Edze Ahobrɛadze Gye To Mu na Edzi Do
Ahobrɛadze yɛ ehiadze ahyɛdze ma hɛn dɛ yɛbɛyɛ krado asan akɔ Nyankopɔn n’enyim.
Alma tsir a otsĩa enum, mu no wobisa asɛmbisa bi a ɔgye ndwenho dɛ: “Ana sɛ ɔba dɛ hom ruwu mber yi mu a, hom botum akã wɔ hom mu dɛ hom ayɛ ahobrɛadze ara yie?’’1 Dɛm asɛmbisa yi kyerɛ dɛ ahobrɛadze yɛ ehiadze ahyɛdze ma hɛn dɛ yɛbɛyɛ krado asan akɔ Nyankopɔn n’enyim.
Hɛn nyinara yɛpɛ dɛ yɛdwen dɛ yɛayɛ ahobrɛadze ara yie, mbom sũahu bi wɔ abrabɔ mu ma yehu dɛ honammunyi, ɔbarimba anaa ɔbaa ahantanyɛ no da ho ara tse hɛn mu.
Mfe a abasen kɔ no, mber a nna hɛn mbabaa beenu da ho tse fie no, meyɛɛ adwen dɛ mebɛkyerɛ hɔn na me yer edwuma tɔw kor a nna mohwɛ do wɔ edwuma a mowɔ no mu.
Nna mo botae ankasa nye dɛ mebɛkyerɛ hɔn bea a, ɔnntse dɛ hɛn fie no, obiara bɛyɛ dza mebɛse no pɛpɛɛpɛr a onnkebisa me asɛm. Mber a yedur enyim abotsen ano, a ɔtaa dɛ wonnsuo mu ana oebue no sɛ me kaar rebɛn ho a, ɔyɛɛ m’ahobow dɛ oemmbue dɛm mber yi. Mbom, ɔweɔmfo a munnhun no dabiarada wɔ m’abrabɔ mu baa hɛn no ho na obisaa me m’edwuma ahyɛnsewdze.
Mekãa kyerɛɛ no dɛ minnhia ahyɛnsewdze mfa me kaar nnhɛn edwuma no mu da na nkyii mibisaa no dzibew ahantanyi asɛmbisa no dɛ: “Ana inyim onyia erekasa kyerɛ no?’’
Ɔno na obuaa dɛ, “Oye, osiandɛ nnyi w’edwuma mu ahyɛnsewdze ntsi, munnkotum ehu nyia a eyɛ, na ber a mowɔ abotsen yi ho no nnkenya kwan ahɛn fie hɔ a nndze ahyɛnsewdze papa.’’
Modwen ho dɛ monhwɛ ahwehwɛ a ɔbɔ ekyir no mu, na monhwɛ dza me mbabaa no reyɛ wɔ dza ɔrokɔ do no nyinara ho, nna minyim dɛ hɔn enyiwa gye dza nna orisi no ho! Nna me yer a ɔtsena me nkyɛn no rowosow ne tsir mmfa mmpen mo suban no do. Nkyii nna dza ɔwɔ dɛ me yɛ nye dɛ mepa ɔweɔmfo no kyɛw na mekã dɛ ɔyɛ me yaw dɛ me tseetsee no. Ɔkãa dɛ, “medze akyɛ wo,’’ “mbom sɛ nnyi edwuma ahyɛnsewdze a, nnkɛba mu ndɛ!’’
Nkyii mesanee bɔkɔɔ kɔr fie keyii m’ahyɛnsewdze, a musũaa adzesũadze a ɔsom bo yi: sɛ yɛannsan mu annyɛ ahobrɛadze a, no nsunsuando yɛ enyimguase.
Mbɛbusɛm mu no yehu dɛ, “Nyimpa no nkontompɔ bɛbrɛ no adze: Na sunsum mu ahobrɛadzenyi benya enyidzi.’’2 Ama yeenya ahobrɛadze no, otwar dɛ yɛtse dza n’asekyerɛ ankasa ase wɔ asɛmpa asɛm mu!
Nkorɔfo binom dze ereyɛ ahobrɛadze forafora ndzɛmba bi mu tse dɛ, mfatoho, eyɛ bɔbɔfo. Mbom dodowara ankasa wɔ hɔ a wɔyɛ abɔbɔfo na nkontompɔfo na dodow so san wɔ hɔ a wɔyɛ ɔdzefo naaso wɔyɛ ahobrɛadze. Binom so a wɔfɛr papaapa anaa wɔnngye hɔnho nndzi no ebia na wɔwɔ ahobrɛadze hwɛbea na ɔtɔfabia hɔn mu ankasa dze nkontompɔ hyɛ mu mã.
Afei ebɛnadze nye ahobrɛadze? Dɛ mbrɛ Preach My Gospel, akã no, ɔyɛ “pɛ no dɛ ibegyaa mu ama Ewuradze ne pɛ. … Ɔyɛ ereyɛ brɛfo. … [Ɔyɛ] edwindze a ohia tsitsir ma sunsum mu mpontu.’’3
Nokwar ara kwanhorow pii wɔ hɔ ma hɛn nyinara dɛ yetu mpon wɔ Christ-su suban yi mu. Mepɛ dɛ mohwehwɛ mbrɛ yebesi yɛayɛ ahobrɛadze, anaa ɔwɔ dɛ yɛyɛ, wɔ yeridzi hɛn nkɔnhyɛnyi n’afotu do mu. Mpofirmu asɛmbisa ma hɛn ankorankor botum ayɛ dɛ:
-
Ana yɛbɔ Asɔr no ne dzin nyina wɔ hɛn nkitahodzi nyinara mu? President Russell M. Nelson kãa dɛ, “Iyi Ewuradze Ne dzin fi Ewuradze N’Asɔr do a ɔyɛ konyimdzi kɛse ma Satan.”4
-
Ana yɛrema Nyame edzi nyim wɔ hɛn abrabɔ mu ber a yɛregye hɛn nkɔnhyɛnyi no ɔfrɛ tsitsir ara ato mu? “Ndɛ mefrɛ hɛn asɔrmba a wɔwɔ beebiara dɛ hom ndzi kan ngyaa adwenbɔn suban na ndzeyɛɛ no.”5
-
Ana yeridzi wiadze no do konyim, a yɛwɔ awerɛhyɛmu wɔ Christ ne nkyerɛkyerɛ mu kyɛn adasa hɔn wiadze nyansaa, dɛ mbrɛ hɛn nkɔnhyɛnyi akyerɛkyerɛ no?6
-
Ana yɛayɛ asomdweefo a yɛkã ndzɛmba apapa kyerɛ nkorɔfo na yɛkã fa hɔn ho? Wiadze mfɛndzanan ehyiadzi a woetwa mu no President Nelson kyerɛkyerɛ hɛn dza odzi do no dɛ: “Sɛ ɔbra pa, dza ɔyɛ fɛw anaa ɔwɔ dzin pa anaa ɔsɛ nkamfo a yebotum akã afa obi ho—wɔ n’enyim anaa n’ekyir—ɔno na ɔwɔ dɛ ɔyɛ hɛn nkitahodzi ho esusudze.”7
Iyinom yɛ nkyerɛkyerɛ a ɔnnyɛ dzen na tum wɔ mu. Kaa dɛ, dza nna ɔwɔ dɛ Moses no nkorɔfo nyinara yɛ ma woenya ayarsa nye dɛ wɔhwɛ borɔn abowatsena a ɔama do wɔ sor no.8 Naaso “edwuma no nnyɛ dzen na ɔyɛ mberɛw dze, naaso pii na wɔherae.”9
Ehyiadzi ber yi yɛatse na yɛbɛsan so atse hɛn nkɔnhyɛfo na asomafo hɔn afuto a ɔmmbɔadze da. Ɔyɛ ber a odzi mu dɛ yebenya ahobrɛadze na yɛbɛma enyimpsi dzendzen yie mpo no amen hɛn adwenkyerɛ adzendzen no dɛ Ewuradze kasa dua banodzifo yinom a wɔasan mu eyi hɔn mu.
Ne nyina no, yerenya ahobrɛadze no, otwar dɛ yɛsan so tse ase na yɛgye to mu dɛ yennkotum edzi hɛn nsɔhwɛ do konyim anaa yennkenya hɛn ndaamba yie wɔ hɛnara hɛn mbɔdzembɔ do nko. Nkenyan akasafo, akyerɛwfo. anyɛnfo, na nhyɛdofo wɔ wiadze nyina, tsitsir ara wɔ abaefo mfir do, bɛkã dɛ biribiara gyina hɛn nko na hɛn ndzeyɛe do. Wiadze no gye honam abasa no dzi.
Naaso ɔnam asɛmpa a wɔdze asan ananmu do no yeesũa dɛ yɛdan Ɔsor Egya ne papayɛ na hɛn Agyenkwa Jesus Christ No Werdambɔ no ara yie, “osiandɛ yenyim dɛ dza yebotum ayɛ nyinara ekyir no wɔnam adom do na wɔbɛgye hɛn nkwa.”10 Dɛm ntsi na ohia dodoodow dɛ yɛnye Nyankopɔn yɛ ahyɛmu na yesie, na yɛreyɛ dɛm no ɔnam No Werdambɔ do no bɛma hɛn Jesus Christ, n’ayarsa, tum, na no tum a odzi mu no ho kwan yie.
Yɛrokɔ sacrament nhyiamu dapɛn dapɛn na yɛtaa sɔr wɔ temple dze hɛnho kɛhyɛ ayɛdze horow mu na yɛregye na yɛreyɛ ahyɛmu fofor no yɛ sɛnkyerɛdze ma yehu dɛ yɛdan Ɔsor Egya na hɛn Agyenkwa, Jesus Christ. Dɛm no bɔtwe Hɔn tum no aba hɛn abrabɔ mu dze aboa hɛn wɔ hɛn nsɛnhia nyinara mu na ewiei no oedzi hɛn mbɔe ho botae do.
Ɔnnkyɛree na m’ahobrɛadze na ntseasee pɛnpɛndo wɔ Ewuradze a me dan no no wɔsɔe hwɛe bio. Nna metsena kaar a ɔrokɔ wimuhɛn gyinabea akɔfow wimuhɛn dze akɔ bea bi a ɔnnwar a nna asɛnhia dzendzenndzen bi esi dɛ wɔhwɛ siesie. Hɛnkanyi no, a nna ɔnnyɛ Asɔrba no, hwɛɛ me wɔ ahwehwɛ no mu na ɔkãa dɛ, “mutum hu dɛ enntse apɔw ndɛ!’’
“Itum hu a?’’ Mibisae.
Ɔkãa dɛ, “Nyew.” Nkyii ɔkãa biribi tse dɛ, “Nokwar dɛ su a etwa ehyia woho no nnyɛ papa koraa!’’
Mekyerɛkyerɛɛ no mu dɛ nna mowɔ gyinabew bi a ɔyɛ dzen yie dɛ mohwɛ me siesie, na nkyii obisaa me dɛ, “Ana ayɛ biribiara a w’ahoɔdzen dze bɛma wo ma esiesie iyi?’’
Mubuaa dɛ maayɛ biribiara a mubotum.
Nkyii ɔkãa biribi a mowerɛ nnkefir dabiarada dɛ: “Ntsi no gyaa iyi mu hyɛ Nyankopɔn ne Nsa, na biribiara bɛyɛ yie.’’
Mepaa mu kã dɛ nkyɛ merebisa no dɛ, “Ana inyim nyia a erekasa kyerɛ no?’’ Naaso mannyɛ! Dza meyɛe nye dɛ mebrɛ moho adze wɔ Ewuradze n’enyim wɔ wimuhɛn akwantu dɔnhwer kor no nyina, dze serɛɛ mboa krɔnkrɔn. Mber a mirifi wimuhɛn mu no, musũae dɛ gyinabew no a ɔyɛ dzen dɛ wosiesie no ɔayɛ ewie na monkɔree no ennkehia mpo bio.
Nuambanyin na nkyerɛbaa, mbra no, ɔfrɛ na anohoba a ofi Ewuradze hɔ no yɛ pefee na awerɛkyekyer: “ Brɛ wo ho adze; na Ewuradze wo Nyankopɔn bosuo wo nsamu agye wo taataa, na ɔama wo wo mpaabɔ ho mbuae.’’11
Hom ma yɛnyɛ ahobrɛadze ndzi hɛn nkɔnhyɛfo hɔn afuto do na yɛngye nto mu dɛ Nyankopɔn na Jesus Christ nko na wobotum asesa hɛn—a ɔnam ayɛdze na ahyɛmudzi horow a yɛgye wɔ N’Asɔr mu—dze siesie hɛnho wɔ abrabɔ yi mu na, da kor bi, wɔama yeedzi mu wɔ Christ mu yie ara. Jesus Christ ne dzin mu, amen.