Pworacho non Kapasen Pwaratan Jises
Sisap tongeni mut ngeni ach kapasen pwarata usun ewe Sam me ewe Nau repwe osukosuk me fitikoko ren foun chepetek.
Manau esemuch ina ewe wachemuken niffang me ren Kot me a kawor ngeni ekkewe ra aneasochisi an Kot kewe annuk me nikitu tori nesoponon.1 Nge, manau esemuch ren Samach won Nang ese fich ngeni ekkewe rese pworacho non ewe kapasen pwaratan Jises.2 Mi wor ekkoch foun chepetek ngeni ach pworacho ir mi tongeni eppeti kich seni ach sipwe tori manau esemuch.3 Foun chepetek ir mi tongeni fitikoko; iei upwe awewei.
Chommong ier a no semei we a aueta ew kukkun imw won kinikinin ewe nenien maan ikewe a marita me ie. Ekkewe neni esopun ewe masies ra fokkun ning. Nupwen tipanin ewe imw ra kauta, ua feito churi. Ua mairu pwe ewe asamwacho ra wenengeni efoch asira mi ekis towaweno seni ewe imw. Me rei, a ew watten aosukuosuk ngeni ewe ning mi pwano.
Ua apasa, “Papa, pwata ka mut ngenir repwe aueta ewe asira mwom om kopwe nenengeni seni ewe asamwacho?”
Semei we, emon mwan mi fokkun sokkono me mosonoson, a awewei fiti memef, “Quentin, enan asira ina ewe mettoch me won unusen ewe neni mi fokkun ning me rei!” Mwirin a affata pwata a mefi ena: “Nupwen ua nengeni enan asira, ua apareni pwe, ese usun nupwen ua marita me ikei, usap chiwen kakita pwekinen konik seni ewe puacheta ngeni ewe imwen kuk, tonu pei, ika tutu. Usap chiwen kek kanten ika nam nepwin ne annea. Ua mochen kuna enan asira nukanapen ewe asamwacho ai upwe kuna.”
A sokkono mefien semei we usun ewe asira nap seniei. Me ren pwe ewe asira a asisinata ew manau mi murino, nge me rei a ew foun chepetek ngeni ningen ai kuna ewe neni. Semei we a aucheani fifi, saram, nimenimoch nap seni ningen mettoch sia kuna. Ua mwitir apareni pwe nupwen ewe asira a ew foun chepetk me rei, watte auchean, asisinan ngeni semei we.
Ew foun chepetek a “ew eppet ngeni nuku are weweiti” ika “ew eppet ngeni ach fefeita.”4 Ach turuno non pekin ngun a wewen “ach nom non tipis ika mettoch mi ungeni pung.”5 Ew foun chepetek mi tongeni epwe och mettoch a aruka kich seni ach tori mettoch mi tupwon.
Sisap tongeni mut ngeni ach kapasen pwarata usun ewe Sam me ewe Nau repwe osukosuk me fitikoko ren foun chepetek. Sisap tup ren ekkei osukosuk. Ach kapasen pwarata Usur repwe chok nimenimoch me mecheres usun an semei we peni ewe asira won ewe nenien man ikewe a marita ie.
Met ekkoch foun chepetek ra aosukosuka me afitikoko ach kapasen pwarata mi nimenimoch me mecheres usun ewe Sam me ewe Nau o a eppetikich seni ach pworacho non ena kapasen pwarata?
Sinenapen Aramas ina ew Foun Chepetek
Sia unusen aucheani sokkun mirit meinisin me nuku ewe ningen Kot pwe mi tipachem.6 Nge kich mi pwan sinei pwe ewe kokkot an ewe chon ungeni kich pwe epwe emwenano aramas seni Kot me fori ar repwe turuno ren an pesei ekkewe sinenapen aramas nap seni ewe Chon Amanau me An afanafan.
Ewe Aposel Paul I emon chon pwaratan Jises Kraist mi pworacho pokiten ew manaman me ekkesiwinin manauan me ren ewe Chon Amanau.7 Nonnomun Paul mi sokkono a amwonata I ne weweiti aramas seni sokopaten oreni. A sani “pochokunen me wenecharen” ewe Chon Thessalonia me ewe “kirekirochun” ewe Chon Philippi.8 A akkom kuna pwe mi weires an epwe weweiti tipacheman me miriten Chon Greece. Non Athen won Chukun Mars, a sossot ne afanafan ren sinenapen aramas nge ese ketiw. Ngeni ekkewe Chon Corinth a chok afanafana “ewe nongonongen an Kraist irapengesino.”9 Upwe pwisin aea an Paul Kapas:
“O use afanafan are kapas usun ekkewe aramas mi sinenap me mirit, nge ai afanafan a pwarata usun manamanen ewe Ngunun God:
“Ami nuku esap anongonong won sinenapen aramas, nge epwe anongonong won pochokunen God..”10
Ekkoch me nein ekkewe amwararen uruo non pukefel usun ewe Chon Amanau me An Misin ra nom non 1 Corinth. Ew sopun—15—a fen itefouno me non fonufan seni ekkewe sipain an George Frideric we kon Messiah.11 A masouweni nongonong usun ewe Chon Amanau. Non ewe aunungatin kinikinin ewe Messiah, mwirin ewe “Hallelujah Chorus,” napengeni ekkewe uwokisin ra feito seni 1 Corinth 15. Non ekkoch ekkei uwokisin, Paul a awewei non ningoch ekkoch mettoch ewe Chon Amanau a apwonueta:
“[Nge] mi fakkun ennet pwe Kraist a fen manaueta seni mano, … ekkewe ra mano repwe pwan manau sefan.
“… Usun mano a popu seni emon aramas, ina chok usun manau sefan seni mano a popu seni emon aramas.
“Pun usun aramas meinisin repwe mano ren ar chiechi ngeni Adam, iwe pwan ina chok usun meinisin repwe manau sefen ren ar chufengen me Kraist. …
“Mano, ifa om pworacho? Mano, ifa om pochokunen afeiengawa …
“Nge sipwe kinisou ngeni Kot, [ewe] a ngeni kich ewe pworacho punun ach Samon Jises Kraist.”12
Sia sinei pwe ewe Fansoun rochopwak a fis pokiten ekkewe sinenapen aramas ra seikita seni An Kraist nongonong mi auchea. Rese afanafana An ewe Chon Amanau we poraus, chommong ennet mi fatafatoch me auchea ra siwin me mworukono. Ennetin, Chon nuku Kraist ra etiwa ekkoch orenien Greek pwe repwe usun ewe oreni mi itefouno. Ewe chon uruo Will Durant a makkei: “Chon nuku Kraist rese atano nuku usun mettochun fonufan; ra etiwa. Ewe orenien Greek a ngaweno nge a popusefan non ekkewe ra etiwa kinikin.13 Me nom, pwan non manauach ikenai, ekkoch rese etiwa ewe kapas allimen Jises Kraist pun, ngeni pwisin ir, ese nonno ren ekiekin chon fonufan
Nepoputan ewe Niwinsefanito, chommong aramas ra apasa pwe ra tapweno mwirin afanafanen ewe Chon Amanau. Chommong fonu ra ekieki pwe ir chon nuku Kraist. Nge mi wor osini usun ew fansoun mi aweiresi kich ren ach fansoun.
Heber C. Kimball I emon me nein ekkewe akkomwen Engon me Ruemon Aposel non ei kinikinin fansoun me Aewin Chon Aninis ngeni Preseten Brigham Young. A fonoukich: “Ewe fansoun a feito nupwen … epwe weires ach sipwe sinei ion souneng seni chon koum ngeni ekkewe aramasen Kot. Iwe … sipwe tumunuochu ewe kaimufesen, pun epwe wor fansoun watten kaimufesen, me chommong repwe turuno.” A sopweno pwe epwe wor “ew TES epwe feito.”14
Non ach ei fansoun, ewe mwokutukutun Chon nuku Kraist non chommong fonu, mi pachenong Merika, a fokkun kukkununo. Ika esap wor nuku non namanam, esap wor memefin kapas ngeni Kot. Ina minne mi weires ach sipwe forata mettoch mi auchea usun ach sipwe manau. Sinenapen aramas minne ir mi fifis ra kan osukosuk fengen.
Nge, ei a pwan fis ren ekkoch chon ewe Mwichefen ekkewe ra rikino seni met ir mi sinei pwe mi pung me pesepes me ren met mi itefouno non na fansoun—chommong mi fatoch pwe rese tupwon.
Usun osinien Heber C. Kimball, Elder Neal A. Maxwell a apasa non 1982: “Epwe wor aimunon watte pokiten kounon fofforoch aramas resap aier seni. Ekkoch repwe fangeta nap seni ar nikitu tori nesoponon. Ekkoch repwe tup ren chon ungenir. Ennetin, ekkoch repwe song, pun a wor foun chepetekan aramas non meinisin ekkewe kinikinin fansoun fonufan!”15
Ach Amam ne Esinna pwe met Sia Fori mi Tipis mi Pwan ew Foun Chepetek
Ew me nein kinikinin ach fansoun mi sokkono me aosukosuk ina pwe chommong aramas ra fiti mwokutukut mi tipis me ra amonungaweno pwe ese tipis. Ese wor ar niamam ika rese mochen esinna ar mwokutukut pwe mi ngaw. Pwan ekkoch ekkewe ra era pwe ra nuku non ewe Sam me ewe Nau ra mwan ren ar nuku pwe emon Sam won Nang mi tong esap echimwa pungun mwokutukut mi ungeni An kewe annuk.
Iei ewe nuku an Korianton, noun Alma ewe Nau non ewe Puken Mormon. A fori mwokutukut mi tipisinap me a aurour me ren Alma. Sia feioch pwe ewe soufos Alma, ewe a fen pwisin mefi “ewe rochopwaken pwang [me] ewe amwararen saram.”16 a makketiw ewe aurour a fen ngeni. Non sopun 39 non Alma, sia anneani ifa usun a auroura noun we me ren ewe tettenin aier me mwirin a awewei ifa usun Kraist epwe feito pwe epwe angeiano tipis. A fori auchean aier epwe fatafatoch ngeni Korianton pokiten “ese wor mettoch mi nimengaw a tongeni muuni ewe muun Kot.”17
Alma 42 a masoweni ekkoch nongonong mi amwarar usun ewe Achasefan non pukefel meinisin. Alma a anisi Korianton an epwe weweiti pwe ese “pungoch pwe ekkewe chon tipis repwe ewiis ngeni ew nikinikin riaffou.”18 Nge a afffata pwe poputa seni Adam, emon Kot mi umoumoch a awora ew “fansoun aier” pokiten ika ese wor aier, “iwe ewe kokkotun amanau mi auchea esap fen pwonueta.”19 Alma a pwan apungano pwe an Kot we kokkot a ew “kokkotun pwapwa.”20
An Alma afanafan ra unusen aitiechukich: “Pun nengeni, pungoch a apwonueta an kewe mochen meinisin, me pwan umoumoch a nemanano met minne an pwisin meinisin; iwe; iwe iei, ese wor nge ekkewe chok mi ennetin aier ra manau.”21 Sia weweiti ennetin, ekkewe feiochun aier me aneasochis ngeni an ewe Chon Amanau afanafan ra fokkun auchea. Ese pung an ese fatoch, usun Alma ren Korianton, usun ekkewe pungun ach finata tipis me ach sise aier. A fen affat, “Mwirtir chok meinisin repwe kuna pungun met ra finata.”22
Ewe feioch mi amwarar me seni nang a feito seni an ewe Chon Amanau we Achasefan ina pwe non aier, mwokutukutun tipis ra tottonuno. Mwirin an Korianton aier, Alma a sopweno, “Kosap chiwen mut ngeni ekkei mettoch repwe aosukosukok, iwe kopwe chok mut ngeni om kewe tipis repwe aosukosukok, ren ena osukosuk minne repwe uweiuketiw ngeni aier.”23
Ach neno seni ewe Esisin Ina ew Foun Chepetek
Ewe soufos Jacob a era pwe ekkewe chon Jew me nom ir “aramas nukumach [ra] oput … fatafatoch, … “nieno ekkewe soufos, me kutta ekkewe mettoch rese tongeni weweiti, Ina minne, pokiten ar chun, minne ewe chun a feito seni nunon ar neno seni ewe esisin, mi auchea repwe turutiw.”24
Nupwen mi chommong awewen neno seni ewe esisin,25 nunon mettoch ina ew awewe mi nap non ach fansoun. Nunon kapas allim a fis nupwen emon a anapa ew nongonongen kapas allim nap seni pwan ekkoch nongonong mi nonno auchear me angei ew wiis mi ungeni afanafanen sou emwenin ewe Mwichefen. Ew awewe a nupwen emon a pesei pwan ekkoch mettoch, siwini, ika echimwa kinikinin ewe Kapasen Emirit. Pwan ew awewe ina amwonetan soponon ewe fonufan mi watte niwinin. Non ir me ru awewe, ekkoch ra pesepes ne etiwa afanafan mi monomon. “Ika sia siwin ew annukun pochokunen inis ika och nongonong ngeni ew napanapanen namanam, sia neno seni ewe esisin.”26
Ach kapas usun auchean nongonong, ewe Samon a apasa, pwe ion chok a afanafana nap seni ika ekis seni ei, I esap seniei.27 Nupwen sia seikata och nongonong non ew napanap an epwe akukunano ach mochen nikitu ngeni pwan ekkoch nongonong mi nonno auchear ika angei ew wiis mi ungeni are minne mi nap seni afanafanen sou emwenin Mwichefen, sia neno seni ewe esisin.
Pwan, ekkoch chon ewe mwichefen ra seikata mwokutukut, chommong ir mi och, ngeni ew wiis mi nap seni nongonongen kapas allim. Ra siwini ar achocho ngeni ewe mwokutukut pw ear aewin nikitu me akukunatiw ar nikitu ngeni ewe Chon Amanau me An afanafan ngeni aruwen kinikin. Ika sia seikata och mettoch seni ach nikitu ngeni ewe Chon Amanau, ika ach mwokutukut ra etiwa I pwe emon chok pwan sense me esap ewe Noun Kot mi fel, iwe sia neneno seni ewe esisin. Jises Kraist I ewe esisin!
Ewe 76 kinikinin ewe Doctrine and Covenants a afffata pwe ach “pworacho non ewe kapasen pwaratan Jises”28 ina ewe tes mi mecheres me auchea nefinen ekkewe repwe muuni feiochun ewe muun selestial me ekkewe non ewe muun terrestrial. Ren ach sipwe pworacho, mi auchea sipwe anonga ach ekiek won manamanen Jises Kraist me An achasefan ne akkufu mano me, ren ach sipwe aier, ne nimetikich seni tipis, me tapweno mwirin ewe nongonongen Kraist.29 Mi pwan auchea ngenikich ewe saram me miritin manauen ewe Chon Amanau me an afanafan ne emwenikich ne aneasochisi ach pwon mi pin, mi pachenong annukun tempel. Sipwe nukuchar non Kraist, kametip won An kapas, me nikitu tori nesoponon.30
Nesoponon
Ika sia pworacho non ach kapasen pwaratan Jises, sipwe suseni ekkewe foun chepetek ra akouno me eppeti fefeitan chommong mwan me fefin mi murino. Sipwe nikitu ne nonnom chok non An angang. Nupwen sia kutta mirit, sipwe suseni ekkewe sinenapen aramas ekkewe ra akukkunano ach nikitu ngeni ewe Chon Amanau. Sipwe weweochuti usun tipis me etiwa an ewe Chon Amanau Achasefan ren ach sipwe aier. Sipwe suseni ach neneno seni ewe esisin me anonga ach ekiek won Jises Kraist, ach Chon Amanau me Chon Angasano, me tapweno mwirin An nongonong.
Semei we a kuna ewe asira pwe ew popun kaworen fifi, saram, me watten konik fan itan kuk me nimenim. A ew aninnis ngeni an manau mi murino.
Emon chon mak a apasa pwe foun chepetek ir mi tongeni winiti “aninnis ngeni ew napanapaoch mi sufon pwan anisi kich ne Nang.”31
Ngeni kich, ach pworacho non ach kapasen pwaratan Jises ina ew kinikin ngeni ach sipwe fich ngeni an ewe Chon Amanau chen me we muun celestial. Jises Kraist ina ewe chok it fan nang ren minne aramas repwe tongeni manau ren.32 Ua pwarata ai ennetin kapasen pwarata usun Tekian me An popun non kokkotun ewe Sam. Non itan Jises Kraist, amen.