Nuambanyin na Nkyerɛbaa wɔ Christ mu. .
Hom ma hɛn enyi ngye yie wɔ sunsum mu ebusua kuw a ɔwɔ hɛn ntamu no na suban ahorow na akyɛdze asorɔtow a hɛn nyinara yɛwɔ no nsom hɛn bo.
M’anyɛnkofo adɔfo, yeenya ehyiadzi nwanwa ndɛ. Hɛn nyinara yɛatse Ewuradze No Sunsum nkã na No dɔ nwanwa nsɛm a ɔnam hɛn baanodzifo do no wɔakyɛ. Ɔayɛ me adom dɛ menye hom bɛkasa ewimbir yi dɛ nhyiamu yi ne kasamaafo a odzi ewiei. Mobɔ mpaa dɛ Euradze No Sunsum nkɔ do nkã hɛn ho ber a yɛbɔ mu dzi ehurusi dɛ nokwar nuambanyin na nkyerɛbaa wɔ Christ mu.
Hɛn nkɔnhyɛnyi dɔfo, Russell M. Nelson, paa mu kãa dɛ: “Mefrɛ hɛn asɔrmba a wɔwɔ beebiara dɛ hom ndzi kan ngyaa su na adwenbɔn ndzeyɛe no. Mototɔ serɛ hom dɛ hom mfa obu mma Nyankopɔn ne mba nyina.”1 Dɛ Asɔr a ɔwɔ wiadze nyina na ogu do rinyin no, yeridzi ɔfrɛ yi a ofi hɛn nkɔhyɛnyi hɔ do no yɛ dza odzi kan a ohia ma yɛdze bɛkyekyer Agyenkwa n’ahenman wɔ wiadze ne man biara mu.
Jesus Christ n’asɛmpa no kyerɛkyerɛ dɛ hɛn nyina yɛyɛ ɔsor awofo hɔn sunsum mu mbambanyin na mbabaa a wɔawo hɛn na nokwar ara wɔdɔ hɛn2 na dɛ yɛtsenaa dɛ ebusua wɔ Nyankopɔn ne nkyɛn ansaana wɔrowo hɛn wɔ asaase yi do. Asɛmpa no kyerɛkyerɛ so dɛ wɔbɔɔ hɛn nyinara wɔ Nyankopɔn ne saso na no su do.3 Dɛm ntsi yɛyɛ pɛr wɔ N’enyim,4 osiandɛ “Ofi adze kor mu yɛɛ nyimpa amanaman nyina [na mbaa].’’5 Dɛm ntsi, hɛn nyinara yɛwɔ awosu krɔnkrɔn, egyapadze, na ndaamba, osiandɛ “hɛn nyina hɛn Nyankopɔn nye Egya kor a ɔbɔ hɛn nyina, ɔnam hɛn nyina mu, ɔwɔ [hɛn] nyina mu.’’6
Dɛ Christ n’esuafo no, wɔto nsa frɛ hɛn dɛ yento hɛn gyedzi na ɔdɔ mu, mma hɛn sunsum mu onuabanyin na akyerɛbaa ber a nokwar mu ara yɛdze akoma a wɔabɔ mu kor wɔ nkabɔmu na koryɛ mu, a hɛn nsonsonee mmfa ho, na ntsi yerutu hɛn ahom mpon dɛ yɛbɛma obu na enyidzi akɔ kan ama Nyankopɔn ne mbambanyin na mbabaa nyinara.7
Ana iyi nnyɛ gyinabew a Nephi no nkorɔfo nyae bɛyɛ mfe ahaebien a Christ soom hɔn ekyir no?
“Na nokwar, nyimpa biara nnyi hɔ a Nyankopɔn dze ne nsa abɔ hɔn a wonyaa ahomka tse dɛ dɛm nyimpa yi. …
“Nna Lamanfo, anaa nkyerɛkyerɛmu biara nnyi hɔn mu; mbom hɔn nyina yɛɛ adze kor, Christ ne mba, Nyankopɔn n’ahendzi mu adzedzifo.
“Na mbrɛ woduaa sii hyiraa hɔn a!’’8
President Nelson kɔr do tsii yɛretserɛw enyidzi na obu ma hɛn fɛfo nyimpa mu mber a ɔkãa dɛ: “Hɛn nyinara hɛn Bɔfo no frɛ hɛn mu kor biara dɛ yenngyaa adwenbɔn su horow dze tsia Nyankopɔn ne mba kuw biara. Hɛn mu biara a ɔwɔ adwenbɔn dze tsia ebusuakuw bi no hia dɛ onu noho! … Oye ma hɛn mu kor biara dɛ yɛbɛyɛ dza yebotum biara wɔ hɛn nhyɛdo akwanhorow mu dze bɔ enyidzi na obu a Nyankopɔn ne babanyin na babaa biara fata no ho ban.’’9 Nokwar mu no, nyimpa enyidzi kyerɛ obu ma hɛn nsonsonee.10
Yɛhwɛ nkitahodzi krɔnkrɔn a ɔka hɛn nye Nyankopɔn bɔ mu dɛ Ne mba a, nkɔnhyɛsɛm akwankyerɛ yi a President Nelson dze mae no ekyingye biara nnyi ho dɛ ɔyɛ fapem anamɔn dze kɔ yerisi ntseasee nsamdo kyɛn dɛ yɛbɔtow adwenbɔn na hɛn ntamu nkyekyɛmu afasu.11 Naaso, dɛ mbrɛ Paul bɔɔ Ephesusfo kɔkɔ no, otwar dɛ yehu dɛ ama yeenya botae yi no, obehia dɛ yɛyɛ ankorankor na nkabɔmu ho mbɔdzembɔ dɛ yɛdze mbrɛhoadze, botooyɛ, na penkyɛr dzi dwuma ma hɛnho nkorkor.12
Asɛm bi wɔ hɔ a ɔfa Jewnyi rabbi na n’anyɛnkofo beenu a nna wɔrohwɛ wipue ho. Obisaa hɔn dɛ, “Wosi dɛn hu mber a anago asen ma da fofor ahyɛ ase?’’
Hɔn mu kor buae dɛ, “Sɛ itum hwɛ boka na itum hu oguan fi apɔnkye ho a.’’
Nkyii kor no buae dɛ, “Sɛ itum hwɛ wimu na ihu ngodua fi adɔmba dua ho a.’’
Nkyii wɔdanee kɔr rabbi nyansafo no hɔ na wobisaa no asɛmbisa kor noara. Ɔdwendwen ho mber tsentsen ekyir no, obuaa dɛ, “Sɛ itum hwɛ boka na ihu ɔbaa bi n’enyim anaa ɔbarimba bi n’enyim na itum kã dɛ, ‘Ɔyɛ m’akyerɛbaa; ɔyɛ mo nuabanyin a.’’13
M’anyɛnkofo adɔfo, mutum ma hom awerɛhyɛmu dɛ da fofor ne kan hyerɛn yie wɔ hɔn abrabɔ mu sɛ yehu hɛn fɛfo nyimpa na yɛdze obu na enyidzi hwɛ hɔn yie dɛ nokwar nuambanyin na nkyerɛbaa wɔ Christ mu a.
N’asaase somdwuma ber mu no, Jesus yɛɛ fasusu a odzi mu maa fapem yi ber a “Okyinii yɛɛ yie’’14 maa nyimpa nyinara, ɔroto nsa frɛ dɛ wɔmbra No hɔ na wombedzi Ne papayɛ no bi, a bea wofi, fekuw, anaa kusum su mmfa ho. Ɔsomee, saa yarba, na aber nyina no ɔkyɛɛn aso maa obiara n’ehiadze, tsitsir ara hɔnnom a dɛm mber no nna wohu hɔn dɛ wɔyɛ soronko, wommbu hɔn, anaa wogya hɔn hɔ. Ɔammpow obiara na ɔdze pɛryɛ na ɔdɔ hwɛɛ hɔn yie, osiandɛ Ohun hɔn dɛ No nuambanyin na nkyerɛbaa, mbambanyin na mbabaa a wofi Egya kor.15
Mber a ahobowdze dodow mu kor yi sii nye mber a nna Agyenkwa no rutu kwan akɔ Galilee, na ɔgyee enyim ara faa kwan a odua Samaria no do.16 Afei Jesus yɛɛ adwen dɛ ɔbɛtsena Jacob bura no ho agye n’ahom. Ber a nna ɔwɔ hɔ no, Samarianyi ɔbaa bi bɛɛn ho dɛ ɔdze nsu rebɛhyɛ no kuraba mã. Jesus a Onyim adze nyina no frɛɛ no, see dɛ, “Ma me bi monnom.’’17
Ahobow kaa ɔbaa yi dɛ Jewnyi aserɛ Samarianyi ɔbaa hɔ mboa na ɔkyerɛɛ n’ahodwiriw, see dɛ, “Ɔyɛ dɛn na ɔwo a eyɛ Jewnyi ibisa emi a meyɛ Samarianyi ɔbaa hɔ nsu nom? Na Jewfo nye Samariafo nnkã.’’18
Naaso Jesus, poow ɔtan amambra tsentsen no a ɔda Samariafo na Jewfo ntamu no, dze dɔ soom ɔbaa yi, a ɔboaa no ma ɔtsee No nokwar nyimpa ban a ɔyɛ ase—dɛ, Messiah no, nyia a ɔbɛpaa mu akã adze nyina akyerɛ hɛn na ne mbae a ɔbaa no rotweɔn no.19 Dɛm awɔse som no nsusuando no maa ɔbaa no sii mu kɔr kurow no mu, na ɔsee nyimpa no dɛ hom mbra mbɔhwɛ dza oesi, na ɔsee dɛ, “Nnyɛ oyi nye Christ no anaa?’’20
Mowɔ ayamuhyehye a no mu dɔ ma hɔnnom a etsiɔdzenfo ayɛ hɔn ayakayakadze, wommbu hɔn, anaa wɔtseetsee hɔn, osiandɛ, wɔ m’abrabɔ mu no, medze m’enyiwa ehu yaw a apapafo hu ho amandze wɔ atsɛmbu anaa wɔpam hɔn osiandɛ hɔn kasa, hwɛbea, anaa hɔn abrabɔ yɛ soronko. Mesan so tse nokwar awerɛhow wɔ m’akoma mu ma hɔnnom a hɔn adwen da ho bir, a wonntum nnhu ndaamba, na wɔda ho epirim hɔn akoma ɔnam hɔn gyedzi dɛ hɔnnom a wɔnnye hɔn nsɛ no wɔ famu sen hɔn ntsi. Mbrɛ wosi hu binom tɔ sin no ntsi ɔmma hɔn kwan ma wonntum nnhu hɔn nyimpa ban dɛ wɔyɛ Nyankopɔn ne mba.
Dɛ mbrɛ nkɔnhyɛfo edzikan akã no, yɛtse mbusu nda mu a ogya kɔ hɛn Agyenkwa ne Mbae a Otsĩa Ebien no.21 Wiadze no tsitsir ara ayɛ nkyekyɛmu dzendzen, a ebusuasɛm, amanyɛsɛm, na sikasɛm dzibew dzi mu akotsen. Ɔtɔfabi a nkyeykyɛmu a ɔtsetse dɛm no nsusuando nya nhyɛdo wɔ kwan a nyimpa dwen na ne ndzeyɛɛ a wɔnye hɔn fɛfo nyimpa nya. Ne siantsir ntsi, ɔnnyɛ nwanwa dɛ ibohu nkorɔfo dɛ wɔrekã kwan a kusum, ebusuakuw, na amanhorow binom dwendwen, hɔn ndzeyɛe, na hɔn kasaa ho asɛm dɛ wɔnnsom bo, a wɔdze adwenkyerɛ a woesusu ho dada a, ɔyɛ mfomdo, na ɔtaa yɛ kasabɔn, a ɔdze enyimtsiabu, enyiannsɔ, na mpo adwenbɔn dze tsia hɔn ba. Su horow a ɔtsetse dɛm no hɔn ndwow wɔ ahantan, ahomado, enyitan, na nyinkun mu a wɔyɛ honammunyi no su,22 a ɔnye Christsu suban horow bɔ ebira korakoraa. Suban yi mmfata hɔn a wɔreper dɛ wɔbɛyɛ No nokwar esuafo no.23 Nokwar, mo nuambanyin na nkyerɛbaa kwan biara nnyi hɔ ma adwenbɔn adwendwen anaa ndzeyɛɛ wɔ Ahotseweefo hɔn kuw mu.
Dɛ ahyɛmu mbambanyin na mbabaa no, yebotum aboa eyiyi suban a ɔtse dɛm yi efi hɔ ber a yɛdze Agyenkwa n’enyiwa hwɛ nsonsonee a ɔda hɛn ntamu a ɔda edzi no24 na ogyina dza hɛn nyina yɛwɔ do—hɛn su na ebusuakuw krɔnkrɔn no. Bio no, yebotum aper ehu hɛnankasa hɛnho a ɔda edzi wɔ hɛn anyɛnkofo hɔn adaaso, enyidado, awerɛhow, na ayawdzi ahorow mu. Hɛn nyinara yɛyɛ akwantufo fɛfo dɛ Nyankopɔn ne mba, pɛr wɔ hɛn tsebea a onndzi mu mu na wɔ hɛn ahom dɛ yɛdze benyin mu. Wɔto nsa frɛ hɛn dɛ yɛmbɔ mu nantsew, asomdwee mu ara, a ɔdɔ ahyɛ hɛn akoma mu mã ma Nyankopɔn na nyimpa nyina—anaa, dɛ mbrɛ Abraham Lincoln kyerɛe no, “enyitan nnyi hɔ ma obiara yɛdze ayamuyie ma nyimpa nyina.’’25
Ana adwendwen mbrɛ obu ma nyimpa enyidzi na pɛryɛ fapem no wosi kyerɛ a ɔnam kwan a ɔnnyɛ dzen do wɔ hɛn ntarhyɛ wɔ Ewuradze ne fie mu ho a? Hɛn nyinara yɛba temple a koryɛ wɔ botae kor mu na pɛ hyɛ hɛn mã dɛ yɛbɛyɛ krɔngyenn na krɔnkrɔn wɔ N’enyim krɔnkrɔn mu. Yɛahyehyɛ ntar efufuw no, Ewuradze Nankasa gye hɛn nyinara ma Noho dɛ Ne mba a ɔdɔ hɛn, Nyankopɔn ne mbambanyin na mbabaa, Christ n’asefo.26 Ɔyɛ hɛn adom dɛ yɛyɛ ayɛdze horow kor noara, yɛyɛ ahyɛmudzi horow kor noara, yɛgye to hɛnho do dɛ yɛbɔbɔ bra a ɔkrɔn na ɔyɛ krɔnkrɔn, na yeenya onnyiewiei anohoba horow kor noara. Koryɛ wɔ botae mu no, yɛdze enyiwa fofor hu hɛnho nkorkor, na wɔ hɛn koryɛ mu no, yedzi dɛw wɔ hɛn nsonsonee mu dɛ yɛyɛ Nyankopɔn ne mba krɔnkrɔn.
Ɔnnkyɛree na moboaa enyimdzifo na aban mpanyimfo kɔr Brasilia Brazil Temple ofi no mbuei mu nserahwɛ. Migyinae wɔ nsesaa bea hɔ a menye Brazil president n’abadziekyir, na yɛpɛnsapɛnsa ntar efufuw no a obiara hyɛ wɔ temple mu no mu. Me kyerɛkyerɛɛ no mu dɛ ntar efufuw a wɔhyɛ no wɔ beebiara no yɛ sɛnkyerɛdze dɛ hɛn nyinara yɛyɛ kor ma Nyankopɔn na wɔ temple mu no, hɛn ahyɛnsewdze nnyɛ man bi president n’abadziekyir anaa asɔr baanodzinyi mbom hɛn onnyiewiei ahyɛnsew dɛ Ɔsor Egya dɔfo ne mbambanyin.
Iguaçú Esutsen no pem dua Brazil anaafo na ohue gu asaase tɛtɛɛtɛr bi mu a ɔyɛ nsu a ɔtsen gu famu a wiadze nyina nyim no dɛ Iguaçú Falls—Nyankopɔn n’abɔdze mu kor a ɔyɛ fɛw dodow na ɔyɛ ahomka, a wosusu dɛ wiadze mu anwanwadze esuon no mu kor a. Nsu piinara pem kɔ esutsen kor mu na nkyii wɔpapaa mu, bɛyɛ nsu a ɔtsen gu famu aha pii a ɔyɛ soronko. M’adwenkyerɛ no, nsu a ɔtsen gu famu anwanwadze yi da Nyankopɔn n’ebusua wɔ asaase do edzi, osiandɛ yɛwɔ sunsum mu ahyɛse na abɔdze kor noara, a yenyae fi hɛn egyapadze na ebusuakuw krɔnkrɔn mu. Mbom, hɛn mu kor biara pem kɔ kusum, nyimpakuw, na amanaman horow mu a yɛdze adwenkyerɛ, sũahu, na nkã-tse ahorow. Iyi ekyir no, yɛkɔ kan dɛ Nyankopɔn ne mba na dɛ nuambanyin na nkyerɛbaa wɔ Christ mu, a yɛnnyew hɛn nkitahodzi krɔnkrɔn, a ɔma yɛyɛ nyimpa soronko na ahomka kuw.27
Mo nuambanyin na nkyerɛbaa adɔfo, hom ma yɛmfa hɛn akoma na adwen nka nyimdzee na dasee ho dɛ hɛn nyinara yɛyɛ pɛr wɔ Nyankopɔn enyim, na hɛn nyinara wɔdze onnyiewiei ndaamba na egyapadze kor noara adom hɛn emu. Hom ma hɛn enyi ngye yie wɔ sunsum mu ebusua kuw a ɔwɔ hɛn ntamu no na suban ahorow na akyɛdze asorɔtow a hɛn nyinara yɛwɔ no nsom hɛn bo. Sɛ yɛyɛ dɛm a, mobɔ hom anohoba dɛ yɛbɛpem wɔ hɛnara hɛn kwan mu, dɛ mbrɛ Iguaçú Falls nsu yɛ no, a yɛrennyew hɛn nkitahodzi krɔnkrɔn a ɔhyɛ hɛn nsew dɛ nyimpa soronko, “Christ ne mba, na Nyankopɔn n’ahendzi mu adzedzifo.’’28
Megye dase kyerɛ hom dɛ sɛ yɛkɔ do pem wɔ kwan yi mu wɔ hɛn ɔnnkyebo abrabɔ ber mu a, da fofor dze kan fofor bɛhyɛ ase a ɔbɛhyerɛn hɛn abrabɔ mu na oebuebue kwanhorow nwanwa ma Nyankopɔn Ne mba ahorow a ɔbɔɔ hɔn a wɔwɔ hɛn mu no asom hɛn bo yie, na ɔnam do woehyira hɛn yie.29 Nokwar ara yɛbɛyɛ edwindadze wɔ Ne nsa mu ma obu na enyidzi aba Ne mbambanyin na mbabaa nyinara hɔn ntamu. Nyankopɔn tse ase! Jesus nye wiadze Agyenkwa no. President Nelson nye hɛn nda mu Nyankopɔn no nkɔnhyɛnyi. Megye dɛm nokwar yinom ho dase wɔ Jesus Christ dzin krɔnkrɔn mu, amen.