ប៉ុន្តែពួកយើងឥតយកចិត្តទុកដាក់ដល់គេឡើយ

ដោយអែលឌើរ ដេវីឌ អេ បែដណា

ក្នុងកូរ៉ុមនៃពួកសាវកដប់ពីរនាក់

សេចក្ដីសញ្ញា និងពិធីបរិសុទ្ធរបស់យើងចង្អុលបង្ហាញ និងជួយយើងឲ្យចងចាំទំនាក់ទំនងរបស់យើងជាមួយនឹងព្រះអម្ចាស់យេស៊ូវគ្រីស្ទជានិច្ច កាលដែលយើងរីកចម្រើននៅតាមផ្លូវនៃសេចក្ដីសញ្ញា ។

ភរិយាខ្ញុំ ស៊ូសាន កូនប្រុសទាំងបីរបស់យើង និងភរិយាពួកគេ ចៅៗរបស់យើង និង អែលឌើរ ឃ្វីនថិន អិល ឃុក ដែលអង្គុយនៅជិតខ្ញុំក្នុងកូរ៉ុមនៃពួកសាវកដប់ពីរនាក់ ជិត ១៥ ឆ្នាំ យល់ស្របថា ខ្ញុំច្រៀងមិនពិរោះទេ ។ ប៉ុន្តែ ទោះខ្ញុំមិនប្រសប់ច្រៀងក៏ដោយ ក៏ខ្ញុំចូលចិត្តច្រៀងទំនុកតម្កើងអំពីការស្ដារឡើងវិញដែរ ។ ពេលទំនុកច្រៀងដ៏បំផុសគំនិត និងបទភ្លេងដ៏រុងរឿងដាក់បញ្ចូលគ្នា វាជួយខ្ញុំឲ្យរៀនអំពីគោលការណ៍ដំណឹងល្អសំខាន់ៗ ហើយវារំជួលដល់ព្រលឹងខ្ញុំ ។

ទំនុកតម្កើងមួយ ដែលបានប្រទានពរដល់ជីវិតខ្ញុំដ៏អស្ចារ្យ គឺ « ចូរយើងខិតខំទៅ » ។ ថ្មីៗនេះខ្ញុំបានពិចារណា និងរៀនអំពីឃ្លាជាក់លាក់មួយនៅក្នុងបទបន្ទរនៃទំនុកតម្កើងនោះ ។ « យើងនឹងមិនស្តាប់ តាមសម្តីពួកទុច្ចរិតថា តែយើងនឹងគោរពតែព្រះប៉ុណ្ណោះ » ។^១

យើងនឹងមិនស្តាប់ ។

ពេលខ្ញុំច្រៀងបទ « ចូរយើងខិតខំទៅ » ជាញឹកញាប់ខ្ញុំគិតអំពីប្រជាជននៅក្នុងការនិមិត្តរបស់លីហៃ ដែលកំពុងតែប្រជ្រៀតទៅមុខនៅលើផ្លូវ ដែលនាំទៅកាន់ដើមជីវិត ដែលមិនគ្រាន់តែ « ដើរសួតាមដំបងដែក »^២ប៉ុណ្ណោះទេ តែថែមទាំង « កាន់ដំបងដែកយ៉ាងខ្ជាប់ជានិច្ច រហូតដល់ពួកគេបានមកដល់ ហើយដួលចុះ ហើយបរិភោគផ្លែឈើនោះទៅ » ។^៣ លីហៃបានពិពណ៌នាអំពីហ្វូងមនុស្សនៅក្នុងអគារដ៏ធំ ហើយទូលាយ ដែលកំពុង « ចង្អុលមើលងាយដល់ [ លោក ] និងពួកអ្នកដែលបរិភោគផ្លែឈើផងនោះ » ។^៤ ការឆ្លើយតបរបស់លោកចំពោះការចំអក និងការប្រមាថនោះ គឺអស្ចារ្យ និងមិនអាចបំភ្លេចបាន« ប៉ុន្តែពួកយើងឥតយកចិត្តទុកដាក់ដល់គេឡើយ »⁵ ។

ខ្ញុំអធិស្ឋានថា ព្រះវិញ្ញាណបរិសុទ្ធនឹងប្រទានពរ ហើយបំភ្លឺយើងម្នាក់ៗ ពេលយើងពិចារណាជាមួយគ្នា អំពីរបៀបដែលយើងអាចរឹងមាំ « មិនស្ដាប់ »ឥទ្ធិពលអាក្រក់ៗ និងសំឡេងចំអករបស់ពិភពសហសម័យដែលយើងកំពុងរស់នៅនេះ ។

មិនស្ដាប់

ពាក្យថា ស្ដាប់ សំដៅដល់ការកត់សម្គាល់ ឬយកចិត្តទុកដាក់ទៅលើនរណាម្នាក់ ឬអ្វីមួយ ។ ហេតុនេះ ទំនុកច្រៀងបទ « ចូរយើងខិតខំទៅ » ដាស់តឿនយើងឲ្យធ្វើការសម្រេចចិត្តដ៏ជាក់ថា កុំឲ្យយកចិត្តទុកដាក់ទៅលើ « សម្តីពួកទុច្ចរិតថា » ឡើយ ។ លីហៃ និងប្រជាជន ដែលកំពុងទទួលទានផ្លៃនៃដើមនោះ គឺជាគំរូដ៏រឹងមាំមួយអំពីការមិនយកចិត្តទុកដាក់ទៅលើការចំអក និងការមើលងាយជាញឹកញាប់មកពីអគារដ៏ធំ ហើយទូលាយនោះ ។

គោលលទ្ធិនៃព្រះគ្រីស្ទដែលកត់ត្រា « នឹងព្រះវិញ្ញាណនៃព្រះដ៏មានព្រះជន្មរស់ … ក្នុង [ ចិត្ត ] ខាងសាច់ឈាមរបស់យើង »^៦ ចម្រើនសមត្ថភាពយើង« មិនឲ្យស្ដាប់ » ការរំខាន ការឡកឡឺយ និងការបន្លែបន្លំជាច្រើន នៅក្នុងពិភពលោកដ៏ធ្លាក់ចុះរបស់យើងនេះ ។ ឧទាហរណ៍ សេចក្ដីជំនឿដែលផ្ដោតទៅលើព្រះអម្ចាស់ព្រះយេស៊ូវគ្រីស្ទ ជួយបង្កើនកម្លាំងខាងវិញ្ញាណយើង ។ សេចក្តីជំនឿលើព្រះអង្គសង្គ្រោះ គឺជាគោលការណ៍សកម្មភាព និងអំណាច ។ ពេលយើងប្រព្រឹត្តតាមសេចក្ដីពិតនៃដំណឹងល្អរបស់ទ្រង់ នោះយើងត្រូវបានប្រទានពរឲ្យមានសមត្ថភាពខាងវិញ្ញាណ ដើម្បីប្រជ្រៀតទៅមុខ ឆ្លងកាត់ឧបសគ្គទាំងឡាយនៃជីវិតរមែងស្លាប់ ខណៈកំពុងផ្ដោតលើអំណរដែលព្រះអង្គសង្គ្រោះប្រទានដល់យើង ។ ពិតណាស់ « បើយើងធ្វើត្រឹមត្រូវ នោះយើងមិនត្រូវខ្លាចអ្វីឡើយ ដ្បិតព្រះអង្គជាជំនួយទ្រង់នឹងគង់នៅជិតស្ថិតស្ថេរ » ។^៧

ទំនាក់ទំនងផ្ទាល់ខ្លួនតាមរយៈសេចក្តីសញ្ញា

ការចូលក្នុងសេចក្ដីសញ្ញាដ៏ពិសិដ្ឋ និងការទទួលពិធីបរិសុទ្ធនៃបព្វជិតភាពដោយស័ក្ដិសម ជួយទឹម និងចងភ្ជាប់យើងទៅនឹងព្រះអម្ចាស់យេស៊ូវគ្រីស្ទ និងព្រះវរបិតាសួគ៌ ។^៨ នេះមានន័យថា យើងទុកចិត្តលើព្រះអង្គសង្គ្រោះថាជាព្រះគាំទ្រ^៩និងជាអ្នកកណ្ដាល^១០របស់យើង ហើយពឹងផ្អែកទៅលើគុណបុណ្យ សេចក្ដីមេត្តាករុណា និងព្រះគុណទ្រង់^១១ក្នុងដំណើរជីវិតនេះ ។ ពេលយើងខ្ជាប់ខ្ជួនក្នុងការមកកាន់ព្រះគ្រីស្ទ ហើយចូលនឹមនឹងទ្រង់ នោះយើងទទួលបានការសម្អាត ការព្យាបាល និងពរជ័យនៃភាពរឹងមាំមកពីដង្វាយធួនដ៏គ្មានទីបំផុត និងអស់កល្បរបស់ទ្រង់ ។^១២

ការរស់នៅតាម និងការស្រឡាញ់ការតាំងចិត្តចំពោះសេចក្ដីសញ្ញា បង្កើតទំនាក់ទំនងមួយជាមួយព្រះអម្ចាស់ ដែលជាឥទ្ធិពលផ្ទាល់ខ្លួន និងខាងវិញ្ញាណដ៏ជ្រាលជ្រៅ ។ ពេលយើងគោរពតាមលក្ខខណ្ឌនៃសេចក្ដីសញ្ញា និងពិធីបរិសុទ្ធដ៏ពិសិដ្ឋ នោះយើងខិតកាន់តែជិតទ្រង់បន្តិចម្ដងៗ^១៣ ហើយដកពិសោធន៍ក្នុងជីវិតរបស់យើងនូវឥទ្ធិពលនៃទេវភាព និងភាពពិតនៃការមានព្រះជន្មរស់របស់ទ្រង់ ។ បន្ទាប់មក ព្រះយេស៊ូវគ្រីស្ទ កាន់តែប្រែក្លាយជាតួអង្គដ៏សំខាន់ជាងនៅក្នុងដំណើររឿងនៃព្រះគម្ពីរទៅទៀត ហើយគំរូ និងការបង្រៀនរបស់ទ្រង់ជះឥទ្ធិពលលើគ្រប់បំណងប្រាថ្នា គំនិត និងសកម្មភាពរបស់យើង ។

និយាយឲ្យចំទៅ ខ្ញុំពុំមានសមត្ថភាពពិពណ៌នាគ្រប់គ្រាន់អំពីលក្ខណៈ និងអំណាចជាក់លាក់នៃទំនាក់ទំនងនៃសេចក្ដីសញ្ញារបស់យើង ទៅនឹងព្រះរាជបុត្រានៃព្រះ ដ៏មានព្រះជន្មរស់ឡើងវិញ និងដែលមានព្រះជន្មរស់នៅនោះទេ ។ ប៉ុន្តែខ្ញុំសូមធ្វើជាសាក្សីថា ទំនាក់ទំនងជាមួយទ្រង់ និងព្រះវរបិតាសួគ៌គឺមានពិត ហើយជាប្រភពដ៏សំខាន់នៃការធានាអះអាង ភាពសុខសាន្ត អំណរ និងកម្លាំងខាងវិញ្ញាណ ដែលធ្វើឲ្យយើង « កុំខ្លាច ទោះជាខ្មាំងសត្រូវចំអក » ។^១៤ ក្នុងនាមជាសិស្សដែលធ្វើសេចក្ដីសញ្ញា និងរក្សាសេចក្ដីសញ្ញារបស់ព្រះយេស៊ូវគ្រីស្ទ យើងអាចត្រូវប្រទានពរឲ្យមាន « ភាពក្លាហាន ព្រោះព្រះអម្ចាស់នៅខាងយើង »^១៥ ហើយកុំឲ្យយកចិត្តទុកដាក់ទៅលើឥទ្ធិពលអាក្រក់ និងការចំអកខាងលោកិយឡើយ ។

ពេលខ្ញុំជួបនឹងសមាជិកសាសនាចក្រនៅជុំវិញពិភពលោក ជាញឹកញាប់ខ្ញុំសួរពួកគេនូវសំនួរនេះ ៖ តើមានអ្វីខ្លះដែលជួយបងប្អូន « មិនឲ្យស្ដាប់ » តាមឥទ្ធិពល ការចំអក និងការមើលងាយខាងលោកិយ ? ចម្លើយរបស់ពួកគេគឺរៀបរាប់បានល្អបំផុត ។

ជាញឹកញាប់ សមាជិកដ៏ក្លាហានគូសបញ្ជាក់ពីសារៈសំខាន់នៃការអញ្ជើញព្រះចេស្ដានៃព្រះវិញ្ញាណបរិសុទ្ធមកក្នុងជីវិតពួកគេ តាមរយៈការសិក្សាព្រះគម្ពីរប្រកបដោយអត្ថន័យ ការអធិស្ឋានដ៏ក្លៀវក្លា និងការរៀបចំខ្លួនត្រឹមត្រូវដើម្បីចូលរួមក្នុងពិធីបរិសុទ្ធនៃសាក្រាម៉ង់ ។ អ្វីដែលបានលើកឡើងជាញឹកញាប់ដែរនោះគឺ ការគាំទ្រខាងវិញ្ញាណមកពីសមាជិកគ្រួសារដ៏ស្មោះត្រង់ និងមិត្តភក្ដិជាទីទុកចិត្ត មេរៀនសំខាន់ៗដែលបានរៀនមកពីការងារបម្រើ និងការបម្រើនៅក្នុងសាសនាចក្រដែលបានស្ដារឡើងវិញរបស់ព្រះអម្ចាស់ និងសមត្ថភាពដើម្បីញែកដឹងអំពីភាពគ្មានន័យនៃអ្វីៗដែលមាននៅក្នុងអគារ និងដែលចេញមកពីអគារដ៏ធំ ហើយទូលាយនោះ ។

ខ្ញុំបានកត់សម្គាល់ទៅលើចម្លើយរបស់សមាជិកទាំងនេះនូវគំរូជាក់លាក់មួយ ដែលសំខាន់ជាពិសេស ។ ជាដំបូង និងសំខាន់បំផុតនោះគឺ ពួកសិស្សទាំងនេះមានទីបន្ទាល់ដ៏រឹងមាំអំពីផែនការនៃសុភមង្គលរបស់ព្រះវរបិតាសួគ៌ និងតួនាទីនៃព្រះយេស៊ូវគ្រីស្ទ ជាព្រះអង្គប្រោសលោះ និងព្រះអង្គសង្គ្រោះរបស់យើង ។ ហើយទីពីរគឺ ចំណេះដឹង និងការជឿជាក់ខាងវិញ្ញាណរបស់ពួកគេគឺ មានដាច់ដោយឡែកៗពីគ្នា ផ្ទាល់ខ្លួន និងជាក់លាក់ វាពុំទូទៅ ហើយអរូបី ។ ខ្ញុំស្ដាប់មនុស្សលះបង់ទាំងនេះ និយាយអំពីសេចក្ដីសញ្ញាដែលផ្ដល់កម្លាំង ដើម្បីយកឈ្នះលើការផ្ទុយ និងទំនាក់ទំនងរបស់ពួកគេជាមួយនឹងព្រះអម្ចាស់ដែលមានព្រះជន្មនៅរស់ ដែលគាំទ្រពួកគេឆ្លងកាត់ទាំងគ្រាល្អ និងគ្រាអាក្រក់ ។ ចំពោះបុគ្គលទាំងនេះ ព្រះយេស៊ូវគ្រីស្ទគឺពិតជាព្រះអង្គសង្គ្រោះផ្ទាល់ខ្លួនរបស់ពួកគេ ។

រូបភាព

ត្រីវិស័យ

សេចក្ដីសញ្ញា និងពិធីបរិសុទ្ធនៃដំណឹងល្អដំណើរការនៅក្នុងជីវិតរបស់យើងដូចជាត្រីវិស័យមួយ ។ ត្រីវិស័យគឺជាឧបករណ៍មួយប្រើដើម្បីចង្អុលបង្ហាញទិសដៅសំខាន់ៗ ទិសខាងជើង ខាងត្បូង ខាងកើត និងខាងលិច ក្នុងគោលបំណងនៃការរុករក និងការតម្រង់ទិសភូមិសាស្ត្រ ។ ស្រដៀងគ្នានេះដែរ សេចក្ដីសញ្ញា និងពិធីបរិសុទ្ធរបស់យើងចង្អុលបង្ហាញ និងជួយយើងឲ្យចងចាំទំនាក់ទំនងរបស់យើងជាមួយនឹងព្រះអម្ចាស់យេស៊ូវគ្រីស្ទជានិច្ច កាលដែលយើងរីកចម្រើននៅតាមផ្លូវនៃសេចក្ដីសញ្ញា ។

រូបភាព

រូបចម្លាក់ព្រះគ្រីស្ទ

ទិសដៅសំខាន់ៗសម្រាប់យើងទាំងអស់គ្នានៅក្នុងជីវិតរមែងស្លាប់ គឺមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ ។^១៦ សេចក្ដីសញ្ញា និងពិធីបរិសុទ្ធដ៏បរិសុទ្ធ ជួយយើងឲ្យបន្ដផ្ដោតទៅលើព្រះអង្គសង្គ្រោះ ហើយតាមរយៈព្រះគុណរបស់ទ្រង់^១៧ ព្យាយាមប្រែក្លាយកាន់តែដូចទ្រង់ ។ ប្រាកដណាស់ « [ អំណាច ] បិទបាំងនឹងជួយអ្នក និងខ្ញុំ ក្នុងបុព្វហេតុនៃសេចក្តីពិត » ។^១៨

កាន់ដំបងដែកយ៉ាងខ្ជាប់ជានិច្ច

ទំនាក់ទំនងនៃសេចក្ដីសញ្ញារបស់យើងជាមួយនឹងព្រះ និងព្រះយេស៊ូវគ្រីស្ទ គឺជាផ្លូវយើងអាចទទួលបានសមត្ថភាព និងកម្លាំងដើម្បី « មិនស្ដាប់ » ។ ចំណងនេះត្រូវបានពង្រឹង កាលដែលយើងបន្តកាន់ដំបងដែកយ៉ាងខ្ជាប់ជានិច្ច ។ ប៉ុន្តែ ដូចពួកបងប្រុសរបស់នីហ្វៃបានសួរថា « ចុះតើដំបងដែក ដែលឪពុកយើងបានឃើញ … មានន័យដូចម្តេច ?

« ហើយ [ នីហ្វៃ ] បាននិយាយទៅពួកគេថា នោះគឺជា ព្រះបន្ទូលនៃព្រះ ហើយអស់អ្នកណាដែលប្រុងស្ដាប់តាម ព្រះបន្ទូលនៃព្រះ ហើយ តោងជាប់តាមព្រះបន្ទូលនៃព្រះនោះនឹងមិនត្រូវវិនាសឡើយ សូម្បីតែការល្បួង និងព្រួញភ្លើងទាំងឡាយរបស់មារសត្រូវ ក៏មិនអាចឈ្នះលើគេដល់ទៅធ្វើឲ្យគេខ្វាក់ ដើម្បីនាំគេទៅឯសេចក្ដីបំផ្លិចបំផ្លាញបានដែរ » ។^១៩

សូមកត់ចំណាំថា សមត្ថភាពដើម្បីទប់ទល់នឹងការល្បួង និងព្រួញភ្លើងទាំងឡាយរបស់មារសត្រូវ គឺត្រូវបានសន្យាដល់បុគ្គលទាំងឡាយ ដែល « កាន់យ៉ាងខ្ជាប់ជានិច្ច » ជាជាងគ្រាន់តែ « ដើរសួតាម » ព្រះបន្ទូលនៃព្រះ ។

គួរឲ្យចាប់អារម្មណ៍ណាស់ ដែលសាវកយ៉ូហានបានពិពណ៌នាអំពីព្រះយេស៊ូវគ្រីស្ទថាជា ព្រះបន្ទូល ។^២០

« កាលដើមដំបូងមាន ព្រះបន្ទូល ព្រះបន្ទូល ក៏គង់នៅជាមួយនឹងព្រះ ហើយ ព្រះបន្ទូល នោះឯងជាព្រះ ។ …

« គ្រប់របស់ទាំងអស់បានកើតមកដោយសារទ្រង់ ហើយក្នុងបណ្តារបស់ដែលបានបង្កើតមកទាំងប៉ុន្មាន នោះគ្មានអ្វីណាមួយកើតមកក្រៅពីទ្រង់ឡើយ ។ …

« ព្រះបន្ទូល ក៏ត្រឡប់ជាសាច់ឈាម ហើយបានស្នាក់នៅជាមួយនឹងយើងរាល់គ្នា ( យើងរាល់គ្នាបានឃើញសិរីល្អទ្រង់ គឺជាសិរីល្អនៃព្រះរាជបុត្រាតែ១ ដែលមកពីព្រះវរបិតា ) មានពេញជាព្រះគុណ និងសេចក្តីពិត » ។^២១

ហេតុដូច្នោះហើយ ព្រះនាមមួយរបស់ព្រះយេស៊ូវគ្រីស្ទគឺជា « ព្រះបន្ទូល » ។^២២

លើសពីនោះទៀត មាត្រានៃសេចក្ដីជំនឿទីប្រាំបីចែងថា « យើងខ្ញុំជឿថា ព្រះគម្ពីរប៊ីប គឺជា ព្រះបន្ទូលនៃព្រះបើសិនជាបានបកប្រែត្រឹមត្រូវ យើងខ្ញុំក៏ជឿដែរថា ព្រះគម្ពីរមរមនជា ព្រះបន្ទូលនៃព្រះ^២៣

ហេតុដូច្នោះហើយ ការបង្រៀនអំពីព្រះអង្គសង្គ្រោះ ដូចដែលបានកត់ត្រាទុកនៅក្នុងព្រះគម្ពីរដ៏បរិសុទ្ធ ក៏ជា « ព្រះបន្ទូល » ផងដែរ ។

ខ្ញុំសូមផ្ដល់យោបល់ថា ការកាន់ខ្ជាប់ជានិច្ចទៅនឹងព្រះបន្ទូលនៃព្រះ រួមមាននូវ ( ១ ) ការចងចាំ ការគោរព និងការពង្រឹងទំនាក់ទំនងផ្ទាល់ខ្លួន ដែលយើងមានជាមួយនឹងព្រះអង្គសង្គ្រោះ និងព្រះវរបិតារបស់ទ្រង់ តាមរយៈសេចក្ដីសញ្ញា និងពិធីបរិសុទ្ធនៃដំណឹងល្អដែលបានស្ដារឡើងវិញ និង ( ២ ) ការប្រើប្រាស់ព្រះគម្ពីរដ៏បរិសុទ្ធ និងការបង្រៀននៃព្យាការី និងពួកសាវកដែលនៅរស់ ប្រកបដោយការអធិស្ឋាន ដោយស្មោះ និងដោយខ្ជាប់ខ្ជួន ដូចជាប្រភពដ៏ប្រាកដនៃសេចក្ដីពិតដែលបានបើកសម្ដែង ។ ពេលយើងចងភ្ជាប់ និង « កាន់ខ្ជាប់ » ទៅនឹងព្រះអម្ចាស់ ហើយត្រូវបានផ្លាស់ប្ដូរដោយសារការរស់នៅតាមគោលលទ្ធិរបស់ទ្រង់^២៤ នោះខ្ញុំសន្យាថា យើងនឹងទទួលបានពរជ័យដោយឡែក និងជារួមឲ្យ « ឈរនៅក្នុងទីបរិសុទ្ធទាំងឡាយ ហើយនឹងពុំត្រូវបានរើឡើយ » ។^២៥ បើយើងនៅជាប់នឹងព្រះគ្រីស្ទ នោះទ្រង់នឹងនៅជាប់នឹងយើង ហើយយាងដើរជាមួយយើងដែរ ។^២៦ ពិតណាស់ « នៅក្នុងពេលលំបាក នោះព្រះអង្គនឹងលួងលោមចិត្ត ហើយចម្រើននូវសេចក្តីពិត » ។^២៧

ទីបន្ទាល់

ចូរខិតខំទៅ ។ ចូរកាន់ខ្ជាប់ ។ មិនស្ដាប់ ។

ខ្ញុំសូមថ្លែងទីបន្ទាល់ថា ភក្ដីភាពចំពោះសេចក្ដីសញ្ញា និងពិធីបរិសុទ្ធនៃដំណឹងល្អដែលបានស្ដារឡើងវិញរបស់ព្រះអង្គសង្គ្រោះ ជួយយើងឲ្យ ខិតខំទៅ នៅក្នុងកិច្ចការរបស់ព្រះអម្ចាស់ កាន់ខ្ជាប់ នឹងទ្រង់ ជាព្រះបន្ទូលនៃព្រះ និង មិនស្ដាប់ តាមភាពទាក់ទាញរបស់មារសត្រូវឡើយ ។ ចូរយើងម្នាក់ៗកាន់ដាវច្បាំង សម្រាប់សេចក្ដីទៀងត្រង់ « ជាដាវនៃសេចក្តីពិត »^២៨ នៅក្នុងព្រះនាមដ៏ពិសិដ្ឋនៃព្រះអម្ចាស់យេស៊ូវគ្រីស្ទ អាម៉ែន ។