តើបងប្អូនដឹងទេថា ហេតុអ្វីក្នុងនាមជាគ្រីស្ទានខ្ញុំជឿលើព្រះគ្រីស្ទ ?
ព្រះយេស៊ូវគ្រីស្ទត្រូវរងទុក្ខ សុគត ហើយមានព្រះជន្មរស់ឡើងវិញ ដើម្បីលោះមនុស្សទាំងអស់ពីសេចក្តីស្លាប់ ខាងសាច់ឈាម និងដើម្បីផ្តល់ជីវិតដ៏អស់កល្បជានិច្ចជាមួយព្រះ ។
កាលប៉ុន្មានឆ្នាំកន្លងទៅ នាល្ងាចមួយពេលចេញពីធ្វើការ ខ្ញុំបានជិះរថយន្តក្រុងដូចសព្វមួយដង ពី ញ៉ូវ យ៉ក ទៅផ្ទះនៅ ញ៉ូវ ជើស៊ី ។ ស្ត្រីដែលអង្គុយក្បែរខ្ញុំ សង្កេតឃើញអ្វីដែលខ្ញុំកំពុងសរសេរក្នុងកុំព្យូទ័រ រួចបានសួរថា « តើលោកជឿលើ…ព្រះគ្រីស្ទឬ ? » ខ្ញុំបានតបថា « បាទខ្ញុំជឿ ! » ពេលយើងនិយាយគ្នា ខ្ញុំបានដឹងថា គាត់ទើបតែផ្លាស់ពីប្រទេសអាស៊ីដ៏ស្រស់ស្អាត មកធ្វើការក្នុងវិស័យព័ត៌មានវិទ្យាដែលមានការប្រកួតប្រជែងយ៉ាងខ្លាំងនៅទីក្រុង ញ៉ូវ យ៉ក ។
រួចខ្ញុំសួរគាត់ថា « តើប្អូនដឹងថា ហេតុអ្វីក្នុងនាមជាគ្រីស្ទានខ្ញុំជឿលើព្រះយេស៊ូវគ្រីស្ទឬទេ ? » គាត់ក៏បានតបមកខ្ញុំវិញដោយសាមញ្ញ ហើយសូមខ្ញុំឲ្យប្រាប់គាត់ ។ ប៉ុន្តែពេលខ្ញុំហៀបនិយាយ ពេលនោះស្រាប់តែមានយោបល់ជាច្រើនបានផុសឡើងក្នុងគំនិតខ្ញុំ ។ នោះជាលើកដំបូងហើយ ដែលខ្ញុំពន្យល់ពី « មូលហេតុ » របស់គ្រីស្ទាន ទៅកាន់អ្នកមិនស្គាល់ពីគ្រីស្ទាន ហើយជាអ្នកមានបញ្ញាខ្ពស់ ។ ខ្ញុំមិនអាចគ្រាន់តែនិយាយថា « ខ្ញុំធ្វើតាមព្រះយេស៊ូវគ្រីស្ទ ដោយសារទ្រង់បានស្ម័គ្រព្រះទ័យរងទុក្ខ ហើយសុគតសម្រាប់អំពើបាបខ្ញុំ » ទេ ។ គាត់អាចឆ្ងល់ថា « តើព្រះយេស៊ូវត្រូវតែសុគតឬ ? ចុះហេតុអ្វីក៏ព្រះមិនអភ័យទោស និងសម្អាតយើងពីអំពើបាប បើយើងទូលសូមឲ្យទ្រង់ធ្វើដូច្នោះទៅ ? »
តើបងប្អូននឹងឆ្លើយតបយ៉ាងដូចម្ដេច ក្នុងរយៈពេលតែពីរបីនាទីនោះ ? តើបងប្អូននឹងពន្យល់រឿងនេះដល់មិត្តភក្តិយ៉ាងដូចម្តេច ? កុមារ និងយុវវ័យ ៖ សូមក្មួយៗសួរឪពុកម្ដាយ ឬអ្នកដឹកនាំនៅពេលក្រោយថា « ហេតុអ្វីព្រះយេស៊ូវត្រូវតែសុគតដូច្នេះ ? » បងប្អូនប្រុសស្រី ខ្ញុំសូមសារភាពថា ៖ ទោះជាខ្ញុំបានគិតថា ខ្ញុំបានដឹងអំពីគោលលទ្ធិ ប្រវត្ដិសាស្ដ្រ គោលនយោបាយ និងអ្វីៗផ្សេងក្តី ក៏ចម្លើយចំពោះសំណួរដ៏សំខាន់អំពីសេចក្ដីជំនឿរបស់យើង ពុំបានកើតឡើងដោយងាយនោះដែរ ។ ថ្ងៃនោះ ខ្ញុំបានសម្រេចចិត្តផ្តោតខ្លាំងទៅលើអ្វីដែលសំខាន់បំផុតចំពោះជីវិតដ៏អស់កល្បជានិច្ច ។
មែនហើយ ខ្ញុំបានប្រាប់មិត្តថ្មីខ្ញុំ១ ថាក្រៅពីរូបកាយ យើងក៏មានវិញ្ញាណផងដែរ ហើយព្រះជាព្រះវរបិតាខាងវិញ្ញាណរបស់យើង ។២ ខ្ញុំបានប្រាប់គាត់ថា យើងបានរស់នៅជាមួយព្រះវរបិតាសួគ៌ ពីមុនយើងកើតមកក្នុងពិភពនៃជីវិតរមែងស្លាប់នេះ ។៣ ដោយសារទ្រង់ស្រឡាញ់គាត់ និងបុត្រាបុត្រីទាំងអស់របស់ទ្រង់ នោះទ្រង់បានបង្កើតផែនការមួយឲ្យយើង ទទួលបានរូបកាយតាមរូបអង្គដ៏រុងរឿងនៃទ្រង់៤កើតក្នុងគ្រួសារមួយ៥ហើយត្រឡប់ទៅវត្តមានដែលពេញដោយក្តីស្រឡាញ់របស់ទ្រង់ ដើម្បីរីករាយនឹងជីវិតដ៏អស់កល្បជានិច្ចជាមួយក្រុមគ្រួសារយើង៦ដូចគ្រួសារទ្រង់ផងដែរ ។៧ ប៉ុន្តែខ្ញុំបានប្រាប់ថា យើងនឹងប្រឈមមុខនឹងឧបសគ្គចម្បងពីរនៅក្នុងពិភពលោកធ្លាក់ចុះនេះ ៖៨ ( ១ ) សេចក្តីស្លាប់ខាងសាច់ឈាម—គឺវិញ្ញាណយើងបែកចេញពីរូបកាយរបស់យើង ។ ពិតណាស់ គាត់បានដឹងថា យើងទាំងអស់គ្នានឹងស្លាប់ ។ និង ( ២ ) សេចក្ដីស្លាប់ខាងវិញ្ញាណ—គឺយើងបែកចេញពីព្រះ ដោយសារអំពើបាប កំហុស និងការធ្វើខុសក្នុងជីវិតរមែងស្លាប់ ធ្វើឲ្យយើងឃ្លាតឆ្ងាយពីវត្តមានដ៏បរិសុទ្ធរបស់ទ្រង់ ។៩ គាត់យល់ថា រឿងនេះក៏ទាក់ទងនឹងគាត់ដែរ ។
ខ្ញុំបានប្រាប់គាត់ថា នេះគឺជាឥទ្ធិពលនៃក្រឹត្យវិន័យនៃសេចក្តីយុត្តិធម៌ ។ ក្រឹត្យវិន័យដ៏អស់កល្បជានិច្ចនេះទាមទារឲ្យមាន ទណ្ឌកម្មដ៏អស់កល្បដែលត្រូវតែបង់សងដល់គ្រប់អំពើបាប ឬការបំពានលើក្រឹត្យវិន័យ ឬសេចក្ដីពិតរបស់ព្រះ ឬយើង មិនអាចត្រឡប់មករស់នៅក្នុងវត្តមានដ៏បរិសុទ្ធរបស់ទ្រង់វិញបានឡើយ ។១០ វានឹងជារឿងអយុត្តិធម៌ ហើយព្រះ « ពុំអាចបដិសេធសេចក្តីយុត្តិធម៌បានឡើយ » ។១១ គាត់យល់ពីរឿងនេះ ហើយថែមទាំងយល់ថា ព្រះក៏មានក្តីមេត្តាករុណា ស្រឡាញ់ និងសព្វព្រះទ័យនាំមកនូវជីវិតដ៏នៅអស់កល្បជានិច្ចដល់យើងផងដែរ ។ ១២ ខ្ញុំបានប្រាប់មិត្តខ្ញុំថា យើងក៏មានមារសត្រូវដ៏មានឧបាយកល និងឥទ្ធិពលផងដែរ—វាគឺជាប្រភពនៃអំពើអាក្រក់ និងការកុហក—ប្រឆាំងនឹងយើង ។ ១៣ ហេតុដូច្នេះ ចាំបាច់ត្រូវមានព្រះមួយអង្គដែលមានព្រះចេស្តានៃព្រះ ដ៏និរន្តរ៍ ដែលឈ្នះលើការប្រឆាំង និងឧបសគ្គទាំងអស់នេះ មកសង្គ្រោះយើង ។ ១៤
បន្ទាប់មក ខ្ញុំបានចែកចាយដំណឹងល្អនឹងគាត់—គឺ « ដំណឹងល្អពីអំណរយ៉ាងអស្ចារ្យ … សម្រាប់បណ្តាជនទាំងអស់គ្នា »១៥—ថា « ដ្បិតព្រះទ្រង់ស្រឡាញ់មនុស្សលោក ដល់ម៉្លេះបានជាទ្រង់ប្រទានព្រះរាជបុត្រាទ្រង់តែមួយ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ » ។១៦ ខ្ញុំបានថ្លែងទីបន្ទាល់ដល់មិត្តខ្ញុំ ហើយធ្វើជាសាក្សីដល់បងប្អូនថា ព្រះយេស៊ូវគ្រីស្ទគឺជាព្រះអង្គសង្រ្គោះ ថាទ្រង់ ត្រូវ រងទុក្ខ សុគត ហើយមានព្រះជន្មរស់ឡើងវិញ—គឺជាដង្វាយធួន ដ៏និរន្តរ៍ របស់ទ្រង់—ដែលប្រោសលោះមនុស្សជាតិទាំងអស់ពីសេចក្ដីស្លាប់ខាងសាច់ឈាម១៧ ហើយផ្តល់ជីវិតដ៏អស់កល្បជានិច្ច១៨ ដល់ អស់អ្នក ដែលនឹងដើរតាមទ្រង់ ឲ្យនៅជាមួយព្រះ និងក្រុមគ្រួសារយើង ។ ព្រះគម្ពីរមរមនប្រកាសថា « ម្ល៉ោះហើយ ព្រះទ្រង់ … បានឈ្នះលើសេចក្ដីស្លាប់ ដោយបានប្រទានព្រះចេស្ដាដល់ព្រះរាជបុត្រាសម្រាប់អង្វរជំនួសកូនចៅមនុស្ស … ដោយមានចិត្ត [ ក្ដួលមេត្តា និង ] ពោរពេញទៅដោយចិត្តប្រោសប្រណី … ដោយបានផ្ដាច់ចំណងទាំងឡាយនៃសេចក្ដីស្លាប់ បានទទួលមកលើអង្គទ្រង់នូវអំពើទុច្ចរិតរបស់គេ និងអំពើរំលងទាំងឡាយរបស់គេ បានប្រោសលោះពួកគេ ហើយបានបំពេញការទាមទារទាំងឡាយនៃសេចក្ដីយុត្តិធម៌ » ។ ១៩
ជំហានទាំងឡាយដែលព្រះបានបើកសម្តែង ដែលយើងត្រូវតែធ្វើតាមព្រះយេស៊ូវ ហើយទទួលបានជីវិតដ៏អស់កល្បជានិច្ចនោះ ត្រូវបានហៅថា គោលលទ្ធិនៃព្រះគ្រីស្ទ ។ ជំហានទាំងនោះរួមមាន « សេចក្តីជំនឿលើព្រះយេស៊ូវគ្រីស្ទ និងដង្វាយធួនរបស់ទ្រង់ ការប្រែចិត្ត ពិធីបុណ្យជ្រមុជទឹក [ ចូលជាសមាជិកសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ] ទទួលអំណោយទាននៃព្រះវិញ្ញាណបរិសុទ្ធ និងកាន់ខ្ជាប់ដរាបដល់ចុងបំផុត » ។ ២០ ខ្ញុំបានចែកចាយជំហានទាំងនេះជាមួយមិត្តខ្ញុំ ប៉ុន្តែនេះគឺជាវិធីមួយចំនួនដែលព្យាការី និងសាវក ទើបតែបានបង្រៀននាពេលថ្មីៗនេះ អំពីរបៀបដែលគោលលទ្ធិនៃព្រះគ្រីស្ទអាចផ្តល់ពរដល់បុត្រាបុត្រីទាំងអស់របស់ព្រះ ។
ប្រធាន រ័សុល អិម ណិលសុន បានណែនាំ ៖ « គោលលទ្ធិនៃព្រះគ្រីស្ទដ៏បរិសុទ្ធគឺមានអានុភាពណាស់ ។ វាផ្លាស់ប្តូរជីវិត មនុស្សគ្រប់គ្នា ដែលយល់ពីគោលលទ្ធិនេះ ហើយព្យាយាមអនុវត្តតាមគោលលទ្ធិនេះនៅក្នុងជីវិតរបស់ពួកគេ » ។ ២១
អែលឌើរ ឌៀថើរ អេហ្វ អុជដូហ្វ បានបង្រៀនថា [ សៀវភៅ ] ដើម្បីកម្លាំងនៃយុវជន [ គឺ ] មានការប្រកាសដ៏ចំៗអំពីគោលលទ្ធិនៃព្រះគ្រីស្ទ [ ហើយ ] អញ្ជើញក្មួយៗដែលជា [ យុវវ័យ ] ឲ្យធ្វើការជ្រើសរើសដោយផ្អែកលើ [ សៀវភៅនោះ ] » ។២២
អែលឌើរ ឌៀថើរ អេហ្វ អុជដូហ្វ បានបង្រៀនថា « យើងអញ្ជើញឲ្យពួកអ្នកផ្សព្វផ្សាយសាសនាធ្វើអ្វី ដែលពួកគេសូមឲ្យមនុស្សដែលពួកគេបង្រៀនធ្វើដែរ ៖ … អនុវត្តគោលលទ្ធិនៃព្រះគ្រីស្ទនៅក្នុងជីវិតរបស់ពួកគេ ដើរ និងបន្ដដើរនៅលើផ្លូវនៃសេចក្ដីសញ្ញា » ។ ២៣
គោលលទ្ធិនៃព្រះគ្រីស្ទផ្ដល់អំណាចដល់អស់អ្នកដែលកំពុង ជួបការលំបាក ឬមានអារម្មណ៍ថា ពួកគេគ្មានចំណែកក្នុងសាសនាចក្រពីព្រោះគោលលទ្ធិនៃព្រះគ្រីស្ទជួយពួកគេ ដូចអែលឌើរ ឌី ថត គ្រីស្តូហ្វឺសិន បានថ្លែងថា « សូមបញ្ជាក់ថា ៖ ព្រះយេស៊ូវគ្រីស្ទបានសុគតជំនួសខ្ញុំ [ ហើយ ] ស្រឡាញ់ខ្ញុំ » ។ ២៤
មាតាបិតាអើយបើកូនរបស់បងប្អូនមានការលំបាកនឹងគោលការណ៍មួយនៃដំណឹងល្អ ឬការបង្រៀនរបស់ព្យាការី សូមទប់កុំនិយាយអាក្រក់២៥ឬធ្វើសកម្មភាពតាមគ្រប់រូបភាព ប្រឆាំងនឹងសាសនាចក្រ ឬថ្នាក់ដឹកនាំរបស់សាសនាចក្រឡើយ ។ វិធីតូចៗខាងលោកិយទាំងនេះដែលនៅក្រោមទង្វើរបស់បងប្អូន អាចបំពុលដល់ភាពស្មោះត្រង់យូរអង្វែងនៃកូនរបស់បងប្អូនបាន ។ ២៦ បើបងប្អូននិយាយពីរោះពិសារ នោះបងប្អូននឹងការពារ ឬនិយាយគាំទ្រដល់កូនៗដ៏មានតម្លៃរបស់បងប្អូន ឬបង្ហាញសញ្ញានៃសាមគ្គីភាពជាមួយគាត់ ។ ប៉ុន្តែភរិយាខ្ញុំ ជេន និងខ្ញុំដឹងតាមបទពិសោធន៍ផ្ទាល់ខ្លួនថា ពេលបង្រៀនកូនៗជាទីស្រឡាញ់របស់បងប្អូន អំពីមូលហេតុដែលយើងទាំងអស់គ្នាពិតជាត្រូវការព្រះយេស៊ូវគ្រីស្ទ និងរបៀបអនុវត្តគោលលទ្ធិដ៏រីករាយរបស់ទ្រង់ វាគឺជាអ្វីដែលនឹង ពង្រឹង និងព្យាបាលពួកគេ ។ ចូរយើងបង្វែរពួកគេទៅរកព្រះយេស៊ូវ ដែលជាអង្គគាំទ្រដ៏ពិតរបស់ពួកគេ ជាមួយនឹងព្រះវរបិតា ។ សាវកយ៉ូហានបានបង្រៀនថា « អ្នកណាដែល … កាន់ខ្ជាប់ក្នុងសេចក្តីបង្រៀនរបស់ព្រះគ្រីស្ទ … នោះមានទាំងព្រះវរបិតា និងព្រះរាជបុត្រាផង » ។ បន្ទាប់មក លោកព្រមានយើងឲ្យប្រុងប្រយ័ត្ន « បើអ្នកណាមកឯអ្នករាល់គ្នា តែមិនបង្រៀនចំពោះសេចក្តីនេះ » ។២៧
ថ្មីៗនេះ ជេន និងខ្ញុំបានទៅលេងទីរហោស្ថានដែលម៉ូសេបានលើកពស់លង្ហិនឡើង នៅចំពោះមុខកូនចៅរបស់អ៊ីស្រាអែលដែលដើររសាត់ព្រាត់ ។ ព្រះអម្ចាស់បានសន្យាថា ព្យាបាលអស់អ្នកដែលពស់អសិរពិសនោះចឹក បើពួកគេគ្រាន់តែសម្លឹងមើលវាប៉ុណ្ណោះ ។២៨ ការបង្រៀនគោលលទ្ធិនៃព្រះគ្រីស្ទនៅចំពោះមុខយើង នោះព្យាការីរបស់ព្រះអម្ចាស់កំពុងធ្វើដូចគ្នា « ដើម្បីឲ្យលោកអាចព្យាបាលទាំងសាសន៍ » ។២៩ មិនថាយើងជួបប្រទះការសាកល្បង ឬសេចក្តីវេទនា ឬការលំបាកអ្វីក៏ដោយ នៅក្នុងទីរហោស្ថាននៃជីវិតរមែងស្លាប់នេះ ចូរយើងកុំធ្វើដូចមនុស្សពីបុរាណ និងបច្ចុប្បន្ន ដែលគេអាចនឹងត្រូវបានព្យាបាល ប៉ុន្តែបែរជា « មិនព្រមសម្លឹងមើល … មកពីពួកគេមិនជឿថា វានឹងព្យាបាលគេឲ្យជានោះឡើយ » ។ ៣០ ព្រះគម្ពីរមរមនបញ្ជាក់ថា ៖ « មើលចុះ … នេះគឺជាផ្លូវ ហើយគ្មានផ្លូវឯណាទៀតទេ ឬក៏ឈ្មោះណាទៀតនៅក្រោមមេឃនេះ ដែលមនុស្សអាចបានសង្គ្រោះនៅក្នុងនគរនៃព្រះឡើយ ។ ហើយឥឡូវនេះមើលចុះ នេះគឺជាគោលលទ្ធិនៃព្រះគ្រីស្ទ » ។៣១
នៅរដ្ឋ ញ៉ូវ ជើស៊ី នាល្ងាចនោះ ការចែកចាយពីមូលហេតុដែលយើងត្រូវការព្រះយេស៊ូវគ្រីស្ទ និងគោលលទ្ធិរបស់ទ្រង់ បានផ្តល់ឲ្យខ្ញុំមានប្អូនស្រីថ្មីម្នាក់ ហើយគាត់មានបងប្រុសថ្មីម្នាក់ ។ យើងទទួលអារម្មណ៍ភាពសុខសាន្ត ដែលជាសាក្សីបញ្ជាក់មកពីព្រះវិញ្ញាណបរិសុទ្ធ ។ រួច ខ្ញុំសុំព័ត៌មានទាក់ទងទៅគាត់ ហើយអញ្ជើញគាត់ឲ្យបន្តការសន្ទនាជាមួយពួកអ្នកផ្សព្វផ្សាយសាសនារបស់យើង ។ គាត់រីករាយនឹងជួបពួកគេ ។
ព្រះគម្ពីរមរមនប្រកាសថា « ហេតុដូច្នោះហើយ គឺជាការសំខាន់បំផុត ដើម្បីធ្វើឲ្យការណ៍ទាំងនេះបានដឹងដល់បណ្ដាជននៅលើផែនដី »—ដើម្បីស្រឡាញ់ ចែកចាយ និងអញ្ជើញ៣២នៅពេលយើងប្រមូលសាសន៍អ៊ីស្រាអែលនៅក្នុងសហគមន៍ និងក្រុមគ្រួសារទាំងអស់របស់យើង—« ដើម្បីឲ្យពួកគេអាចដឹងថា គ្មានសាច់ឈាមណាអាចរស់នៅក្នុងវត្តមាននៃព្រះបានឡើយ លើកលែងតែដោយបុណ្យគុណ និងសេចក្ដីមេត្តាករុណា និងព្រះគុណ [ និងគោលលទ្ធិ ] នៃព្រះមែស៊ីដ៏បរិសុទ្ធ » ប៉ុណ្ណោះ ។៣៣ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។