Yudando esnan Pober i Afligí
E Iglesia di JesuCristo ta komprometé pa sirbi esnan den nesesidat, i ta komprometé tambe pa koperá ku otronan den e esfuerso ei.
Rumannan, nos kerido Presidente Russell M. Nelson lo papia ku nos despues den e seshon aki. El a puntra mi pa ta e promé diskursante.
Mi tópiko awe ta konserní loke E Iglesia di JesuCristo di e Santunan di Delaster Dianan i su miembronan ta duna i hasi pa esnan pober i afligí. Lo mi papia tambe di donashonnan similar pa medio di otro bon hendenan. Duna na esnan den nesesidat ta un prinsipio den tur religion Abrahámiko i den otronan tambe.
Algun luna pasá, E Iglesia di JesuCristu di e Santunan di e Delaster Dianan a reportá pa e promé bia e alkanse di nos trabou humanitario rònt mundu.1 Nos gastunan di 2021 pa esnan den nesesidat den 188 pais rònt mundu tabata di $ 906 mion—kasi mil mion dòler. Ademas, nos miembronan a duna mas di 6 mion ora di trabou boluntario den e mesun kousa.
E sifranan ei ta, klaro, un informe inkompleto di nos dunamentu i yudamentu. Nan no ta inkluí e servisionan personal ku nos miembronan ta duna individualmente ora nan ta ministrá un na otro den posishonnan di yamamentu i servisio boluntario di miembro na miembro. I nos rapòrt di 2021 no ta hasi menshon di kiko nos miembronan ta hasi individualmente pa medio di innumerabel organisashonnan di karidat ku no ta formalmente konektá ku nos Iglesia. Mi ta kuminsá ku esakinan.
Na 1831, mènos ku dos aña despues ku e Iglesia restorá tabata organisá, Señor a duna e revelashon aki pa guia su miembronan i, mi ta kere, tur Su yunan, mundialmente:
“Ata aki, no ta nesesario ku Mi tin ku manda den tur kos; pasó esun ku ta obligá den tur kos, e mesun ta un sirbidó floho i no ta sabio. …
“Di bèrdat mi ta bisa, boso mester traha masha duru den un bon kousa, i hasi hopi kos di boso mes boluntat, i kumpli ku hopi rektitut;
“Pasó e poder ta den esnan, den kua ta nan propio agentenan. I asina leu ku hòmbernan hasi bon, di ningun manera nan lo pèrdè nan rekompensa.”2
Den mas di 38 aña komo un Apòstel i den mas di 30 aña di trabou profeshonal, mi a mira hopi esfuersonan generoso di parti di organisashonnan i personanan di e tipo ku e revelashon aki ta deskribí komo “un bon kousa” i “laga[ndo] hopi rektitut sosodé .” Tin ehèmpelnan innumerabel di tipo di servisionan humanitario den henter mundu, mas leu di nos propio fronteranan i mas leu di nos konosementu komun. Kontemplando esaki, mi ta pensa di profeta-Rei Benjamin di e Buki di Mormon, ken su predikashi tabata inkluí e bèrdat eterno aki: “Ora bo ta den servisio di bo próhimo, bo ta únikamente den servisio di bo Dios.”3
Hopi servisio di bienestar i humanitario na nos próhimo ta siñá i praktiká pa E Iglesia di JesuCristo di e Santunan di e Delaster Dianan i pa nos komo su miembronan. Por ehèmpel nos ta yuna riba e promé dia di kada luna i nos ta kontribuí al ménos ku ekivalente di e kumindanan ku nos no a kome pa esnan den nesesidat den nos mes kongregashonnan. Tambe Iglesia ta hasi kontribushonnan enorme pa servisionan humanitario i di otro tipo rònt mundu.
A pesar di tur loke nos Iglesia ta hasi direktamente, e mayor parti di e servisio humanitario na e yunan di Dios den henter mundu ta hasí pa personannan i organisashonnan ku no tin konekshon formal ku nos Iglesia. Manera un di nos Apòstelnan a opservá: “Dios ta usa mas di un pueblo pa realisashon di Su obra grandi i maravioso. … E ta muchu grandi, muchu pisá, pa un pueblo.”4 Komo miembronan di e Iglesia restorá, nos mester ta mas konsiente i tin mas apresio pa e servisio di otronan.
E Iglesia di JesuCristo ta komprometé pa sirbi esnan den nesesidat, i ta komprometé tambe pa koperá ku otronan den e esfuerso ei. Resientemente nos a hasi un donashon grandi na e Programa Mundial di Alimento di e Nashonnan Uní. Durante e hopi dekadánan di nos trabou humanitario, dos organisashon a resaltá komo kolaboradónan klave: proyektonan huntu ku agensianan di Krus Kòrá i Red Crescent den dosena di paisnan a proveé e yunan di Dios alivio krusial durante desasternan natural i konflikto. Igualmente, nos tin un registro largu di asistensia ku Servisionan di Alivio Katóliko. E organisashonnan aki a siña nos hopi tokante sokoro di klase mundial.
Nos tabatin tambe kolaborashonnan fruktífero ku otro organisashonnan, inkluso Muslim Aid, Water for People i IsraAID, pa nombra algun. Maske kada organisashon humanitario tin nan mes área di spesialisashon, nos ta kompartí e ophetivo komun di aliviá e sufrimentu di e yunan di Dios. Tur esaki ta parti di Dios Su obra pa Su yunan.
E revelashon moderno ta siña ku nos Salbador, JesuCristo, ta “e lus bèrdadero ku ta iluminá tur hende ku bini na mundu.”5 Konsekuentemente, tur e yunan di Dios ta iluminá pa sirbiÉ i un na otro ku e mihó di nan konosementu i abilidat.
E Buki di Mormon ta siña ku “tur kos ku ta invitá i ta persuadí na hasi bon, i pa stima Dios, i na sirbi E, ta inspirá di Dios.”6
Siguiendo:
“Pasó ata’ki, e Spiritu di Cristo ta wòrdu duná na tur hende, pa e por sa bon di malu; asina ku, mi ta mustra boso e manera di husga; pasobra tur loke ta invitá pa hasi bon, i persuadi pa kere den Cristo, ta wòrdu mandá pa medio di e poder i don di Cristo, …
“I awor, mi rumannan, … boso konosé e lus pa kua boso por wòrdu husgá, kua lus ta e lus di Cristo.”7
Aki tin algun ehèmpel di yunan di Dios yudando otro yunan di Dios den e áreanan di alimento, kuido médiko, i enseñansa:
Dies aña pasá, e Kanhdaris, un hòmber Sikh i su kasá den Emirato Arabe Uní, a lansa personalmente un esfuerso remarkabel pa alimentá esnan ku hamber. Mediante e tèmpel Guru Nanak Darbar Sikh, nan ta sirbi aktualmente mas di 30,000 kuminda vegetariano tur wikènt na kualke ku drenta nan portanan, independientemente di religion òf rasa. Dr. Kanhdari ta splika, “Nos ta kere ku tur ta un, nos ta yunan di un Dios, i nos ta aki pa sirbi humanidat.”8
E provishon di kuido médiko i dental pa esnan den nesesidat ta un otro ehèmpel. Na Chicago, mi a topa ku un dòkter Sirio Amérikano pa kuido kritiko, Dr. Zaher Sahloul. E ta un di e fundadónan di MedGlobal, ku ta organisá profeshonalnan médiko pa duna di nan tempu, talentonan, konosementu, i liderazgo pa yuda otronan den krísis, manera den e guera di Siria, na unda Dr. Sahloul ta riska su bida pa duna kuido médiko na siudadanonan. MedGlobal i organisashonnan similar (inkluso hopi profeshonal Santunan di Delaster Dia) ta demostrá ku Dios ta motivando profeshonalnan di fe pa trese alivio nesesario na e pobernan rònt mundu.9
Hopi yunan di Dios generoso ta enbolbí den esfuerssonan di enseñansa, tambe mundialmente. Un bon ehèmpel, konosí pa nos pa medio di nos esfuersonan humanitario, ta e aktividatnan di un hòmber konosí komo Sr. Gabriel, ku tabata un refugiado di vários konflikto na diferente okashon. Resientemente el a opservá ku sentenar i miles di muchanan refugiado na Afrika Ost tabatin mester di yudansa pa mantené nan speransanan bibu i nan mentenan aktivo. El a organisá otro maestronan den e poblashon di refugiado den loke nan ta yama “tree schools [skolnan di palu],” kaminda e muchanan ta reuní pa lèsnan bou di sombra di un palu. E no a warda riba otronan pa organisá òf dirigí pero a proveé oportunidatnan di enseñansa pa miles di muchanan di skol básiko durante añanan estresante di mudansa forsá.
Klaro, e tres ehèmpelnan aki no ta nifiká ku tur kos ta bisá òf hasí pa organisashonnan òf individuonan ku ta pretendé di ta bon òf di Dios ta bèrdaderamente asina. E ehèmpelnan aki ta mustra ku Dios ta inspirá hopi organisashonnan i individuonan pa hasi hopi bon. E ta mustra tambe ku mas di nos mester ta rekonosiendo e bon hasí dor di otronan i sostené manera nos tin e tempu i e posibilidatnan pa hasi asina.
Aki tin algun ehèmpel di servisio ku e Iglesia ta sostené i ku nos miembronan i otro bon hendenan i organisashonnan tambe ta sostené ku donashonnan individual di tempu òf sèn:
Mi ta kuminsá ku libertat religioso. Den sosteniendo esei, nos ta sirbi nos propio interesnan, pero tambe e interesnan di otro religionnan. Komo e promé Presidente, José Smith, a siña, “Nos ta afirmá e privilegio di alabá Dios Todopoderoso segun e diktado di nos mesun konsenshi, i nos ta permití tur hòmber e mesun privilegio, laga nan alabá kon, unda, i kiko nan ke.”10
Otro ehèmpelnan di donashonnan humanitario di e Iglesia restorá i otro asistensia ku ta apoyá boluntariamente pa nos miembronan ta nos skolnan, universidatnan bon konosí i esnan ménos konosí pero awor donashonnan grandi publiká pa e alivio di esnan ku ta sufri pa destrukshonnan i deslokalisashonnan di desasternan natural manera tornado i teremotonan.
Otro aktividatnan di karidat ku nos miembroan ta apoyá ku nan donashonnan boluntario i esfuersonan ta muchu hopi pa menshoná, pero djis menshonando algun di esakinan lo sugerí nan variedat i importansia: kombatí rasismo i otro prehuisionan; investigashon na kon pa prevení i kura malesanan; yuda esnan desabilitá; apoyá organisashonnan musikal i museo; i mehorá e ambiente moral i físiko pa tur hende.
Tur e esfuersonan humanitario di E Iglesia di JesuCristo di e Santunan di e Delaster Dianan ta buska pa sigui e ehèmpel di hendenan rekto deskribí den e Buki di Mormon: “I asina, den nan sirkunstansianan próspero, nan no a manda niun ku tabata sunú, òf ku tabatin hamber òf ku tabatin set, òf ku tabata malu bai, … i nan … tabata liberal ku tur, tantu bieu komo yòn, tantu sirbidónan komo katibu, tantu hòmbernan komo muhénan, sea pafó di iglesia òf den iglesia.”11
Mi ta testifiká di JesuCristo, ken su lus i Spiritu ta guia tur e yunan di dios den yuda e pobernan i esnan den angustia rònt mundu. Den e nòmber di JesuCristo, amèn.