sokkun tokorikirik. Ngawan, pwe mwirin, ekkoch repwe fini tipefesen, a forata keimu fesen.”24
Ekkoch ier ra no, Elter John H. Groberg a aporousa ewe porous usun ew famini ir mi chok onuon me fopun ra nom non ew kukkun pranch non Hawaii non ewe ier 1900s. Ir ra fen choni ewe Mwichefen ren arapakan ruu ier nupwen emon me nein nour kewe nengin a semwen ese fat met sokkun semwen me a nuing. Non fan non ewe ew Raninifen, ewe sam me noun we at ra amonata ewe sakrament usun ra fofori iteiten wik, nge nupwen ewe semenap a fotopukutiw an epwe efeiochu ewe pinewa, ewe presetenin ewe pranch, a mwitir ne esina ion ewe ren ewe chepenin sakrament, a mweteta me puchor ne apasa, “Kouno. Kose tongeni atapa ewe sakrament. Noum ewe nengin a uri ew semwen ese fat. Mwitir feinno emon epwe fori eu minefon pinewan sakrament. Kose tongeni nom ikei. Feinno.” Ewe semenap a mairu a nenengeni ewe pranch preseten iwe mwirin ekkewe chon fan me, esina ewe onononun memefin ourek me sau seni meinisin, a pwom ngeni an we famini, iwe ra anifeu seni ewe fan.
Esap mo nge ew kapas epwe apasa, tipengauweno, ewe famini ra fetan won aaner ewe ngeni imwer we mi kukun. Ikewe ra mot non ew kukumos, me ewe sam a apasa, “Ouse mochen oupwe mosonoson tori ai upwe moneta ai upwe kapas.” Noun ewe kukun at a ekiek ika met repwe fori ar repwe angei siwinin ewe saw ra riaffouni: repwe awata noun ewe presetenin pranch ewe pik, ika keni imwan ewe, ika choni pwan ew mwichefen? Nimu, engon, engon me nimu-ruwe me-nimu minich a pasino non mosonoson.
Ewe sam a kumuchu fengeni outun me ongutano a poputa ne masosotiw, me sur chonun mesan. Ewe inenap a poputa ne kechiw, me ekkisino chok emon me emon kewe semirit ra kechiw non mosonoson. Ewe sam a kunungeni punuwan ewe me apasa, “Ai tong ngonuk”, me a eniwini ekkewe kapas ngeni emon me emon nour kewe semirit. “Ai tong ngeni kemi meinisin me ua mochen kich meinisin sipwe nomofengen, feinfeino, usun ew famini. Me ewe chok annen an epwe fis ei ren okich meinisin sipwe memper mi och non Ewe Mwichefenin Jses Kraist ren Aramas mi Pin non Fansoun Soponon me riri fengen me ren ewe pristut mi pin non ewe tempel. Ei esap an ewe pranch preseten mwichefen. Ewe Mwichefenin Jises Kraist. Sisap mut ngeni emon aramas ika sokkun emetek ika asawa ika esikesik epwe fori ach sisap chufengen feifeino. Non en Raninifen epwe feito sipwe niwinsefan ngeni fan. Sipwe chok nomofengen tori an nouch ewe semwen epwe fat, nge sipwe feino.
Ir mi niwin sefan ngeni fan, nour ewe nengin a chikar sefan, me ewe famini ra fen riri non ewe Laie Hawaii Tempel nupwen a wes. Ikenai, nap seni 100 aramas ra kori ngeni semer, semen iner me semer, me papachi a feioch pokiten a chok nengeni fansoun ese much.25
Ew sokkun pwarachou non kapasen pwarata ussun Jises upwe apasa pwe ach pusin atapwa ach epinikich won winikapach. Jises i nouch Chon Angasano mi auchea,26 me I a tingor, “Aier, meinisin won unusen fonufan, me feitto rei o papatais non itei, pwe oupwe epinipinino ren ewe Ngun mi Fel, pwe oupwe nimenimoch ne uta me mwei ren ewe omuchunon ran.”27
Ewe soufos Mormon a awewei ew mwichen souneng ewe a sopweno non ei napanap inamo ika “epwe mokut ika poputani fiti weires seni watten osukosuk ”:28
“Nge inamo ra echikipin me iotek fan chommong, me pochokun me pochokununo non ar tipetekison, me nukuchar me nukuchareno non ar nuku Kraist, tori ngunur a ureno ren pwapwa me kinamwe, ewer pwan mwo tori ewe enimenimen me epinipininon netiper, minne epinipininon a fis pokiten ar fangeta netiper ngeni Kot.”29 Iei ei watten siwinin netip, fangeno netipach ngeni Kot me upusefan non pekin ngun seni ewe chenin ewe Chon Amanau—ewe sia kuta.
Ai tingor pwe oupwe mokut iei oupwe onukunukano neniemi ussun emon mi porachou non ewe kapasen pwarata ussun Jises. Nupwen epwe auchea an epwe wor aier, “kosap amangano ewe ranin om aier,”31 nuokus pwe “non ew awa nupwen ouse ekieki pwe ewe summer epwe ne pasino, me atun kinikin uwa a wes, me ngunumi resap ngaseno.”32 Oupwe nikitu non ami aponueta ami kewe pwon mi pin ngeni Kot. Ousap “netipengaw [ren] ewe tichikin kapas.”33 “Chechemeni pwe oupwe onomu ewe it [iten Kraist] epwe mak non netipemi fansoun meinisin,… pwe I [epwe tongeni] rongorong me sinei ewe mongungu ren minne oupwe iteni, me pwan, ewe it ren minne i epwe kokori ngenikemi.”34 Me saingonon, “oposaeitiw non netipemi, pwe oupwe fori ekkewe mettoch minne [Jises] epwe osukuna, me annuku ngenikemi.”35
Samach a mochen meinisin Noun semirit repwe pwapwa non ewe manau ese much ren I non An muun seletial. Jises a riaffou, mano, me manau sefan an epwe fori ei tufich. I “a fen feita nang, me a fen mwotiw won peniemwanin Kot, pwe epwe tingor ngeni ewe Sam an kewe pungun umoumoch minne a fen aea won ekkewe noun aramas”36 Ua iotek pwe kich meinisin sipwe feiochuni ew ngetengeten kapasen pwarata ussun ewe Samon Jises Kraist, pwapwa me porachou non ewe kapasen pwarata, me ani meseiken ekkewe uwan An chen mi chok soposopono non manauach. Non iten Jises Kraist, amen.