Lantá riba e Krus
Pa ta un siguidó di JesuCristo tin biaha bo mester wanta e karga i bai kaminda sakrifisio ta rekerí i sufrimentu ta inevitabel.
Hopi aña pasá, despues di un diskushon universitario riba historia di religion Merikano, un studiante a puntra mi, “Dikon e Santunan di Delaster Dianan no a adoptá e krus ku otro Cristiannan ta usa komo símbolo di nan fe?”
Mirando ku e tipo di preguntanan asina tokante di e krus hopi biaha ta preguntanan tokante nos kompromiso ku Cristo, inmediatamente mi a bis’é ku e Iglesia di JesuCristo di e Santunan di Delaster Dianan ta konsiderá ku e sakrifisio ekspiatorio di JesuCristo ta e echo sentral, e fundamentu krusial, e doktrina prinsipal i e ekspreshon máksimo di e amor divino den e gran plan di Dios pa e salbashon di Su yunan. 1 Mi a splika ku e grasia salbadó inherente na e akto aki tabata esensial i universalmente otorgá na kada famia humano for di Adam i Eva te na final di mundu. 2 Mi a sita e Profeta Jose Smith, ku a bisa, “Tur … kos pertenesiente na nos religion ta solamente apendise” na e Ekspiashon di JesuCristo 3
E ora ei mi a lesa p’e loke Nefi a skibi 600 aña promé ku e nasimentu di Jesus: “I … , e angel a papia ku mi … , bisando: Mira! “I mi a wak i a mira e Lamchi di Dios, … Kende] tabata lantá riba e krus i matá pa e pikánan di mundu.”
Ku mi deseo di “amor, kompartí, i invitá” awor drentando den velosidat altu, mi a sigui lesa! Na e Nefitanan den e Mundu Nobo e Cristo resusitá a bisa, “Mi Tata a manda mi pa mi wòrdu elevá riba krus; …ku Mi por hala tur hòmber na mi, … pa e kousa aki mi a manda mi pa mi wòrdu elevá.”5
Mi tabata pa bai sita e Apòstel Pablo ora mi a ripara mi amigu su wowonan a kuminsá ta wak leu. Un mirada lihé na su oloshi di man aparentemente a kòrd’é ku e mester tabata un kaminda—unda ku ta—i el a kore bai na su sita fiktisio. Asina ei nos kombersashon a kaba.
E mainta aki, algun 50 aña despues, mi ta determiná pa kaba e splikashon ei—hasta si kada un di boso individualmente kuminsa wak boso oloshi di man. Miéntras mi ta purba na splika dikon generalmente nos no ta usa e ikonografia di e krus, mi ta deseá pa pone abundantemente kla nos rèspèt i atmirashon profundo pa e motibunan yená ku fe i bidanan deboto di esnan ku si ta hasié.
Un motibu ku nos no ta enfatisá e krus komo un símbolo ta bin for di nos rais bíbliko. Pasobra krusifikshon tabata un di e maneranan mas agonisante di e Imperio Romano pa ehekushon, hopi di e siguídonan di antaño di Jesus a skohé pa nos suprayá e instrumento brutal di sufrimentu aki. E nifikashon di Cristo Su morto ta sigur sentral den nan fe, pero pa kasi 300 aña típikamente nan a buska pa kompartí nan identidat di evangelio dor di otro medionan.6
Ya na e di kuater pa di sinku siglo, e krus a wòrdu introdusí komo un símbolo di Cristianismo general, pero nos no ta un “Cristianismo general.” Siendo ni Katóliko ni Protestante, nos ta, mas bien un iglesia restorá e iglesia restorá di Tèstamènt Nobo. Pues, nos origennan i outoridat ta bai bèk promé ku e tempu di konsilio, kredu, i ikonografia.7 Den e sentido aki, e ousensia di e símbolo ku tabata lat den uso komun ta ainda otro evidensia ku E Iglesia di JesuCristo di e Santunan di Delaster Dianan ta un restorashon di e komienso bèrdadero di Cristianismo.
Un otro rason pa no usa e krus ikonográfiko ta nos énfasis riba e milager kompleto di Cristo Su mishon—Su Resurekshon glorioso i tambe Su sufrimentu di sakrifisio i morto. Suprayando e relashon ei, mi a nota dos pida arte8 ku ta sirbi komo fondo pa e Promé Presidensia i e Quorum di Diesdos Apòstelnan den nan sagrado reunion semanal di tèmpel kada djaweps na Salt Lake City. E kuadronan aki ta sirbi komo rekordatorio konstante pa nos di e preis ku a wòrdu pagá i e viktoria ku a wòrdu ganá pa medio di DjE di kua nos ta Su siervonan.
Un representashon mas públiko di Cristo Su triunfo di dos parit ta nos uso di e imágen chikitu di Thorvaldson di e Cristo resusitá den gloria for di e tumba ku Syu heridanan di Su Krusifikshon ainda evidente.9
Finalmente, nos ta kordá nos mes ku Presidente Gordon B. Hinckley a yega di siña nos ku, “E bida di nos hendenan mester [ta] …un simbolo di nos [fe].”10 E konsiderashonnan aki—spesialmente e delaster—ta hiba mi na loke por ta e referensia di skritura mas importante di tur tokante e krus. E no tin nada di haber ku kadena òf prenda, ku toren òf bòrchi di señal. E tin di haber, mas bien, ku e integridat fuerte i wes’i lomba rígido ku Cristiannan mester trese na e yamada ku Jesus a duna na kada un di Su disípulonan. Den tur pais i tempu, El a bisa na nos tur, “Si kualke hòmber [òf muhé] ke sigui mi, lag’é nenga su mes, tuma su krus i sigui mi.”11
Esaki ta papia di e krusnan ku nos ta karga en bes di esnan ku nos ta bisti. Pa ta un siguidó di JesuCristo, tin biaha bo mester wanta e karga—di bo mes òf di un otro—i bai kaminda sakrifisio ta rekerí i sufrimentu ta inevitabel. Un bèrdadero Cristian no por sigui e Maestro solamente den e asuntunan ku e ta di akuerdo ku n’e. No. Nos ta siguiE tur kaminda, inkluyendo, si ta nesesario, den arena yená ku lagrima i difikultat, kaminda tin bia nos ta pará hopi bia nos so.
Mi sa di hende, den i pafó di Iglesia, ku ta sigui Cristo asina fiel. Mi sa di muchanan ku desabilidat físiko severo, i mi sa di mayornan ku ta kuida nan. Mi ta mira nan tur trahando tin biaha te na e punto di kansansio total, buskando forsa, siguridat, i momentunan di goso ku no ta bin di ningun otro manera. Mi sa di adultonan soltero ku ta añorá, i ta meresé un kompañero amoroso, un matrimonio maravioso, i un hogar yen di mucha di nan mes. Ningun deseo por ta mas rekto, pero despues di añanan e tipo di bon fortuna [suerte] ei no ta bin ainda. Mi sa di esnan ku ta lucha ku malesa mental di tur tipo, ku ta roga pa yudansa ora nan ta hasi orashon, suspirá i purba gara na e tera primintí di stabilidat emoshonal. Mi sa di esnan ku ta biba den pobresa debilitante pero, desafiando desesperashon, ta pidi solamente pa e oportunidat di hasi bida mihó pa nan sernan kerí i otronan den nan serkania. Mi sa di hopi ku ta lucha ku asuntunan grave di identidat, género, i seksualidat. Mi ta yora pa tur, mi ta yora ku nan, sabiendo kon signifikante e konsekuenshanan di nan desishonan lo ta.
Esakinan ta djis algun di e hopi sirkumstansianan difísil ku nos ta enfrentá, rekordatorionan solèm ku tin un kosto mará na disípulado. Na Arauna, kende a purba na dun’e bué i palu gratis pa su ofrenda, Rei David a bisa, “No; pero sigur lo mi kumpr’é for di bo pa un preis: … [pasobra ami] lo [no] ofres … na Señor mi Dios … e loke no a kosta mi nada”12 Pues asina tambe nos tur ta bisa.
Ora nos ta tuma riba nos [nos] krusnan i siguiE, e lo ta trágiko di bèrdat si e peso di nos desafionan lo nos hasi nos mas enfátiko pa i mas atento na e karga ku otronan ta wanta. Ta un di e paradòksnan mas poderoso di e Krusifikshon ku e brasanan di e Salbador tabata hanchu habri i nan a klab’é einan, inevitablemente pero presis mustrando ku kada hòmber, muhé, i mucha den hinter e famia humano no solamente ta bon biní pero ta invitá den Su brasanan di redenshon, i eksaltashon.13
Manera e Resurekshon glorioso a sigui e Krusifikshon ku agonia, e bendishonnan di kada tipo a wòrdu deramá riba esnan ku ta deseoso, manera e profeta di Buki di Mormon Jakob ta bisa, pa “kere den Cristo, i wak su morto, i sufri su krus.” Tin biaha e bendishonnan ei ta bin lihé i tin biaha nan ta bin despues, pero e konklushon maravioso na nos via dolorosa14 ta e promesa di e Maestro Mes ku nan ta i nan lo bin. Pa optené e tipo di abundansia asina, ta mi orashon pa nos siguiE—sin faya, nunka basilá ni hui, nunka spanta pa e tarea, tampoko ora nos krusnan por ta pisá i tampoko ora, pa un tempu, e kaminda por bira skur, Pa bo fortalesa, bo fieldat, i bo amor, mi ta duna bo un danki personal. Riba e dia aki mi ta duna mi testimonio apostóliko di DjE ku a wòrdu “antá”15 i di e bendishonnan eterno ku E ta duna nan esnan ku “antá” huntu ku nE, hasta Señor JesuCristo, amèn.