Illum
Il-profeta ħaj tagħna qed jagħmel il-parti tiegħu biex jimla d-dinja bil-Ktieb ta’ Mormon. Jeħtieġ li nimxu wara l-eżempju tiegħu.
Għeżież ħuti, fil-Ktieb ta’ Mormon il-frażi “illum”1 tintuża ripetutament biex tiġbdilna l-attenzjoni għal xi parir, wegħdiet, u tagħlim. Is-Sultan Benjamin, fl-aħħar diskors tiegħu, widdeb lin-nies, “Isimgħu l-kliem li se ngħidilkom illum; … iftħu widnejkom ħalli tisimgħu, u qalbkom ħalli tifhmu, u moħħkom ħalli l-misteri ta’ Alla jkunu jistgħu jiġu żvelati lilkom.”2 Il-konferenza ġenerali hija xenarju simili. Niġu hawn “illum,” biex nisimgħu pariri ħalli nkunu nisimgħu nkunu “leali f’kull ħin”3 lejn il-Mulej u l-evanġelju tiegħu. Ta’ importanza kbira għalija “illum” huwa t-tiġdid tal-impenn tagħna lejn il-Ktieb ta’ Mormon, li Joseph Smith sejjaħlu “l-aktar ktieb korrett fost il-kotba kollha fid-dinja.”4
F’idejja għandi kopja tal-Ktieb ta’ Mormon. Din hija edizzjoni vintage tal-1970, u hi mill-aktar prezzjuża għalija. Minn kif tidher hi kopja li ż-żmien jidher sew fuqha, iżda l-ebda ktieb ieħor mhu aktar importanti għal ħajti u għat-testimonjanza tiegħi. Meta qrajtu jien ksibt xhieda permezz tal-Ispirtu li Ġesù Kristu hu Iben Alla,5 li Hu s-Salvatur tiegħi,6 li din l-iskrittura hija l-kelma ta’ Alla,7 u li l-evanġelju ġie rrestawrat.8 Dawn il-veritajiet huma minsuġa fil-fond ta’ ruħi. Kif qal il-profeta Nefi, “Fil-ħwejjeġ tal-Mulej ruħi ssib is-serħan.”9
Xellug għal-lemin: Il-Presbiteru Ronald A. Rasband, missjunarju żagħżugħ; il-President Harold Wilkinson, president tal-Missjoni tal-Istati tal-Lvant; u l-Presbiteru Marion D. Hanks, Awtorità Ġenerali Sebgħin.
Din hi l-istorja wara dil-kopja. Meta kont għadni missjunarju żagħżugħ, jien ħadt il-parir tal-Presbiteru Marion D. Hanks, li ġie jżurna fil-Missjoni tal-Istati tal-Lvant. Huwa qabel kien president tal-Missjoni Brittanika, u llum tnejn mill-missjunarji tiegħu jinsabu hawn fuq quddiem: l-għeżież ħuti l-Presbiteru Jeffrey R. Holland u l-Presbiteru Quentin L. Cook.10 L-istess kif kien jagħmel mal-missjunarji tiegħu fl-Ingilterra, hu talabna biex naqraw kopja mhux immarkata tal-Ktieb ta’ Mormon mill-inqas darbtejn. Jiena aċċetajt li nagħmel dan. Fl-ewwel qari kelli nimmarka jew nagħmel linja taħt kull ħaġa li kienet tirreferi għal Ġesù Kristu jew tixhed dwaru. Jien użajt lapis aħmar u qtajt linja taħt bosta versi. It-tieni darba, il-Presbiteru Hanks qal biex nagħmlu enfasi fuq prinċipji u duttrina tal-evanġelju, u did-darba mmarkajt l-iskrittura bil-blu. Jiena qrajt il-Ktieb ta’ Mormon darbtejn, kif kien issuġġerixxa, u mbagħad darbtejn oħra fejn użajt l-isfar u l-iswed biex nimmarka l-aktar versi li laqtuni.11 Kif qed taraw, jiena inkludejt ħafna noti.
Il-qari tiegħi kien jinkludi ferm aktar milli sempliċiment nimmarka l-iskrittura. Kull darba li qrajt il-Ktieb ta’ Mormon, mill-bidu sal-aħħar, imtlejt b’imħabba profonda għall-Mulej. Ħassejt fija xhieda b’għeruq mill-aktar profondi tal-verità tat-tagħlim tiegħu u kif japplika għalina “illum.” Dan il-ktieb verament jirrifletti t-titlu tiegħu, “Testment ieħor ta’ Ġesù Kristu.”12 Permezz ta’ dak l-istudju u x-xhieda spiritwali li kont ksibt, jiena sirt missjunarju tal-Ktieb ta’ Mormon u dixxiplu ta’ Ġesù Kristu.13
“Illum,” wieħed mill-akbar missjunarji tal-Ktieb ta’ Mormon huwa l-President Russell M. Nelson. Meta kien għadu kif ġie msejjaħ Appostlu, huwa ta lekċer ġewwa Accra, il-Ghana.14 Jattendu għaliha kien hemm numru ta’ dinjitarji, fosthom sultan ta’ tribù Afrikan, li hu tkellem miegħu permezz ta’ interpretu. Is-sultan kien bniedem li jistudja bis-serjetà l-Bibbja u li kien iħobb lill-Mulej. Wara d-diskors tal-President Nelson, mar fuqu dak is-sultan u b’Ingliż perfett staqsieh, “Allura int min int?” Il-President Nelson spjegalu li kien ġie ordnat bħala Appostlu ta’ Ġesù Kristu.15 Is-sultan reġa’ staqsa, “X’ tista’ tgħallimni dwar Ġesù Kristu?”16
Il-President Nelson qabad f’idejh il-Ktieb ta’ Mormon u fetħu fil-ktieb ta’ 3 Nephi 11. Il-President Nelson u s-sultan qraw flimkien id-diskors tas-Salvatur lin-Nefiti: “Araw, jiena Ġesù Kristu, li dwari l-profeti xehdu li kelli niġi fid-dinja. … Jiena d-dawl u l-ħajja tad-dinja.”17
Il-President Nelson ippreżenta dik il-kopja tal-Ktieb ta’ Mormon lis-sultan, u s-sultan wieġeb, “Inti stajt tajtni d-djamanti jew ir-rubini, iżda xejn mhu aktar prezzjuż għalija minn dan l-għarfien addizzjonali dwar il-Mulej Ġesù Kristu.”18
Dan mhuwiex eżempju iżolat ta’ kif il-maħbub profeta tagħna jaqsam ma’ ħaddieħor il-Ktieb ta’ Mormon. Huwa ta kopji tal-Ktieb ta’ Mormon lil mijiet ta’ nies, fejn dejjem jaqsam ix-xhieda tiegħu ta’ Ġesù Kristu. Meta l-President Nelson jiltaqa’ ma’ mistednin, presidenti, slaten, kapijiet ta’ stat, u mexxejja ta’ negozju u organizzazzjonijiet u ta’ twemmin varju, kemm jekk fil-kwartieri ewlenin tal-Knisja jew fil-postijiet tagħhom, hu jippreżentalhom b’qima dan il-ktieb ta’ skrittura żvelata. Hu jista’ jagħtihom tant affarijiet imgeżwra fiż-żigarelli li jafu jispiċċaw fuq xi mejda jew skrivanija jew f’xi armarju bħala tifkira tal-lagħqa li kellhom miegħu. Minflok, hu jagħti dak li hu l-aktar prezzjuż għalih, ferm aktar mir-rubini u d-djamanti, kif iddeskriva s-sultan tat-tribù.
“Il-veritajiet tal-ktieb ta’ Mormon,” qal il-President Nelson, “għandhom il-qawwa li jfejqu, ifarrġu, jirrestawraw, jgħinu, jikkonslaw, u jferrħu l-erwieħ.”19 Jiena rajt b’għajnejja dawn il-kopji tal-Ktieb ta’ Mormon jgħaddu f’idejn dawk li rċevewhom mingħand il-profeta tagħna li huwa l-profeta ta’ Alla. Ma jistax ikun hemm rigal akbar minn hekk.
M’ilux huwa ltaqa’ mal-mara tal-president tal-Gambja fl-uffiċċju tiegħu u b’umiltà taha kopja tal-Ktieb ta’ Mormon. Huwa ma waqafx hemm. Huwa fetaħ il-paġni tiegħu biex jaqralha minnu, biex jgħallem u jixhed dwar Ġesù Kristu, l-Espjazzjoni tiegħu, u l-imħabba tiegħu lejn l-ulied kollha ta’ Alla—kullimkien.
Il-profeta ħaj tagħna qed jagħmel il-parti tiegħu biex jimla d-dinja bil-Ktieb ta’ Mormon.20 Iżda huwa ma jistax jagħmel dan waħdu. Jeħtieġ li nimxu wara l-eżempju tiegħu.
Ispirat permezz tal-eżempju tiegħu, jiena ilni nipprova b’umiltà u b’mod aktar ferventi naqsam il-Ktieb ta’ Mormon ma’ ħaddieħor.
M’ilux kont fuq essajnment fil-Mozambique. Iċ-ċittadini ta’ dan il-pajjiż sabiħ qed ibatu ferm minħabba faqar, problemi ta’ saħħa, qgħad, maltemp, u taqlib politiku. Jien kelli l-unur li niltaqa’ mal-president tal-pajjiż, Filipe Nyusi. Skont ix-xewqa tiegħu, jiena tlabt għalih u għal ġensu; għidtlu li konna qed nibnu tempju ta’ Ġesù Kristu21 f’pajjiżu. Fi tmiem il-laqgħa tagħna, jien ippreżentajtlu kopja tal-Ktieb ta’ Mormon bil-Portugiż, il-lingwa nattiva tiegħu. Hekk kif bi gratitudni huwa aċċetta l-ktieb, jiena qsamt miegħu ix-xhieda tiegħi dwar it-tama u l-wegħda għall-poplu tiegħu, li nsibuha permezz ta’ kliem il-Mulej fil-paġni tiegħu.22
F’okkażjoni oħra, jien u marti, Melanie ltqajna mar-Re Lestie III ta’ Lesotho u l-mara tiegħu fid-dar tagħhom.23 Għalina, il-qofol taż-żjara tagħna kien meta ppreżentajnielhom kopja tal-Ktieb ta’ Mormon u wara qsamna t-testimonjanza tagħna. Meta nħares lura lejn dik l-esperjenza u oħrajn, jiġi f’moħħi vers minn skrittura tal-aħħar żmien: “Il-milja tal-evanġelju tiegħi tiġi mxandra mid-dgħajfin u s-sempliċi sa truf id-dinja, u quddiem is-slaten u l-mexxejja.”24
Jiena qsamt kopji tal-Ktieb ta’ Mormon mal-Ambaxxatur tal-Indja għall-Ġnus Magħquda, l-Ambaxxatur Pandey26; mal-Qdusija Tiegħu il-Patrijarka Bartholomew26 tal-Knisja Ortodossa tal-Lvant; u ma’ ħafna oħrajn. Ħassejt magħna l-Ispirtu tal-Mulej hekk kif personalment għaddejtilhom din “il-ġebla ewlenija tar-reliġjon tagħna”27 u qsamt magħhom ix-xhieda tiegħi ta’ Ġesù Kristu, il-ġebla tax-xewka tal-fidi tagħna.28
Issa, ħuti, m’hemmx għalfejn li intom tmorru l-Mozambique jew l-Indja jew tiltaqgħu mas-slaten jew mexxejja biex tagħtu lil xi ħadd dan il-ktieb ta’ tagħlim u wegħdiet sagri. Nistedinkom, illum, biex tagħtu Ktieb ta’ Mormon li ħbieb u lil familja tagħkom, lill-kollegi tagħkom fuq ix-xogħol, lill-kowċ tal-futbol tagħkom, jew lill-persuna li tixtru mingħandha fis-suq. Huma jeħtieġu l-kliem tal-Mulej li jinsab f’dan il-ktieb. Huma jeħtieġu tweġibiet għall-mistoqsijiet tal-ħajja ta’ kuljum u tal-ħajja ta’ dejjem li għad trid tiġi. Huma jeħtieġu jkunu jafu dwar it-triq tal-patt li ġiet imfassla għalihom dwar l-imħabba kontinwa tal-Mulej għalihom. Insibu dan kollu fil-Ktieb ta’ Mormon.
Meta tgħaddilhom kopja tal-Ktieb ta’ Mormon tkun qed tiftħilhom moħħhom u qalbhom għall-kelma ta’ Alla. M’hemmx għalfejn toqgħod iżżomm fuqek kopji stampati tal-ktieb. Tistgħu faċilement tixxerjawh mill-mowbajl tagħkom mis-sezzjoni tal-iskrittura tal-app Librerija tal-Evanġelju.29
Aħsbu dwar dawk kollha li jistgħu jitbierku permezz tal-evanġelju f’ħajjithom, u mbagħad ibgħatulhom kopja tal-Ktieb ta’ Mormon mill-mowbajl tagħkom. Araw li tinkludu t-testimonjanza tagħkom u kif dan il-ktieb bierek ħajjitkom.
Għeżież ħbieb tiegħi, bħala Appostlu tal-Mulej, nistedinkom biex timxu wara l-maħbub profeta tagħna, il-President Nelson, ħalli nimlew id-dinja bil-Ktieb ta’ Mormon. Il-ħtieġa hija kbira wisq; jeħtieġ naġixxu issa. Inwegħidkom li intom tkunu qed tieħdu sehem “fl-akbar ħidma fuq l-art,” il-ġabra ta’ Iżrael”30 hekk kif tkunu ispirati biex tilħqu lil dawk li “inżammu ’l bogħod mill-verità għax ma jafux fejn għandhom isibuha.”31 Huma jeħtieġu t-testimonjanza u x-xhieda tagħkom ta’ kif dan il-ktieb biddel ħajjitkom u ressaqkom aktar qrib Alla,32 u “l-bxara ta’ ferħ kbir” tiegħu.33
Jiena nixhed li permezz ta’ pjan divin il-Ktieb ta’ Mormon ġie mħejji fl-Amerka tal-qedem biex jinġieb għad-dawl ħalli jiddikjara l-kelma ta’ Alla, biex iressaq l-erwieħ lejn il-Mulej Ġesù Kristu u l-evanġelju rrestawrat tiegħu “illum.” F’isem Ġesù Kristu, ammen.