Jesus Christ No Tum wɔ Hɛn Abrabɔ Mu Da Biara
Hɛn ahoɔdzen ne farbaa nye gyedzi wɔ Jesus Christ mu ber a enyidaho mu ara yɛhwehwɛ dɛ yɛbɛba No hɔ da biara.
Enuanom mbanyin na nkyerɛbaa adɔfo, iyi nye Jesus Christ N’Asɔr a ɔwɔ hɔ Ma Nda a Odzi Ekyir Ahotseweefo. Mbrɛ osi yɛ enyigye dɛ yehyia mu dɛ N’Asɔr. Ɔyɛ me enyisɔ dɛ President Russell M. Nelson abɔ hɛn nkaa mpɛn pii dɛ yɛmfa Ewuradze N’Asɔr ne dzin a ɔtsen mfa mfrɛ Asɔr no ama yɛaakaa nyia Asɔr yi yɛ nedze na nyia yedzi Ne nkyerɛkyerɛ do.
President Nelson akã dɛ: “Nda a ɔreba mu no, yebohu Agyenkwa no tum a ɔreda edzi kɛse akyɛn dza wiadze ehu no pɛn. … Ɔdze ndzinoa, nhyira, na anwanwadze a wonnkotum akan bogu anokwafo do.”1
Ndzinoa akɛse koraa no mu kor ma emi na me yer, Renee, nye dɛ yebehyia Ahotseweefo a wɔwɔ bea a yɛsom no. Yɛtse hɔn nsɛm, yehu dza wɔhwer, yɛnye hɔn dzi hɔn yaw, na yɛnye hɔn dzi dɛw wɔ hɔn nkonyimdzi ho. Yeehu nhyira na anwanwadze no mu pii a Agyenkwa no dze egu anokwafo do. Yeehyia nkorɔfo a woedua dza ɔyɛ dzen mu, nkorɔfo a wɔaberɛ wɔ dza innkotum adwen ho ano.
Yeehu Agyenkwa no tum a ɔdaa edzi wɔ kunafo bi mu a ɔhweer no kun ber a nna wɔreyɛ Ewuradze n’edwuma wɔ Bolivia.2 Yeehu No tum wɔ akataasia bi mu wɔ Argentina a ɔhwee famu wɔ keteke ase ma ɔhweer ne nan, ɔnam dɛ nna obi pɛ dɛ owia no foon ara gyan.3 Na wɔ n’egya a onnyi yer no mu a, sesei ɔwɔ dɛ osiesie ndzɛmba na ɔhyɛ ne babaa no dzen wɔ dɛm ewurkadze a nkyerɛasee nnyi mu yi ekyir no. Yeehu no wɔ ebusua ebusua mu a wɔhweer hɔn efiefi na ndzɛmba nyina a wɔwɔ ber a ogya hyehyew sii wɔ Chlie, nda ebien ana Borɔnya roso wɔ afe 2022 mu.4 Yeehu no wɔ hɔn a wɔberɛ wɔ awargyaa yaayaw ekyir hɔn mu na wɔ hɔn a wonndzi fɔ na wɔasɔw enyimtsiabu mu.
Ebɛnadze na ɔma hɔn tum ma wɔdze dua ndzɛmba a ɔyɛ dzen mu? Ebɛnadze na ɔma ahoɔdzen fofor kã ho a wɔdze kɔ kan ber a ɔyɛ dɛ adze nyinara asɛɛ?
Mehu dɛ dɛm ahoɔdzen no ne farbaa nye gyedzi wɔ Jesus Christ mu ba ber a enyidaho mu ara yɛhwehwɛ dɛ yɛbɛba No hɔ da biara.
Nkɔnhyɛnyi Jacob kyerɛkyerɛ dɛ, “Na ɔbaa wiadze ama sɛ nyimpa nyina tsie ne ndze a ɔaagye hɔn nkwa; na hwɛ, ɔsɔɔw nyimpa nyina hɔn yaw, nyew, ɔtseasefo biara ne yaw, mbanyin, mbaa na mbofra nyina a wɔkã Adam n’ebusuakuw ho.”5
Ɔtɔfabi a, irinya gyedzi wɔ Jesus Christ mu tum yɛ dɛ adze a onnkotum esi, mpo nsa nnkotum akã koraa. Yɛbɔdwen dɛ yɛreba Christ hɔ gye ahom, tum, na emudzi bi a yennyi, na yennkotum ara enya ahoɔdzen a wɔdze yɛ ne nyina. Naaso dza mesũa efi dɛm nkorɔfo yi nyina hɔ nye dɛ gyedzi wɔ Jesus Christ mu na ɔma hɛn ahoɔdzen ma yɛdze hyɛ akwantu no ase. Ɔyɛ a yɛbɔdwen dɛ, “Ɔwɔ dɛ mototo me bra yie ana maaba Jesus hɔ,” mbom nokwar no nye dɛ yɛba Jesus hɔ ama yɛaanam No do aatoto hɛn bra yie.
Yɛmmba Jesus hɔ osiandɛ yedzi mu bi ntsi. Yɛba No hɔ osiandɛ yɛtɔ sin na wɔ No mu yebotum “[e]dzi mu.”6
Yebesi dɛn bɛhyɛ ase dɛ yɛdze gyedzi kakra bedzi dwuma dabiara? Emi mehyɛ ase anapa: Minyan a, nkyɛ mobɔhwɛ mo foon no, mobɔ mpaa. Mpaa a ɔda famu. Nkyii mekan kyerɛwsɛm bi. Iyi boa me wɔ me dapɛn dapɛn ahyɛmudzi a meyɛ ho ber a midzi sacrament no dɛ “[mebɛ]kaa no aber nyina.”7 Sɛ medze mpaabɔ na kyerɛwsɛm bi hyɛ me da no ase a, mubotum “[a]kaa No” ber a mohwɛ mo phone mu. Mubotum “[a]kaa No” ber a mihyia ɔhaw na wentwiwentwi, na mobɔ mbɔdzen dzi ho dwuma dɛ mbrɛ Jesus bɛyɛ no.
Ber a “[me]kaa No” no, minya ɔpɛ dɛ mebɛsesa, mubonu moho. Minya ahoɔdzen a medze sie m’ahyɛmudzi horow, na metse Sunsum Krɔnkrɔn ne nhyɛdo nkã wɔ m’abrabɔ mu na “[mi]dzi ne mbrasɛm a ɔdze ama [me] no do; ama aber nyina [me]enya no Sunsum.”8 Ɔboa me ma mitsim kodu ewiei.9 Anaa kodu da no n’ewiei ara! Na wɔ nda binom mu a mennkaa No da ne nyinara mu no, Ɔda ho wɔ hɔ, a ɔdɔ me na Ɔkã kyerɛ me dɛ, “Oye; ibotum abɔ mbɔdzen bio ɔkyena.”
Yɛtɔ sin dɛ yɛbɛkaa No dze, naaso hɛn Ɔsor Egya dɔfo dze Ɔkaa hɛn da biara.
Mpɛn pii no mfom kor a yɛyɛ nye dɛ yɛdwen dɛ yerisie ahyɛmudzi, anaa bɔhyɛ a yɛdze ama Nyankopɔn no, yɛ biribi dɛ tɔn ma montɔ nhyehyɛɛ a yɛnye No yɛ: Emi meyɛ setsie, na Ɔno so bɔ moho ban dɛ biribi bɔn biara nnkɔto me. Mutua m’ebupɛn du, ntsi m’edwuma rimmfi me nsa da anaa gya no rennhyew me dan. Naaso sɛ ndzɛmba annkɔ do dɛ ma yɛrohwehwɛ a, yesũ kyerɛ Ewuradze dɛ, “Ɔnnyɛ wo asɛm dɛ [me] rehera?”10
Hɛn ahyɛmudzi nnyɛ nhyehyɛɛ ara; wɔyɛ nsakyeree.11 Ɔnam m’ahyɛmudzi do no me nsa ka Jesus Christ ne ntsewho, dzenhyɛ tum, a ɔma me kwan ma mebɛyɛ nyimpa fofor, mutum dze dza ɔyɛ dɛ yennkotum dze akyɛ dze kyɛ, mutum dzi dza munnkotum ayɛ do. Merekaa Jesus Christ enyidaho mu ara da biara no yɛ ndam; ɔma me ahoɔdzen bi kã ho a medze “dzi ne mbrasɛm a ɔdze ama [me] do.”12 Ɔboa me ma meyɛ papa yie, meyerɛw m’ano wɔ siantsir bi ho, meyɛ siesiefo,13 mokwetsir wentwiwentwi, dɛ Nyankopɔn ndzi nyim wɔ m’abrabɔ mu.14
Sɛ hɛn yaw anaa obi a yɛdɔ no ne yaw sõ ara dɛ yenntum nnsoa a, yɛrekaa Jesus Christ na yɛaba No hɔ botum ama adzesoa no no mu ayɛ har, adwedwe akoma, na Ɔabrɛ yaw no adze. Dɛm tum yi na ɔmaa egya no mboa bor dza n’ahom botum do dze boaa ne babaa ma oduaa honandua mu na atsenka mu yaw dɛ ɔahwer ne nan.
Ber a Elder Soares kɔr Argentina Obiradzi bosoom a abasen yi na obisaa Flavia wɔ n’akwanhyia huuhu no ho no, oyii ano nokwar mu dɛ, “M’adwen mu yɛɛ me konsẽe dodoodow, metsee yaw, ebufuw, na ɔtan ber a [asɛm yi sii] no. Dza ɔboaa me nye dɛ memmbisa, ‘dɛn ntsi na emi yi?’ mbom ‘ebɛnadze a memfa nyɛ?’ … Iyi yɛ adze a ɔtwee me bɛn binom na Ewuradze yie. … Nkyɛ mebɛtsew moho efi No ho no, metetaar No.”15
President Nelson kyerɛkyerɛɛ dɛ: “Irisie ahyɛmudzi a enye Nyame dzi n’akatua nye ɔsorsor tum—tum a ɔhyɛ hɛn dzen ma yetum gyina hɛn haw, nsɔhwɛ, na akomayaw ano yie. … Dɛm ntsi, ahyɛmu siefo wɔ ahomgye soronko ho kwan.”16 Dɛm ahomgye na asomdwee yi bi na muhun no wɔ kunafo no n’enyiwa mu, akomayaw a ɔtse dɛ ɔfe no kun da biara mpo ekyir no.
Ahyɛmu Fofor no kã asɛm fa aber bi a nna Jesus na N’esũafo wɔ hɛn bi mu ho:
“Na mframa kɛse bɔɔ huu, na asorɛkye bui bɔhwee hɛn no mu. …
“[N]na ɔnodze … [ɔ]da sundze do: na wonyaan no, na wɔsee no dɛ, Kyerɛkyerɛfo, ɔnnyɛ wo asɛm dɛ yɛrehera?
“Na onyanee no, ɔbraa mframa no, na ɔsee po no dɛ, Taa dzinn. …
“Na ɔsee hɔn dɛ, Ebɛnadze ntsi na hom yɛ ehufo? Ana hom da ho nnyi gyedzi?”17
Dɛm asɛm yi yɛ me nwanwa dabaa. Ana nna Ewuradze rohwehwɛ dɛ wɔdze hɔn gyedzi bɛma ehum no adwe? Abra mframa no? Gyedzi wɔ Jesus Christ mu yɛ asomdwee atsenka a yetum dze gyina ehum ano, a yenyim dɛ yɛrennhera osiandɛ Ɔnye hɛn wɔ hɛn no mu.
Dɛm gyedzi yi bi na yehunii ber a yɛkɛseraa ebusua ebusua wɔ Chile gya nhyehyewee no ekyir. Nna hɔn adan ahyew akã daadze; wɔahwer biribiara. Eso ber a yɛnam bea a nkyɛ ɔyɛ hɔn efiefi no na wɔrekã dza wɔafa mu rekyerɛ hɛn no, yɛtsee nka dɛ yegyina asaase krɔnkrɔn do. Akyerɛbaa kor bi kãa kyerɛɛ me yer dɛ, “Ber a muhun dɛ adan a wɔbɛn me rehyew no, minyaa nkenyan dɛ hɛn dan so rebɛhyew, na yɛbɔhwer biribiara. Nkyɛ mobɔbɔ hu no, mbom minyaa asomdwee atsenka a munnkotum akyerɛ ase. Kwan bi do no, metsee nkã dɛ biribiara bɛyɛ yie.” Yerotwer Nyankopɔn na yerisie hɛn ahyɛmudzi a yɛnye no ayɛ dze tum brɛ hɛn mberɛwyɛ na ɔdze awerɛkyekyer brɛ hɛn yaw.
M’enyi sɔ wɔ akwan a emi na Renee nyae dze hyiaa Ahotseweefo soronko yi mu binom, ma hɔn fasusu pii a ɔfa gyedzi, ahoɔdzen, na enyimia ho. Akomayaw na abagura ho nsɛm a onnkopue dawurbɔ nkraataa enyim anaa ɔrenntahye da ho. Nyinsuwa na mpaabɔ a wonntwa ho mfonyin wɔ adzehwer bi ekyir anaa awargyaa yaayaw bi ekyir; ma suro, awerɛhow, na yaw a wɔnnkyerɛw ato bagua mu a wotum dzi do ɔnam hɔn gyedzi wɔ Jesus Christ na No Werdambɔ mu ntsi. Dɛm nkorɔfo yi hyɛ mara me gyedzi dzen, na m’enyi sɔ papaapa.
Minyim dɛ iyi nye Jesus Christ N’Asɔr no. Minyim dɛ Ogyina a Ɔayɛ krado dɛ Ɔdze No tum bɛma hɛn sɛ yɛba No hɔ dakor biara a. Jesus Christ ne dzin mu, amen.