Kiko ta Bèrdat?
Dios ta e fuente di tur bèrdat. E Iglesia di JesuCristo di e Santunan di Delaster Dianan ta brasa tur bèrdat ku Dios ta duna na Su yunan.
Mi kerido rumannan, danki na tur pa e seshon inspiradó aki! For di nos konferensia aprel ku a pasa, nos a bin ta presensia hopi eventonan mundial, for di tristu te ku sublime.
Nos ta deleita ku e reporte di konferensianan di hubentut grandi ku ta wòrdu tené rònt mundu. 1 Na e konferensianan aki, nos hubentut noble a siña ku no ta importa kiko ku pasa den nan bida, nan fortalesa di mas grandi ta bin for di Señor.2
Nos ta regosihá ku mas tèmpenan ta wòrdu konstruí rònt mundu. Ku e dedikashon di kada un di e tèmpelnan nobo, podernan divino ta bin den e mundu pa fortalesé nos i kontrarestá e esfuersonan ku ta intensivando di e atversario.
Abusu ta konstituí e influensia di e atversario. E ta un piká grave.3 Komo Presidente di e Iglesia, mi ta afirmá ku e enseñansanan di e Señor JesuCristo riba e asuntu aki. Laga mi ta perfektamente kla: kualke tipo di abusu di hende muhé, mucha, òf ken ku ta, ta un abominashon pa Señor. E ta afligí i ami ta afligí tur ora ku un hende wòrdu herida. E ta yora, i nos tur ta yora pa kada persona ku a bira viktima di un abusu di kualke tipo. Esnan ku kometé e aktonan malu aki no ta solamente responsabel na e lèinan di hende pero lo enfrenta e ira di Dios Todopoderoso.
Ya pa siglonan, e Iglesia a tuma medidanan ekstensivo pa protehá—spesialmente—muchanan di abusu. Tin hopi yudansa den Iglesia awendia. Mi ta invitá boso pa studia nan. 4 E guianan aki tei pa protehá e inosente. Mi ta urgí kada un di nos pa ta alerta na kada ken ku kisas ta den peliger di ta abusá i pa aktua mesora pa protehé nan. E Salbador lo no tolerá abusu, i manera Su disípulonan, nos tampoko.
E atversario tin hopi taktikanan [ku ta] perturbá. Entre nan tin su esfuerso pa konfundí entre kiko ta bon i kiko no ta bon. E fluho di informashon disponibel na bo puntanan di dede, ironiamente, ta hasie mas difísil pa determiná kiko ta bèrdat.
E desafio aki kòrda mi di un eksperiensia ku Hermana Nelson i am ta tin ora nos a bishita un dignitario di un pais kaminda relativamente tiki hende a skucha di JesuCristo. E kerido amigu aki di edat tabata basta malu resientemente. E a konta nos ku durante su hopi dianan den kama, hopi biaha e ta wak na e plafònt i puntra, “Kiko ta bèrdat?”
Hopi na mundu awendia “ta keda tené for di e bèrdat pasó nan no sa unda pa hañ’é.”5 Algun lo laga nos kere ku e bèrdat ta relativo—ku kada persona mester determiná p’e mes kiko ta bèrdat. Un kreensia asinei ta un ilushon pa esnan ku eroneamente ta kere ku nan lo no wòrdu tené tambe responsabel dilanti di Dios.
Kerido rumannan, Dios ta e fuente di tur bèrdat. E Iglesia di JesuCristo di e Santunan di E Delaster Danan ta brasa tur bèrdat ku Dios ta duna na Su yunan, sea siñá den un laboratorio sientifiko òf pa medio di revelashon direkto for di DjE.
For di e pulpito aki awe i mañan, lo bo kontinuá na skucha e bèrdat. Por fabor tuma nota di pensamentunan ku ta kue bo atenshon i esnan ku ta bin den bo mente i keda den bo kurason. Ku orashon puntra Señor pa konfirmá ku loke bo a skucha ta bèrdat.
Mi ta stima boso, mi kerido rumannan. Ta mi orashon ku e konferensia aki lo proveé e bankete spiritual ku bo ta buskando. Den e nòmber sagrado di JesuCristo, amèn.