Pukfel
Alma 23


Sopun 23

Pungun finata namanam a affateno—Ekkewe chon Leiman non fisu fonu me teninimw ra siwin—Ra pwisin eita ngeni ir Antai-Nifai-Liai me ra ngaseno seni ewe anumamau—Ekkewe chon Amalekai me ekkewe chon Amulon rese etiwa ewe ennet. Arap ngeni 90–77 Ier Mwen Kraist.

1 Nengeni, iei non ewe fansoun pwe ewe kingen ekkewe chon Leiman a tinauu ew porous nein noun kewe aramas meinisin, pwe resap wata pour won Ammon, are Aaron, are Omner, are Imnai, ika emon me nein pwir kewe ekkewe repwe feino afanafana ewe kapasen Kot, non ian chok neni repwe nom ie, non ew kinikinin fonuer we.

2 Ewer, a tinano ew annuk neir, pwe resap wata pour wor ar repwe foti ir, are ar repwe aturarenong non kanapus; resap pwan attofuta wor, are ninni ir, are aturareu seni ar kewe sinakok, are ariaffour; resap pwan mwonei ngeni ir fau, nge epwe wor ar pung ne tonong non imwer kewe, me pwan ar kewe tempel, me ar kewe nenien imwenipin.

3 Iwe iei repwe tongeni feino me afanafana ewe kapas anongonong won ar mochen, pun ewe king a fen siwin ngeni ewe Samon, me chon non imwan we meinisin; iei minne a tinano an we porous non unusen ewe fonu ngeni noun kewe aramas, pwe ewe kapasen Kot esap tongeni wor eppetin, nge pwe epwe tongeni feino non unusen ewe fonu, pwe noun kewe aramas repwe tongeni pesepes usun ngawen eerenien semer kewe, me pwe repwe tongeni pesepes pwe ir pwipwi meinisin, me pwe resap nii manau, are resap angemwan, are resap sona, are resap fori nisou, are resap fori och sokkun fofforungaw.

4 Iwe non ewe fansoun pwe nupwen ewe king a fen tinano ei porous, pwe Aaron me pwin kewe ra feino seni teninimw ngeni teninimw, me seni ew imwen fen ngeni pwan ew, ra forata imwen fan, me epinano pris me sense non unusen ewe fonu me nein ekkewe chon Leiman, pwe repwe afanafan me repwe aiti me neir ewe kapasen Kot; iwe iei a poputa ne wor ar watten fetanoch.

5 Iwe ngerou ra emmwen ngeni ewe mirit usun ewe Samon, ewer, ngerou ra emmwen ngeni ewe nuku non eerenien ekkewe chon Nifai; iwe ra kaeo ekkewe uruo me osini minne ra keititiw pwan mwo tori ei fansoun iei.

6 Iwe usun ennetin ewe Samon mi manau, mi ennet meinisin ekkewe ra nuku, are meinisin ekkewe ra emmwen ngeni ewe mirit usun ewe ennet, seni ewe afanafan an Ammon me pwin kewe, anongonong won ewe ngunun pwarata me osini, me ewe manamanen Kot a anganga manaman non ir—ewer, ua apasa ngenikemi, usun ewe Samon mi manau, meinisin me nein ekkewe chon Leiman ra nuku non ar we afanafan, me ra siwin ngeni ewe Samon, rese tongeni rikino.

7 Pun ra winiti ew aramas tupwon; ra watiw ekkewe pisekin ar ungeni, pwe rese chiwen fiu ngeni Kot, pwan ngeni emon me nein pwir kewe.

8 Iei, ikkei ir ekkewe ra siwin ngeni ewe Samon:

9 Ekkewe aramasen ekkewe chon Leiman ekkewe ra nom non ewe fonuen Ishmael;

10 Me pwan ekkewe aramasen ekkewe chon Leiman ekkewe ra nom non ewe fonuen Mitonai;

11 Me pwan ekkewe aramasen ekkewe chon Leiman ekkewe ra nom non ewe teninimwen Nifai;

12 Me pwan ekkewe aramasen ekkewe chon Leiman ekkewe ra nom non ewe fonuen Sailum, me ekkewe ra nom non ewe fonuen Semlan, me non ewe teninimwen Lemuel, me non ewe teninimwen Simnailam.

13 Iwe ikkei ekkewe iten ekkewe teninimwen ekkewe chon Leiman minne ra siwin ngeni ewe Samon; me ikkei ir ekkewe ara watiw pisekin ar ungeni, ewer, nour kewe pisekin maun meinisin; iwe ir meinisin chon Leiman.

14 Iwe ekkewe chon Amalekai rese siwin, tiwenon chok emon; ese pwan wor emon nein ekkewe chon Amulon a siwin; nge ra apochokunano netiper, me pwan netipen ekkewe chon Leiman non kinikinin ena fonu ikewe ra nom ie, ewer, me sopwur kewe meinisin me teninimwer kewe meinisin.

15 Iei minne, am aua eita ekkewe teninimwen ekkewe chon Leiman meinisin non minne ra aier me feito ngeni ewe mirit usun ewe ennet, me ra siwin.

16 Iwe iei non ewe fansoun pwe ewe king me ekkewe ra siwin ra fokkun mochen pwe epwe wor ew iter, pwe ren ewe popun repwe tongeni sokkono seni pwir kewe; iei minne ewe king a apungupung ngeni Aaron me chommong me nein nour kewe pris, usun ewe it repwe wata wor, pwe repwe tongeni sokkono.

17 Iwe non ewe fansoun pwe ra eita ngeni ir Antai-Nifai-Liai; iwe ra iteni ei it me rese chiwen iteni chon Leiman.

18 Iwe ra poputa ne winiti ew aramas mi fokkun angang öch; ewer, me ra chiechioch ngeni ekkewe chon Nifai; iei minne, ra fori ew pekin chiechioch ngeni ir, iwe ewe anumamauen Kot ese chiwen tapwer.