“Pokiten Oua Fen Sinei Ei”
Kich mi sinei usun ewe Chon Amanau, are sia sopweno ne sinei I Ifa usun sipwe sinei ewe Samon?
Nupwen ewe Chon Amanaw a asopono ewe Afanafan won ewe Chukuchukuta, I a a afanafana usun ewe nongonong mi ennet pwe “sia chok tongeni angei an ewe Nau chen ika sia fori netipan ewe Sam.”1
A apasa:
“Esap aramas meinisin mi kan kori ngeni ei, ‘Samon, Samon,’ repwe tonong non ewe Muun nang, nge ir ekkewe chok mi fori netipen Semei we non nang.
“Nupwen epwe tori ewe Ranin Kopung, chommong repwe apasa ngeni ei, ‘Samol, Samol! Fan itom am oua afanafana ewe kapasen Kot, fan itom oua asueno chommong ngunu ngaw o am oua fori chommong manaman!’
“Iwe, upwe apasa ngenir, ‘Use mo sinei kemi. Oupwe su seni ei, ami aramas mi ngaw!’”2
Ach weweiti usun ei afanafan mi anapano nupwen sia ekieki usun ekkewe wokisin mi chiaku sefan ren pwarata. Mi auchea pwe an ewe Samon kapas non ewe Paipen seni King James, “Use mo sinei kemi,” a siwin ngeni “Ouse mo sinei ei”3 non ewe wokisin minne Joseph Smith a chiakuni.3
Ekieki usun ewe kapas monomon usun ekkewe engon fopun. Chechemeni pwe ekkewe nimmon mi tiparoch me rese monota ra feino angei anonon nour kewe nam mwirin ra rongorong ewe kokko pwe repwe feino souni ewe chon apuppunu.
“Iwe ekkewe mi tiparoch ra feinno pwe repwe kamo anonon nour ekkewe nam, nge non chok ewe atun ewe chon apuppunu a wareto. Iwe ekkewe nimmon fopun ra fen monnota ra fitanong atewe non ewe nenien kametipen apuppunu, iwe ewe asam a kapunguno.
“Murin chok ekis fansoun ekkewe nimmon fopun mi tiparoch ra wareto. Iwe ra kokko, ‘Maing, maing! Kose mochen am oupwe tonong!’
“Ewe chon apuppunu a ponuweni, ‘Apw! Use sinei kemi.’”4
Sia tongeni weweiti auchean ei kapas monomon ren pwan eu wokisin mi chiaku sefan. Auchean, ekkewe kapas “Use sinei kemi” minne mi nom non ewe Paipen seni King James a siwin ngeni “Ouse sinei ei,”5 non ewe wokisin minne Joseph Smith a chiakuni.5
Ekewe kapas “Ouse mo sinei ei” me “Ouse sinei ei” epwe efisata ach pwisin ekieki usun nonnomuch. Sia chok sinei usun ewe Chon Amanau, are sia sopweno ne sinei I? Ifa usun sipwe sinei ewe Samon? Ekkei kapas eis an ewe ngun ikana ekkewe nongonongun ai afanafan. Ua ennetin tingorei ewe Ngun mi Fel an epwe anisikich nupwen sia ekieki usun ei nongonong mi unusen auchea.
Poputa ne Sinei
Jises a apasa:
“Ngang ewe aan, ewe ennet o ewe manau. Ese wor emon epwe feinno ren ewe Sam ika esap punun ngang.
“Pokiten oua fen sinei ei, oupwe ne pwan sinei Semei we.”6
Sia poputa ne sinei ewe Sam nupwen sia poputa ne sinei Noun we At mi Achengicheng.
Eu watten popun manauach won fonufan mi auchea minne sisap chok kaeo usun Noun ewe Sam ewe Anamon nge sipwe achocho ne sinei I. Ruanu mettoch sia tongeni fori pwe sipwe sinei ewe Samon pwe sipwe anganga ach nuku non I, tapweno mwirin i, angang fan itan I, me nuku non I.
Anganga Ach Nuku non I
Ach anganga ach nuku non Jises Kraist a wewen pwe sia anongonong won An angang, umoumoch, me chen.7 Sia poputa ne sinei ewe Chon Amanau nupwen sia poputa ne anganga ngunuch me sotuni An kewe afanafan, tori sia awora nenien An kapas non ngunuch.8 Nupwen ach nuku non ewe Samon a awateno, sia nuku non I me sia nuku non An manaman ne amanaua, echikara, me apochokuna kich.
Ennetin nuku non me won ewe Samon a efisata foffor mi tupwon fansoun meinisin. “Nuku non Kraist [mi] ewe aewin nongonongen namanam, … ewe nongonongen mettoch meinisin mi tupwon … me ewe nongonongen foffor an aramas meinisin.”9 Ewe Chon Amanau a pwarata pwe mi namwot ach sipwe manaueni ekkewe nongonong mi ennet pwe sipwe angei me anganga ennetin nuku, “ika nuku ese fiti foffor, mi chok namwot muan.”10 Sisap “chok ausening ngeni an kapas, nge [sipwe] aponueta non [ach] foffor.”11
Ach rong an Kot kapas me ach angei ewe niffangen nuku non ewe Chon Amanau mi angang fengen, “nuku mi feito seni ach rongorong ewe kapas, nge ewe kapas mi feito seni ekkewe ra afanafan ussun Christ.”12 Sia kaeo usun I me mongungun nupwen sia anneani me kametip won An kapas non ekkewe pukfel,13 iotek ngeni ewe Sam non Itan ren ennetin netip,14 me kuta ach sipwe chiechi ngeni ewe Ngun mi Fel fansoun meinisin.15 Ach kaeo me manaueni ekkewe nongonongen Kraist a namwot ach sipwe anganga ewe niffangen nuku non I.16
Ach anganga ach nuku non ewe Samon mi namwot non ach ammonata ne tapweno mwirin I.
Tapweno Mwirin I
“Nge nupwen an Jesus a feffetanno arossetin ewe Noom Galilee, a kuna ruemon pwipwi ir chon attaw, Simon (pwan itan Peter) o pwin we itan Andrew, ra akkattaw non ewe noom non nour we chew.
“Jesus a apasa ngenir, ‘Oupwe feito fiti ei o upwe aiti kemi ifa ussun oupwe attawa aramas.’
“Muttir chok ra nikitano nour kewe chew o ra fitano Jesus.”17
Peter me Andrew ir me ruemon nenien appiru usun aramas mi rongornong me tapweno mwrinin ewe Masta.
Ewe Chon Amanau a pwan tingoreikich ami me ngang: “Ika emon a mochen fiti ei, epwe fakkun ponuku ekiekin pwisin inisin, epwe mwarei an irapenges, iwe epwe tapweto muri.”18 Nupwen sia mwarei An irapenges a wewen pwe sia nikitano mettoch meinisin mi ngau me ekkewe mochenin fonufan me anneasochisi ekkewe annukun ewe Samon.19
Ewe Chon Amanau a pesei kich pwe sipwe winiti usun I.20 Iwe, ach tapweno mwirin ewe Samon a wewen sia appiru I. Sia achocho ach sipwe sinei ewe Samon nupwen sia achocho ach sipwe winiti usun I me ren ewe manamanen An angangen Achesefan.
Non An angang won fonufan, Jises a aitikich ewe an, a emweni kich, me I ewe nenien appiru mi unusoch. Ach weweiti napanapan, unusochun, me nikinikin 21a awora ach popun me ew an ach sipwe tapweno mwirin I won ewe anen chon kaeo mi nukuchar.
Ach tapweno mwirin ewe Chon Amanau a otufichikich ach sipwe angei mirit pwe ewe an sia fiti non manauach mi fich ren netipen Kot.22 Ei mirit esap ew metoch mi monomon me ese anongonong won ekkewe mettoch sia achocho ne fori are ekieki usun ren mettochun fonufan. Nge, ach soposopweno ne fefeita won ewe anen ach fori me apwonueta pwon mi pin mi ewe chok an non ei manau mi apwapwai I.
An Liai tan non ewe Puken Mormon a pwarata ewe an minne siwpe fiti, ekkewe osukosuk sipwe kuna, me ekkewe mettochun ngun mi tongeni anisi kich ach sipwe tapweno mwirin me feito ren ewe Chon Amanau. Ach soposopweno won ewe an mi aukukkun me chokisikis ina met A mochen sipwe fori. Ach nenni uwan ewe ira me nupwen sia ennetin “siwin ngeni ewe Samon”23 iei ekkewe feioch A mochen sipwe angei. Iwe, A kokkorikich, “[Oupwe] tapweto muri.”24
Ach anganga ach nuku non me ach tapweno mwirin Jises Karist mi namwot non ach ammonata ne angang ngeni I.
Angang Ngeni I
“Pun ifa usun an emon aramas epwe sinei ewe masta i esamo angang ngeni, me i emon chon ekis ngeni i, me mi towaw seni ekiekin me popun netipan?”25
Sia awateno ach sinei ewe Samon nupwen sia angang ngeni I me angang non muun we. Nupwen sia fori, A efeiochu kich ren aninis seni nang, niffang non pekin ngun, me pwan och tufich. Sise akanaemon nupwen sia angang non An atake.
A apasa, Upwe feino mwen mesemi. Upwe nom won penien mwanemi me penien fefinemi, me Nguni epwe nom non netipemi, me nei kewe chon nang repwe pwenikemino, me apochokuna kemi.”26
Sia poputa ne sinei ewe Chon Amanau nupwen sia achocho ne feino ian A mochen sipwe feino ia, nupwen sia achocho ne apasa met A mochen sipwe apasa, me nupwen sia achocho ne winiti met A mochen sipwe winiti.27 Nupwen sia esina pwe sia unusen anongonong won I, A awatteno ach tufichin angang. Ekis me ekis, ach mochen a poputa ne fiti An mochen, me An kewe popun mi winiti ach kewe popun, iwe sisap “tingor met minne mi ungeni [An] mochen.”28
Mi namwot sipwe aea unusen netipach, ach tufich, ekiekich, me ach pochokun nupwen sia angang ngeni I.29 Nge, ach angang ngeni ekkoch me sise ekieki usun pwisin kich a poracho ngeni ekkewe mochenin ewe inisin fituk. Sia poputa ne tongei ekkewe sia angang ngeni. Me pokiten nupwen sia angang ngeni ekkoch sia angang ngeni Kot, sia awatteno ach tongei I me pwich me fefinach. Ei sokun tong a pwarata ewe niffangen tong ennet, pwan mo ewe tongen Kraist mi unusoch.30
“Iotek ngeni ewe Sam ren unusen pochokunen netip, pwe oupwe ureno ren ei tong, minne a fen wata won ir meinisin chon ennetin tapweno mwirin Noun we, Jises Kraist; pwe oupwe winiti noun Kot; pwe nupwen i epwe pwato sipwe usun chok i, pun sipwe kuna i usun wesewesen i; pwe epwe wor ach ei apinukunuk; pwe sipwe nimenimochuno pwan mwo usun I mi nimenimoch.”31
Sia poputa ne sinei ewe Samon nupwen sia ur ren An tong.
Apinukunuk non I
Mi tufich sipwe anganga ach nuku non I, tapweno mwirin I, me angang ngeni I, nge sise apinukunuk non I?
Ua sinei ekkoch chon ewe Mwichefen minne ra nuku pwe ekkewe nongonong non ekkewe pukfel me ekkewe mi pwarata seni ar rong pwe mi ennet. Nge rese nuku ekkewe nongonongen ewe kapas allim mi poraus usun mettochun manauer me nonnomur. Ra nuku non ewe Chon Amanau, nge rese apinukunuk pwe ra tongeni angei are aea ekkewe feioch A pwonei non manauer. Ua pwan kuna mwan me fefin mi apwonueta wiser nge ewe kapas allim mi niwinsefan ese mo winiti ew mettoch mi siwini manauer. Sia poputa ne sinei ewe Samon nupwen sise chok apinukunuk non I nge sia pwan apinukunuk I me An kewe pwon.
Non ewe Testamen Sofo, emon sam a tingorei ewe Chon Amanau an epwe echikara noun we, Jises A ponueni:
“Ika en mi pwisin tongeni! Mettoch meinisin mi tufich ren ewe aramas mi wor an nuku.
“Ewe sam a muttir puchoruta, ‘Ngang mi nuku, nge ese naf. Kopwe anisi ei pwe epwe napeno ai nuku!”32
Fan chommong ua ekieki usun ewe tingor an ewe sam: “Anisi ei pwe epwe napeno ai nuku.” Ua ekieki ika popun an ewe mwan tingor esap ren anepwe anisi an epwe nuku non Jises pwe ach Chon Amanau me non An manamanen echikara. Naman a fen esina pwe Kraist I ewe Noun Kot. Nge naman a namwot epwe angei aninis an epwe nuku pwe ewe manamanen ewe Masta mi tongeni anisi i an epwe pwisin ne efeiochu noun we at. Naman a nuku non Kraist nge ese pwisin nuku Kraist.
Fan chommong sia pwarata met sia sinei pwe mi ennet, nge naman ewe kapas eis sipwe eisini pwisin kich ika sia nuku met sia sinei.
Ekkewe angang mi pin mi fori me ren ewe mumutan ewe pristut mi namwot pwe sipwe nuku ewe Chon Amanau, poputa ne sinei I, me, nesoponon, sipwe nuku met sia sinei.
Ewe pristut seni Melchizedek a tumunu mokutokuten ewe kapas allim me a aea ekkewe kien ekkewe monomon non ewe muu, pwan ewe kien ewe miritin Kot.
“Ina minne, ewe manamanen Kot mi pwa non ekkewe angang mi pin an ewe pristut seni Melchizedek.33
Sia nuku me poputa ne sinei ewe Samon pwe I ewe kien ewe mirit usun Kot minne ewe pristut seni Melchizedek a suki ewe asam me a otufichi kich meinisin ne angei ewe manamanen Kot non manauach. Sia nuku me poputa ne sinei ewe Chon Amanau nupwen sia tapweno mwriin i ren ach angei me ach anneasochisi ekkewe angang mi pin me sia angei nikinikin me non nikinikin mesach.34 Sia nuku me poputa ne sinei Kraist nupwen sia pwisin kuna ewe siwin, chikar, pochokun, me manamanen An Achesefan. Sia nuku me poputa ne sinei ewe Masta nupwen “pochokunen an kapas minne a nom rech,”35 a mak non ekiekich me netipach,36 me sia “aturano [ach] kewe tipis meinisin pwe [sipwe sinei I].”37
Ach apinukunuk non I a wewen sia nuku pwe sia tongeni angei me aea An kewe feioch non manauach me manauen ach kewe famini. Ach apinukunuk non I ren unusen ngunuch38 a feito nupwen sia soposopweno won ewe anen fori me aponueta pwon mi pin, fori netipan, me fiti An kokkot fan itach. Ach apinukunuk non I—ach etiwa An manaman me pwon pwe mi ennet—a efisata mirit me kinamwe non manauach.
Pwon me Kapasen Pwarata
Non eu ran epwe feito, iteiten aramas repwe fotupukutiw me apasa39 pwe Jises I ewe Kraist. Won ena ran, sipwe sinei pwe A sinei kich me itach. Ua pwarata me pwon pwe sise chok tongeni sinei usun ewe Samon nge sia pwan tongeni sinei I nupwen sia anganga ach nuku non, tapweno mwirin, angang ngeni, me apinukunuk non I. Ua pwarata ekkei mettoch fan iten Jises Kraist, amen.