Wala Na Bala sing Bulong sa Galaad?
Ang nagapang-ayo nga gahum sang Manluluwas indi lamang ang Iya ikasarang nga mag-ayo sang aton kalawasan kundi, ayhan ang mas importante, ang Iya ikasarang sa pag-ayo sang aton mga tagipusuon.
Pagkatapos sang akon misyon, samtang estudyante sa Brigham Young University, nakabaton ako sang tawag halin kay tatay. Ginsiling niya sa akon nga may ara sia sang kanser sa pancreas kag bisan gamay ang posibilidad nga magdugay sia, determinado sia nga mag-ayo kag magbalik sa normal niya nga pangginawi. Ang tawag nga ato nakapapamensar sa akon. Si tatay nangin akon bishop, abyan, kag manuglaygay. Samtang ginapanumdum namon ni nanay kag sang mga utod ko ang palaabuton, daw madulom ini tulukon. Ang manghod ko nga si Dave nagaalagad sa misyon sa New York kag nagapartisipar sa malayo sa sining mabudlay nga hitabo sa pamilya.
Ang mga doktor sadto nga adlaw nagpanugyan sang operasyon para mapunggan ang paglapta sang kanser. Hugot nga nagpuasa kag nagpangamuyo ang amon pamilya para sa isa ka milagro. Nabatyagan ko nga bastante ang amon pagtuo nga mag-ayo si tatay. Antes lang gid sang operasyon, ako kag ang magulang ko nga si Norm naghatag kay tatay sang bendisyon. Upod sang tanan nga pagtuo nga ara sa amon, nagpangamuyo kami nga mag-ayo sia.
Natalana ang operasyon nga magalawig sing pila ka oras, pero pagligad lamang sang malip-ot nga tiyempo, nakigkita ang doktor sa amon pamilya sa hululatan nga kuwarto. Siling niya nga sang pagsugod nila sang operasyon, nakita nila nga naglapta na ang kanser sa lawas ni tatay. Base sa ila obserbasyon, pila na lamang ka bulan ang itiner ni tatay. Naglalain kami.
Pagbugtaw ni tatay halin sa operasyon, nalangkag sia nga mahibal-an kon nagmadinalag-on ang operasyon. Ginsugid namon sa iya ang masubo nga balita.
Padayon kami nga nagpuasa kag nagpangamuyo para sa isa ka milagro. Sang madasig nga nagalain ang kondisyon sang lawas ni tatay, nagsugod kami sa pagpangamuyo nga mahilway na sia sa sakit. Sang ulihi, sang naglala na gid ang iya kondisyon, ginpangayo namon sa Ginuo nga tugtan na sia nga magtaliwan sing madasig. Pila lamang ka bulan pagkatapos sang operasyon, pareho sa ginhambal sang doktor, napatay matuod si tatay.
Dako nga pagpalangga kag pag-atipan ang ginbuhos sa amon pamilya sang mga miyembro sa ward kag kaabyanan sang pamilya. Matahum ang nangin serbisyo sa lubong sa pagpasidungog sa kabuhi ni tatay. Ugaling sa pagligad sang panahon, kag sang naeksperiyensyahan namon ang kasakit sang pagtaliwan ni tatay, nagsugod ako sa pagpamangkot kon ngaa wala nag-ayo si tatay. Nanumdom ako kon bala kulang pa ang kabakod sang akon pagtuo. Ngaa ang iban nga pamilya nakabaton sang milagro, pero kami wala? Natun-an ko sa misyon nga magdangop sa balaan nga mga kasulatan para sa mga sabat, gani nagsugod ako sa pag-usisa sang balaan nga mga kasulatan.
Ang Daan nga Katipan nagatudlo parte sa mahamot nga sangkap ukon balanyos nga ginagamit sa pagbulong sang mga pilas halin sa kahoy-kahoy nga nagatubo sa Galaad. Sang panahon sang Daan nga Katipan, ang balanyos ginkilala nga “bulong sang Galaad.”1 Ang propeta nga si Jeremias nagpangasubo tungod sa mga kalamidad nga nakita niya sa tunga sang iya katawhan kag naglaum sang pagpang-ayo. Namangkot si Jeremias, “Wala na bala sing bulong sa Galaad; wala bala sing mga manugbulong didto?”2 Paagi sa literatura, musika, kag art, ang Manluluwas nga si Jesucristo masami ginatumod nga Bulong sang Galaad tungod sang iya tumalagsahon nga gahum sa pagpang-ayo. Pareho kay Jeremias, nagapamangkot ako, “Wala na bala sing bulong sa Galaad para sa pamilya Nielson?”
Sa Marcos kapitulo 2 sang Bag-ong Katipan, makita naton ang Manluluwas sa Capernaum. Ang balita parte sa nagapang-ayo nga gahum sang Manluluwas naglapta sa bilog nga kadutaan kag madamo nga mga tawo ang nagbiyahe pakadto sa Capernaun agud paayuhon sang Manluluwas. Tama kadamo sang mga nagtililipon sa palibot sang balay kon sa diin ang Manluluwas nga wala na sing lugar para mapasulod Niya tanan. Apat ka lalaki ang nagdala sang tawo nga paralitiko agud paayuhon sang Manluluwas. Indi na sila kasal-ot sa mga tawo, gani ginguhab nila ang atop sang balay kag gintunton ang tawo papanaog agud makita sang Manluluwas.
Samtang ginabasa ko ining panaysayon, nakibot ako sa ginsiling sang Manluluwas sang makita Niya ining tawo: “Anak ko, napatawad na ang imo mga sala.”3 Nahunahuna ko nga kon isa ako sa apat ka lalaki nga nagkarga sining tawo, mahimo nga nahambal ko sa Manluluwas, “Gindala namon sia diri para paayuhon.” Siguro nagsabat ang Manluluwas, “Gin-ayo ko na sia.” Posible ayhan nga wala ko lubos mahangpi—nga ang nagapang-ayo nga gahum sang Manluluwas indi lamang ang Iya ikasarang nga magpaayo sang aton kalawasan kundi, ayhan mas importante, ang Iya ikasarang sa pag-ayo sang aton mga tagipusuon kag sang ginasuboan nga mga tagipusuon sang akon pamilya?
Ang Manluluwas nagtudlo sang isa ka importante nga leksyon paagi sa sining eksperiyensya sang Iya gin-ayo sang ulihi ining tawo sa pisikal nga kabudlayan. Nangin maathag sa akon nga ang Iya mensahe amo nga sarang Niya tandugon ang mga mata sang mga bulag kag makakita sila. Sarang Niya tandugon ang mga dulunggan sang mga bungol, kag makabati sila. Sarang Niya tandugon ang mga tiil sang mga indi makalakat, kag makalakat sila. Sarang Niya ayuhon ang aton mga mata kag mga dulunggan kag aton mga batiis, pero pinakaimportante sa tanan, sarang Niya paayuhon ang aton mga tagipusuon samtang ginatinloan Niya kita sa sala kag ginaalsa kita sa tion sang mabudlay nga mga pagtilaw.
Sang magpakita ang Manluluwas sa katawhan sa Libro ni Mormon pagkatapos sang Iya Pagkabanhaw, naghambal Sia liwat parte sa Iya nagapang-ayo nga gahum. Nabatian sang mga Nefinhon ang Iya tingug halin sa langit nga nagasiling, “Indi bala kamo karon magbalik sa akon, kag maghinulsol sang inyo mga sala, kag mahaylo, agud nga mapaayo ko kamo?”4 Sang ulihi, ang Manluluwas nagtudlo, “Kay wala kamo makapakot nga basi magabalik sila kag magahinulsol, kag magakari sa akon nga may bug-os nga katuyuan sang tagipusuon, kag paayuhon ko sila.”5 Ang Manluluwas wala lamang nagatumod sa pisikal nga pag-ayo kundi lakip sa espirituhanon nga pag-ayo sang ila mga kalag.
Si Moroni nagahatag sang dugang nga pagpaintiendi samtang ginapaambit niya ang mga pulong sang iya amay, nga si Mormon. Pagkatapos nga maghambal parte sa mga milagro, si Mormon nagpaathag, “Kon kamo makaangkon sing pagtuo sa akon makaangkon kamo sing gahum sa paghimo sang bisan ano nga butang nga nagakaigo sa akon.”6 Natun-an ko nga ang sentro sang akon pagtuo dapat si Jesucristo kag nga kinahanglan ko nga batunon kon ano ang nagakaigo sa Iya panan-aw samtang nagagamit ako sang pagtuo sa Iya. Naintiendihan ko na karon nga ang pagtaliwan ni tatay nagakaigo sa plano sang Dios. Sa karon, kon ginatungtong ko ang akon mga kamot sa ulo sang isa ka tawo agud bendisyunan sia, ang akon pagtuo ara kay Jesucristo, kag nahangpan ko nga ang isa ka tawo sarang kag mahimo mag-ayo sa pisikal kon nagakaigo ini kay Cristo.
Ang Pagbayad-Sala sang Manluluwas, nga nagapatigayon sang pareho nagatubos kag nagapabakod Niya nga gahum, amo ang pinakamataas nga bugay nga ginatanyag ni Jesucristo sa tanan. Kon maghinulsol kita nga may bug-os nga katuyuan, ginatinloan kita sang Manluluwas gikan sa sala. Kon masinadyahon kita nga magpaubos sa pagbuot sang Amay, bisan sa pinakamabudlay nga sitwasyon, ang Manluluwas magaalsa sang aton mga kabudlayan kag himuon ini nga mamag-an.7
Pero ari ang mas dako nga leksyon nga akon natun-an. Nagsayop ako sa pagpati nga ang nagapang-ayo nga gahum sang Manluluwas wala nag-epekto sa akon pamilya. Karon samtang ginabinagbinag ko ang nagligad nga may mas masangkad nga paghangop kag eksperiyensya, narealisar ko nga ang nagapang-ayo nga gahum sang Manluluwas makita sa mga kabuhi sang tagsa ka miyembro sang akon pamilya. Nagtutok lamang ako sa pisikal nga pag-ayo nga wala ko matalupangdi ang mga milagro nga nagkalatabo. Ang Ginuo nagpabakod kag nag-alsa sang akon iloy masobra sa iya masarangan sa sining mabudlay nga pagtilaw, kag nagkabuhi sia sing malawig kag produktibo. May dalayawon sia nga positibo nga impluwensya sa iya kabataan kag mga apo. Kami sang akon kauturan ginbugayan sang Ginuo sang pagpalangga, pag-isa, pagtuo, kag kabakod nga nangin importante nga bahin sang amon mga kabuhi kag nagapadayon tubtob karon.
Pero paano si tatay? Pareho sa tanan nga magahinulsol, ginpaayo sia sa espirituhanon samtang iya ginhandum kag nabaton ang mga bugay nga sarang matigayon tungod sang Pagbayad-Sala sang Manluluwas. Nakabaton sia sang kapatawaran sang iya mga sala kag karon nagahulat sang milagro sang Pagkabanhaw. Si Apostoles Pablo nagtudlo: “Kay subong nga kay Adan ang tanan nagakalamatay, amo man kay Cristo ang tanan buhion.”8 Nakita ninyo, ginsilingan ko ang Manluluwas, “Gindala namon si tatay sa imo para mag-ayo,” kag karon klaro sa akon nga gin-ayo sia matuod sang Manluluwas. Ang bulong sang Galaad nag-epekto sa pamilya Nielson—indi sa paagi nga amon ginpaabot, kundi sa mas dako nga paagi nga nagbugay kag padayon nga nagabugay sa amon mga kabuhi.
Sa Juan kapitulo 6 sang Bag-ong Katipan, ginbuhat sang Manluluwas ang pinakadalayawon nga milagro. Nga may pila lamang ka isda kag pila ka bilog nga tinapay, ginpakaon sang Manluluwas ang 5,000 ka tawo. Nabasa ko ining panaysayon sing madamo nga beses, pero may isa ka parte sinang eksperiyensya nga wala ko mamutiki nga karon dako kaayo ang kahulugan para sa akon. Pagkatapos nga ginpakaon sang Manluluwas ang 5,000 ka tawo, ginpangabay Niya ang Iya mga disipulo nga tipunon ang mga tinipik, ang bilin, nga nagpuno sang 12 ka basket. Natingala ako kon ngaa ginhatagan sang Manluluwas sang tiyempo nga himuon ina. Nangin klaro sa akon nga isa ka leksyon nga mahimo naton matun-an sa sina nga hitabo amo ini: Sarang Niya pakan-on ang 5,000 kag may mga sobra pa. “Ang akon grasya igo para sa tanan nga mga tawo.”9 Ang nagatubos kag nagapang-ayo nga gahum sang Manluluwas makasakop sang bisan ano nga sala, pilas, ukon pagtilaw —bisan ano pa kadako ukon kabudlay—kag may mga sobra pa. Bastante ang Iya grasya.
Upod ang ina nga ihibalo, makaabante kita nga may pagtuo, nga nakahibalo nga kon mag-abot ang kabudlayan—kag sigurado gid ina—ukon kon nalikupan sang sala ang aton mga kabuhi, ang Manluluwas nagatindog nga may “pag-ayo sa iya mga pakpak,”10 nga nagahagad sa aton nga magpalapit sa Iya.
Nagapamatuod ako sa inyo sang Bulong sang Galaad, ang Manluluwas nga si Jesucristo, ang aton Manunubos, kag sang Iya dalayawon nga nagapang-ayo nga gahum. Nagapamatuod ako sang Iya handum nga paayuhon kamo. Sa ngalan ni Jesucristo, amen.