Ang Mas Mangin-Isa kay Cristo: Ang Paanggid sang Slope
Sa tiyempo sang Dios, indi ang kon diin kita nag-umpisa kundi kon diin kita nagapadulong ang labing importante.
Bilang isa ka bata, dalagko ang akon mga handum. Isa ka adlaw pagbuhi sa eskwelahan, nagpamangkot ako, “Nay, anong kuhaon ko pagdako ko: mangin propesyunal nga basketbolista ukon rakista?” Sa masubo nga palad, si Clark “ang abilidaran nga wala ngipon” wala nagapakita sang mga senyales nga mangin atleta ukon hilig sa musika. Kag bisan kapila na magpaninguha, sulit-sulit ako nga wala mabaton sa abanse nga programa pang-akademiko sa akon eskwelahan. Sang ulihi nagpanugyan ang akon mga manunudlo nga magpadayon na lang ako sa regular nga klasehan. Sa kadugayan, nakaangkon ako sing makabulig nga mga gawi sa pagtuon. Pero sang magmisyon lang ako sa Japan sang pamatyag ko ang akon intelektwal kag espiritwal nga mga ikasarang nagsugod nga maggwa. Nagpadayon ako sa pagtinguha sing todo. Apang sa unang higayon sang akon kabuhi, sige-sige ko nga ginlakip ang Ginuo sa akon pag-uswag, kag nakita gid ang maayo nga resulta sini.
Mga kauturan, sa sining Simbahan, nagapati kita sa diosnon nga potensyal sang tanan mga anak sang Dios kag sa aton ikasarang nga mag-uswag sing labi sa pagsunod kay Cristo. Sa tiyempo sang Dios, indi ang kon diin kita nag-umpisa kundi kon diin kita nagapadulong ang labing importante.1
Agud ipakita ining prinsipyo, magagamit ako sang simple nga matematika. Karon, indi kamo mataranta sa pagkabati sang tinaga nga matematika sa pangkabilogan nga komperensya. Ang aton mga manunudlo sang matematika sang BYU-Idaho nagpasalig sa akon nga bisan bag-uhan sarang makahangop sining importante nga konsepto. Nagasugod ini sa isa ka pormula bilang linya. Ang intercept, para sa aton mga katuyoan, amo ang puno sang aton linya. Ang intercept pwede nga magsugod nga mataas ukon manubo. Ang slope sang linya mahimo nga nagapasaka ukon nagapanaog.
Tanan kita may nagkalainlain nga mga intercept sa kabuhi—nagaumpisa kita sa lainlain nga halintang nga may nagkalainlain nga mga ikasarang sa kabuhi. Ang iban natawo nga may mataas nga mga intercept, puno sang oportunidad. Ang iban nagaatubang sang panugod nga makahalangkat kag dawsa indi-patas.2 Dayon nagaabante kita sa slope sang personal nga pag-uswag. Ang aton palaabuton mapat-od indi sa kon diin kita nag-umpisa kundi sang aton slope [direksyon]. Nakita ni Jesucristo ang aton diosnon nga potensyal bisan diin kita mag-umpisa. Nakita Niya ini sa imol, sa makasasala, kag sa mahuyang. Nakita Niya ini sa mangingisda, sa manugsukot sang buhis, kag bisan sa panatiko. Bisan diin kita mag-umpisa, ginakonsiderar ni Jesucristo kon ano ang aton ginhimo sa ginhatag sa aton.3 Kon ang kalibutan nagatutok sa aton intercept [ginsugdan], ang Dios nagatutok sa aton slope [direksyon]. Sa calculus sang Ginuo, Iya himuon ang tanan agud buligan kita nga ituon ang aton mga slope pa-langit.
Ini nga prinsipyo dapat magpaumpaw sa mga ginabudlayan, kag magpabinagbinag sa mga daw ara sa ila ang tanan nga bentaha. Pasugura ako sa paghambal sa mga indibidwal nga may mabudlay nga mga sirkumstansya sa umpisa, lakip ang kapigaduhon, limitado nga ikasarang sa edukasyon, kag mabudlay nga mga sitwasyon sang pamilya. Ang iban may pisikal nga mga kasablagan, may problema sa kaisipan, ukon may napanubli nga balatian.4 Sa bisan sin-o nga may mabudlay nga ginsugoran, palihog hibal-a nga ang Manluluwas nakahibalo sang aton mga pagpangabudlay. Dalhon Niya “sa Iya kaugalingon ang [aton] mga kahuyang, agud ang iya tagipusuon [mahimo] mapuno sang kaawa, … agud [mahimo] niya mahibal-an … kon paano magtabang sa [aton] suno sa [aton] mga kahuyangan.”5
Tuguti ako sa pagpaambit sang duha ka aspeto sang pagpaisog sa mga nagaatubang sing mabudlay nga mga sirkumstansya sa umpisa. Una, magtutok kon sa diin kamo pakadto kag indi sa kon diin kamo nagsugod. Indi husto nga bale-walaon ninyo ang inyo mga sirkumstansya—matuodtuod ang mga ini kag kinahanglan solusyonan. Apang ang sobra nga pagtutok sa mabudlay nga sitwasyon sang pag-umpisa makaapekto sa inyo kag magalimita pa gani sang inyo ikasarang sa pagpili.6
Mga tinuig ang nagligad nagserbisyo ako sa mga lamharon sa sentro sang siyudad sang Boston, Massachusetts, nga ang kalabanan bag-o sa ebanghelyo kag sa mga ginalauman sang Simbahan. Daw matentar ako tungod naintiendihan ko kag nabalaka sa ila sitwasyon daw gusto ko nga panuboan ang mga talaksan sang Dios.7 Narealisar ko sang ulihi nga ang pinakamaayo nga paagi agud ipakita ang akon pagpalangga amo nga indi pagpanubuon ang akon mga ginalauman sa ila. Gamit ang tanan ko nga nahibal-an nga himuon, ululupod namon nga gintutokan ang ila potensyal, kag ang tagsa sa ila nagsugod sa pagsaka sa ila mga slope. Ang ila pagtubo sa ebanghelyo amat-amat pero sige-sige. Sa karon nakamisyon na sila, nakatapos na sa kolehiyo, nakasal na sa templo, kag nagapangabuhi sing dalayawon sa personal kag sa trabaho.
Ikaduha, ilakip ang Ginuo sa proseso sang pagpataas sang inyo slope. Samtang nagaserbisyo bilang pangulo sang BYU–Pathway Worldwide, akon madumduman nga nagatambong sa isa ka dako nga debosyunal sa Lima, Peru, sa diin si Elder Carlos A. Godoy amo ang manughambal. Sang iya gintan-aw ang kongregasyon, dawsa nahalawhaw sia nga nakita ang sa kadamo nga mga matinuohon nga mga unang-henerasyon sang mga estudyante sang unibersidad. Ayhan nagapulopamensar sang iya kaugalingon nga dalanon sa sinang mabudlay nga mga sirkumstansya, si Elder Godoy emosyunal nga nagsiling: ang Ginuo “magabulig sa inyo labaw pa sangsa inyo mabulig sa inyo kaugalingon. [Gani] ilakip ang Ginuo sa sini nga proseso.”8 Ang propeta nga si Nefi nagtudlo “paagi sa grasya kita naluwas, pagkatapos sang tanan nga aton mahimo.”9 Kinahanglan himuon naton ang aton pinakamaayo,10 nga nagalakip sang paghinulsol, apang paagi lamang sa grasya sang Ginuo nga aton malab-ot ang aton diosnon nga potensyal.11
Sa katapusan, tuguti ako nga ipaambit ang duha ka bahin sang laygay sa ila nga may maayo nga sitwasyon sang pag-umpisa. Una, sarang bala kita magpakita sang pagpaubos sa sirkumstansya nga indi man kita ang may kahimoan? Sa ginsambit sang anay pangulo sang BYU nga si Rex E. Lee sa iya mga estudyante, “Nag-inom kita sa mga bubon nga indi kita ang nagkutkot kag nagpainit sa kalayo nga indi kita ang nagdabok.”12 Nagpanawagan dayon sia sa iya mga estudyante nga balosan kag ulian ang mga bubon sang edukasyon nga gintukod sang nauna nga mga pionero. Ang pagkapaslaw sa pagbalik sang imo gin-ani nga tinamnan sang iban daw pareho lang sang pag-uli sang talanton nga wala sing tubo.
Ikaduha, ang pagtutok sa mataas nga ginsuguran masami nga nagasiod sa aton nga magbatyag nga nagasanyog kita bisan sa pagkamatuod ang aton espirituhanon nga direksyon wala sing pag-uswag. Ang propesor sang Harvard nga si Clayton M. Christensen nagtudlo nga ang pinakamadinalag-on nga mga tawo amo ang pinakamapainubuson tungod kompiyansa sila nga tadlungon kag tudloan sang bisan sin-o.13 Si Elder D. Todd Christofferson naglaygay sa aton nga “kinabubut-on nga [magpangita sang mga paagi] nga batunon kag bisan pa gani mangita sang koreksyon.”14 Bisan kon ang lakat sang kabuhi daw maayo, dapat kita magpangita sang mga oportunidad sa pag-uswag paagi sa mapinangamuyuon nga pagpangabay.
Wala sapayan kon mag-umpisa kita sa bastante ukon mabudlay nga mga sirkumstansya, malab-ot lamang naton ang aton pinakamataas nga kadangatan kon himuon naton nga katuwang ang Dios. Nakapakighambal ako sang sini lang sa isa ka bantog nga manunudlo sa pungsod nga nagapamangkot parte sa kadalag-an sang BYU–Pathway. Maalam sia kag ang iya pamangkot sinsero, apang maathag nga luyag niya sang sekular nga sabat. Gin-istorya ko sa iya ang aton mga programa sa pagtipig sang estudyante kag mga pagpaninguha sa pag-mentor. Apang gintapos ko sa pagsiling “Maayo ini tanan nga mga kagawian, apang ang matuod nga rason nga ang amon mga estudyande nagauswag amo nga amon sila ginatudloan sang ila diosnon nga potensyal. Pamensara bala nga sa bilog mo nga kabuhi, ginhambalan ka nga indi ka gid mag-uswag. Dayon binagbinaga ang imo mabatyagan nga matudloan nga isa ikaw ka literal nga anak sang Dios nga may diosnon nga kadangatan?” Nagpundo sia, kag simple lang nga nagsabat, “Mabaskog matuod.”
Mga kauturan ko, isa sang mga milagro sining Simbahan sang Ginuo, amo nga ang tagsa sa aton sarang mag-uswag sing labi sa pagsunod kay Cristo. Wala na ako sang nahibal-an nga iban pa nga organisasyon nga nagahatag sa iya mga miyembro sang mas madamo nga oportunidad sa pag-alagad, pagbalos sa kaayo, paghinulsol, kag mangin mas maayo nga mga tawo. Bisan magsugod kita sa bugana ukon sa mabudlay nga mga sirkumstansya, magpadayon kita nga ang aton handum kag ang aton slope nagapasaka pa-langit. Kon himuon naton ini, alsahon kita ni Cristo sa mas mataas nga lugar. Sa ngalan ni Jesucristo, amen.