U Fittxew Li Jaraw Min Kien Ġesù
Jiena nixhed li Ġesù jgħix, li Hu jafna, u li Hu għandu l-qawwa li jfejjaq, li jittrasforma, u li jaħfer.
Ħuti, u ħbieb, fl-2013 jien u marti, Laurel, konna msejħin biex inservu bħala mexxejja tal-missjoni fil-Missjoni Ċeka Slovakkla. L-erba’ wlied tagħna servew magħna. 1 Aħna konna mberkin bħala familja b’missjunarji brillanti u bil-Qaddisin meraviljużi, Ċeki u Slovakki. Aħna nħobbuhom.
Hekk kif jien u l-familja dħalna fl-għalqa tal-missjoni, xi ħaġa li l-Presbiteru Wirthlin kien għallimna kienet qed takkumpanjana. F’diskors imsemmi “Il-Kbir Kmandament” il-Presbiteru Wirthlin staqsa, “Intom tħobbuh lill-Mulej?” Il-parir tiegħu lil dawk fostna li konna lesti nwieġbu “iva” kien wieħed sempliċi u profond: “Qattgħu ħin miegħu. Immeditataw dwar kliemu. Ħudu l-madmad tiegħu fuqkom. Fittxu li tifhmu u tobdu.”2 Il-Presbiteru Wirthlin imbagħad wiegħed barkiet trasformattivi lil dawk lesti jiddedikaw ħin u post għal Ġesù Kristu.3
Aħna ħadna l-parir u l-wegħda tal-Presbiteru Wirthlin b’serjetà kbira. Flimkien mal-missjunarji tagħna, aħna qattajna aktar żmien ma’ Ġesù hekk kif studjajna lil Mattew, Mark, Luqa, u Ġwanni mit-Testment il-Ġdid u 3 Nefi mill-Ktieb ta’ Mormon. Fi tmiem ta’ kull konferenza taż-żona, kunsill tat-tmexxija, jew laqgħa tad-distrett, aħna sibna rwieħna lura għal dawk li konna nirreferu għalihom bħala l- “Ħames Evanġelji”4 li fihom qrajna, iddiskutejna, ikkunsidrajna, u tgħallimna dwar Ġesù.
Għalija, għal Laurel, u għall-missjunarji tagħna, li nqattgħu l-ħin ma’ Ġesù fl-iskrittura biddel kollox. Aħna ksibna apprezzament iktar profond ta’ dak li Hu kien, u ta’ dak li kien importanti għalih. Aħna kkonsidrajna kif kien jgħallem, x’kien jgħallem, il-modi li bihom wera l-imħabba, dak li għamel biex ibierek u jservi, il-mirakli tiegħu, x’kien ir-rispons tiegħu għat-tradiment, kif aġixxa fejn jidħlu emozzjonijiet umani mill-aktar diffiċli, it-titli u l-ismijiet tiegħu, kif kien jisma’, kif kien isolvi konflitt, id-dinja li għex fiha, il-parabboli tiegħu, kif kien iħeġġeġ l-għaqda u l-ġentilezza, il-kapaċità tiegħu li jaħfer u jfejjaq, il-priedki tiegħu, it-talb tiegħu, is-sagrifiċċju espjatorju tiegħu, il-Qawmien tiegħu mill-Imwiet, l-evanġelju tiegħu.
Kemm-il darba ħassejna nfusa bħal Żakkew, ir-“raġel qasir”, jiġri u jixxabbat ma’ siġra tat-tin selvaġġ meta Ġesù għadda minn Ġeriko għaliex, kif iddeskrivieha Luqa, aħna “nfittxu biex naraw min kien Ġesù.”5 Ma kienx Ġesù kif aħna ridnieh jew xtaqnieh ikun, iżda pjuttost Ġesù kif realment kien u hu.6 Eżatt kif kien wiegħed il-Presbiteru Wirthlin, aħna tgħallimna b’mod reali ħafna li “l-evanġelju ta’ Ġesù Kristu huwa evanġelju ta’ trasformazzjoni. Jeħodna bħala rġiel u nisa tad-dinja u jirfinana bħala rġiel u nisa għall-eternitajiet.”7
Dawk kienu ġranet speċjali. Fl-aħħar tgħallimna li “ma’ Alla xejn mhu se jkun impossibbli.”8 Il-memorji ta’ sigħat sagri wara nofsinhar fi Praga, Bratislava, jew Brno, flimkien bħala missjoni, nikkonsidraw u nesperjenzaw il-qawwa u r-realtà ta’ Ġesù, jibqgħu jidwu fil-ħajja tagħna lkoll.
Spiss studjajna l-Mark 2:1–12. Il-ġrajja ma tistax ma tqanqlekx. Irrid naqra parti minna direttament minn Mark, imbagħad nixxerja kif sirt nifhimha wara studju u diskussjoni komprensivi mal-missjunarji tagħna u oħrajn.9
“Meta wara xi ġranet [Ġesù] daħal Kafarnahum; in-nies semgħet li kien id-dar.
“U nġabru bosta, hekk li ma kienx hemm fejn joqogħdu iżjed, anqas quddiem il-bieb. U qagħad ixandrilhom il-kelma.
“U marru ħadulu quddiemu wieħed mifluġ, merfugħ minn erbgħa min-nies.
“Billi ma setgħux jersqu sa ħdejh minħabba l-kotra, qalgħu s-saqaf ta’ fuqu, fetħu toqba, u niżżlu minnha l-friex li fuqu kien mimdud il-mifluġ.
“Meta ra l-fidi tagħhom, Ġesù qal lill-mifluġ, Ibni, dnubietek maħfura.”
Wara li jkellem lil xi wħud mill-folla,10 Ġesù jħares lejn ir-raġel mifluġ u jfejqu fiżikament, hekk kif jgħidlu:
“Qum, qiegħed ngħidlek, aqbad friexek u mur lejn darek.
“Dak qam, qabad malajr friexu, u ħareġ ’il barra quddiem kulħadd. U kulħadd stagħġeb, u bdew ifaħħru lil Alla u jgħidu, Ħwejjeġ bħal dawn qatt ma rajniehom.”11
Issa l-istorja kif jien wasalt biex nifhimha: Kmieni fil-ministeru tiegħu, Ġesù rritorna lejn Kafarnahum, villaġġ żgħir tas-sajjieda fix-xatt tat-tramuntana tal-Baħar tal-Galilija.12 Hu kien għadu kemm wettaq sensiela ta’ mirakli billi jfejjaq il-morda u keċċa l-ispirti l-ħżiena.13 Ir-raħħala, anzjużi biex jisimgħu u jesperjenzaw lil dan ir-raġel jismu Ġesù, inġabru fid-dar fejn, skont ma xterdet l-aħbar, kien qed joqgħod.14 Kif għamlu dan, Ġesù beda jgħallem.15
F’dak iż-żmien, id-djar ta’ Kafarnahum kellhom is-saqaf ċatt u jikkonsistu f’sular wieħed, waħda ħdejn l-oħra.16 Is-saqaf u l-ħitan kienu taħlita ta’ ġebel, injam, tafal, u tiben, u l-aċċess kien b’taraġ sempliċi fil-ġenb tad-dar.17 Il-folla kibret malajr fid-dar, u mliet il-kamra fejn Ġesù kien qed jgħallem, u n-nies inġabret anki barra fit-triq.18
L-istorja tiffoka fuq raġel “mifluġ” u l-erba’ ħbieb tiegħu.19 Li tkun mifluġ kienet forma ta’ paraliżi, spiss akkumpanjata minn dgħufija ta’ saħħa u rogħda.20 Jien nimmaġina wieħed minn dawk l-erbgħa jgħid lill-oħrajn, “Ġesù qiegħed hawn fil-villaġġ tagħna. Ilkoll nafu dwar il-mirakli li wettaq u lil dawk li fejjaq. Kieku nistgħu jaħasra nieħdu lil seħibna għand Ġesù, forsi anki hu jista’ jikseb saħħtu.”
Għalhekk kull wieħed minnhom jieħu rokna mill-friex jew is-sodda ta’ ħabibhom u jibdew iġorruh mit-toroq imserrpin, dojoq u mtarbin ta’ Kafarnahum.21 B’idejhom u saqajhom kważi ma jifilħux iżjed, l-erbgħa rġiel fl-aħħar iduru mal-aħħar kantuniera u jsibu folla sħiħa jew, kif l-iskrittura ssejħilha, il-“kotra” ta’ nies miġbura biex tisma’ hija tant kbira li kien impossibbli li jaslu għand Ġesù.22 B’imħabba u fidi, l-erbat irġiel ma jaqtgħux qalbhom. Minflok, huma b’xi mod jitilgħu t-taraġ li jagħti għall-bejt, u bir-reqqa jqandlu lil seħibhom u l-friex tiegħu, jiftħu l-bejt jew is-saqaf tal-kamra fejn Ġesù qed jgħallem, u jniżżlu lil seħibhom.23
Immaġinaw kif f’nofs xi mument ta’ tagħlim serju, Ġesù jisma’ ħoss ta’ grif, iħares ’il fuq, u jara ħofra fis-saqaf, li bdiet tikber iktar ma beda jaqa’ trab u tiben ġol-kamra. Raġel mifluġ fuq friexu mbagħad jitniżżel fil-kamra. Ta’ min wieħed jinnota li Ġesù jintebaħ li din mhix interruzzjoni iżda aktarx xi ħaġa ta’ importanza. Huwa jħares lejn ir-raġel fuq il-friex, jaħfirlu dnubietu pubblikament, u jfejqu fiżikament.24
B’dak ir-rakkont ta’ Mark 2 f’moħħna, bosta veritajiet importanti joħorġu ċari dwar Ġesù bħala l-Kristu. L-ewwel nett, meta aħna nippruvaw ngħinu lil xi ħadd li nħobbu jersaq lejn Kristu, aħna nistgħu nagħmlu dan bil-kunfidenza li Huwa għandu l-kapaċità li jerfa’ t-toqol tad-dnub u li jaħfer. It-tieni nett, meta nġibu għand Kristu mard fiżiku, emozzjonali, u mard ieħor, nistgħu nagħmlu dan bl-għarfien li Hu għandu l-qawwa li jfejjaq u jfarraġ. It-tielet nett, meta nagħmlu sforz bħal dawk l-erbgħa li nieħdu li xi ħaddieħor għand Kristu, nistgħu nagħmlu dan b’ċertezza li Hu se jara l-intenzjonijiet vera tagħna u li se jonorahom kif xieraq.
Ftakru, it-tagħlim ta’ Kristu kien imfixkel bid-dehra ta’ toqba fis-saqaf. Lil dawk l-erbgħa, minflok ċanfarhom jew keċċiehom talli interrompewh, l-iskrittura tgħidilna li “Ġesù ra l-fidi tagħhom”.25 Dawk li kienu xhieda tal-miraklu mbagħad “beżgħu u qabdu jfaħħru lil Alla li ta setgħa bħal din.”26
Ħuti, ħa nagħlaq b’żewġ osservazzjonijiet addizzjonali. Sew bħala missjunarji, ministri, presidenti tas-Soċjetà tal-Għajnuna, isqfijiet, għalliema, ġenituri, aħwa, jew ħbieb, aħna lkoll aħna impenjati bħala Qaddisin tal-Aħħar Żmien fil-ħidma li nressqu lil ħaddieħor lejn Kristu. Għalhekk, il-kwalitajiet murija mill-erba’ ħbieb ta’ min wieħed jikkunsidrahom u jimitahom.27 Huma kuraġġużi, adattivi, reżiljenti, kreattivi, versatili, mimlijin tama, determinati, fidili, ottimisti, umli, u paċenzjużi.
Barra minn hekk, l-erba’ ħbieb jenfasizzaw l-importanza spiritwali tal-komunità u s-soċjabiltà.28 Sabiex iġibu lil seħibhom għand Kristu, kull wieħed minn dawk l-erbgħa kellu jġorr rokna tal-friex. Jekk wieħed jerħi rokna, l-affarjiet jikkumplikaw. Jekk tnejn jabbandunaw l-attentat, il-biċċa tax-xogħol tispiċċa effettivament impossibbli. Ilkoll kemm aħna għandna rwol xi nwettqu fis-saltna ta’ Iżrael.29 Hekk kif nidħlu f’dak l-irwol u nagħmlu l-parti tagħna, inkunu qed inġorru r-rokna tagħna. Sew jekk fl-Arġentina jew fil-Vjetnam, f’Accra jew Brisbane, f’fergħa jew f’qasam, bħala familja jew bħal sħubija missjunarja, kull wieħed u waħda minna għandna rokna x’inġorru. Hekk kif u jekk nagħmlu dan, il-Mulej iberikna lkoll. Bħalma ra l-fidi tagħhom, l-istess jara tagħna u jberikna bħala poplu.
Fi żminijiet differenti f’ħajti, jien ippruvajt inżomm ir-rokna tiegħi, u drabi oħra kont jien li qed ninġarr. Parti mill-qawwa ta’ din l-istorja impressjonanti ta’ Ġesù hija li propju tfakkarna kemm għandna bżonn lil xulxin, bħala aħwa, biex nersqu lejn Kristu u niġu ttrasformati.
Dawn huma ftit mill-affarjiet li jien tgħallimt mill-ħin li qattajt ma’ Kristu f’ Mark 2.
“Jalla li Alla jagħtina l-ħila li [nerfgħu r-rokna tagħna], li ma naħslux idejna, li ma nibżgħux, iżda li nkunu qawwija fil-fidi tagħna, u determinati fil-ħidma tagħna, li nwettqu l-għanijiet tal-Mulej.”30
Jiena nixhed li Ġesù jgħix, li Hu jafna, u li Hu għandu l-qawwa li jfejjaq, li jittrasforma, u li jaħfer. F’isem Ġesù Kristu, ammen.