ខ្ជាប់ខ្ជួននៅកណ្ដាលខ្យល់ព្យុះ
នៅពេលមានខ្យល់ព្យុះក្នុងជីវិតកើតឡើង បងប្អូនអាចនៅខ្ជាប់ខ្ជួនបាន ដោយសារបងប្អូនកំពុងឈរនៅលើសិលានៃសេចក្ដីជំនឿរបស់បងប្អូនលើព្រះយេស៊ូវគ្រីស្ទ ។
បងប្អូនប្រុសស្រីជាទីស្រឡាញ់ យើងមានពរជ័យនៅថ្ងៃនេះ ដែលបានស្ដាប់អ្នកបម្រើដ៏បំផុសគំនិតរបស់ព្រះផ្ដល់ការទូន្មាន និងពាក្យលើកទឹកចិត្ត ។ ពួកយើងម្នាក់ៗ មិនថាយើងនៅទីណានោះទេ សូមដឹងថា យើងកំពុងរស់នៅក្នុងគ្រាដែលកាន់តែលំបាកខ្លាំងឡើង ។ ការអធិស្ឋានរបស់ខ្ញុំគឺថា សូមឲ្យខ្ញុំអាចជួយបងប្អូនឲ្យឈរយ៉ាងខ្ជាប់ខ្ជួននៅកណ្ដាលខ្យល់ព្យុះដែលយើងជួបប្រទះ ដោយដួងចិត្តសុខសាន្ដ ។១
កន្លែងដែលត្រូវចាប់ផ្ដើមគឺត្រូវចាំថា យើងម្នាក់ៗគឺជាបុត្រសំណព្វរបស់ព្រះ ហើយថាទ្រង់មានអ្នកបម្រើដ៏បំផុសគំនិតជាច្រើន ។ អ្នកបម្រើរបស់ព្រះទាំងនោះបានមើលឃើញជំនាន់ ដែលយើងកំពុងរស់នៅនេះ ។ សាវកប៉ុលបានសរសេរទៅកាន់ធីម៉ូថេថា « ចូរឲ្យដឹងថា នៅជាន់ក្រោយបង្អស់ នឹងមានគ្រាលំបាកណាស់ » ។២
គ្រប់គ្នាមានកែវភ្នែកបានឃើញទីសម្គាល់ក្នុងសម័យនេះ ហើយមានត្រចៀកសម្រាប់ស្តាប់ប្រសាសន៍របស់ព្យាការី ដឹងថាវាគឺជាការពិត ។ ការលំបាកនៃគ្រោះថ្នាក់ដ៏ធំបំផុតកើតមានដល់យើង ដោយសារកម្លាំងនៃអំពើទុច្ចរិត ។ កម្លាំងទាំងនោះកំពុងតែកើនឡើង ។ វាមិនងាយស្រួលឡើយ ប៉ុន្តែវាកាន់តែពិបាកខ្លាំងឡើង ហើយដើម្បីគោរពដល់សេចក្ដីសញ្ញា យើងត្រូវតែចុះ និងរក្សាដើម្បីរស់នៅតាមដំណឹងល្អរបស់ព្រះយេស៊ូវគ្រីស្ទ ។
សម្រាប់យើងទាំងអស់គ្នាណាដែលព្រួយបារម្ភចំពោះខ្លួនឯង និងចំពោះមនុស្សដែលយើងស្រឡាញ់ នោះមានសេចក្ដីសង្ឃឹមនៅក្នុងការសន្យាដែលព្រះបានប្រទានមក អំពីកន្លែងដែលមានសុវត្ថិភាពនៅកណ្ដាលខ្យល់ព្យុះខាងមុខនេះ ។
នេះគឺជាការពិពណ៌នាអំពីរូបភាពនៃទីកន្លែងនោះ ។ វាត្រូវបានរៀបរាប់ដោយព្យាការីដែលនៅរស់ម្ដងហើយម្ដងទៀត ។ ជាគំរូដូចដែលបានកត់ត្រានៅក្នុងព្រះគម្ពីរមរមន ឪពុកដ៏បំផុសគំនិត និងប្រកបដោយសេចក្តីស្រឡាញ់បានប្រាប់ដល់កូនប្រុសទាំងឡាយរបស់លោកពីរបៀបដើម្បីពង្រឹងខ្លួនពួកគេឲ្យឈរដោយខ្ជាប់ខ្ជួននៅក្នុងព្យុះភ្លៀងនៅពីមុខពួកគេថា ៖« ហើយឥឡូវនេះ ឱកូនប្រុសទាំងឡាយរបស់ឪពុកអើយ ចូរចងចាំចុះ ចូរចងចាំចុះថា គឺនៅលើសិលានៃព្រះដ៏ប្រោសលោះនៃយើង គឺព្រះគ្រីស្ទជាព្រះរាជបុត្រានៃព្រះ ដែលកូនត្រូវសង់គ្រឹះរបស់កូន ដើម្បីកាលណាអារក្សបញ្ចេញខ្យល់ដ៏ខ្លាំងក្លារបស់វាមក មែនហើយ ព្រួញរបស់វានៅក្នុងខ្យល់កួច មែនហើយ កាលណាព្រិល និងខ្យល់ព្យុះកំណាចទាំងអស់របស់វាបោកបក់មកលើកូន នោះវានឹងគ្មានអំណាចមកលើកូនឡើយ ដើម្បីទាញកូនចុះទៅក្នុងជង្ហុកនៃសេចក្ដីវេទនា និងទុក្ខលំបាកដ៏មិនចេះចប់មិនចេះហើយ ពីព្រោះមកពីសិលាដែលកូនបានសង់នៅលើនោះ ដែលជាគ្រឹះដ៏ខ្ជាប់ខ្ជួនមួយ ជាគ្រឹះមួយបើសិនណាមនុស្សសង់នៅលើនោះ នោះពួកគេមិនអាចរលំបានឡើយ » ។៣
សេចក្ដីវេទនា និងទុក្ខលំបាកដ៏មិនចេះចប់មិនចេះហើយដែលលោកបានថ្លែងនេះ គឺជាឥទ្ធិពលដ៏អាក្រក់នៃអំពើបាប បើយើងមិនប្រែចិត្តពីអំពើបាបឲ្យបានពេញលេញទេនោះ ។ ខ្យល់ព្យុះដ៏កំណាចគឺជាការល្បួង និងការកើនឡើងនៃការវាយប្រហាររបស់សាតាំង ។ វាមិនដែលសំខាន់ខ្លាំងដូចពេលឥឡូវនេះទេ ដែលត្រូវយល់ពីរបៀបសង់លើគ្រឹះដ៏រឹងមាំនោះ ។ សម្រាប់ខ្ញុំ ពុំមានកន្លែងណាដែលប្រសើរជាងទេសនកថាចុងក្រោយរបស់ស្ដេចបេនយ៉ាមីននោះទេ ដែលបានកត់ត្រានៅក្នុងព្រះគម្ពីរមរមនផងដែរ ។
ព្រះបន្ទូលក្នុងនាមជាព្យាការីរបស់ស្ដេចបេនយ៉ាមីនអនុវត្តបានចំពោះពួកយើងនៅជំនាន់យើងនេះ ។ ទ្រង់ជ្រាបដោយសារទ្រង់បានដកពិសោធន៍ការរន្ធត់នៃសង្គ្រាមផ្ទាល់ព្រះអង្គ ។ ទ្រង់បានការពារប្រជាជនរបស់ទ្រង់នៅក្នុងការប្រយុទ្ធ ដោយពឹងផ្អែកលើព្រះចេស្តានៃព្រះ ។ ទ្រង់បានទតឃើញយ៉ាងច្បាស់នូវអំណាចដ៏ព្រៃផ្សៃរបស់លូស៊ីហ្វើរក្នុងការល្បួងដើម្បី ព្យាយាមយកឈ្នះ និងបំបាក់ទឹកចិត្តកូនចៅរបស់ព្រះ ។
ទ្រង់បានអញ្ជើញប្រជាជនរបស់ទ្រង់ និងយើងឲ្យសង់នៅលើសិលានៃសុវត្ថិភាពដ៏រឹងមាំតែមួយគត់ ពោលគឺព្រះអង្គសង្គ្រោះ ។ ទ្រង់បានបញ្ជាក់ច្បាស់ថា យើងមានសេរីភាពក្នុងការជ្រើសរើសរវាងត្រូវ និងខុស ប៉ុន្ដែយើងមិនអាចចៀសវាងពីលទ្ធផលនៃជម្រើសរបស់យើងបានទេ ។ ទ្រង់បានមានបន្ទូលចំៗ និងមុតៗ ព្រោះទ្រង់បានជ្រាបពីទុក្ខសោកដែលនឹងកើតឡើងដល់អស់អ្នកដែលមិនស្ដាប់ និងគោរពតាមការព្រមានរបស់ទ្រង់ ។
នេះគឺជារបៀបដែលទ្រង់បានរៀបរាប់ពីលទ្ធផលដែលកើតមានបន្ទាប់ពីជម្រើសរបស់យើង មិនថាការធ្វើតាមការបំផុសនៃព្រះវិញ្ញាណ ឬការធ្វើតាមសារអាក្រក់ដែលមកពីសាតាំង ដែលមានបំណងល្បួង និងបំផ្លាញយើងនោះទេ ៖
« ដ្បិតមើលចុះ មានការវេទនាមួយត្រូវបានដាក់ដល់ជនណា ដែលចុះឈ្មោះគោរពតាមវិញ្ញាណ [ អាក្រក់ ] នោះ ព្រោះបើសិនជាជននោះចុះឈ្មោះគោរពតាមវាមែន ហើយនៅតែស្ដាប់បង្គាប់ ហើយស្លាប់ទៅនៅក្នុងបាបរបស់ខ្លួន ជននោះនឹងផឹកនូវសេចក្ដីជាប់ទោសដល់ព្រលឹងរបស់ខ្លួន ព្រោះជននោះនឹងទទួលទោសដ៏អស់កល្បជានិច្ចសម្រាប់ជាឈ្នួលដល់ខ្លួន ដោយបានរំលងក្រឹត្យវិន័យនៃព្រះ ដែលផ្ទុយនឹងការចេះដឹងរបស់ខ្លួន ។ …
« ហេតុដូច្នេះហើយ បើសិនជាជននោះពុំប្រែចិត្តទេ ហើយនៅដូច្នោះតទៅ ហើយស្លាប់ទៅជាខ្មាំងសត្រូវដល់ព្រះដែរ នោះសេចក្ដីទាមទារនៃសេចក្ដីយុត្តិធម៌ដ៏ឧត្ដុង្គឧត្ដមនឹងដាស់ព្រលឹងអមតរបស់ជននោះឲ្យគេស្គាល់នូវទោសរបស់ខ្លួន ដែលធ្វើឲ្យគេរួញពីវត្តមាននៃព្រះអម្ចាស់ ហើយធ្វើឲ្យទ្រូងរបស់គេពោរពេញទៅដោយទោសកំហុស និងការឈឺចាប់ និងទុក្ខព្រួយ ដូចជាភ្លើងមួយដែលពន្លត់មិនបាន ឯអណ្ដាតភ្លើងនឹងសន្ធោសន្ធៅឡើងជារៀងដរាបតទៅ » ។
ស្ដេចបេនយ៉ាមីនបានបន្ដមានបន្ទូល ៖ « ឱអស់អ្នកដែលចាស់ និងអ្នកដែលក្មេង និងអ្នកដែលតូចផង ដែលអាចយល់ពាក្យរបស់យើងអើយ ដ្បិតយើងបាននិយាយដោយច្បាស់លាស់ទៅកាន់អ្នក ដើម្បីឲ្យអ្នករាល់គ្នាយល់ យើងសូមឲ្យអ្នករាល់គ្នាភ្ញាក់ឡើង ដើម្បីចងចាំនូវស្ថានការណ៍ដ៏គួរឲ្យខ្លាចនៃអស់អ្នកណា ដែលបានធ្លាក់ទៅក្នុងការរំលងច្បាប់ » ។៤
សម្រាប់ខ្ញុំ អំណាចនៃការព្រមានឲ្យប្រែចិត្តនោះបង្កើតបានជារូបភាពក្នុងគំនិតខ្ញុំអំពីពេលវេលាដ៏ខ្ជាប់ខ្ជួនមួយ ដែលបងប្អូន និងខ្ញុំនឹងត្រូវឈរចំពោះព្រះភក្រ្ដព្រះអង្គសង្គ្រោះ បន្ទាប់ពីជីវិតនេះទៅ ។ ដោយអស់ពីដួងចិត្តរបស់យើង យើងគ្រប់គ្នា គឺមិនចង់ចុះញមឡើយ ប៉ុន្ដែចង់ងើយមុខឡើងមើលទៅកាន់ទ្រង់ ឃើញទ្រង់ញញឹម ហើយស្ដាប់ទ្រង់មានបន្ទូលថា « ប្រពៃហើយ បាវល្អស្មោះត្រង់អើយ … ចូរឲ្យឯង [ ចូលមក ] » ។៥
ស្ដេចបេនយ៉ាមីនបញ្ជាក់យ៉ាងច្បាស់ ពីរបៀបដែលយើងអាចទទួលបានសេចក្ដីសង្ឃឹមដើម្បីបានស្ដាប់បន្ទូលទាំងនោះ បើយើងរកឃើញផ្លូវនោះនៅក្នុងជីវិតនេះ ដើម្បីផ្លាស់ប្ដូរនិស្ស័យធម្មជាតិរបស់យើងតាមរយៈដង្វាយធួនរបស់ព្រះយេស៊ូវគ្រីស្ទ ។ នោះគឺជាផ្លូវតែមួយគត់ដែលយើងអាចសង់នៅលើគ្រឹះដ៏រឹងមាំនេះបាន ហើយបន្ដឈរយ៉ាងខ្ជាប់ខ្ជួននៅក្នុងពេលមានខ្យល់ព្យុះនៃការល្បួង និងការសាកល្បងនាពេលខាងមុខ ។ ស្ដេចបេនយ៉ាមីនពិពណ៌នាពីការផ្លាស់ប្ដូរនិស្ស័យធម្មជាតិរបស់យើងនោះ ដោយប្រើការប្រៀបធៀបដ៏ល្អមួយដែលតែងតែប៉ះដល់ដួងចិត្តខ្ញុំជានិច្ច ។ វាត្រូវបានប្រើដោយព្យាការីសម្រាប់សហស្សវត្សរ៍ និងដោយព្រះអម្ចាស់ទ្រង់ផ្ទាល់ ។ ការប្រៀបធៀបនេះគឺ ៖ យើងត្រូវតែក្លាយដូចជាកូនក្មេង—ជាកូនក្មេងតូចម្នាក់ ។
សម្រាប់មនុស្សមួយចំនួន ការណ៍នោះនឹងមិនងាយទទួលយកបានទេ ។ ពួកយើងភាគច្រើនចង់រឹងមាំ ។ យើងអាចមើលឃើញថា ការធ្វើដូចជាកូនក្មេងគឺជាភាពទន់ខ្សោយ ។ ឪពុកម្ដាយភាគច្រើនទន្ទឹងរង់ចាំថ្ងៃមួយ ដែលកូនៗរបស់ពួកគេលែងប្រព្រឹត្តរឿងល្ងង់មិនដឹងអ្វីដូចក្មេងទៀត ។ ប៉ុន្ដែស្ដេចបេនយ៉ាមីន និងមនុស្សរមែងស្លាប់ផ្សេងទៀត ដែលបានយល់ច្បាស់ពីអត្ថន័យនៃការធ្វើជាមនុស្សរឹងមាំ និងមានសេចក្ដីក្លាហាន បានបញ្ជាក់យ៉ាងច្បាស់ថា ការក្លាយដូចជាកូនក្មេងមិនមែនជាការប្រព្រឹត្តរឿងល្ងង់មិនដឹងអ្វីដូចក្មេងនោះទេ ។ វាគឺជាការក្លាយដូចជាព្រះអង្គសង្គ្រោះ ដែលបានអធិស្ឋានទៅព្រះវរបិតារបស់ទ្រង់សូមកម្លាំងដើម្បីអាចធ្វើតាមព្រះទ័យរបស់ព្រះវរបិតាទ្រង់ ហើយធួនសម្រាប់អំពើបាបរបស់កូនចៅទាំងអស់របស់ព្រះវរបិតាទ្រង់ រួចហើយបានធ្វើសម្រេចតាមនោះ ។ និស្ស័យធម្មជាតិរបស់យើងត្រូវតែផ្លាស់ប្ដូរ ដើម្បីក្លាយដូចជាកូនក្មេង ដើម្បីទទួលបានកម្លាំងដែលយើងត្រូវការ ដើម្បីបន្ដឈរយ៉ាងខ្ជាប់ខ្ជួន និងមានសេចក្ដីសុខសាន្ដនៅគ្រាដ៏លំបាកខ្លាំង ។
នេះគឺជាការពិពណ៌នាដ៏រំជួលចិត្តរបស់ស្ដេចបេនយ៉ាមីន អំពីរបៀបដែលការផ្លាស់ប្ដូរនោះកើតមាន ៖ « ព្រោះមនុស្សខាងសាច់ឈាមជាសត្រូវដល់ព្រះ ហើយមានមកតាំងពីការធ្លាក់នៃលោកអ័ដាមម្ល៉េះ ហើយនឹងនៅយ៉ាងនេះជារៀងដរាបតទៅ លើកលែងតែគេព្រមធ្វើតាមសេចក្ដីទូន្មាននៃព្រះវិញ្ញាណបរិសុទ្ធ ហើយសម្រាតភាពខាងសាច់ឈាមចេញ ហើយក្លាយទៅជាអ្នកបរិសុទ្ធវិញ តាមរយៈដង្វាយធួននៃព្រះគ្រីស្ទដ៏ជាព្រះអម្ចាស់ ហើយក្លាយទៅដូចជាកូនក្មេង ងាយប្រដៅ ស្លូតបូត ទាបរាបសា អត់ឱន ពោរពេញទៅដោយសេចក្ដីស្រឡាញ់ ព្រមទទួលនូវអ្វីៗទាំងអស់ ដែលព្រះអម្ចាស់ទ្រង់ទតឃើញថាល្អ ដូចជាកូនក្មេងព្រមធ្វើតាមឪពុកខ្លួនដូច្នោះ » ។៦
យើងទទួលបានការផ្លាស់ប្ដូរនោះ នៅពេលយើងចុះ និងរំឭកសេចក្ដីសញ្ញាជាមួយព្រះ ។ ការណ៍នោះនាំឲ្យមានអំណាចនៃដង្វាយធួនរបស់ព្រះគ្រីស្ទ ដើម្បីអនុញ្ញាតឲ្យមានការផ្លាស់ប្ដូរនៅក្នុងដួងចិត្តយើង ។ យើងអាចមានអារម្មណ៍នោះ រាល់ពេលដែលយើងទទួលទានសាក្រាម៉ង់ ធ្វើពិធីបរិសុទ្ធនៅក្នុងព្រះវិហារបរិសុទ្ធសម្រាប់បុព្វការីជនដែលបានចែកឋានទៅ ថ្លែងទីបន្ទាល់ជាសាក្សីអំពីព្រះអង្គសង្គ្រោះ ឬថែទាំដល់មនុស្សដែលខ្វះខាតក្នុងនាមជាសិស្សរបស់ព្រះគ្រីស្ទ ។
នៅក្នុងបទពិសោធន៍ទាំងនោះ យើងនឹងក្លាយដូចជាកូនក្មេង ដែលមានសមត្ថភាពដើម្បីស្រឡាញ់ និងប្រតិបត្តិតាម ។ យើងបន្ដឈរនៅលើគ្រឹះដ៏រឹងមាំនេះ ។ សេចក្ដីជំនឿរបស់យើងទៅលើព្រះយេស៊ូវគ្រីស្ទនាំឲ្យយើងមានការប្រែចិត្ត និងកាន់តាមបទបញ្ញត្តិទាំងឡាយរបស់ទ្រង់ ។ យើងគោរពតាម ហើយយើងនឹងទទួលបានអំណាចដើម្បីទប់ទល់នឹងការល្បួង ហើយយើងទទួលបានភាពជាដៃគូនៃព្រះវិញ្ញណបរិសុទ្ធដូចដែលបានសន្យា ។
និស្ស័យធម្មជាតិរបស់យើងផ្លាស់ប្ដូរដើម្បីក្លាយដូចជាកូនក្មេងតូចម្នាក់ ដែលគោរពប្រតិបត្តិតាមព្រះ និងមានសេចក្ដីស្រឡាញ់កាន់តែខ្លាំងឡើង ។ ការផ្លាស់ប្ដូរនោះនឹងធ្វើឲ្យយើងស័ក្ដិសមដើម្បីរីករាយនឹងអំណោយទាន ដែលកើតមានតាមរយៈព្រះវិញ្ញាណបរិសុទ្ធ ។ ការមានភាពជាដៃគូនៃព្រះវិញ្ញាណនឹងលួងលោម ដឹកនាំ និងពង្រឹងយើង ។
ខ្ញុំបានដឹងពីអត្ថន័យមួយចំនួនពីអ្វីដែលស្ដេចបេនយ៉ាមីនបានប្រាប់ ពេលទ្រង់មានបន្ទូលថា យើងអាចក្លាយដូចជាកូនក្មេងតូចម្នាក់នៅចំពោះព្រះភក្រ្ដព្រះ ។ ខ្ញុំបានរៀនតាមរយៈបទពិសោធន៍ជាច្រើនថា ព្រះវិញ្ញាណបរិសុទ្ធមានបន្ទូលញឹកញាប់បំផុតក្នុងសំឡេងដ៏ស្ងប់ស្ងាត់ ស្ដាប់បានឮបំផុតពេលដួងចិត្តរបស់យើងស្លូតបូត និងងាយប្រដៅ គឺដូចជាដួងចិត្តរបស់កូនក្មេងដែរ ។ តាមពិត ការអធិស្ឋានដែលមានប្រសិទ្ធភាពគឺ « ខ្ញុំចង់បានស្របតាមអ្វីដែលទ្រង់សព្វព្រះទ័យ។ សូមគ្រាន់តែប្រាប់ខ្ញុំថានោះជាអ្វី ។ ខ្ញុំនឹងធ្វើវា !
នៅពេលមានខ្យល់ព្យុះក្នុងជីវិតកើតឡើង បងប្អូនអាចនៅខ្ជាប់ខ្ជួនបាន ដោយសារបងប្អូនកំពុងឈរនៅលើសិលានៃសេចក្ដីជំនឿរបស់បងប្អូនលើព្រះយេស៊ូវគ្រីស្ទ ។ សេចក្ដីជំនឿនោះនឹងដឹកនាំបងប្អូនឲ្យប្រែចិត្តជារៀងរាល់ថ្ងៃ ហើយខ្ជាប់ខ្ជួនក្នុងការរក្សាសេចក្ដីសញ្ញា ។ បន្ទាប់មក បងប្អូននឹងចងចាំទ្រង់ជានិច្ច ។ ហើយពេលបងប្អូនឆ្លងកាត់ខ្យល់ព្យុះនៃសេចក្តីស្អប់ និងអំពើទុច្ចរិត នោះបងប្អូននឹងមានអារម្មណ៍នឹងនរ និងពេញដោយក្ដីសង្ឃឹម ។
លើសពីនេះ បងប្អូននឹងឃើញថាខ្លួនឯងកំពុងជួយលើកស្ទួយអ្នកដទៃ ឲ្យទៅទីសុវត្ថិភាពនៅលើសិលានោះជាមួយបងប្អូនដែរ ។ សេចក្ដីជំនឿលើព្រះយេស៊ូវគ្រីស្ទតែងតែដឹកនាំទៅរកក្ដីសង្ឃឹមដ៏ធំ និងអារម្មណ៍នៃសេចក្ដីសប្បុរសទៅកាន់អ្នកដទៃជានិច្ច ដែលជាសេចក្ដីស្រឡាញ់ដ៏ពិតប្រាកដនៃព្រះគ្រីស្ទ ។
ខ្ញុំសូមថ្លែងជាសាក្សីដ៏មុតមាំរបស់ខ្ញុំដល់បងប្អូនថា ព្រះអម្ចាស់ព្រះយេស៊ូវគ្រីស្ទបានប្រទានដល់បងប្អូននូវការអញ្ជើញឲ្យ « ចូរមកឯខ្ញុំ » ។៧ ទ្រង់អញ្ជើញបងប្អូន ដោយសេចក្ដីស្រឡាញ់ចំពោះបងប្អូន និងមនុស្សដែលបងប្អូនស្រឡាញ់ ឲ្យមករកទ្រង់ដើម្បីបាននូវសេចក្ដីសុខសាន្តនៅក្នុងជីវិតនេះ និងជីវិតអស់កល្បនៅក្នុងលោកខាងមុខ ។ ទ្រង់ញាណដឹងយ៉ាងឥតខ្ចោះពីខ្យល់ព្យុះ ដែលបងប្អូននឹងជួបប្រទះនៅក្នុងការសាកល្បងរបស់បងប្អូន ដែលជាផ្នែកមួយនៃផែនការនៃសុភមង្គល ។
ខ្ញុំសូមអង្វរបងប្អូនឲ្យទទួលយកការអញ្ជើញរបស់ព្រះអង្គសង្គ្រោះ ។ ដូចជាកូនក្មេងដ៏ស្លូតបូត និងពេញដោយក្ដីស្រឡាញ់ សូមទទួលយកជំនួយរបស់ទ្រង់ ។ សូមចុះ និងរក្សាសេចក្ដីសញ្ញាដែលទ្រង់ប្រទានមកនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ សេចក្ដីសញ្ញាទាំងនោះនឹងពង្រឹងបងប្អូន ។ ព្រះអង្គសង្គ្រោះញាណដឹងពីខ្យល់ព្យុះ និងកន្លែងដែលមានសុវតិ្ថភាពនៅលើផ្លូវទៅផ្ទះ ទៅរកទ្រង់ និងព្រះវរបិតាសួគ៌យើងវិញ ។ ទ្រង់ស្គាល់ផ្លូវនោះ ។ ទ្រង់គឺជាផ្លូវ ។ ខ្ញុំសូមថ្លែងទីបន្ទាល់ដូច្នោះក្នុងព្រះនាមនៃព្រះយេស៊ូវគ្រីស្ទ អាម៉ែន ៕