ពរជ័យអយ្យកោរបស់បងប្អូន—ជាការដឹកនាំដ៏បំផុសគំនិតមកពីព្រះវរបិតាសួគ៌
ពរជ័យអយ្យកោរបស់ខ្ញុំបានជួយខ្ញុំឲ្យយល់ពីអត្តសញ្ញាណពិតដ៏អស់កល្បជានិច្ច—ថាខ្ញុំជានរណា ហើយខ្ញុំអាចក្លាយជានរណា ។
ខ្ញុំបានចិញ្ចឹមបីបាច់ដោយឪពុកម្ដាយដ៏ល្អដែលស្រឡាញ់ និងបានបង្រៀនដំណឹងល្អដល់កូនៗដោយស្មោះត្រង់ ។ តែគួរឲ្យស្តាយឳពុកម្តាយជាទីស្រឡាញ់របស់ខ្ញុំរកាំរកូសក្នុងចំណងអាពាហ៍ពិពាហ៍ជាច្រើនឆ្នាំ ។ កាលនោះខ្ញុំនៅតូច ពេលខ្ញុំបានដឹងថាពួកគាត់អាចនឹងលែងលះគ្នានៅថ្ងៃណាមួយ ហើយខ្ញុំនឹងត្រូវជ្រើសរើសថា រស់នៅតាមឪពុក ឬម្ដាយ ។ ជាលទ្ធិផល ខ្ញុំថប់បារម្ភយ៉ាងខ្លាំងអស់មួយរយៈពេលធំ ប៉ុន្តែអំណោយទានមួយមកពីព្រះវរបិតាសួគ៌របស់ខ្ញុំ បានជួយផ្លាស់ប្ដូរអ្វីៗគ្រប់យ៉ាង—នោះគឺពរជ័យអយ្យកោរបស់ខ្ញុំ ។
កាលអាយុ ១១ ឆ្នាំ ខ្ញុំព្រួយបារម្ភខ្លាំងអំពីទំនាក់ទំនងរបស់ឪពុកម្តាយខ្ញុំ ខ្ញុំប្រាថ្នាចង់បានពរជ័យអយ្យកោខ្លាំងណាស់ ។ ខ្ញុំដឹងថាព្រះវរបិតាសួគ៌ស្គាល់ខ្ញុំយ៉ាងឥតខ្ចោះ និងជ្រាបដឹងពីកាលៈទេសៈខ្ញុំយ៉ាងច្បាស់ ។ ហើយខ្ញុំក៏ដឹងផងដែរថាខ្ញុំនឹងបានទទួលពីទ្រង់ដោយផ្ទាល់ ។ ពេលខ្ញុំមានអាយុ ១២ ឆ្នាំ ភ្លាម ខ្ញុំបានទទួលពរជ័យអយ្យកោរបស់ខ្ញុំ ។ រឿងនេះបានកើតឡើងជាងកន្លះសតវត្សរ៍ទៅហើយ ប៉ុន្តែខ្ញុំចាំយ៉ាងច្បាស់នូវការលម្អិតពីបទពិសោធន៍ដ៏ពិសិដ្ឋនោះ ។
អរគុណណាស់ ដែលយើងបានទទួលការណែនាំដ៏បំផុសគំនិតមកពីពរជ័យអយ្យកោនៅក្នុង ក្បួនខ្នាតទូទៅ របស់សាសនាចក្រ ៖
« រាល់សមាជិកដែលបានទទួលពិធីបុណ្យជ្រមុជទឹក និងមានភាពស័ក្តិសមគ្រប់រូបមានសិទ្ធិទទួលពរជ័យអយ្យកោ ដែលផ្តល់ការដឹកនាំដ៏បំផុសគំនិតមកពីព្រះវរបិតាសួគ៌ » ។
សមាជិកម្នាក់គួរតែ « មានភាពចាស់ទុំគ្រប់គ្រាន់ដើម្បីយល់ពីសារៈសំខាន់ និងលក្ខណៈពិសិដ្ឋនៃពរជ័យ » និង « យល់ពីគោលលទ្ធិគ្រឹះនៃដំណឹងល្អ » ។
« ជាការប្រសើរបំផុតនោះ សមាជិកគួរតែមានវ័យក្មេងល្មម និងមានការសម្រេចចិត្តសំខាន់ៗជាច្រើនក្នុងជីវិតនៅចំពោះមុខនៅឡើយ ។… ថ្នាក់ដឹកនាំបព្វជិតភាពមិនគួរកំណត់អាយុតិចបំផុតសម្រាប់សមាជិកមួយរូបក្នុងការទទួលពររបស់លោកអយ្យកោនោះទេ ។ …
រាល់ពររបស់លោកអយ្យកោនីមួយៗគឺពិសិដ្ឋ សម្ងាត់ និងផ្ទាល់ខ្លួន ។ …
« បុគ្គលដែលទទួលពរជ័យអយ្យកោគួរតែឲ្យតម្លៃដល់ពាក្យពេចន៍ក្នុងពរជ័យនេះ សញ្ជឹងគិតពីពរជ័យនេះ ហើយរស់នៅឲ្យមានភាពស័ក្តិសមតាមការសន្យានៃពរជ័យនេះនៅក្នុងជីវិតនេះ និងភាពអស់កល្បជានិច្ច » ។១
ប្រធាន រ័សុល អិម ណិលសុនជាទីស្រឡាញ់របស់យើង បានបង្រៀនដដែលៗអំពីសារៈសំខាន់នៃពរជ័យអយ្យកោ២ដែលផ្តល់ឲ្យអ្នកទទួលម្នាក់ៗនូវ« ការប្រកាសអំពីពូជពង្សត្រឡប់ទៅរហូតដល់ អ័ប្រាហាំ អ៊ីសាក និងយ៉ាកុប »៣និងពរជ័យនីមួយៗថា « ជាព្រះគម្ពីរផ្ទាល់ខ្លួនសម្រាប់បងប្អូន » ។៤
ពរជ័យអយ្យកោខ្ញុំសំខាន់ណាស់ចំពោះខ្ញុំពេលខ្ញុំនៅក្មេង ព្រោះតែហេតុផលជាច្រើន ។ ទីមួយ តាមរយៈអំណាចនៃព្រះវិញ្ញាណបរិសុទ្ធ ពរជ័យអយ្យកោរបស់ខ្ញុំ បានជួយខ្ញុំឲ្យយល់ពីអត្តសញ្ញាណពិតដ៏អស់កល្បជានិច្ច—ថាខ្ញុំជានរណា ហើយខ្ញុំអាចក្លាយជានរណា ។ វាបានជួយខ្ញុំឲ្យដឹងដូច ប្រធាន ណិលសុន បានបង្រៀនថា ខ្ញុំគឺជា « បុត្រារបស់ព្រះ » ជា « [ បុត្រ ]នៃសេចក្តីសញ្ញា » និងជា « សិស្សរបស់ព្រះយេស៊ូវគ្រីស្ទ » ។៥ ខ្ញុំបានដឹងថា ព្រះវរបិតាសួគ៌ និងព្រះអង្គសង្រ្គោះស្គាល់ និងស្រឡាញ់ខ្ញុំ ហើយទ្រង់ទាំងទ្វេទាក់ទងនឹងជីវិតរបស់ខ្ញុំផ្ទាល់ ។ រឿងនេះ បានជួយខ្ញុំឲ្យមានបំណងចង់ខិតទៅជិតទ្រង់ ហើយបង្កើនសេចក្ដីជំនឿ និងការទុកចិត្តខ្ញុំលើទ្រង់ទាំងទ្វេ ។
មិត្តជាទីស្រឡាញ់ម្នាក់ដែលបានចូលរួមក្នុងសាសនាចក្រកាលជាយុវមជ្ឈិមវ័យ បានចែកចាយថា ៖ « ពេលលោកអយ្យកោបានដាក់ដៃលើក្បាលខ្ញុំ ហើយហៅឈ្មោះខ្ញុំ នោះអ្វីៗបានផ្លាស់ប្ដូរ…មិនត្រឹមតែពេលនោះទេតែពេញមួយជីវិតខ្ញុំ ។ រំពេចនោះខ្ញុំយល់ភ្លាមថា—តាមរយៈអំណាចដែលលោកថ្លែង—គឺលោកបានស្គាល់ខ្ញុំខ្លាំងភ្លាមៗតែម្ដង ។ ពាក្យដែលលោកបានថ្លែង បានជ្រាបចូលទៅក្នុងរូបកាយខ្ញុំទាំងមូល ។ ខ្ញុំដឹងថាព្រះវរបិតាសួគ៌ស្គាល់ខ្ញុំ ទាំងចិត្ត និងរូបកាយខាងក្រៅ » ។
ការដឹងថាខ្ញុំជានរណាពិតប្រាកដ បានជួយខ្ញុំឲ្យយល់ និងមានបំណងប្រាថ្នាចង់ធ្វើអ្វីដែលព្រះបានរំពឹងទុកពីខ្ញុំ ។៦
រឿងនេះបាននាំខ្ញុំឲ្យសិក្សាអំពីសេចក្ដីសញ្ញា ដែលខ្ញុំបានធ្វើ និងពរជ័យដែលបានសន្យានៅក្នុងសេចក្ដីសញ្ញារបស់ព្រះជាមួយអ័ប្រាហាំ ។៧ វាបានផ្ដល់ឲ្យខ្ញុំនូវទស្សនៈវិស្ស័យដ៏អស់កល្បជានិច្ច ដែលបានបំផុសគំនិតខ្ញុំឲ្យរក្សាសេចក្ដីសញ្ញារបស់ខ្ញុំឲ្យបានកាន់តែពេញលេញ ។
ខ្ញុំបានសិក្សាពរជ័យអយ្យកោរបស់ខ្ញុំជាញឹកញាប់ ហើយក្នុងនាមជាយុវវ័យម្នាក់ រាល់ថ្ងៃ វាជួយខ្ញុំឲ្យទទួលការលួងលោម ដឹកនាំដោយឥទ្ធិពលនៃព្រះវិញ្ញាណបរិសុទ្ធ ដែលបានជួយកាត់បន្ថយការថប់បារម្ភរបស់ខ្ញុំ នៅពេលខ្ញុំធ្វើតាមការបំផុសគំនិតរបស់ទ្រង់ ។ រឿងនេះបានបង្កើនបំណងប្រាថ្នាខ្ញុំឲ្យអញ្ជើញពន្លឺ សេចក្ដីពិត និងព្រះវិញ្ញាណបរិសុទ្ធយ៉ាងសកម្ម ដោយការសិក្សាព្រះគម្ពីរ និងការអធិស្ឋានរាល់ថ្ងៃ ព្រមទាំងធ្វើការព្យាយាមឲ្យកាន់តែឧស្សាហ៍ក្នុងការសិក្សា និងធ្វើតាមការបង្រៀនរបស់ព្យាការី និងសាវករបស់ព្រះ ។ ពរជ័យអយ្យកោរបស់ខ្ញុំ ក៏បានជួយខ្ញុំឲ្យមានបំណងប្រាថ្នាចុះចូលទៅនឹងឆន្ទៈរបស់ព្រះវបិតាសួគ៌កាន់តែច្រើន ហើយការផ្តោតអារម្មណ៍នោះបានជួយខ្ញុំឲ្យមានអំណរដ៏អស្ចារ្យ ទោះបីជាស្ថានភាពផ្ទាល់ខ្លួនរបស់ខ្ញុំយ៉ាងណាក្ដី ។៨
ខ្ញុំបានទទួលកម្លាំងខាងវិញ្ញាណរាល់ពេលដែលខ្ញុំបានសិក្សាពរជ័យអយ្យកោរបស់ខ្ញុំ ។ នៅទីបំផុត ពេលដែលឪពុកម្តាយខ្ញុំបានលែងលះគ្នា នោះគឺដូចប្រធាន ថូម៉ាស អេស ម៉នសុន បានបង្រៀន ពរជ័យអយ្យកោរបស់ខ្ញុំកាន់តែក្លាយជា « រតនៈសម្បត្តិផ្ទាល់ខ្លួនដ៏មានតម្លៃ និងមិនអាចកាត់ថ្លៃ » ហើយដូចជា « លីអាហូណាផ្ទាល់ខ្លួន » ។៩
ឥឡូវនេះសូមកុំយល់ច្រឡំ ។ ខ្ញុំមិនល្អឥតខ្ចោះទេ ។ ខ្ញុំមានកំហុសគ្រប់យ៉ាង ។ ដៃគូដ៏អស់កល្បរបស់ខ្ញុំនឹងបញ្ជាក់ថាខ្ញុំនៅតែធ្វើ ។ ប៉ុន្តែពរជ័យអយ្យកោរបស់ខ្ញុំ បានជួយខ្ញុំ ហើយនៅតែបន្តជួយខ្ញុំឲ្យមានបំណងប្រាថ្នាចង់ធ្វើល្អ ហើយជាមនុស្សប្រសើរជាងមុន ។១០ ការសិក្សាពរជ័យអយ្យកោរបស់ខ្ញុំជាញឹកញាប់បានបង្កើនបំណងប្រាថ្នាខ្ញុំឲ្យទប់ទល់នឹងការល្បួង ។ វាបានជួយខ្ញុំឲ្យមានបំណង និងភាពក្លាហានដើម្បីប្រែចិត្ត ហើយការប្រែចិត្តរឹតតែក្លាយជាដំណើរការដ៏រីករាយមួយ ។
វាសំខាន់ណាស់សម្រាប់ខ្ញុំដើម្បីទទួលបានពរជ័យអយ្យកោតាំងពីក្មេងខណៈដែលទីបន្ទាល់របស់ខ្ញុំកំពុងតែលូតលាស់ ។ ហើយខ្ញុំមានអំណរគុណជារៀងរហូតដែលឪពុកម្ដាយ និងប៊ីស្សពរបស់ខ្ញុំយល់ថា បំណងប្រាថ្នារបស់ខ្ញុំបានបង្ហាញថា ខ្ញុំបានត្រៀមខ្លួនជាស្រេច ។
កាលខ្ញុំអាយុ ១២ ឆ្នាំ ពិភពលោកនេះមិនសូវច្របូកច្របល់ និងរំខានដូចពិភពលោកសព្វថ្ងៃនេះទេ ។ ប្រធាន ណិលសុន បានពិណ៌នាពិភពលោកសព្វថ្ងៃថាជា « គ្រាមួយដែលស្មុគស្មាញខ្លាំងបំផុត ក្នុងប្រវត្តិសាស្ត្រនៃពិភពលោកនេះ » ជាពិភពលោកដែល « មានអំពើបាបដ៏ជោគជាំ » និង « អត្មានិយម » ។១១ សំណាងល្អដែលយុវវ័យយើងសព្វថ្ងៃនេះមានភាពចាស់ទុំច្រើនជាងកាលខ្ញុំអាយុ ១២ ឆ្នាំ ហើយពួកគេក៏មានការសម្រេចចិត្តដ៏សំខាន់ៗ ខណៈនៅពេលពួកគេនៅក្មេងនៅឡើយ ! ពួកគេក៏ត្រូវដឹងថាពួកគេជានរណាពិតប្រាកដ ហើយថាព្រះស្រឡាញ់ពួកគេ ហើយស្គាល់ពួកគេយ៉ាងច្បាស់ !
មិនមែនមនុស្សគ្រប់គ្នាសុទ្ធតែមានបំណងចង់បានពរជ័យអយ្យកោរបស់ខ្លួនពេលនៅក្មេងដូចជាខ្ញុំទេ ។ ប៉ុន្តែ ខ្ញុំសូមអធិស្ឋានថា សមាជិកដែលមិនទាន់បានទទួលពរជ័យអយ្យកោ នឹងស្វែងរកដោយការអធិស្ឋានដើម្បីដឹងថាតើពេលណាពួកគេបានត្រៀមខ្លួនរួចរាល់ហើយ ។ ខ្ញុំសន្យាថា បើបងប្អូនរៀបចំខាងវិញ្ញាណ នោះបងប្អូននឹងមានបទពិសោធន៍ដូចខ្ញុំ ដែលវាពិសិដ្ឋចំពោះបងប្អូន ។ ខ្ញុំក៏សូមអធិស្ឋានផងដែរថា អស់អ្នកដែលបានទទួលពរជ័យអយ្យកោ ហើយ នឹងសិក្សា ហើយទុកវាជាវត្ថុដ៏មានតម្លៃ ។ ការស្រឡាញ់ពរជ័យអយ្យកោរបស់ខ្ញុំតាំងពីក្មេងបានផ្ដល់ពរជ័យដល់ខ្ញុំជាមួយនឹងសេចក្តីក្លាហានពេលខ្ញុំបាក់ទឹកចិត្ត វាបានលួងលោមខ្ញុំពេលខ្ញុំភ័យខ្លាច វានាំសេចក្ដីសុខសាន្តដល់ខ្ញុំពេលខ្ញុំថប់បារម្ភ វានាំក្តីសង្ឃឹមពេលខ្ញុំអស់សង្ឃឹម និងមានអំណរពេលព្រលឹងខ្ញុំត្រូវការវាបំផុត ។ ពរជ័យអយ្យកោខ្ញុំបានជួយបង្កើនសេចក្ដីជំនឿ និងទុកចិត្តលើព្រះវរបិតាសួគ៌ និងព្រះអង្គសង្រ្គោះ ។ វាក៏បង្កើនសេចក្តីស្រឡាញ់របស់ខ្ញុំសម្រាប់ទ្រង់ទាំងទ្វេរ—ហើយនៅតែបន្តជួយដល់ខ្ញុំ ។១២
ខ្ញុំសូមថ្លែងទីបន្ទាល់ថា ពរជ័យអយ្យកោរបស់ខ្ញុំ ផ្ដល់នូវការដឹកនាំដ៏បំផុសគំនិតមកពីព្រះវរបិតាសួគ៌ ។ ខ្ញុំសូមធ្វើជាសាក្សីអំពីភាពពិតនៃការមានព្រះជន្មរស់របស់ព្រះវបិតាដែលគង់នៅស្ថានសួគ៌ និងព្រះរាជបុត្រាទ្រង់—គឺ ព្រះអង្គសង្គ្រោះរបស់យើងព្រះយេស៊ូវគ្រីស្ទ —ដែលទ្រង់ស្គាល់ ទ្រង់ស្រឡាញ់និងមានព្រះទ័យចង់ប្រទានពរដល់យើង ។ ខ្ញុំក៏ដឹងយ៉ាងច្បាស់ដែរថា ប្រធាន រ័សុល អិម ណិលសុន គឺជាព្យាការីរបស់ព្រះនៅលើផែនដីសព្វថ្ងៃនេះ ។ ក្នុងព្រះនាមនៃព្រះយេស៊ូវគ្រីស្ទ អាម៉ែន ៕