Ekkewe tempel, Imwen ewe Samon epwe Choufetan won Fonufan

Seni Elter Neil L. Andersen

Seni ewe Mwichen Engon me Ruemon Aposel

Nupwen kopwe feito non nimenimoch me nukuchar ngeni Imwan mi pin, kopwe fokkun mefi An we manaman.

Met kese sano ekkewe ningochun kapas sia keran konu? “Upwe apochokunok, anisuk, me anisuk om kopwe uta, … tumunuk ren pei mi tupwen me manaman.”¹ Ewe Samol a apochokunata Noun Souneng ese nifinifin ierir atun ra eto ngeni Imwan mi pin. Seni Kinshasa ngeni Zollikofen ngeni Fukuoka ngeni Oakland, ekkewe serafo, won pusin ar, ra anapano ach angangen papatais. Me nom, napengeni ekkewe achengicheng chon angang a uwan mokurer—ese chiwen ina. Misineri mi koko, misineri ra angang, me ekkewe rafen wes angangen misineri ekis meinisin. Unusen fonufan, a fokkun napono ewe memefin uweikicheno ngeni imwen ewe Samon we.

A keran eu ier mwirin, emon achengicheng famini chienei, a ier 95, a nom won ewe coast non United State, ewe afen kakapas ngeni misineri non 70 ier, a apasa ngeni noun we nengin, “Ua mochen fituk ne no ngeni ewe tempel.”

Noun we nengin a ponuweni, “Iwe, mama, a auchea kopwe akom papatais.”

An ewe chinap sister fansoun papatais

“EWER,” a ponuweni, “iwe, ua mochen upwe papatais.” A fen papatais. Fitu ran me mwirin, a mosonoson ne tonong non ewe nenien papatais non ewe tempel. Me non ewe chok maram ano, a angei pusin an endowment me ririfengen. “Ewe weweiti me manaman an Kot ra wateno; ewe mangaku a ponu ewe fonufan a poputa ne suk.”²

Chinap sister nukun ewe temple.

En mi kan ekieki pwata ewe Samon a emweni Noun Soufos an epwe achou ewe fonufan ngeni Imwan mi pin?³ Pwata epwe I, non wesewesen ei fansoun epwe wato auchean ekkewe mwirimwirin aramas ngeni Noun aramas mi pin pwe seni ar asor mi pin, ipuku imwen ewe Samon kewe a tongeni kouta?

Non ei soran, Preseten Dallin H. Oaks a pwarano eu ningochun nios ren forutan tempel non unusen fonufan. Kathy me ngang aua chok nom non Phillipines. Ekieki usun ei manaman: Ewe Manila Tempel a efeioch non 1984. Ina epwe 26 me mwen ewe oruen tempel, non Cebu City, a wesochuno non 2010. Iei, a 14 ier mwirin, 11 tempel ra foruta, niosu, ika amonata repwe efeioch. Seni ewe north ngeni ewe south: Laoag, Tuguegarao, Santiago, Urdaneta, Alabang, Naga, Tacloban City, Iloilo, Bacolod, Cagayan de Oro, me Davao. Ammen amwarar ach kuna ewe amwararen angang an Kot!

Temples non Philippines.

Non unusen fonufan, imwen ewe Samon ra fokkun kanengeni kich. Pwata epwe non ach ei fansoun?

Kewe Saingon Ran

Ewe Samon a esine ngeni kich pwe non ewe saingon ran, mu repwe tipe ngaw fengen,⁴ aramas repwe “pusin tonger,”⁵ mettoch meinisin [repwe] fokkun fitikoko,”⁶ epwe wor osukosuk,⁷ me “netipen aramas [repwe] netipengaw.”⁸ Sia fokun kuna sokkun an mwan me fefina kun senir netipwer: ewe ningen fonufan, ewe nikatuputup a otupureno, ewe tumunungaw ngeni aninisin ngun, ewe chipwang ren an ekkewe chon kuno kapasen echim.⁹ Ewer kopwe fokkun netipengaw nupwen ka kuna emon kamen tongei, ewe a kapas fan eu ren ennetin an nuku non Jises Kraist, a pwarata usun ewe Puken Mormon, me fokkun mochen aninis ne ouweta ewe mun Kot, a keran towawono, ewer ren iei, seni an nuku me towaw seni ewe Mwichefen. Ai pesepes ngeni kemi osapw epinukunukumang! Mettoch meinisin mi och. Pwe ren Kot, ese wor mettoch epwe tufichingaw.¹⁰

Ren ei osini fitikoko me nukunukumang non ei fonufan, ewe Samon a pwon pwe epwe wor aramas pwon, aramas ra fokkun nukuchar ngeni An niwinsefan, aramas ra uta non ewe neni mi pin me rese suseni nenier.¹¹ A kapas usun ekkwe aramas nukuchar mine ra engino ngeni ekkewe sosot, mamasa ar nuku, ekiek murino, me nukuchar non ewe Chon Amanau, Jises Kraist.

Pwata ewe Samon a akana ngeni kich ipuku An kewe tempel? Eu popun me auchean non ei fonuen osukosuk me sosot, I a pwonei pwe epwe apochokuna me efeiochu Noun kewe Souneng pwon, me An kewe pwon a poputa ne fifis iei!

Kewe Pwon Seni ewe Kirtland Temple

Ifa usun an ekkei imw mi pin a apochokuna, oururu, me tumunu kich? Sia kuna ponuwan me non an ewe Soufos Joseph Smith tingor non ewe efeiochun ewe Tempel Kirtland. Iei non ewe tempel ikewe ie ekkewe Souneng ra aewin konu, “We’ll sing and we’ll shout with the armies of heaven.”¹² Ewe Chon Amanau A pwarano Inisin, me soufosun nom ra niwinsefan, ra wato ekkewe kien pristut ngeni ewe kapas allim a niwisefanito.¹³

Non ewe angang mi pin non ewe Tempel Kirtland, ewe soufos a iotek pwe non imwen ewe Samon mi pin, ekkewe Souneng repwe mefi ewe manamanen Kot, pwe ewe it Jises Kraist epwe nonom rer, pwe Noun kewe chon nang epwe mamaser, me repwe marita non ewe Samon me “angei unusen ewe Ngun mi Fel.”¹⁴ Ekkei manamanen tufich afen unusechuno non manauach nupwen sia unuseni pin non imwen ewe Samon.

Afout ren Wenechar

Non Imwan, sia fen endow ren manamanen nang.¹⁵ Ach nuku non Jises Kraist me ach tongei I a ennet me napono. Sia weweiti ren pekin ngun ika kich ion me ewe popun manauach.¹⁶ Nupwen sia nukuchar, sia feioch ren tumun seni sosot me osukosuk. Sia mefi an ach Chon Amanau tong nupwen a angasa kich seni ach weires me ach netipengaw. Sia tumun ren ewe manamanen Kot.

Itan won Kich

Non Imwan mi pin, sia ennetin mwarei itan. Nupwen sia papatais, sia pwarata ach nuku non I me ennetin mochen aponueta An kewe annuk. Non ewe tempel, sia pwonepin, seni ach kewe pwon, ne tapweno Mwirin fefeino.

Chungan Heber Valley Utah Tempel.

Serafon ei Mwichefen ramen fokkun murino. Non ei fonufan mi weires, ra wata wor ewe iten Kraist. Non Heber City, Utah, eu mwichen aramas ra mwichefengen ar repwe kapas usun tichikin koutan tempel. Unupuku serafo ra chouno non ewe park repwe pwarano ar tipeeu ngeni ewe kapas usun tempel. Emon onuon, a kapas ngeni ekkewe souemwenin kofemen ren sukunon, a pochokun ne awewei, “ua epinukunuku upwe apupunu non ei tempel. [Ewe tempel epwe anisi ei] ai upwe tumunu inisi epwe nimoch me pin.” Pwan eu awewen ewe tempel a eu esisinen saram me epinukunuk. Onuon me Fopun seni ei Mwichefen non unusen fonufan ra pwarata usun ar komochunuk iten Jises Kraist.¹⁷

Sarafo ra amasowa ewe park non Heber City.

Chon Nang Neich

Non ewe Tempel Kirtland, ewe Soufos Joseph a iotek pwe “chon nang [repwe] nonom ren [Noun Souneng].”¹⁸ Repwe fori ekkewe angangepin iteitan fan iten mwirimwirich kewe non ewe tempel ne wato eu ennetin nuku pwe ei manau epwe soposopono mwirin ei manau.

Ewer mi pung meinisin mine a fis ngeni kich non imwen ewe Samon we a fokkun pin ach sipwe apasa fetanei, ekkoch sia tongeni kapas ngeni ekkoch won. Faik ier ano, nupwen ua nom Florida, Am me Kathy aua no ngeni ewe tempel non Atlanta, Georgia. Non pwinin Ounungat, May 9, 1984, nupwen aua awesano ewe kinikin non ewe tempel, emon chon angangepin a feito me a eis ika mi wor ai fansoun upwe fori eu chok esisinen amonotan angangepin. Iten ewe aramas upwe siwini amen sokono. Ita we itan Eleazer Cercy.

Ewe ran mwirin, ewe tempel a fokkun urono ren Souneng. Nupwen ua amoneta ngeni oruen ai endowment non ewe ran, Ua angei iten ewe aramas upwe siwini. Ua mairu, ewe it pwan chok iten ewe aramas ren naneu, Eleazer Cercy. Ua mefi Ngunun ewe Samon nupwen ewe endowed a wesino. Mwirin non ewe anowasan, non chok ewe tempel, Kathy a kuna emon chienan chinap, Sister Dolly Fernandez, ewe a nom non Atlanta iei. Ese wor mwan chochon an famini epwe fiti, a tingoreei ika ngang mi tongeni anisi ne ririfengeni saman we ngeni saman kewe me inan. Ua men kinisou.

Nupwen ua fotopuku nesopun ewe antare ren ei angangepin, ua pwan rong sefan ewe it mine a pwan eniwin non ekieki, seman we, Eleazer Cercy. Ua ennetin nuku pwe mwirin ei manau, upwe churi me turufi emon mwan ua sinei non ei manau itan Eleazer Cercy.

Met mi fis ngeni kem me non imwen ewe Samon a awora pwapwa kinamwe me sokkun pwarata nap seni met sia ekieki. Nge mi ennet: chon nang ra nonom rech!

Ew Unusochun ewe Ngun mi Fel

Ewe niffangen Ngun mi Fel a ngeni kich nupwen sia apungano pwe kich chon ewe Mwichefen. Iteiten wik nupwen sia nimenimoch ne angei ewe pinewa me konik ach sipwe chechemeni ach Chon Amanau, sia angei pwonan pwe Ngunun epwe chok nonom rech.¹⁹ Ika sia feito ngeni imwen ewe Samon ren unusen netipach, ewe auchean neni mi pin won fonufan, sia marita non ewe Samon me tongeni “angei unusen ewe Ngun mi Fel.”²⁰ Seni manamanen ewe Ngun mi Fel, sia ureno ren kinamwe me pwapwa me epinukunuk.²¹ Sia angei ewe pochokunen nikitu pwe Noun chon kuno ina mwo ika sia kunakich me nukun ekkewe neni mi pin.

Preseten Russell M. Nelson a pwarata: “Ach Chon Amanau me Chon Angasano, Jises Kraist, epwe fori ekkoch An kewe angang mi tekia nefinen iei me mwen An epwe niwinsefan. Sipwe kuna amwararen esisin pwe Kot ewe Sam me … Jises Kraist ra nemeni unusen ei Mwichefen non an manaman me ning.”²² Achoufetanei fonufan ren imwen ewe Samon a eu amwararen angang me manaman mi pwano.²³

Chienei achengicheng, ika sia tongeni me sise mwo anapano ach feino non tempel, mut ngeni kich sipwe awora chommong fansoun sipwe feino iteitan sipwe angang non imwen ewe Samon we. Mut ngeni kich sipwe iotek faniten ekkewe tempel a esinesin non unusen fonufan, pwe neni repwe tongeni kamotiw, ekkewe kofemen repwe tipeeu ngeni, ekkewe chon angang murino repwe kuna ar kewe nifangen tipachem, me ewe efeioch mi pin epwe wato ewe ketiw seni nang me feito an chon nang.

Kewe Pwon

Ewe tempel wesewesen imwan ewe Samon. Ua pwon ngonuk nupwen ka feito nimenimoch me nukuchar ngeni Imwan mi pin, kopwe ureno ren An manaman, Itan epwe nonom reom, Noun chon nang repwe emwenuk, me kopwe marita non feiochun ewe Ngun mi Fel.

Ewe Samon a pwon, “Meinisin aramas minne repwe nikitano ar kewe tipis me feito rei, me kokkori itei, me anneasochisi mongungi, me apwonueta ai kewe annuk, repwe kuna won mesei me sinei ngang ion.”²⁴ Mi chommong anen om kopwe kuna mesen Kraist, me ese pwan wor eu neni me nukun Imwan we mi pin.²⁵

Non ekkei ranin osukosuk me fitikoko, ua pwarata pwe ewe tempel ina Imwan mi pin me epwe anisi kich, me amonakicheta ngeni ewe ningochun ran nupwen, Noun kewe chon nang, me ach Chon Amanau epwe niwinsefanito non ning, manaman, me waten muu. Non iten Jises Kraist, amen.

Esinesin

1. “Mi Pochokun ewe Nongonong,” Kon mi fel, nampa 4, wokison 3.

2. “Ewe Ngunun Kot,” Hymns, no. 2.

3. Iei a 182 Tempel sia aea. Onuu ra forsefan. Fisu ra utiwitin ar repew efeioch, me eu a utiwitin an epwe efeioch sefan. Mi wor 45 ra chiwen for me 94 rafen esinesin ika ra nom non kokot me for.

4. Nengeni Luke 21:10.

5. 2 Timothy 3:2.

6. Doctrine and Covenants 88:91.

7. Elder David A. Bednar a apasa: “Kewe nongonongun ewe kapas annim fan itom me fan itei ususun efoch kasi ngeni efoch sipw. Kewe nongonong mi pung ra ngeni kich ach sipwe kuna annach me utanuk, epinikunuk, me nukuchar pwe sisap tongeni mokutukut fetan me turunong non ekkewe monumonun rochopwak me osukosuk” (“The Principles of My Gospel,” Liahona, May 2021, 126).

8. Doctrine and Covenants 45:26.

9. “Ika emon a mochen fiti ei, epwe fakkun ponuku ekiekin pwisin inisin, epwe mwarei an irapenges, iwe epwe tapweto muri” (Matthew 16:24

10. Nengeni Luke 1:37.

11. Nengeni Doctrine and Covenants 87:8.

12. Kon mi Fel,, no. 2.

13. Nengeni Doctrine and Covenants 110. Ouchean ngeni ei fansoun, ewe Soufos Joseph Smith a angei ewe Aaronik Pristuthad received the Aaronik Pristut me kian kewe seni John ewe chon Papatais, me angei ewe Melksetek Pristut me kian seni ekkewe Aposel Peter, James, me John (nengeni Doctrine and Covenants 13:1; 27:12–13).

14. Doctrine and Covenants 109:15; nengeni pwan uwokisin 22.

15. Preseten Russell M. Nelson said: “Ewe tempel a tongeni anisi kich non ach angang fengen. Ikewe sia endowed ren an Kot manaman, a ngeni kich tufich ach sipwe ungeni Setan, ewe chon otupwutup non sokkun otuputup meinisin” (“Peacemakers Needed,” Liahona, May 2023, 101).

16. Russell M. Nelson, “Choices for Eternity” (fonufan unus chufengen ren serafo, May 15, 2022), Gospel Library.

17. Elter Colin Stauffer, personal correspondence, Jan. 30, 2024.

18. Doctrine and Covenants 109:22.

19. (Nengeni Doctrine and Covenants 20:77, 79.

20. Doctrine and Covenants 109:15.

21. Nengeni Rome 15:13.

22. Russell M. Nelson, “Revelation for the Church, Revelation for Our Lives,” Liahona, May 2018, 96.

23. Brigham Young a apasa, “Epwe wor ipuku tempel me ngorou mwan me fefin repwe emwen non ngeni ekkewe ir mi anut, nge ese wor ar fansoun ar repwe rong me anneasosichi ewe Kapas Allim” (Teachings of Presidents of the Church: Brigham Young [1997], 312). Me Preseten Ezra Taft Benson a apasa: “Nouch souemwen akom a pwarata pwe epwe unusono tempel non fonufan seni North me South America, ekkewe fonuen neset non Pacific, Europe, me ekis meinisin. Ika pwe ei angangen angasano epwe fis non ei napanap mi namot epwe fokkun wor, ipuku tempel mi namot epwe wor ”” (The Teachings of Ezra Taft Benson [1988], 247).

24. Doctrine and Covenants 93:1.

25. Elter David B. Haight a apasa:

    Elter David B. Haight a apasa: “A ennet pwe ekkoch ra ennetin kuna ach Chon Amanau, nge nupwen emon a anneani ewe puken wewen kapas, a kaeo pwe a tepetep wewen ewe kapas kuna, usun ach kaeo usun I, tufich mefi nonnomun I, esinna I me An angang, weweiti auchean I, ika poputa ne weweiti I.

    Ekkei sokku247n saramen nang me feioch a tufich ngenikich meinisin” (“Temples and Work Therein,” Ensign, Nov. 1990, 61).